Israel tabatin asina tantu mondi i palu grandi manera Beibel ta bisa?

BEIBEL ta bisa ku den algun área di e Tera Primintí tabatin palu grandi na abundansia. (1 Rei. 10:27; Hos. 17:15, 18) Sinembargo, awe hopi di e palunan ei a disparsé, i p’esei kisas tin hende ta puntra nan mes si loke Beibel ta bisa ta bèrdat.

Un tròshi di figu sikamor

E buki Life in Biblical Israel (Bida den Israel di Tempu Bíbliko) ta splika ku “den Israel di antigwedat e mondinan tabata hopi mas grandi ku awe.” E regionnan di seru tabata kubrí prinsipalmente ku palunan di pino di Alepo (Pinus halepensis), di eik ku ta keda semper bèrdè (Quercus calliprinos) i di terebinto (Pistacia palaestina). Den e área di Shefela, ku a keda entre e kadena di seru di e parti sentral i e Kosta Mediteráneo, tabatin kantidat di palu grandi di figu sikamor (Ficus sycomorus).

E buki Plants of the Bible (Matanan di Beibel) ta indiká ku den algun zona na Israel tur palu di mata a disparsé. Kon bini? E buki ta splika ku esaki a tuma lugá gradualmente i ta bisa: “Hende a rosa e mondinan i a kaba ku e vegetashon natural pa nan por a haña tereno pa planta, pa bestia por kome yerba, pa haña material di konstrukshon i tambe kombustibel.”