Bai na kontenido

Bai na kontenido

Keda Leal na e Reino di Dios

Keda Leal na e Reino di Dios

“Nan no ta parti di mundu.”HUAN 17:16.

KANTIKA: 63129

1, 2. (a) Dikon nos mester ta leal na Dios, i kiko lealtat tin di haber ku nos posishon neutral? (Wak e promé plachi.) (b) Hopi hende ta leal na kiko? (c) Ki problemanan e tipo di lealtat ei sa kousa?

DIOS su sirbidónan mester ta leal i neutral, no solamente den tempu di guera, sino tambe den tempu di pas. Dikon? Pasobra ora nos a dediká nos mes na Yehova, nos a primintié ku nos lo keda leal na dje, ku nos lo stim’é i ku nos lo obedes’é. (1 Huan 5:3) Nos ke sigui e normanan hustu di Dios sea kual sea nos kriansa, nashonalidat òf kultura. Lealtat na Yehova i na su Reino mester ta mas importante ku kualke otro kos. (Mat. 6:33) Pa logra esaki, nos komo kristian tin ku keda neutral, es desir, nos no ta mete den e konflikto- i kontroversianan di e mundu akí.—Isa. 2:4; lesa Huan 17:11, 15, 16.

2 Hopi hende ku no ta Testigu di Yehova ta masha leal na nan pais, region, kultura òf asta nan ekipo nashonal di deporte. Pero e tipo di lealtat ei a pone hopi hende kompetí ku otro, odia otro i, den kasonan ekstremo, asta mata esnan ku ta leal na e banda kontrali. Aunke nos no ta tuma parti den e konfliktonan akí, nan por afektá nos i nos famia, ya ku nos ta forma parti di e sosiedat  humano. Tin biaha tambe nos por sinti nos indigná pa e mal desishonnan ku gobièrnunan ta tuma, ya ku Dios a traha hende ku un sentido di hustisia. (Gén. 1:27; Deu. 32:4) Ma kon nos ta reakshoná den sirkunstansianan asina? Nos ta keda neutral òf nos ta tuma parti pa un òf otro banda?

3, 4. (a) Dikon kristiannan ta keda neutral den e konfliktonan di mundu? (b) Kiko nos lo analisá den e artíkulo akí?

3 E gobièrnunan djawe ta pone preshon riba nan siudadanonan pa apoyá nan ora surgi konflikto, pero komo kristian, nos no por entregá na e preshon ei. Nos ta sigui Hesus. Nos no ta mete den e desakuerdonan polítiko di e mundu akí ni ta bai guera. (Mat. 26:52) Nos no ta laga hende ku ta pensa ku un parti di e mundu di Satanas ta mas mihó ku otro influensiá nos. (2 Kor. 2:11) Komo ku nos no ta parti di e mundu akí, nos ta keda neutral den e konfliktonan di mundu.—Lesa Huan 15:18, 19.

4 Sinembargo, nos ta imperfekto i p’esei algun di nos kisas te ainda tin sintimentunan negativo pa ku personanan ku ta diferente for di nos. (Yer. 17:9; Efe. 4:22-24) Pues, e artíkulo akí lo duna nos algun sugerensia práktiko pa yuda nos superá e sintimentunan ei ku ta kousa divishon den hende. Tambe nos lo analisá kon nos por kambia nos manera di pensa i train nos konsenshi pa ta leal na e Reino di Dios ora esei ta nesesario.

E MOTIBU PAKIKO NOS NO TA APOYÁ NIUN PARTI DI E MUNDU

5, 6. (a) Kiko Hesus a pensa di e diferente gruponan di hende den su tempu? (b) Dikon Hesus a evitá e mentalidat di e hudiunan di su tempu?

5 Si bo no ta sigur kiko bo tin ku hasi pa keda neutral den un sierto situashon, puntra bo mes: ‘Kiko Hesus lo a hasi na mi lugá?’ Den e pais kaminda Hesus tabata biba tabatin hende for di diferente region, manera Hudea, Galilea i Samaria. I Beibel ta mustra ku tabatin konflikto i desakuerdo entre e hendenan akí. Konsiderá algun ehèmpel. Hudiu ku samaritano no tabata papia ku otro. (Huan 4:9) Tabatin hopi desakuerdo entre fariseo i saduseo. (Echo. 23:6-9) Hudiunan ku a studia na e skolnan rabíniko tabata pensa ku nan ta mihó ku esnan ku no a studia einan. (Huan 7:49) I e pueblo tabatin rabia riba kobradó di belasting i tambe riba e dirigentenan polítiko, kendenan tabata romano. (Mat. 9:11) Ma aunke Hesus a defendé e bèrdat i a rekonosé ku Israel tabata un nashon spesial pa Yehova, nunka e no a siña su disipelnan ku nan tabata mihó ku otro hende. (Huan 4:22) Al kontrario, el a manda nan stima tur hende i mira nan komo nan próhimo.—Luk. 10:27.

