Bai na kontenido

Bai na kontenido

 NOS LEKTORNAN TA PUNTRA . . .

Dikon Beibel No Ta Menshoná Nòmber di Tur Personahe Bíbliko?

Dikon Beibel No Ta Menshoná Nòmber di Tur Personahe Bíbliko?

E buki bíbliko di Rut ta yama un hòmber ku a nenga di hasi loke e Lei di Moises ta bisa: Amigu. (Rut 4:1-12) Nos mester konkluí ku tur personahe ku Beibel no ta menshoná nan nòmber ta mal hende òf no ta hende importante?

Nò! Laga nos wak un otro ehèmpel. Pa prepará pa e último sena di Pasku Hudiu, Hesus a bisa su disipelnan pa “bai den stat serka tal i tal hende” i prepará tur kos na kas di e persona ei. (Mateo 26:18) Nos tin ku konkluí ku e hòmber ku Hesus a referí na dje komo “tal i tal hende” den e versíkulo akí tabata un mal hende? Òf ku e no tabata un hende dje importante ei pa menshoná su nòmber? Di ningun manera, pasobra e “tal i tal hende” ei sin duda tabata un disipel di Hesus. Pero Hesus no a menshoná su nòmber, pasobra esaki no tabata esensial pa e relato akí.

Es mas, Beibel ta menshoná nòmber di hopi hende malbado, pero e ta referí tambe na hopi hende fiel kende nan nòmber no ta ser menshoná. Por ehèmpel, e nòmber Eva, e promé hende muhé, ta masha konosí maske su egoismo i desobedensia a kontribuí na e piká di Adam, loke tabatin konsekuensia teribel pa nos tur. (Romanonan 5:12) Kontrali na esei, Beibel no ta menshoná e nòmber di e esposa di Noe, aunke el a sostené su esposo Noe den su trabou importante na un manera inegoista i obediente. Ta klaru ku e echo ku no a menshoná su nòmber no ta nifiká ku e tabata insignifikante òf ku e no tabatin e aprobashon di Dios.

Tin otro personanan ku Beibel no ta menshoná nan nòmber pero ku a hunga un papel importante den e propósito di Yehova. Pensa un ratu riba e ehèmpel di e hobensita israelita ku tabata un esklabo den kas di Naman, un hefe di ehérsito di Siria. Yen di kurashi el a papia ku su doño, e esposa di Naman, tokante e profeta di Yehova kende tabata na Israel. Komo resultado, un milager grandi a sosodé. (2 Reinan 5:1-14) E yu muhé di e hues Yefta tambe a pone un ehèmpel sobresaliente di fe. El a keda sin kasa i sin haña yu pa e por a kumpli ku un promesa ku su tata a hasi; el a hasi esaki di buena gana. (Huesnan 11:30-40) Ademas, tin eskritornan di mas ku 40 salmo i tambe profetanan ku a kumpli fielmente ku asignashonnan importante ku Beibel no ta menshoná nan nòmber.1 Reinan 20:37-43.

Pero un ehèmpel ku ta asta mas impreshonante ta esun di e angelnan fiel. Tin miónes i miónes di angel, pero Beibel ta menshoná nòmber di dos di nan so, esta, Gabriel i Miguel. (Daniel 7:10; Lukas 1:19; Hudas 9) E Palabra di Dios no ta menshoná nòmber di ningun di e otro angelnan. Por ehèmpel, Manoa, e tata di Sámson, a puntra un angel: “Kon bo nòmber ta, pa ora bo palabranan wòrdu kumplí nos por duna bo onor?” E angel a bis’é: “Pakiko bo ta puntra mi nòmber.” E angel a mustra humildat i a keda sin aseptá e onor ku Dios so ta meresé.Huesnan 13:17, 18.

Beibel no ta splika dikon nòmber di algun personahe sí ta ser menshoná i di otronan nò. Pero, nos por siña hopi for di personanan fiel ku a sirbi Dios sin ku nan a spera di haña fama òf prominensia.