Bai na kontenido

Bai na kontenido

E Reino di Dios Tin 100 Aña Ta Goberná

E Reino di Dios Tin 100 Aña Ta Goberná

“[Ku] e Dios di pas . . . ekipá boso ku tur kos bon pa hasi su boluntat.”—HEB. 13:20, 21.

KANTIKA: 136, 14

1. Kon importante e trabou di prediká tabata pa Hesus? Splika.

HESUS tabata gusta papia tokante e Reino di Dios. Segun Beibel, el a papia mas tokante e Reino ku tokante kualke otro tema. Durante su sirbishi, el a referí mas ku 100 biaha na e Reino. Sí, e Reino tabatin un lugá spesial den su kurason.—Lesa Mateo 12:34.

2. Kuantu hende kisas tabata presente ora Hesus a duna e mandato na Mateo 28:19 i 20, i kon nos por sa esei?

2 Un poko despues di su resurekshon, Hesus a reuní ku mas ku 500 hende ku lo por a bira su disipel. (1 Kor. 15:6) Kisas ta na e momento ei el a duna e mandato pa hiba e mensahe di Reino na “hende di tur nashon.” Pa e tempu ei, esei tabata un trabou inmenso. * Hesus a profetisá ku e trabou di prediká lo a sigui pa un tempu largu, esta, “te na konklushon di e era.” P’esei, ora bo ta partisipá den e trabou di prediká awe, bo  tambe ta yuda kumpli ku e profesia ei.—Mat. 28:19, 20.

3. Menshoná tres kos ku Dios a ekipá nos kuné pa yuda nos prediká e bon notisia.

3 Despues ku Hesus a duna e mandato pa bai prediká, el a primintí su siguidónan: “Mi ta ku boso.” (Mat. 28:20) Pues, ta Hesus mes lo a dirigí e inmenso trabou di prediká akí. I nos Dios a ekipá nos ku “tur kos bon” pa yuda nos kumpli ku e mandato ei. (Heb. 13:20, 21) Den e artíkulo akí, nos lo trata tres di e bon kosnan ei: (1) nos hèrmèntnan, (2) nos métodonan i (3) nos entrenamentu. Promé, laga nos wak algun di e hèrmèntnan ku nos a usa durante e último 100 añanan.

E HÈRMÈNTNAN KU E REI A DUNA PA PREDIKÁ E REINO

4. Dikon nos ta usa diferente tipo di hèrmènt den nos trabou di prediká?

4 Hesus a kompará e mensahe di Reino ku simia ku ta ser sembrá i ku ta kai den diferente tipo di tera. (Mat. 13:18, 19) Un hardinero por usa diferente tipo di hèrmènt pa prepará su hardin pa e planta simia. Asina tambe, atraves di añanan, nos Rei a duna nos vários hèrmènt ku nos por a usa pa prepará kurason di miónes di hende pa risibí e mensahe di Reino. Algun hèrmènt kisas tabata útil pa un dékada so, miéntras ku otronan ta útil ainda. No opstante, tur e hèrmèntnan akí, di un òf otro manera, a yuda nos mehorá nos manera di prediká.

5. Kiko e karchi di testimonio tabata, i kon nos tabata us’é?

5 Un hèrmènt ku a yuda hopi ruman kuminsá prediká tabata e karchi di testimonio ku e publikadónan di Reino a kuminsá usa na aña 1933. E tabata un karchi di mas o ménos 7 pa 12 centimeter ku tabata kontené un mensahe bíbliko kòrtiku. De bes en kuando tabata sali un karchi nobo ku mensahe nobo. E presentashon tabata simpel. Ruman C. W. Erlenmeyer tabatin mas o ménos dies aña ora el a kuminsá usa e karchi di testimonio pa prediká. El a konta: “Nos tabata usa e siguiente introdukshon: ‘Bo por lesa e karchi akí por fabor?’ Despues ku e doño di kas lesa e karchi, nos tabata ofres’é literatura i bai.”