6 Dikon Hesus a evitá e mentalidat di e hudiunan di su tempu? Pasobra ni Hesus ni su Tata no ta di akuerdo ku e kontroversianan ku tin den e mundu akí. Ora Yehova a krea Adam ku Eva, su intenshon tabata pa nan yena henter e tera ku hende. (Gén. 1:27, 28) Dios a traha hende di tal manera ku nan tabatin e kapasidat pa produsí tur e rasanan ku ta eksistí awe. P’esei ni Yehova ni Hesus no ta preferá un rasa, nashonalidat òf idioma mas ku otro. (Echo. 10:34, 35; Rev. 7:9, 13, 14) Nos mester sigui nan ehèmpel perfekto.—Mat. 5:43-48.

7, 8. (a) Relashoná ku ki kuestion kristiannan mester mustra bon kla na ki banda nan ta pará? (b) Kiko kristiannan mester rekonosé enkuanto e solushon pa e problemanan di humanidat?

7 Pero tin un kuestion sí den kua nos mester mustra bon kla na ki banda nos ta pará: e kuestion di Yehova su soberania universal. E kuestion ei a surgi den e Hòfi di Edén ora ku Satanas a indiká ku Yehova no tin derecho di goberná humanidat i ku é lo por goberná mihó. Awe, tur hende mester disidí ta kua banda nan ta skohe: e banda di Yehova òf e banda di Satanas. Kiko di abo? Bo ta  skohe e banda di Yehova i ta obedesé su normanan? Òf bo ta preferá di hasi kos na bo manera? Bo ta konvensí ku su Reino ta e úniko solushon pa e problemanan di humanidat? Òf bo ta kere ku hende por goberná nan mes ku éksito sin Dios?—Gén. 3:4, 5.

8 Bo kontesta riba e preguntanan ei ta determiná kon lo bo kontestá ora un hende pidi bo bo opinion riba un problema sosial òf polítiko, òf riba kualke otro tema kontroversial. Tin polítiko ku pa años ta lucha pa haña solushon pa e difikultatnan ku humanidat ta enfrentá, i kisas nan ta sinsero i tin bon intenshon. Ma komo kristian, nos sa ku ta e Reino di Dios ta e úniko gobièrnu ku por resolvé e problemanan ei i garantisá hustisia pa tur hende. P’esei nos mester laga tur kos den man di Yehova i sigui su direkshon. Imaginá bo kiko lo pasa si kada un di nos kuminsá promové nos propio solushon. Esaki lo kousa hopi divishon den nos kongregashonnan, no ta bèrdat?

9. (a) Ki problema tabatin den e kongregashon di Korinto? (b) Kiko apòstel Pablo a konsehá nan pa hasi pa solushoná e problema?

9 Laga nos wak kiko e kristiannan di e promé siglo a hasi ora a surgi un problema ku a dividí e kongregashon. Algun ruman na Korinto a kuminsá bisa: “Ami ta sigui Pablo.” Otronan a bisa: “Ami ta sigui Apolo,” “Ami ta sigui Sefas,” “Ami ta sigui Kristu.” Nos no sa dikon nan tabata bisa asina, pero Pablo no tabata niun tiki kontentu ku e efekto ku esaki tabatin. El a bisa nan: “Ke men ku Kristu ta partí na pida pida anto!” Kiko tabata e solushon pa e manera di pensa akí ku a menasá e pas di e kongregashon? Wèl, Pablo a bisa nan: “Mi ta urgi boso, rumannan, den nòmber di nos Señor Hesukristu, pa boso tur ta di akuerdo ku otro den loke boso ta papia, i pa no tin desunion den boso, sino pa boso ta kompletamente uní den mesun pensamentu i mesun opinion.” Awe tampoko no mester tin niun tipo di divishon entre nos den e kongregashon.—1 Kor. 1:10-13; lesa Romanonan 16:17, 18.

