Bai na kontenido

Bai na kontenido

Entrená Bo Yu Tiner pa Sirbi Yehova

Entrená Bo Yu Tiner pa Sirbi Yehova

“Hesus a sigui krese físikamente i oumentá den sabiduria, i mas i mas e tabata haña aprobashon di Dios i di hende.”—LUK. 2:52.

KANTIKA: 4189

1, 2. (a) Ki preokupashon algun mayor tin ora nan yunan ta birando tiner? (b) Kon bo yunan por benefisiá di nan adolesensia?

UN DI e momentonan di mas felis pa un mayor ta ora su yu batisá. Un ruman ku yama Berenice tin kuater yu ku a batisá promé ku nan a hasi 14 aña. El a bisa: “Esei tabata un eksperensia masha emoshonante pa nos. Nos tabata felis ku nos yunan a disidí di sirbi Yehova. Pero nos tabata sa tambe ku nos yunan lo enfrentá hopi desafio komo tiner.” Si bo tin yu tiner, bo por komprondé e preokupashon di Berenice.

2 Un eksperto riba tereno di desaroyo di mucha a rekonosé ku adolesensia ta un reto tantu pa e mayornan komo pa e tiner. El a bisa: “Adolesensia no ta un periodo di ‘lokura’ òf ‘inmadures.’ Mas bien, e ta un periodo ku tinernan ta desaroyá nan kreatividat, emoshonnan i kapasidat pa sosialisá ku otro hende.” Nan por desaroyá un bon amistat ku Yehova, pone metanan spiritual, tuma nan mes desishon pa dediká nan bida na Yehova i biba di akuerdo ku e desishon ei. Adolesensia por ta un bunita etapa den bida den kua nan por krese spiritualmente, meskos ku Hesus tempu e tabata yòn. (Lesa Lukas 2:52.) Kiko boso komo mayor por hasi durante e añanan  importante ei? Laga nos mira kon Hesus a desplegá amor, humildat i disernimentu despues ku el a bira adulto. Kon e kualidatnan akí por yuda bo entrená bo yu pa sirbi Yehova?

STIMA BO YU

3. Dikon Hesus por a yama su apòstelnan amigu?

3 Hesus tabata un amigu amoroso i leal. (Lesa Huan 15:15.) Den tempu bíbliko, no tabata komun pa un doño di esklabo bisa su esklabonan loke e tabata pensa i sinti. Sinembargo, Hesus a demostrá di ta tantu un maestro komo un amigu pa su apòstelnan fiel. El a dediká tempu na nan, kompartí su sintimentunan ku nan i a skucha nan ku atenshon ora nan tabata deshogá nan mes serka dje. (Mar. 6:30-32) E manera amoroso ei di komuniká a uni nan mas ku otro i a prepará nan pa responsabilidatnan mas grandi ku Yehova lo a duna nan den futuro.

4. Kon bo por ta un amigu di bo yu sin pèrdè bo outoridat komo mayor? (Wak e promé plachi.)

4 Michael, tata di dos yu, a bisa: “Aunke nos no ta nan pareu, nos por ta nan amigu si.” Amigunan ta pasa tempu huntu. Kisas bo por dediká ménos tempu na trabou òf otro aktividatnan pa bo tin mas tempu pa bo yunan. Lo ta bon pa bo hasi orashon tokante esaki. Hopi biaha bon amigu ta gusta e mesun tipo di kosnan. P’esei, mustra interes den kosnan ku bo yu ta gusta, manera su músika, pelíkula- òf deportenan faborito. Ilaria, kende ta biba na Italia, a bisa: “Mi mayornan a mustra interes den e músika ku mi ta skucha. Mi tata a bira mi mihó amigu, i mi a sinti mi liber pa papia kuné tokante asuntunan delikado.” Si bo ta purba di ta amigu di bo yunan i ta yuda nan disfrutá di un relashon “íntimo” ku Yehova, esei no ke men ku bo ta pèrdè bo outoridat komo mayor. (Sal. 25:14) Al kontrario, bo ta mustra ku bo ta stima nan i respetá nan, i bo ta bira mas aserkabel. Asina nan lo ta mas habrí ku bo.

