E man di [Yehova] lo wòrdu hasi konosí na su sirbidónan.”— ISA. 66:14.

KANTIKA: 6526

1, 2. Kiko algun hende ta pensa di Dios?

HOPI hende ta pensa ku Dios no ta interesá den loke nan ta hasi òf loke ta pasa ku nan. Por ehèmpel, na novèmber 2013, despues ku e tifon Haiyan a kousa hopi daño na e parti sentral di Filipinas, un alkalde di un di e statnan grandi a bisa: “Dios lo mester tabata muchu okupá pa yuda nos.”

2 Otronan ta hasi komo si fuera ku Dios no ta mira loke nan ta hasi. (Isa. 26:​10, 11; 3 Huan 11) Nan ta manera e hendenan ku apòstel Pablo a deskribí ora el a bisa: “Nan no tabata dispuesto pa haña un konosementu eksakto di Dios.” Nan “tabata yen di tur sorto di inhustisia, kos pekaminoso, golosidat [i] maldat.”​—Rom. 1:​28, 29.

3. (a) Ki pregunta nos por hasi nos mes tokante Dios? (b) Ora Beibel ta papia tokante e “man” di Dios, na kiko esaki ta referí?

3 Kiko di nos? Na kontraste ku e personanan menshoná aki riba, nos sí sa ku Yehova ta wak tur kos. Pero nos ta realmente konvensí ku e ta interesá den nos i ku e ke yuda nos? Nos ta entre esnan ku Hesus a bisa ku “lo mira Dios”? (Mat. 5:8) Pa nos por komprondé kiko ke men mira Dios, laga nos  analisá algun ehèmpel di Beibel ku ta mustra kon algun hende por a mira Dios su man den sierto asuntunan i kon otronan a nenga di rekonosé esei. Nos lo siña tambe kon nos fe lo yuda nos mira e man di Dios den nos bida. Kòrda ku ora Beibel ta papia di e “man” di Dios, e ta referí na e poder ku e ta usa pa yuda su sirbidónan i pa vense su enemigunan.​—Lesa Deuteronomio 26:8.

NAN A NENGA DI REKONOSÉ E PODER DI DIOS

4. Dikon e enemigunan di Israel a nenga di rekonosé ku ta Dios tabata yuda su pueblo?

4 Na komienso di e historia di Israel, hende por a mira i tende kon Dios a yuda su pueblo. Milagrosamente Yehova a libra su pueblo for di Egipto, i nan a derotá un rei tras di otro. (Hos. 9:​3, 9, 10) Apesar di loke kasi tur e reinan di e parti wèst di Hordan a tende i mira, “nan a bini huntu den un akuerdo pa bringa kontra Hosue i kontra Israel.” (Hos. 9:​1, 2) Ora e reinan ei a bringa kontra Israel, nan tabatin tur oportunidat pa mira e man di Dios. Por ehèmpel, pa medio di e poder di Dios “solo a keda para, i luna a keda para, te ora ku e nashon a tuma vengansa riba su enemigunan.” (Hos. 10:13) Pero Yehova a permití “nan kurason [bira] duru pa sali kontra Israel den bataya.” (Hos. 11:20) Israel su enemigunan a sufri un derota pasobra nan no kier a rekonosé ku ta Dios tabata bringa pa su pueblo.

5. Kiko e rei malbado Akab no a rekonosé?

5 Siglonan despues, Rei Akab tabatin tur oportunidat pa mira e poder di Dios. Elías a bis’é: “Lo no tin ni serena ni áwaseru e añanan akí, si no ta pa medio di mi palabra.” (1 Rei. 17:1) E palabranan ei a bini di Yehova, pero Akab a nenga di rekonosé esei. Despues, Akab a mira kandela baha for di shelu ora Elías a pidi Dios pa kima su sakrifisio. Elías a laga Akab sa ku Yehova lo kaba ku e sekura. El a bis’é: “Prepará bo garoshi i baha bai, pa e áwaseru pisá no stroba bo.” (1 Rei. 18:​22-45) Maske Akab a mira tur esaki sosodé, tòg el a nenga di rekonosé e gran poder di Dios. E dos ehèmpelnan akí ta siña nos un lès importante: Nos mester rekonosé e man di Dios den nos bida.

NAN SÍ A REKONOSÉ E PODER DI DIOS

6, 7. Kiko algun hende den tempu di Hosue a rekonosé?

6 Kontrali na e reinan malbado ei, tabatin otronan ku a haña nan mes den e mesun situashon, pero nan sí a rekonosé e poder di Dios. Por ehèmpel, maske mayoria di e nashonnan a bringa kontra Israel den tempu di Hosue, e gabaonitanan a hasi pas ku Israel. Dikon? Nan a bisa: “Bo sirbidónan a bini . . . pa motibu di e nòmber di SEÑOR bo Dios; pasobra nos a tende di su fama i di tur loke ku el a hasi.” (Hos. 9:​3, 9, 10) Nan a rekonosé ku ta Yehova tabata bringa pa Israel.

