Bo a tuma tempu pa lesa e último edishonnan di E Toren di Vigilansia? Wèl, wak si bo por kontestá e siguiente preguntanan:

Kristiannan mester resa na Hesukristu?

Nò. Hesus a siña nos resa na Yehova, i e mes a pone e ehèmpel ora el a resa na su Tata. (Mat. 6:6-9; Huan 11:41; 16:23) Su promé siguidónan a sigui su ehèmpel i a resa na Yehova, no na dje. (Echo. 4:24, 30; Kol. 1:3)—1/1, página 14.

Kiko nos por hasi tur aña pa prepará nos mes pa konmemorá e morto di Hesus?

Nos por sigui e programa di lesamentu di Beibel pa e Konmemorashon. Nos por hasi esfuerso tambe pa ekspandé nos sirbishi durante e periodo ei. I nos por meditá i hasi orashon riba e speransa ku Dios a duna nos.—15/1, página 14-16.

Kiko a pasa ku e dos prezunan egipsio ku a revelá nan soño straño na Yosef?

Yosef a splika e kopero di Fárao ku lo e haña su puesto bèk. Ma e panadero, el a bisa ku Fárao lo laga mat’é i kologá su kurpa na palu. Tur e dos soñonan ei a kumpli manera Yosef a bisa. (Gén. 40:1-22)—1/2, página 12-14.

Ki regalo inesperá e rumannan na Hapon a risibí?

Nan a haña un foyeto ku tin e Evangelio di Mateo saká for di e Tradukshon di Mundu Nobo. E rumannan ta lag’é den sirbishi ku hopi hende ku no sa mashá di Beibel.—15/2, página 3.

Kiko a pone ku e bon notisia por a yega na mas hende den e promé siglo?

E stabilidat di e Pax Romana (Pas Romano) a nifiká ku tabatin ménos konflikto. E disipelnan di e promé siglo por a hasi uso di e bon ret di kaminda romano. Hopi kaminda e hendenan tabata papia griego, i esei a yuda e disipelnan prediká, asta na e hudiunan plamá den henter e imperio. Ademas, e kristiannan por a usa e lei romano pa defendé e bon notisia.—15/2, página 20-23.

Dikon kristiannan berdadero no ta selebrá Pasku di Resurekshon?

Hesus a bisa su siguidónan pa konmemorá su morto. E no a bisa nada di rekordá su resurekshon. (Luk. 22:19, 20)—1/3, página 8.

Dikon den e último añanan nos publikashonnan no ta papia dje tantu ei mas di tipo i antitipo bíbliko?

Tin biaha Beibel mes ta bisa ku algun personahe ta representá un persona òf algu mas importante. Nos ta haña un ehèmpel di esaki na Galationan 4:21-31. Pero den otro kasonan, ta mihó nos no duna un nifikashon simbóliko na un relato bíbliko. Loke sí nos por buska ta e lèsnan balioso ku nos por siña di e personahenan i susesonan menshoná den Beibel. (Rom. 15:4)—15/3, página 17-18.

Dikon un fragmento di papiro di antigwedat ku nan a haña den un monton di sushi na Egipto ta asina importante pa nos awe?

Den siglo 20, nan a haña un fragmento di papiro ku ta kontené parti di e Evangelio di Huan. El a ser skirbí kisas djis un par di dékada despues ku Huan a skirbi su Evangelio. Su kontenido ta konfirmá ku e mensahe di Beibel a ser transmití ku eksaktitut i ta konfiabel.—1/4, página 10-11.

Dikon ta un muestra di amor pa ekspulsá un pekadó ku no a arepentí?

Beibel ta bisa bon kla ku mester ekspulsá pekadó ku no arepentí for di e kongregashon. (1 Kor. 5:11-13) Esei ta un paso serio, pero e por duna bon resultado. E ta trese onor pa e nòmber di Dios, e ta tene e kongregashon limpi i e por pone e pekadó kambia su mal aktitut.—15/4, página 29-30.