10. Ki ehèmpel apòstel Pablo a usa pa splika dikon nos mester keda neutral den asuntunan polítiko?

10 Pablo a kòrda e kristiannan ungí ku nan tabata siudadano di shelu i ku nan no mester a fiha nan bista riba “kos di mundu.” (Flp. 3:17-20) * Nan tabata embahador ku a representá Dios i Kristu riba tera. I ora un embahador ta den un pais estranhero, e no ta mete den e asuntunan interno ni polítika di e pais ei. Meskos ta konta pa e ungínan; nan ta leal na e Reino di Dios. (2 Kor. 5:20) Pa loke ta e kristiannan ku tin e speransa di biba pa semper riba tera, nan tambe ta leal na e Reino i p’esei nan no ta apoyá niun parti di e mundu akí.

PREPARÁ BO MES PA TA LEAL NA E REINO DI YEHOVA

11, 12. (a) Ki situashonnan por pone ku ta difísil pa un kristian keda leal na e Reino di Dios? (b) Ki situashon Mirjeta a enfrentá? (c) Kon el a logra superá e sintimentunan negativo ku e tabatin?

11 Den mayoria di pais, e hendenan ta sinti un banchi spesial ku esnan ku ta forma parti di e mesun komunidat. Hopi biaha, nan ta masha orguyoso di nan historia, nan kultura i nan idioma. Pero nos no mester laga e aktitut ei influensiá nos. Mas bien, nos tin ku kambia nos manera di pensa i train nos konsenshi pa asina nos sa kiko pa hasi ora surgi kuestionnan ku ta pone nos posishon neutral na prueba. Kon nos por hasi esaki?

12 Por ehèmpel, tuma e kaso di Mirjeta. * Mirjeta a nase den un region ku ántes tabata parti di Yugoslavia, i for di chikitu nan a siñ’é  odia hende di nashonalidat servio. Sinembargo, Mirjeta a bin siña ku Yehova no ta hasi distinshon di persona i ku ta Satanas ta esun ku ta instigá problema entre gruponan étniko, esta, entre hende di diferente nashonalidat i kultura. Esei a pone ku el a hasi hopi esfuerso pa kambia su manera di pensa i deshasí di sintimentunan nashonalista. Lamentablemente, ora ku den su área un guera a start entre vários grupo étniko, el a bolbe kuminsá sinti e odio ku e tabatin for di chikitu, i esei a pone ku e no kier a ni prediká na e servionan. Mirjeta a realisá ku e sintimentunan ei lo no a kita di nan mes, pues el a roga Yehova pa yud’é stòp di sinti asina. Tambe el a pidi Yehova yud’é oumentá su sirbishi pa asina e por a bira pionero. Mirjeta a bisa: “M’a ripará ku e mihó remedi ta pa tene mi mente okupá den sirbishi. Ora mi ta prediká na e hendenan, mi ta purba di imitá e personalidat kariñoso di Yehova, i asina m’a logra ranka e odio for di mi kurason.”

13. (a) Ki situashon a laga un ruman muhé sinti su mes masha malu? (b) Kon e ruman muhé a reakshoná riba e situashon? (c) Ki lès nos por saka for di e eksperensia di Zoila?

13 Tambe tin e kaso di Zoila. E ta originalmente di México, pero awor e ta biba na Europa. Zoila ta kòrda kon algun ruman di su kongregashon ku tabata di un otro parti di Latinoamérika tabata papia ku menospresio di su pais natal, di e kustumbernan i asta di e músika. Kon abo lo a reakshoná? Ta di komprondé ku nan komentarionan a laga Zoila sinti su mes masha malu. Wèl, e bon ta ku Zoila a pidi Yehova yud’é pa e no sinti su mes ofendí. Algun ruman ainda tin problema pa kontrolá nan emoshonnan ora nan tende komentarionan negativo di nan pais di orígen. Pues, sea ku nos ta entre nos rumannan òf nò, nos no mester hasi ni bisa nada ku lo por zona diskriminatorio òf ku ta laga parse ku un sierto grupo ta mihó ku otro. Nos lo no ke kousa divishon ni ofendé niun hende.—Rom. 14:19; 2 Kor. 6:3.