7 Rahab tambe a rekonosé Dios su poder den su bida. Ora el a haña sa ku Yehova a salba su pueblo, el a bisa e dos spionnan israelita: “Mi sa ku SEÑOR a duna boso e tera.” Rahab tabata sa ku Yehova por a salba e i su famia. El a mustra fe den Yehova apesar ku e tabata sa ku esei lo a pon’é den un situashon hopi peligroso.​—Hos. 2:​9-13; 4:​23, 24.

8. Kon algun israelita a rekonosé e poder di Dios?

8 Distinto di e rei malbado Akab, algun israelita a rekonosé e poder di Dios ora nan a mira kandela baha for di shelu i kima e sakrifisio. Nan a bisa: “Yehova ta e Dios berdadero.” (1 Rei. 18:⁠39NW) Nan no tabatin ningun duda di esei.

9. Kon nos por mira e poder di Yehova awe?

 9 Den tur dos ehèmpel, tantu esun bon komo esun malu, nos por a komprondé kiko ke men mira òf rekonosé e poder di Dios. Segun ku nos ta siña konosé Yehova, nos tambe por rekonosé su poder pasobra nos ta mira su kualidatnan i akshonnan ku “e wowonan di [nos] kurason.” (Efe. 1:18) Meskos ku e sirbidónan di Dios di pasado i djawe, nos tambe ke mira kon Yehova ta yuda su pueblo. Tin prueba ku Dios ta yudando su pueblo awe?

KI PRUEBA TIN KU DIOS TA YUDA NOS?

10. Ki prueba nos tin ku Yehova ta yuda hende awe? (Wak e promé plachi.)

10 Nos tin hopi motibu pa kere ku Yehova ta sigui yuda hende. Bes tras bes, nos ta tende di eksperensianan di hende ku a haña kontesta pa nan orashonnan despues ku nan a pidi Dios pa yudansa. (Sal. 53:2) Un dia, un ruman hòmber ku yama Allan tabata prediká na un isla chikitu na Filipinas, i el a topa un señora ku a kuminsá yora. Allan a bisa: “E mainta ei, e señora tabata hasi orashon pa un Testigu di Yehova bishit’é. Tempu e tabata yòn, el a studia Beibel ku e Testigunan. Pero ora el a kasa i muda bai biba na un otro isla, el a pèrdè kontakto ku nan. E echo ku Yehova a kontestá su orashon asina lihé a emoshon’é.” Den ménos ku un aña, el a dediká su bida na Yehova.

Bo ta mira kon Yehova ta yuda su pueblo awe? (Wak paragraf 11-13)

11, 12. (a) Kon Yehova ta yuda su sirbidónan? (b) Konta un eksperensia ku ta mustra kon un ruman a haña yudansa di Dios.

11 Hopi ruman a eksperensiá Yehova su yudansa den nan bida. Por ehèmpel, algun di nan mester a lucha pa stòp ku bisionan manera humamentu, uso di droga òf wakmentu di pornografia. Hopi biaha nan a purba di stòp ku e bisionan ei riba nan mes, pero nan no a logra. Sinembargo, ora nan a buska yudansa di Yehova, el a duna nan “e poder ku ta surpasá esun di hende,” i asina nan a logra vense nan debilidat.​—2 Kor. 4:7; Sal. 37:​23, 24.

12 Yehova a yuda hopi di su sirbidónan superá sierto opstákulonan. Por ehèmpel, ora un ruman muhé ku yama Amy a ser asigná pa bai yuda konstruí un Salòn di Reino i un kas di misionero na un isla chikitu den Oséano Pasífiko, kosnan no tabata fásil p’e. El a bisa: “Nos tabata keda na un hotèl chikitu, i tur dia nos mester a kana riba kamindanan yen di awa pa yega na e lugá di konstrukshon.” E mester a adaptá su mes na e kustumbernan lokal, i hopi bes no tabatin koriente òf awa. Amy a bisa: “Pió ainda, mi a baha mi rabia riba un ruman muhé ku tabata traha ku nos. Mi a sinti mi masha malu mes pa loke mi a hasi. Na hotèl, den mi kamber skur mi a roga Yehova pa yudansa.” Ora koriente a bini bèk, Amy a lesa un artíkulo den E Toren di Vigilansia tokante un programa di graduashon di Galaad ku tabata trata asuntunan ku e mes tabata lucha kuné, esta, heimwee, kon pa trata ku hende nobo i kon pa kustumbrá ku un kultura nobo. El a bisa: “Mi a sinti ku ta  Yehova a papia ku mi e anochi ei. Esei a duna mi e motivashon ku mi tabatin mester pa sigui ku mi asignashon.”​—Sal. 44:​25, 26; Isa. 41:​10, 13.

13. Ki prueba nos tin ku Yehova ta yuda su pueblo “defendé e bon notisia i establesé e derecho legal” ku nan tin di prediká?

