Bai na kontenido

Bai na kontenido

Moises—Un Hòmber Humilde

Moises—Un Hòmber Humilde

KIKO TA NIFIKÁ SER HUMILDE?

Un persona humilde no ta arogante ni orguyoso. E no ta sinti ku e ta mas ku otro hende. Un hende imperfekto ku ta humilde mester ta modesto tambe, esta, konsiente di su limitashonnan.

KON MOISES A DEMOSTRÁ HUMILDAT?

Moises no a laga e echo ku e tabatin outoridat susha su kabes. Hopi biaha, ora un hende risibí outoridat, ta bira bisto mashá lihé si e ta humilde òf nò. Robert G. Ingersoll, un eskritor di siglo 19, a bisa: “Si bo ke sa ken un hende ta realmente, dun’é poder.” Den e sentido ei, Moises a pone un ekselente ehèmpel di humildat. Kon asina?

Moises a risibí gran outoridat, ya ku Yehova a dun’é e enkargo pa guia e nashon di Israel. Ma e poder ei nunka a hasi Moises orguyoso. Wak por ehèmpel e modestia ku el a demostrá ora el a trata un pregunta difísil tokante derecho di herensia. (Numbernan 27:1-11) Tabata trata di un asuntu di peso, ya ku su kontesta lo a establesé un base legal pa atendé futuro kasonan similar.

Kon Moises lo a reakshoná? Akaso el a pensa ku komo lider di Israel, e tabata sa presis ki desishon e mester a tuma den e asuntu akí? E por a konfia den su mes abilidatnan, su añanan di eksperensia òf e konosementu profundo ku e tabatin di Yehova su manera di pensa.

Podisé un hende orguyoso lo a hasi esei, pero no Moises! Beibel ta bisa: “Moises a hiba [e] kaso dilanti di SEÑOR.” (Numbernan 27:5) Imaginá bo! Maske Moises tabatin 40 aña kaba ta guia e nashon di Israel, tòg e no a dependé riba su mes, sino riba Yehova. Pues, nos ta mira bon kla ku Moises tabata un hòmber humilde.

Moises no a pensa ku ta e so mester tabatin outoridat. El a keda masha kontentu ora Yehova a permití otro israelita tambe bira profeta. (Numbernan 11:24-29) Ora su suegro a sugerié pa e skohe algun hòmber ku por a yud’é ku su trabou, humildemente el a aseptá e konseho. (Éksodo 18:13-24) Anto ora Moises tabata hopi grandi kaba, aunke e tabata fuerte ainda, el a pidi Yehova pa nombra un susesor. Ora Yehova a skohe Hosue pa remplas’é, di kurason Moises a apoyá e hòmber mas yòn akí, i el a papia seriamente ku e pueblo pa sigui e guia di Hosue pa drenta e Tera Primintí. (Numbernan 27:15-18; Deuteronomio 31:3-6; 34:7) Pa Moises, tabata un gran privilegio di por a guia e israelitanan den nan adorashon na Yehova. Pero, e no a usa su outoridat sin tene kuenta ku e bienestar di otro hende.

KI LÈS NOS POR SIÑA?

Nos lo no ke laga poder, outoridat ni abilidat natural susha nos kabes. Kòrda: Pa nos por ta útil pa Yehova, nos humildat semper ta mas importante ku kualke abilidat ku nos por tin. (1 Samuel 15:17) Si di bèrdat nos ta humilde, nos lo hasi esfuerso pa apliká Beibel su konseho sabí: “Konfia den SEÑOR ku henter bo kurason, i no dependé riba bo mes komprondementu.”—Proverbionan 3:5, 6.

E ehèmpel di Moises ta siña nos tambe pa no pone demasiado énfasis riba nos posishon òf outoridat.

Ta bale la pena pa nos imitá su ehèmpel di humildat? Sigur ku sí! Ora nos ta berdaderamente humilde, nos ta hasi bida di e hendenan rònt di nos mas fásil, i nos ta gana nan kariño. Mas importante ainda, nos ta kai na agrado di Yehova Dios, kende tambe ta demostrá e bunita kualidat akí. (Salmo 18:35NW) “Dios ta oponé hende orguyoso, ma e ta duna bondat inmeresí na hende humilde.” (1 Pedro 5:5) Ki un bon motibu pa imitá e humildat di Moises!