Bai na kontenido

Bai na kontenido

“Duna Nos Mas Fe”

“Duna Nos Mas Fe”

Yuda mi kaminda mi falta fe!”​—MAR. 9:24.

KANTIKA: 81135

1. Dikon ta asina importante pa nos fortalesé nos fe? (Wak e promé plachi.)

BO A yega di puntra bo mes: Ami ta e tipo di persona ku Yehova lo ke salba durante e tribulashon grandi i permití drenta den e mundu nobo? Naturalmente, tin vários faktor importante ku nos tin ku tene kuenta kuné si nos ke sobrebibí. Pablo a enfatisá esun di mas importante: “Sin fe ta imposibel pa agradá Dios.” (Heb. 11:6) Esaki ta parse algu simpel, pero e realidat ta ku “no ta tur hende tin fe.” (2 Tes. 3:2) E tekstonan akí ta yuda nos mira kon importante ta pa nos fortalesé nos fe.

2, 3. (a) Kiko nos por siña for di apòstel Pedro tokante fe? (b) Ki preguntanan nos lo bai kontestá?

2 Apòstel Pedro a enfatisá e importansia di fe ora el a bisa ku kristiannan tin ku pone nan fe na prueba pa e “por ta un motibu pa [nan] risibí alabansa, gloria i onor na e revelashon di Hesukristu.” (Lesa 1 Pedro 1:7.) Mirando ku e tribulashon grandi ta asina serka, nos mester hasi sigur ku nos tin e klase di fe ku ta nesesario pa nos por ta entre esnan ku Hesus lo rekompensá ora e keda revelá. Nos ke ta “e tipo di hende ku tin fe, lokual ta konserbá nos alma na bida.” (Heb. 10:39) Ku esei na mente, nos lo por roga Dios meskos ku e hòmber ku a bisa: “Yuda mi kaminda mi falta fe!” (Mar. 9:⁠24)  Òf nos lo por bisa meskos ku e apòstelnan di Hesus: “Duna nos mas fe.”​—Luk. 17:5.

3 Den e artíkulo akí nos lo kontestá e siguiente preguntanan: Kon nos por edifiká nos fe? Kon nos por mustra ku nos tin fe? I ki siguransa nos tin ku Yehova lo duna nos mas fe si nos pidié?

E KLASE DI FE KU TA AGRADÁ DIOS

4. Ki ehèmpelnan por motivá nos pa edifiká nos fe?

4 Ya ku “tur loke a ser skirbí anteriormente a ser skirbí pa nos instrukshon,” nos por siña di e ehèmpelnan di fe ku tin den Beibel. (Rom. 15:4) Ora nos lesa tokante hende manera Abraham, Sara, Isak, Yakòb, Moises, Rahab, Gideon, Barak i otronan, esei lo motivá nos pa analisá nos propio fe. (Heb. 11:​32-35) Ademas, eksperensia di rumannan den nos tempu ku tin fe sobresaliente lo por motivá nos pa hasi esfuerso pa edifiká nos fe. *

5. (a) Kon Elías a mustra ku e tabatin un fe fuerte den Yehova? (b) I kiko Elías su ehèmpel ta motivá nos pa hasi?

5 Un bunita ehèmpel den Beibel ta esun di profeta Elías. Na vários okashon Elías a mustra un konfiansa kompleto den Yehova. Laga nos wak sinku di nan. Di promé, ora Elías a informá Rei Akab ku Yehova lo a trese un sekura, el a bisa ku kurashi: “Manera SEÑOR . . . ta biba, . . . lo no tin ni serena ni áwaseru e añanan akí, si no ta pa medio di mi palabra.” (1 Rei. 17:1) Di dos, Elías a konfia ku Yehova lo a perkurá tur loke ta nesesario p’e i pa otronan durante e sekura. (1 Rei. 17:​4, 5, 13, 14) Di tres, e tabata konvensí ku Yehova lo por a lanta un mucha for di morto. (1 Rei. 17:⁠21) Di kuater, riba Seru Karmelo, Elías no tabatin duda ku Yehova lo a sende su sakrifisio na kandela. (1 Rei. 18:​24, 37) Di sinku, ora a yega tempu pa Yehova kaba ku e sekura, Elías a bisa Akab asta promé ku tabatin kualke indikashon ku awa lo kai: “Bai, kome i bebe, pasobra tin zonido di un áwaseru pisa.” (1 Rei. 18:41) No ta bèrdat ku e relatonan akí ta animá nos pa eksaminá nos mes pa wak si nos fe ta fuerte?