5. Kon Hesus a yuda su disipelnan haña goso den nan sirbishi na Yehova?

5 Hesus tabata sa ku su disipelnan lo ta felis si nan sirbi Yehova ku zelo i keda okupá den e trabou di prediká. P’esei, Hesus a animá su disipelnan pa traha duru den sirbishi, i el a garantisá nan ku lo e yuda nan pa nan tin éksito.—Mat. 28:19, 20.

6, 7. Dikon ta apropiá pa mayornan yuda nan yunan mantené un bon rutina spiritual?

6 Sin duda, bo ke pa bo yunan tin un bon relashon ku Yehova. I Dios ke pa bo kria bo yunan den su disiplina i “inkulká su manera di pensa den nan.” (Efe. 6:4) Pues, usa e responsabilidat ku Dios a duna bo pa establesé i mantené un rutina spiritual. Pa ilustrá: Bo ta sòru pa bo yunan bai skol pasobra bo sa ku enseñansa ta importante pa nan i bo ke pa nan gusta siña. Di igual manera, mayornan amoroso ta hasi sigur ku nan yunan ta benefisiá di e instrukshonnan di Yehova ku nan ta haña na reunion, asamblea i den nan Adorashon Komo Famia. E edukashon akí, ku ta bini di Yehova, por salba nan bida. P’esei, yuda nan mira kon dushi ta pa siña mas tokante Yehova i mustra nan kon e edukashon akí lo hasi nan sabí. (Pro. 24:14) Meskos ku Hesus a yuda su disipelnan, abo tambe por yuda bo yunan haña bon resultado den sirbishi. Bo por yuda nan haña e deseo pa papia ku hende tokante Beibel i yuda nan sali den sirbishi regularmente.

 7 Kon un bon rutina spiritual por yuda hóbennan? Erin, un ruman muhé ku ta biba na Sur Afrika, a atmití: “Komo mucha, hopi biaha nos tabata keha ora nos mester a studia Beibel, bai reunion òf sirbishi. Tin biaha pa malu nos tabata purba di stroba e estudio di famia. Pero mi mayornan no tabata permití esei. E entrenamentu ei a yuda mi haña perseveransia. P’esei, asina ku algu stroba mi rutina spiritual, mi ta hasi mi bèst pa sigui kuné mas lihé posibel. Mi no ta kere ku lo mi tabatin e deseo ei aworakí si mi mayornan no a hasi nan bèst pa mantené e rutina spiritual di nos famia. Mi ta sigur ku si nan no a para firme, lo mi no tabata determiná pa sigui bai mi reunionnan òf partisipá den otro aktividatnan spiritual.”

SIÑA BO YUNAN SER HUMILDE MEDIANTE BO EHÈMPEL

8. (a) Kon Hesus a mustra ku e ta humilde? (b) Kon Hesus su humildat a yuda su disipelnan?

8 Aunke Hesus tabata un hòmber perfekto, humildemente el a rekonosé su limitashonnan i ku e mester a dependé riba Yehova. (Lesa Huan 5:19.) Akaso Hesus su disipelnan a pèrdè rèspèt p’e pasobra e tabata humilde? Klaru ku nò. En realidat, mas el a dependé riba Yehova, mas su disipelnan a konfi’é. Despues, nan a imitá Hesus su humildat.—Echo. 3:12, 13, 16.

9. Ora bo ta atmití bo fayonan i ta pidi despensa, kiko bo yu lo siña?

9 Kontrali na Hesus, nos ta imperfekto i ta faya hopi. P’esei, nos mester ta humilde. Nos mester komprondé ku tin hopi kos ku nos no por hasi, i nos tin ku atmití nos fayonan. (1 Huan 1:8) Ken lo bo respetá mas? Un doño di trabou ku ta atmití ku e ta robes òf un doño ku nunka ta pidi despensa? Asina tambe, bo yu lo respetá bo mas si bo pidi despensa ora bo faya. Lo e por asta siña atmití su mes erornan. Rosemary, un mama ku tin tres yu adulto, a bisa: “Nos tabata atmití ora nos tabata robes, i esei a motivá nos yunan pa papia ku nos libremente ora nan tabatin problema. Nos a mustra nan unda nan por haña e mihó solushon pa nan problemanan. Ora nan tabatin mester di yudansa, semper nos tabata animá nan pa buska informashon den nos publikashonnan basá riba Beibel, i nos tabata hasi orashon ku nan.”

