Bai na kontenido

Bai na kontenido

 UN KÒMBERSASHON INTERESANTE TOKANTE BEIBEL

Dios Ta Sinti Duele Ora E Mira Nos Sufri?

Dios Ta Sinti Duele Ora E Mira Nos Sufri?

Pa bo haña un idea kon Testigunan di Yehova ta kòmbersá ku hende, tuma nota di e siguiente diálogo. Imaginá ku Migarda, un Testigu, ta yama na kas di señora Sonia.

DIKON E TA LAGA E KOSNAN AKÍ PASA?

Migarda: Bon dia señora. Awe mi ta parti un tratado pa tur hende aki banda. Su tema ta Bo Ke Haña Sa e Bèrdat? Ata esun di señora akí.

Sonia: Ta tokante religion?

Migarda: Sí, señora. Djis tira un bista riba e seis preguntanan ku tin riba e portada. Kua di nan. . . ?

Sonia: Bo sa señora, mihó bo no sigui. Ta bo tempu bo ta pèrdè.

Migarda: Dikon señora ta bisa asina?

Sonia: E kos ta ku mi no ta kere ku Dios ta eksistí.

Migarda: Mi ta kontentu ku señora ta franko ku mi. Pero ta semper señora a pensa asina?

Sonia: Nò, mi a lanta ta bai misa. Pero masha ten mi a stòp di bai.

Migarda: Mi ta komprondé pa señora. Promé ku mi lubidá, laga mi introdusí mi mes. Mi nòmber ta Migarda.

Sonia: Ami ta Sonia.

Migarda: Mi ta kontentu di por konosé bo, Sonia.

Sonia: Igualmente.

Migarda: Sonia, mi no a bini aki pa imponé mi kreensianan riba bo. Pero mi por puntra bo si tin algu en partikular ku a pone bo kuminsá duda si Dios ta eksistí?

Sonia: Sí. Diesshete aña pasá mi mama tabata enbolbí den un aksidente di outo.

Migarda: Esei ta duel mi hopi. Anto el a haña sla?

Sonia: Sí, el a keda paralítiko.

Migarda: No bisa mi! Esta tristu no, lo bo ta hopi kibrá.

Sonia: Konpolaga, tur ora mi ta puntra mi mes: ‘Si ta eksistí un Dios, dikon e ta laga kosnan asina pasa? Dikon e ta laga nos sufri asin’akí?

TA MALU PA KUESTIONÁ DIOS?

Migarda: Sonia, no sinti bo malu ku bo ta hasi e preguntanan ei. Ora nos ta sufri, ta normal ku nos ke sa e motibu. De echo, asta algun personahe fiel den Beibel a hasi esei.

Sonia: Bèrdat?

Migarda: Sigur ku sí! Lo bo ke pa mi mustra bo un ehèmpel?

Sonia: Klaru.

Migarda: Mira kiko profeta Habakuk a puntra Dios. Laga nos lesa kapítulo 1, versíkulo 2 i 3 di su buki: “Te ki tempu, o SEÑOR, lo mi sklama pa yudansa, i abo no ta tende? Mi ta sklama na bo: ‘Violensia!’ Tòg bo no ta salba. Pakiko bo ta hasi mi mira inikidat?” Bo no ta haña ku e preguntanan akí ta parse esnan ku abo a hasi?

Sonia: Sí.

Migarda: Sonia, bo sa, nunka Dios no a skual Habakuk pa e preguntanan ku el a hasi ni e no a bis’é ku e mester tin mas fe.

Sonia: Interesante.

YEHOVA NO GUSTA MIRA NOS SUFRI

Migarda: Beibel ta siña nos ku Dios sa di tur nos sufrimentu i ku e no ta sera wowo pa esei.

Sonia: Kon bo ke men?

Migarda: Laga mi mustra bo un ehèmpel na Éksodo 3:7. Bo por les’é pa mi?