KON NOS POR FORTALESÉ NOS FE?

6. Kiko ta nesesario pa nos por tin un fe fuerte?

6 Fe ta un kualidat di e fruta di spiritu. P’esei nos no por tin un fe fuerte sin Dios su yudansa. (Gal. 5:22) Pues, lo ta sabí pa sigui Hesus su konseho i pidi Yehova p’e duna nos spiritu santu. Hesus ta sigurá nos ku e Tata “lo duna spiritu santu na esnan ku pidié.”​—Luk. 11:13.

7. Kon nos por mantené un fe fuerte? Duna un ehèmpel.

7 Unabes nos tin un fe fuerte, nos tin ku sigui fortales’é. Nos por kompará nos fe ku un kandela. Ora bo pega un kandela, e por bira hopi grandi. Ma si bo no hasi nada pa tene e kandela sendí, pokopoko lo e paga i kaba na shinishi. Pero, tanten ku bo sigui pone palu riba e kandela, lo e sigui kima. Meskos ta konta pa nos fe. Ora nos ta lesa i studia Beibel regularmente, nos amor pa Yehova i su Palabra lo sigui krese. Komo resultado, nos fe lo bira mas fuerte.

8. Kiko lo yuda nos sigui mantené i fortalesé nos fe?

8 Pues, no ta sufisiente pa djis dependé  riba loke bo a siña promé ku bo a batisá. (Heb. 6:​1, 2) Por ehèmpel, si nos analisá profesianan di Beibel ku a kumpli kaba, nan por yuda fortalesé nos fe. Ademas, nos por usa e Palabra di Dios pa analisá nos mes pa wak si nos tin un fe fuerte.​—Lesa Santiago 1:25; 2:​24, 26.

9, 10. Kon nos por fortalesé nos fe ora nos (a) tin bon asosiashon? (b) ta asistí na nos reunionnan? (c) ta prediká?

9 Apòstel Pablo a enkurashá kristiannan pa nan “por tin un interkambio di estímulo” i animá otro pa medio di nan fe. (Rom. 1:12) Ora nos ta asosiá ku nos rumannan, nos por yuda otro haña mas fe, foral ora nos ta anda ku esnan ku ya a demostrá ku nan tin un fe fuerte. (Sant. 1:3) Mal asosiashon por kaba ku nos fe, pero bon asosiashon por fortales’é. (1 Kor. 15:33) Esaki ta un motibu pakiko Beibel ta animá nos pa “no keda sin bai e reunionnan,” mas bien, pa sigui “animá otro.” (Lesa Hebreonan 10:​24, 25.) Un otro motibu ta ku na nos reunionnan nos ta haña instrukshon ku por yuda fortalesé nos fe. Esei ta na armonia ku e palabranan di apòstel Pablo: “Fe ta bini despues ku un hende tende e palabra.” (Rom. 10:⁠17) Nos ta hasi esfuerso pa bai reunion i asosiá ku nos rumannan?

10 Ora nos ta partisipá den e trabou di prediká, nos lo yuda fortalesé tantu nos mes fe komo e fe di esnan ku nos ta topa den sirbishi. Esaki lo yuda nos konfia plenamente den Yehova i papia ku kurashi, manera tabata e kaso ku e kristiannan di promé siglo.​—Echo. 4:​17-20; 13:46.