14. Kiko lo yuda nos mira hende manera Yehova ta mira nan?

14 Ta posibel ku bo kriansa òf e ambiente den kua bo a lanta a stimulá sintimentunan patriótiko den bo? Ainda bo tin algun di e sintimentunan ei den bo kurason? Ningun kristian no mester pensa ku su pais, kultura, idioma òf rasa ta mihó ku di otro hende. Pero kiko si bo realisá ku ainda bo tin e sintimentunan ei? Wèl, awor ta un bon momento pa bo meditá riba loke Yehova ta pensa di hende ku ta orguyoso di nan pais (patriotismo) òf ku ta pensa ku nan ta mihó ku otro hende (prehuisio). Esaki lo ta un bon tema pa bo analisá den bo estudio personal òf adorashon komo famia. Anto despues, pidi Yehova yuda bo mira otro hende manera e ta mira nan.—Lesa Romanonan 12:2.

Si nos ke ta leal na Yehova, nos mester para firme ora nos ta konfrontá prueba(Wak paragraf 15, 16)

15, 16. (a) Kon algun hende den mundu lo reakshoná pa motibu ku nos ta keda leal na Dios? (b) Kon mayornan por yuda nan yunan keda leal na Yehova?

15 Tardi òf trempan, tur sirbidó di Yehova lo haña nan mes den situashonnan ku, pa motibu di nan konsenshi, nan mester demostrá ku nan ta diferente for di nan bisiña-, famia- òf kompañeronan di skol òf di trabou. (1 Ped. 2:19) Esaki no mester sorprendé nos! Hesus a spièrta nos ku mundu lo odia nos pa nos posishon diferente. Kòrda ku mayoria di hende ku ta oponé nos no ta komprondé e importansia di e kuestionnan enbolbí den nos posishon neutral komo kristian, pero pa nos nan ta di sumo importansia.

16 Si nos ke ta leal na Yehova, nos mester para firme ora nos ta konfrontá prueba. (Dan. 3:16-18) Miedu di hende por dominá personanan di kualke edat, pero foral hóbennan no gusta di ta diferente for di otronan. Mayornan, si boso yunan ta enfrentá pruebanan manera saludamentu di bandera òf selebrashonnan patriótiko, yuda nan  para firme. Usa e periodonan di Adorashon Komo Famia pa splika boso yunan dikon ta asina importante pa mantené un posishon neutral i siña nan tambe kon pa defendé nan kreensianan na un manera kla i ku rèspèt. Esei lo duna nan e kurashi ku nan mester pa superá kualke prueba ku presentá. (Rom. 1:16) Ademas, si ta nesesario, papia ku nan maestronan di skol i asina boso yunan ta mira ku boso ta para nan tras.

APRESIÁ E VARIEDAT DEN YEHOVA SU KREASHON!

17. Ki mentalidat nos mester evitá, i dikon?

17 Ta di komprondé ku nos ta gusta e kuminda, e idioma, e paisahe i e kustumbernan di e pais kaminda nos a lanta. Pero nos tin ku lucha kontra e mentalidat di “esun di mi ta mihó.” Tin un gran variedat den tur loke Yehova a krea, i el a hasi esei pa nos plaser. (Sal. 104:24; Rev. 4:11) Pues, pakiko insistí ku nos manera di hasi kos ta esun mihó?

18. Kiko ta algun bendishon ku nos lo kosechá si nos ta mira otro hende manera Yehova ta mira nan?

18 Dios ke pa tur sorto di hende yega na un konosementu eksakto di e bèrdat i biba pa semper. (Huan 3:16; 1 Tim. 2:3, 4) Si nos tin un mente habrí i ta dispuesto pa skucha e ideanan di otro hende—tanten ku nan ideanan ta aseptabel pa Yehova—esei ta hasi nos bida mas interesante i ta yuda nos keda uní ku nos rumannan. Manera nos a mira kaba, nos no ta mete den e konfliktonan di mundu ni ta tuma parti pa niun banda, ya ku nos ta leal na Yehova i na su Reino. Es mas, nos ta hasi nos bèst pa evitá e orguyo i spiritu di kompetensia ku ta dominá e mundu akí di Satanas. Nos ta masha gradisidu na Yehova ku el a siña nos promové pas i ser humilde. Nos ta kompletamente di akuerdo ku e eskritor di salmo ku a bisa: “Mira, ki bon i ki dushi ta pa rumannan biba huntu den armonia!”Sal. 133:1.

^ par. 10 Filipo tabata un kolonia di Roma. Kisas algun miembro di e kongregashon einan tabata siudadano romano, i esaki lo a duna nan mas privilegio ku e otro rumannan.

^ par. 12 A kambia algun nòmber.