10. Kon Hesus a mustra un aktitut humilde ora e tabata bisa su disipelnan kiko pa hasi?

10 Hesus tabatin outoridat pa bisa su disipelnan kiko pa hasi. Pero ku un aktitut humilde, hopi biaha e tabata splika nan pakiko nan mester a hasi algu. Por ehèmpel, e no a djis bisa su disipelnan pa buska promé e Reino i e hustisia di Dios, pero el a bisa nan tambe: “I lo e duna boso tur e kosnan akí.” Despues ku Hesus a bisa nan pa “stòp di husga,” el a splika nan: “Pa boso no ser husgá, pasobra ku e huisio ku boso ta husga, boso lo ser husgá.”—Mat. 6:31–7:2.

11. Dikon ta sabí pa splika bo yu pakiko bo a pone un regla òf tuma un sierto desishon?

11 Semper purba di splika bo yu e motibu pakiko bo a pone un regla òf tuma un desishon. Si bo yu ta komprondé pakiko bo a tuma un sierto desishon, lo e ta mas dispuesto pa obedesé bo. Barry, kende a lanta kuater yu, a bisa: “Ora bo duna nan un splikashon, nan lo konfia bo mas pasobra nan ta mira ku bo desishonnan ta basá riba prinsipio; e no ta djis algu ku bo a disidí na e momento ei.” Kòrda ku un tiner ta birando un adulto i ta siñando kon pa usa su mes “kapasidat  di pensa.” (Rom. 12:1) Barry ta splika: “Un tiner mester siña pensa pakiko e ta tuma un sierto desishon i no djis laga su emoshonnan influensi’é.” (Sal. 119:34) Pues, sea humilde i splika bo yu e motibu pakiko bo a tuma un sierto desishon. Di e manera ei, bo yu lo mira ku bo ta rekonosé ku e ta birando un adulto i e ta siña tuma su mes desishonnan ku su “kapasidat di pensa.”

MUSTRA DISERNIMENTU I PURBA DI KOMPRONDÉ BO YU

12. Kon Hesus a usa disernimentu pa yuda Pedro?

12 Hesus tabatin disernimentu i a komprondé ki yudansa su disipelnan tabatin mester. Por ehèmpel, ku tur bon intenshon apòstel Pedro a bisa Hesus pa ta bondadoso ku su mes pa e no ser matá. Ma Hesus tabata sa ku e manera ku Pedro a rasoná no tabata bon. Kon Hesus a yuda Pedro i e otro disipelnan? Promé, Hesus a korigí Pedro. Despues, el a splika nan kiko lo pasa si nan no hasi Yehova su boluntat asta ora nan haña nan ku difikultat, i el a mustra nan e benefisionan di tin un spiritu di sakrifisio propio. (Mat. 16:21-27) Pedro a komprondé e lès.—1 Ped. 2:20, 21.

13, 14. (a) Kiko lo por ta un indikashon ku bo yu su fe ta birando suak? (b) Kon bo por usa disernimentu pa komprondé i yuda bo yu?

13 Pidi Yehova duna bo disernimentu pa bo por komprondé den ki área bo yu tin mester di yudansa. (Sal. 32:8) Por ehèmpel, kon bo por sa si bo yu su fe ta birando suak? Kisas e ta pèrdiendo su goso, e ta papia malu di e rumannan òf bo ta sinti ku tin algu ku e no ke bisa bo. Mayornan no mester konkluí mesora ku nan yu ta hiba un bida dòbel òf ku el a kometé un piká serio. * Di otro banda, si un mayor ripará ku su yu tin un problema, e no mester ignorá esei i pensa ku ta djis un fase di su bida ku lo pasa bai.