11. Dikon nos por bisa ku Kalèb i Hosue tabatin un fe fuerte, i kon nos por imitá nan?

11 Segun ku nos ta mira kon Yehova ta yuda nos i kontestá nos orashonnan, nos fe ta sigui krese. Esei ta loke a sosodé ku Kalèb i Hosue. Nan a mustra fe den Yehova ora nan a bai spioná e Tera Primintí. Pero ora nan a mira kon Yehova tabata guia nan i yuda nan bes tras bes, nan fe a sigui krese. P’esei Hosue por a bisa e israelitanan ku konvikshon: “Ni un palabra di tur e bon palabranan ku SEÑOR boso Dios a papia tokante di boso no a faya.” El a agregá: “P’esei anto, teme SEÑOR i sirbié ku sinseridat i den bèrdat . . . Pa loke ta ami i mi kas, nos lo sirbi SEÑOR.” (Hosue 23:14; 24:​14, 15) Nos fe lo sigui krese ora nos ta konfia den Yehova i mira kon e ta yuda nos personalmente.​—Sal. 34:8.

DEMOSTRÁ KU BO TIN FE

12. Kon nos por demostrá ku nos tin un fe fuerte?

12 Kon nos por demostrá ku nos tin un fe fuerte? E disipel Santiago a bisa: “Ami lo mustra bo mi fe pa medio di mi obranan.” (Sant. 2:18) Nos obranan lo mustra ku nos tin berdadero fe. Laga nos wak algun ehèmpel.

Esnan ku ta dispuesto pa duna lo mihó den e trabou di prediká ta mustra ku nan tin un fe fuerte (Wak paragraf 13)

13. Dikon nos partisipashon den e trabou di prediká ta un manera pa mustra ku nos tin fe?

13 Un bon manera pa mustra ku nos tin fe ta ku nos partisipashon den e trabou di prediká. Dikon? Pasobra ora nos ta prediká, nos ta mustra ku nos tin fe ku e fin ta serka i ku “e lo no tarda.” (Hab. 2:⁠3) Kon nos por sa kon fuerte nos fe ta? Wèl, lo ta bon pa nos puntra nos mes: Kon importante e trabou di prediká ta pa mi? Mi ta hasi tur loke mi por pa papia ku otro hende tokante Dios? Mi ta purba di hasi mas den mi sirbishi? (2 Kor. 13:5) Bo por mustra ku bo tin un fe fuerte ora bo ta “hasi deklarashon públiko di bo fe pa haña salbashon.”​—Lesa Romanonan 10:10.

14, 15. (a) Kon nos por mustra den nos bida diario ku nos tin fe? (b) Konta un eksperensia di un famia ku a mustra ku nan tin un fe fuerte.

14 Tambe nos por mustra ku nos tin fe ora nos ta lucha ku e difikultatnan di bida. Sea ku nos ta enfrentá malesa, desanimashon, depreshon, pobresa òf otro problemanan, nos tin konfiansa ku Yehova i su Yu lo “yuda nos na e momento apropiá.” (Heb. 4:16) Nos por mustra e tipo di konfiansa ei ora nos ta pidi Yehova pa yuda nos no solamente ku kosnan spiritual, sino tambe ku kosnan material. Hesus a bisa ku nos por pidi Dios pa “e pan ku nos mester pa e dia ei.” (Luk. 11:3) Relatonan di Beibel ta konvensé nos ku Yehova por perkurá pa nos. Por ehèmpel, durante un sekura severo ku tabatin na Israel, Yehova a perkurá kuminda i awa pa Elías. Manera Yehova a ordená: “E rafnan tabata trese pan ku karni p’e mainta i pan ku karni atardi; i e tabata bebe for di e roi.” (1 Rei. 17:​3-6) Nos tin fe ku Yehova tin e kapasidat pa perkurá pa nos nesesidatnan tambe.