6. Kon e karchi di testimonio a yuda e publikadónan?

6 E karchi di testimonio a yuda nos publikadónan den vários manera. Algun publikadó tabatin hopi gana di partisipá den e trabou di prediká, pero nan tabata tímido i no tabata sa kiko pa bisa. Otronan tabatin hopi di bisa; nan tabata bisa e doño di kas tur loke nan tabata sa den un par di minüt i nan presentashon no semper tabata ku takto. En kambio, e karchi di testimonio, ku tabata papia pa e publikadó, tabata kontené palabranan simpel i bon skohí.

7. Ki desafio algun ruman a haña nan kuné usando e karchinan?

7 Klaru ku e método akí tabatin su desafionan. Grace A. Estep, kende ta un Testigu pa hopi aña, ta konta: “Tin ora e hendenan tabata puntra nos: ‘Wèl, kiko e karchi ta bisa? Bo mes no por djis bisa mi?’” I tabatin doño di kas ku no por a lesa. Otronan tabata tuma e karchi i sera porta pasobra nan a kere ku e karchi tabata pa nan. Tabatin tambe doño di kas ku tabata asina kontra ku nan tabata kibra e karchi na pida pida. Apesar di tur esaki, e karchinan a yuda nos rumannan aserká hende, duna testimonio i identifiká nan mes abiertamente komo representante di e Reino.

8. Splika kon nos rumannan tabata usa tokadisko portátil. (Wak e promé plachi.)

8 Un otro hèrmènt ku nos rumannan  tabata usa durante e dékada di 1930 i na kuminsamentu di e dékada di 1940 tabata tokadisko portátil. Algun ruman tabata yama nan tokadisko portátil Aron pasobra e tabata papia pa nan. (Lesa Éksodo 4:14-16.) Ku pèrmit di e doño di kas, e publikadó tabata pone un diskurso bíbliko di kuater minüt i mei, i despues e tabata ofresé algun literatura. Tabatin biaha, henter famia tabata bini huntu pa skucha grabashon di un diskurso. Na 1934, Sosiedat Watch Tower a kuminsá traha tokadisko portátil spesialmente pa e trabou di prediká. Ku tempu, e rumannan a graba mas ku 92 diskurso.

9. Kon efikas tokadisko portátil tabata?

9 Despues di a skucha un di e diskursonan ei, un hòmber ku yama Hillary Goslin a pidi e publikadó fi’é e tokadisko pa un siman pa asina e por a laga su bisiñanan tambe skucha e mensahe di Reino. Ora e publikadó a bini bèk, el a haña vários persona interesá ku tabata ward’é. Ku tempu, vários di nan a dediká nan bida na Yehova i batisá. Mas despues, Hillary su dos yu muhénan a asistí na e Skol di Galaad i a haña asignashon pa bai sirbi na otro pais. Meskos ku e karchinan di testimonio, tokadisko portátil a yuda hopi publikadó kuminsá prediká. Despues, e Rei a kuminsá siña su pueblo mediante e Skol di Ministerio Teokrátiko pa nan bira maestronan efikas.

NOS TA USA VÁRIOS MÉTODO POSIBEL PA ALKANSÁ HENDE

10, 11. Kon nos rumannan a usa korant i radio pa plama bèrdatnan bíbliko, i dikon e métodonan akí tabata efikas?

10 Bou di guia di nos Rei, e pueblo di Dios a usa diferente método pa alkansá mas tantu hende posibel ku e bon notisia. E métodonan akí tabata masha importante, foral tempu ku e trahadónan tabata poko. (Lesa Mateo 9:37.) Na komienso di siglo 20, a usa korant pa alkansá un públiko grandi den áreanan kaminda no tabatin hopi Testigu di Yehova. Tur siman, Charles Taze Russell tabata manda un diskurso bíbliko pa un agensia di prensa. E agensia akí tabata manda e diskursonan pa korantnan na Merka, Canada i Europa. Segun kálkulo, pa aña 1913, un 2.000 korant tabata publiká e diskursonan di Ruman Russell i mas o ménos 15.000.000 hende tabata lesa e diskursonan akí.