13 Tin mas prueba ku Yehova ta yuda su sirbidónan. Por ehèmpel, el a yuda nan “defendé e bon notisia i establesé e derecho legal” ku nan tin di prediká. (Flp. 1:7) Algun gobièrnu a purba di stòp e trabou di prediká. Pero nos a gana por lo ménos 268 kaso den korte supremo, i 24 di e kasonan ei nos a gana den e Korte Europeo di Derechonan Humano desde aña 2000. Esaki ta mustra ku ningun hende no por stroba Yehova di yuda su pueblo.​—Isa. 54:17; lesa Isaías 59:1.

14. Ki otro pruebanan nos tin ku Yehova ta yuda su pueblo?

14 Ta solamente ku Dios su yudansa nos por hasi e trabou di prediká rònt mundu. (Mat. 24:14; Echo. 1:8) Ademas, den e pueblo di Dios tin un union entre hende di diferente nashonalidat, algu ku e mundu no por imitá. Asta personanan ku no ta sirbi Yehova ta atmití: “Di bèrdat Dios ta meimei di boso.” (1 Kor. 14:⁠25) Pues, nos tin hopi prueba ku Dios ta apoyá su pueblo. (Lesa Isaías 66:14.) Kiko di abo? Bo ta mira e man di Dios den bo bida?

ABO TA MIRA KON YEHOVA TA YUDA BO?

15. Dikon tin biaha nos no ta mira kon Yehova ta yuda nos?

15 Tin ora nos tin asina tantu problema ku nos por lubidá kiko Dios a yega di hasi pa nos. Esaki ta loke a sosodé ku Elías. E tabata un hòmber yen di kurashi. Pero, ora ku Reina Yézabèl a menas’é ku morto, pa un momento el a lubidá kon Yehova a yega di yud’é. Beibel ta bisa: “El a pidi pa e muri.” (1 Rei. 19:​1-4) Kiko por a yuda Elías ku su problema?  E mester a buska Yehova su yudansa pa e haña kurashi.​—1 Rei. 19:​14-18.

16. Kon nos por mira Dios manera Yòb a mir’é?

16 Yòb tabata asina preokupá ku su propio problemanan ku e no por a mira su situashon for di e punto di bista di Dios. (Yòb 42:​3-6) Nos problemanan tambe por stroba nos di mira kon Dios ta yuda nos. Kiko nos por hasi e ora ei? Nos mester meditá riba loke Beibel ta bisa di nos problemanan. Si nos meditá tambe riba kon Yehova ta yuda nos, e lo bira mas real pa nos. Nos por bisa meskos ku Yòb: “Ta tende mi a tende di bo, ma awor mi wowo ta mira bo.”

Yehova ta usa bo pa yuda otro hende mir’é? (Wak paragraf 17, 18)

17, 18. (a) Den ki manera nos por mira ku Yehova ta yuda nos? (b) Konta un eksperensia ku ta mustra kon Dios ta yuda nos awe.

17 Kon nos por mira ku Yehova ta yuda nos? Wèl, kisas bo ta sinti ku ta Yehova mes a yuda bo haña e bèrdat. Òf bo a yega di skucha un diskurso i sinti ku e tabata nèt pa bo? Kisas bo a mira kon Yehova a kontestá bo orashon. Tal bes bo a disidí di amplia bo sirbishi i bo a mira kon Yehova a yuda bo kumpli ku e meta ei. Òf kisas bo a disidí di kita for di trabou pasobra e tabata stroba bo di sirbi Yehova, i bo a mira kon Yehova a kumpli ku su promesa: “Hamas lo mi bandoná bo.” (Heb. 13:5) Si bo ta keda spiritualmente alerta, bo por mira kon Yehova ta yudando bo den diferente manera.

18 Un ruman muhé di Kenia ku yama Sarah ta konta: “Mi a hasi orashon tokante un studiante ku mi a sinti ku no tabata gusta e estudio di Beibel mashá. Mi a puntra Yehova si mi mester a para e estudio. Nèt mi ta kaba di bisa amèn, mi telefòn a rin. Pa mi sorpresa tabata mi studiante. El a puntra mi si e por bai reunion ku mi.” Si nos keda alerta, nos tambe por mira kon Dios ta yuda nos den nos bida. Rhonna, un ruman muhé ku ta biba na Asia, a bisa: “Ta kosta bo pa bo mira kon Yehova ta yuda bo. Ma unabes bo logra esei, lo bo ripará kuantu interes e tin den bo.”

19. Kiko nos tin mester pa mira Dios den nos bida?

19 Hesus a bisa: “Felis ta esnan di kurason puru, ya ku nan lo mira Dios.” (Mat. 5:8) Kon nos por tin un “kurason puru”? Nos mester mantené nos pensamentunan limpi i stòp di hasi loke ta malu. (Lesa 2 Korintionan 4:2.) Si nos sigui krese spiritualmente i mantené un bon kondukta, nos lo por ta entre esnan ku por mira Dios. Den e siguiente artíkulo nos lo analisá un kualidat importante ku por yuda nos mira kon Yehova ta yuda nos den nos bida: nos fe.