Nos ta mustra ku nos tin fe ora nos ta lucha ku e difikultatnan di bida (Wak paragraf 14)

15 Nos tin konfiansa ku ora nos apliká prinsipio di Beibel, nos lo no falta nada. Rebeka, un ruman muhé kasá ku ta biba na Asia, a eksperensiá esaki ku su famia. Nan a apliká Mateo 6:33, poniendo e Reino na promé lugá den nan bida i tambe Proverbionan 10:4, trahando duru. Rebeka a splika ku na un dado momento su esposo a disidí di kita for di trabou. El a hasi esaki pasobra el a sinti ku e preshon ku e tabata haña na trabou por a pone e kondishon spiritual di su famia na peliger. Pero nan tabatin kuater yu pa kria. Rebeka ta konta kiko a sosodé: “Nos a kuminsá traha kos dushi pa bende. Durante tur e añanan ku nos a gana nos pan di e manera ei, nos a sinti ku Yehova nunka a bandoná nos. Semper nos tabatin algu di kome.” Nan a konfia ku Beibel su konseho ta esun mihó. Abo tambe a yega di pasa den un situashon kaminda bo mester a mustra ku bo tin e mesun konfiansa ei?

16. Kiko lo ta e resultado si nos ta konfia den Dios?

 16 Si nos sigui Dios su guia, nos por ta sigur ku semper esei lo duna bon resultado. Pablo a sita e palabranan di Habakuk ora el a bisa: “E hustu lo biba pa motibu di su fe.” (Gal. 3:11; Hab. 2:4) P’esei, ta importante pa nos pone fe den Esun ku realmente por yuda nos. Pablo ta rekordá nos ku Dios ta “esun ku, segun su poder ku ta obra den nos, por hasi infinitamente mas di tur loke nos ta pidi òf por imaginá.” (Efe. 3:20) Komo sirbidó di Yehova, nos ta hasi tur loke nos por pa hasi su boluntat. Pero komo ku nos tin nos limitashonnan, nos tin konfiansa ku lo e bendishoná nos esfuersonan. Esta gradisidu nos ta ku Yehova ta ku nos!

YEHOVA LO DUNA NOS MAS FE SI NOS PIDIÉ

17. (a) Kon e apòstelnan a haña kontesta pa nan petishon pa mas fe? (b) Dikon nos por konfia ku Yehova lo kontestá nos petishon pa mas fe?

17 Despues di loke nos a kaba di konsiderá, nos por sinti meskos ku e apòstelnan ku a bisa Hesus: “Duna nos mas fe.” (Luk. 17:5) Na Pentekòste di aña 33 di promé siglo, e apòstelnan a haña un kontesta pa nan petishon ora nan a risibí spiritu santu ku a yuda nan komprondé Dios su propósito mas mihó. Esaki a fortalesé nan fe. Komo resultado, nan a kuminsá ku e kampaña di prediká di mas grandi ku a yega di tuma lugá te ku e tempu ei. (Kol. 1:23) Nos por konfia ku Yehova lo kontestá nos petishon pa mas fe? Sí, pasobra Beibel ta sigurá nos ku si nos pidié “di akuerdo ku su boluntat,” lo e tende nos.​—1 Huan 5:14.

18. Kon Yehova ta bendishoná esnan ku ta sigui traha riba nan fe?

18 Ora nos pone tur nos konfiansa den Yehova, e ta sintié masha kontentu. Yehova lo kontestá nos petishon pa mas fe. Lo e yuda nos fe krese mas i mas pa asina nos “ser konsiderá digno di risibí e Reino di Dios.”​—2 Tes. 1:​3, 5.

^ par. 4 Pa algun ehèmpel, wak e historia di bida di Lillian Gobitas Klose den e ¡Despertad! di 22 di yüli 1993, Feliks Borys den e ¡Despertad! di 22 di febrüari 1994 i Josephine Elias den e ¡Despertad! di sèptèmber 2009.