11 Despues ku Ruman Russell a muri, nos rumannan a kuminsá usa radio komo un otro método efikas pa plama e bon notisia. Dia 16 di aprel di aña 1922, Joseph F. Rutherford a duna su promé diskurso via radio i e tabatin un oudiensia di mas o ménos 50.000 hende. Despues, nos a kuminsá usa nos mes radioemisora, ku tabata yama WBBR, i ku a bai den aire dia 24 di febrüari di aña 1924. Relashoná ku e método di prediká akí, e revista E Toren di Vigilansia di 1 di desèmber 1924 a bisa: “Nos ta kere ku te aworakí radio ta e manera mas ekonómiko i efikas pa plama e mensahe di e bèrdat.” Meskos ku korant, radio a yuda nos alkansá un públiko grandi den áreanan kaminda no tabatin hopi publikadó di Reino.

Hopi publikadó ta gusta prediká na lugánan públiko i konta hende tokante nos website, jw.org

(Wak paragraf 12, 13)

12. (a) Na ki lugá públiko abo ta gusta prediká mas? (b) Kiko por yuda nos vense kualke miedu ku nos por tin ora di prediká na lugánan públiko?

12 Awendia, nos ta pone mas i mas énfasis riba predikashon na lugánan públiko, manera parada di bùs, stashon di trein, parkeerplaats, marshe públiko i supermerkado. Awor, si e idea di prediká na e lugánan akí ta duna bo un poko miedu,  lo ta bon pa bo hasi orashon tokante e asuntu i meditá riba e komentario di Angelo Manera Jr., kende ta un superintendente biahero pa hopi tempu. El a bisa: ‘Kada rasgo nobo di sirbishi ta un otro manera pa nos sirbi Yehova i mustra nos lealtat na dje. E ta un otro oportunidat pa demostrá nos integridat. I semper nos ta ansioso pa mustra ku nos ta dispuesto pa sirbi Yehova tur manera ku e pidi nos.’ Ora nos ta vense nos miedu i partisipá den un rasgo nobo di sirbishi, nos lo haña mas konfiansa i fe den Yehova; ademas, nos lo bira mihó predikadó.—Lesa 2 Korintionan 12:9, 10.

13. Dikon nos website, jw.org, ta un método efikas pa prediká, i ki eksperensia abo tin usando e website?

13 Hopi publikadó ta gusta konta hende tokante nos website, jw.org, unda nan por lesa i download literatura bíbliko den mas ku 700 idioma. Tur dia, mas ku 1,6 mion hende ta bishitá nos website. Meskos ku e predikashon via radio den pasado, awe via nos website nos ta alkansá asta hende den áreanan aislá ku e bon notisia.

KON E REI TA ENTRENÁ PREDIKADÓNAN DI E BON NOTISIA?

14. Ki entrenamentu publikadónan di Reino tabatin mester, i kua skol a yuda nan bira bon maestro?

14 Nos a trata algun di e hèrmènt- i métodonan ku nos a yega di usa i ta usando aktualmente pa plama e bon notisia. Awor, kiko di nos entrenamentu? Suponé ku ántes un doño di kas no tabata di akuerdo ku loke el a skucha via tokadisko portátil òf ku e tabata ke sa mas despues di a lesa e karchi di testimonio. Sin duda, e publikadónan mester a siña kon pa kontestá un hende ku a bini ku opheshon òf kon pa yuda esnan ku tabata ke sa mas di e bèrdat. I Dios su spiritu santu a yuda Ruman Nathan H. Knorr mira e importansia di entrená e publikadónan pa nan por a hiba un kòmbersashon den sirbishi. Kiko tabata e solushon? E Skol di Ministerio Teokrátiko. E skol akí a kuminsá na aña 1943 i ta yuda nos bira bon maestro.

15. (a) Ki eksperensia algun studiante tabatin ora nan a duna nan promé parti den e Skol di Ministerio Teokrátiko? (b) Kon e promesa di Yehova na Salmo 32:8 a kumpli den bo kaso?