 Sonia: Ta bon. E ta bisa: “SEÑOR a bisa: ‘Siguramente mi a mira e aflikshon di mi pueblo ku ta na Egipto, i [mi] a tende nan sklamashon pa motibu di nan kapatasnan, pasobra mi ta konsiente di nan sufrimentunan.’”

Migarda: Danki Sonia. Segun e teksto, Dios ta mira ora hende ta sufri?

Sonia: Ta parse ku sí.

Migarda: Anto ripará ku no ta djis un bista e ta tira. Wak e último parti di e teksto. Dios a bisa: “Mi ta konsiente di nan sufrimentunan.” Sonia, un Dios indiferente lo bisa e palabranan ei?

Sonia: Niun ora so.

Migarda: Klaru ku tin un gran diferensia entre mira un hende sufri i sinti duele ora bo mir’é sufri.

Sonia: Bèrdè.

Migarda: Ku esei na mente, laga nos lesa di un otro okashon ora e pueblo di Dios tabata sufri. E ta skirbí na Isaías 63:9. E promé parti di e versíkulo ta bisa: “Den tur nan aflikshon e tabata afligí.” Sonia, nos por bisa ku Dios a sinti duele ora el a mira su pueblo sufri?

Sonia: Sí, ta parse ku sí.

Migarda: Pues Sonia, echo ta ku Dios ta masha interesá den nos i e no gusta mira nos sufri. Ora nos ta sufri, e ta sufri samsam ku nos.

DIKON E NO TA HASI NADA?

Migarda: Sonia, promé ku mi bai, mi ke kompartí algu mas ku bo.

Sonia: Dal bai.

Migarda: Wak kiko Beibel ta siña nos tokante e poder di Dios. Bo por lesa Yeremías 10:12?

Sonia: Sigur no! E ta bisa: “Ta é a traha tera ku su poder, el a establesé mundu ku su sabiduria; i ku su konosementu el a span e shelunan.”

Migarda: Danki Sonia. Laga nos analisá e versíkulo akí un ratu. Kuantu poder bo ta kere Dios lo mester tabatin pa krea nos enorme universo i tur loke tin den dje?

Sonia: Masha hopi poder.

Migarda: Awor, si Dios tin asina tantu poder ku e por a krea tur loke tin rònt di nos, no ta lógiko ku e tin poder pa kontrolá tambe loke el a krea?

Sonia: Ta klaru.

Migarda: Pensa atrobe riba bo mama. Dikon ta duel bo asina tantu pa mir’é sufri?

Sonia: Pasobra mi stim’é, ta mi mama e ta.

Migarda: Si bo tabatin poder pa kur’é, lo bo no hasié?

Sonia: Sin pensa dos bes.

Migarda: Pensa riba esaki awor: E tekstonan ku nos a lesa den Beibel a mustra nos ku Dios ta sinti duele ora e mira nos sufri i ku e tin poder pa kaba mesora ku nos sufrimentunan. Pero el a dominá su mes pa no hasi esei. Bo por imaginá kuantu esfuerso e tin ku hasi?

Sonia: Nunka mi no a mir’é di e manera ei.

Migarda: Pero dikon Dios mester a dominá su mes? Tin un bon motibu dikon e no a kaba ku nos problemanan? *

Sonia: Mmm, mi ta kere ku lo e mester tin.

Migarda: Mi ta tende bo telefòn ta rin, pues lo mi bini bèk un otro biaha i nos por papia mas aleu riba e tema akí.

Sonia: Awèl, ta bon. Mi ta warda bo. *

Tin un tópiko di Beibel en partikular ku bo tin gana di sa mas di dje? Bo ta hopi interesá pa sa mas di e kreensianan i práktikanan religioso di Testigunan di Yehova? Si esei ta e kaso, no duda pa bisa un Testigu esei. Lo e ta kontentu pa konsiderá eseinan ku bo.

^ par. 61 Pa mas informashon, wak kapítulo 11 di e buki Kiko Beibel Ta Siña Realmente? publiká pa Testigunan di Yehova.

^ par. 64 Den un próksimo artíkulo di e seri akí, nos lo trata dikon Dios ta permití sufrimentu.