Yuda bo yunan haña bon amigu den kongregashon (Wak paragraf 14)

14 Pa bo por yuda bo yu, meskos ku Hesus, bo mester hasi pregunta ku takto i rèspèt. Bo por kompará esaki ku ora un hende ta saka awa for di un pos. Si e saka e awa muchu lihé, un tiki awa lo basha  afó. Algu similar lo por pasa si bo no tin pasenshi i bo ta purba di fòrsa bo yu pa ekspresá su mes. Lo bo pèrdè un oportunidat balioso pa haña sa kiko e ta pensa i sinti. (Lesa Proverbionan 20:5.) Ilaria, kende nos a menshoná anteriormente, a bisa: “Durante mi adolesensia, mi kier a sirbi Yehova pero mi kier a pasa mas tempu ku mi kompañeronan di skol tambe. Mi mayornan a ripará ku algu tabata molestiá mi. Un anochi, mi mayornan a bisa mi ku nan a ripará ku mi ta desanimá, i nan a puntra mi si tin algu ku ta preokupá mi. Ku awa na wowo mi a splika nan e situashon, i mi a pidi nan yuda mi. Nan a brasa mi, bisa mi ku nan ta komprondé mi i a primintí ku nan lo yuda mi.” Mesora e mayornan di Ilaria a kuminsá yud’é haña bon amigu den kongregashon.

15. Splika kon Hesus a usa disernimentu den e manera ku el a trata ku otro hende.

15 Hesus a mustra disernimentu tambe ora el a mira e bon kualidatnan di su disipelnan. Por ehèmpel, ora un hòmber ku yama Natanael a tende ku Hesus a bini for di Názarèt, el a bisa: “Akaso algu bon por sali for di Názarèt?” (Huan 1:46) Kiko un pregunta asina lo a laga bo pensa di Natanael? Kisas lo bo a haña ku e tabata krítiko, sin fe òf ku e tabatin prehuisio. Hesus a mustra disernimentu i a konsentrá riba e bon kualidatnan di Natanael. Hesus a yam’é “un israelita den ken sigur no tin engaño.” (Huan 1:47) Hesus por a lesa kurason i a usa e abilidat ei pa buska e bon kualidatnan den hende.

16. Kon bo por yuda bo yu kultivá bon kualidat?

16 Abo no por lesa kurason manera Hesus, pero bo por usa disernimentu sí. Yehova por yuda bo mira e bon kualidatnan di bo yu. Nunka yama bo yu rebelde òf problemátiko. Asta si bo yu faya, lag’é sa ku bo ta mira su potensial i su deseo sinsero di hasi loke ta bon. Tuma nota di kualke progreso ku e ta hasi i elogi’é. Si ta posibel, dun’é mas responsabilidat pa asina yud’é kultivá bon kualidat. Esei ta loke Hesus a hasi ku su disipelnan. Mas o ménos un aña i mei despues ku el a konosé Natanael (konosí tambe komo Bartolomeo), Hesus a skoh’é pa bira un apòstel, i Natanael a demostrá ku e tabata un kristian zeloso. (Luk. 6:13, 14; Echo. 1:13, 14) En bes di laga bo yu sinti ku e ta faya tur ora bai, dun’é elogio i animashon. Yud’é mira ku e por hasi abo i Yehova kontentu i ku e por usa su abilidatnan pa sirbi Yehova.

ENTRENAMENTU KU TA DUNA HOPI GOSO

17, 18. Kiko lo por ta e resultado ora bo sigui yuda bo yunan sirbi Yehova?

17 Kisas bo ta sinti bo mes manera apòstel Pablo, kende a bira un tata spiritual pa hopi hende. E tabata preokupá mashá pa tur esnan ku el a yuda siña tokante Yehova, i e tabata stima nan masha hopi. P’esei, e no tabata ke pa ningun di nan stòp di sirbi Yehova. (2 Kor. 2:4; 1 Kor. 4:15) Victor, kende a lanta dos yu hòmber i un yu muhé, a bisa: “E añanan di adolesensia no tabata fásil. Pero tòg e momentonan bon tabata hopi mas tantu ku e retonan ku nos a enfrentá. Ku yudansa di Yehova, nos tabatin un amistat será ku nos yunan.”

18 Sigui hasi esfuerso pa entrená bo yunan pa sirbi Yehova. Ademas, no keda sin mustra nan kuantu bo ta stima nan. Djis pensa kon kontentu lo bo keda ora bo yunan disidí di sirbi Yehova i “sigui kana den e bèrdat.”—3 Huan 4.

^ par. 13 Mayornan por haña sugerensianan práktiko den e buki Lo que los jóvenes preguntan. Respuestas prácticas, Vol. 1, pág. 317, i Vol. 2, pág. 136-141.