15 Hopi ruman mester a siña papia dilanti di un públiko. Julio S. Ramu ta kòrda su promé parti den e Skol, ku tabata na aña 1944. E mester a papia tokante Doeg, un personahe ku sinku  versíkulo di Beibel so ta papia di dje. Julio mester a basa henter su parti riba e sinku versíkulonan ei. El a bisa: “Mi rudia- i mi mannan tabata tembla; mi djentenan tabata bati riba otro. Mi a hasi e parti den tres minüt. Esei tabata mi promé eksperensia riba plataforma, pero mi no a entregá.” Mucha tambe tabata partisipá den e skol, aunke esei no tabata fásil pa nan. Angelo Manera, ku nos a menshoná anteriormente, ta kòrda kon un hobensito a duna su promé parti. El a bisa: ‘E hobensito akí tabata asina nèrvioso ku el a kuminsá yora ora el a kuminsá papia. Asina mes, el a duna su parti: El a yora durante henter e parti.’ Abo a yega di keda sin duna komentario òf partisipá na reunion pa motibu ku bo ta tímido òf debí na algun limitashon? Pidi Yehova yuda bo vense bo miedu. Lo bo mira ku lo e yuda bo meskos ku el a yuda e promé studiantenan di e Skol di Ministerio Teokrátiko.—Lesa Salmo 32:8.

16. (a) Kiko tabata e propósito di e Skol di Galaad den pasado? (b) Kiko ta su propósito desde 2011?

16 No ta mediante e Skol di Ministerio Teokrátiko so Yehova ta entrená su pueblo. Hopi ruman a haña entrenamentu na e Skol di Galaad. Segun un instruktor, un di e metanan di e skol akí ta “pa inkulká den e studiantenan un deseo intenso pa partisipá den e trabou di prediká.” E Skol di Galaad a kuminsá na aña 1943, i for di e tempu ei te ku awor mas ku 8.500 ruman a haña entrenamentu na e skol ei. Misioneronan entrená na Galaad a sirbi na alrededor di 170 pais. Desde aña 2011, e skol akí ta solamente pa rumannan ku ya kaba ta den un òf otro forma di sirbishi spesial di tempu kompleto, manera pioneronan spesial, superintendentenan di sirkuito, bètelitanan i misioneronan ku no a bai e skol ainda.

17. Kon efikas e entrenamentu di e Skol di Galaad ta?

17 E entrenamentu di e Skol di Galaad tabata efikas? Laga nos wak un ehèmpel. Na ougùstùs 1949, tabatin ménos ku 10 publikadó na Hapon. Pa final di e aña ei, tabatin 13 misionero ku a bai e Skol di Galaad ta prediká na Hapon. Awe, tin mas ku 216.000 publikadó na Hapon, i kasi mitar di e kantidat ei ta traha komo pionero.

18. Menshoná algun di e otro skolnan ku tin.

18 Tin vários otro skol mas, manera Skol di Ministerio di Reino, Skol di Sirbishi di Pionero, Skol pa Predikadó di Reino, Skol pa Superintendente di Sirkuito i Nan Esposa i Skol pa Miembro di Komité di Sukursal i Nan Esposa. E skolnan akí a yuda entrená rumannan i fortalesé nan fe. Sin duda, e Rei ta sigui entrená su súpditonan.

19. Kiko Ruman Russell a bisa tokante e trabou di prediká, i dikon nos por bisa ku e tabatin rason?

19 Mas ku 100 aña a pasa desde ku e Reino di Dios a ser establesí. Nos Rei, Hesukristu, ta sigui entrená nos. Charles Taze Russell, poko promé ku su morto na aña 1916, tabata sigur ku e predikashon di e bon notisia lo a yega na tur parti di mundu. El a bisa un bon amigu di dje: “E trabou ta kresiendo masha lihé, i lo e sigui krese, pasobra e predikashon di e ‘evangelio di e reino’ mester tuma lugá rònt mundu.” (Faith on the March, skirbí pa A. H. Macmillan, pág. 69) E tabatin rason. I nos ta masha gradisidu ku e Dios di pas ta sigui ekipá nos pa nos por hasi e trabou di mas dushi ku un hende por hasi! En bèrdat, nos Dios ta duna nos “tur kos bon” ku nos tin mester pa hasi su boluntat.

^ par. 2 Nos tin bon motibu pa kere ku mayoria di e hendenan ku tabata presente na e okashon ei a bira kristian. Ta na nan apòstel Pablo a referí ora el a papia di “500 ruman” den su karta na e kristiannan di Korinto. Anto ta interesante pa mira loke el a sigui bisa: “Algun di nan a bai sosegá, ma mayoria di nan t’ei huntu ku nos ainda.” Pues, ta parse ku Pablo i otro kristiannan di promé siglo tabata konosé hopi di esnan ku a tende Hesus duna e mandato pa bai prediká.