Bai na kontenido

Bai na kontenido

 FOR DI NOS ARCHIVO

E Kafetaria Tabata Drei Riba Amor

E Kafetaria Tabata Drei Riba Amor

NOS ta sinti nos masha kontentu ora nos bini huntu na asamblea i kongreso pa kome na e bankete di Yehova. Pero tin un kos mas ku ta kontribuí na nos alegria na e okashonnan ei: e dushi momentonan ku nos ta pasa komiendo kuminda literal huntu ku nos rumannan.

Na sèptèmber 1919, e Studiantenan di Beibel a tene un kongreso di ocho dia na Cedar Point (Ohio, Merka). E rumannan a hasi areglo ku vários hotèl pa duna alohamentu i kuminda na e delegadonan. Pero a bini asina tantu hende ku mayoria di e waiternan di un hotèl a kita. E manager di e kafetaria tabata asina desesperá ku el a puntra si tin delegado hóben ku por a duna un man, i hopi ruman a ofresé nan mes. Sadie Green tabata un di nan. El a bisa: “Tabata promé biaha ku mi a traha waiter, pero nos a pasa masha dushi.”

Sierra Leone, 1982

Den e añanan ku a sigui, masha hopi ruman—entre nan un kantidat di hóben—a traha ku smak den kushina na kongreso preparando kuminda pa e rumannan. E trahamentu ku otro ruman a motivá hopi hóben pa pone metanan spiritual. Esaki ta loke a pasa ku Gladys Bolton, kende a traha den kafetaria na un kongreso na 1937. El a bisa: “Mi a konosé rumannan di otro lugá i nan a konta mi kon nan tabata vense nan problemanan. E ora ei mi a pone e meta di bira pionero.”

Beulah Covey, un otro delegado, a bisa: “E rumannan tabata hasi e trabou asina bon ku tur kos tabata kana manera oloshi.” Ma e trabou di prepará i sirbi kuminda tabatin su retonan. Tuma, por ehèmpel, loke a pasa ku Ruman Angelo Manera na 1969. Ta ora ku el a yega e Stadion di Dodger na Los Angeles (California), el a haña sa ku t’e tabata esun enkargá ku kafetaria. El a atmití: “M’a haña e shòk di mi bida!” Anto pa e kongreso ei, nan mester a koba un kanal di 400 meter pa pasa un pipa di gas pa e kushina!

Frankfurt, Alemania, 1951

Na 1982, na Sierra Leone, boluntarionan diligente mester a limpia e tereno promé i despues traha e kafetaria ku e materialnan ku nan tabatin na man. Na 1951, na e kongreso na Frankfurt (Alemania), e  rumannan tabatin un idea masha ingenioso: nan a hür un lokomotif (un tipo di trein) pa generá stom pa keinta 40 wea grandi pa kushiná kuné. E rumannan a sirbi 30.000 kuminda pa ora! Pa aliviá e trabou di e 576 boluntarionan ku tabata laba tayó, esnan ku a asistí na e kongreso a bini ku nan mes kuchú ku fòrki. Na Yangon (Myanmar), e kòkinan a tene konsiderashon ku e delegadonan internashonal i a usa ménos pika den e platonan ku nan a sirbi nan.

“NAN TA KOME PARÁ”

Annie Poggensee ta kòrda loke a pasa kuné na 1950 na un kongreso na Merka miéntras e tabata warda den rei den un higra di solo pa kome: “Ku masha atenshon m’a skucha e kòmbersashon animá entre dos ruman muhé ku a bini ku barku for di Europa.” Nan tabata papia tokante kon Yehova a yuda nan yega na e kongreso. Annie a bisa: “E ratu largu ku nan mester a warda den rei—i e kalor—no tabata un problema. No tabatin niun hende mas felis ku e dos rumannan akí.”

Seul, Korea, 1963

Kon e rumannan a logra sirbi míles di hende kuminda durante e pousa di mèrdia? Na hopi di e kongresonan akí, nan tabata arma tènt grandi i pone rei di mesa haltu pa e rumannan kome pará i asina kaba lihé pa traha lugá pa otro. Un persona ku no tabata Testigu di Yehova a komentá: “E religion akí ta straño! Nan ta kome pará.”

Outoridatnan militar i sivil a keda impreshoná ku e manera organisá i efisiente ku asuntunan tabata kana. Despues ku personal di ehérsito merikano a inspekshoná nos kafetaria na Stadion di Yankee na New York City, nan a rekomendá Komandante Faulkner di Departamento di Guera Britániko p’e tambe hasi un inspekshon similar. Pues, na 1955, e ku su kasá a asistí na e Asamblea “Reino Triunfante” na Twickenham (Inglatera). El a bisa ku e por a mira ku e kafetaria tabata drei riba amor.

Pa dékadanan, míles di ruman a prepará kuminda nutritivo i ekonómiko pa tur ku a asistí na kongreso. Pero e problema tabata ku nan mester a traha hopi ora i asta pèrdè parti di e programa. P’esei, na fin di dékada di 1970, a simplifiká e areglo di kuminda den hopi pais. Anto, for di 1995 ta pidi tur hende pa bini ku nan mes kuminda. Asina e boluntarionan ku tabata prepará i sirbi kuminda por a disfrutá di e programa spiritual i di e kompania di e rumannan. *

Yehova stima su sirbidónan ku ta traha duru pa sirbi nan rumannan! Kisas tin ruman ta sinti nostalgia pa e dushi tempu ku nan a traha den kafetaria. Pero un kos no a kambia: Amor ketu bai ta e ingrediente prinsipal di nos kongresonan.—Huan 13:34, 35.

^ par. 12 Naturalmente, ketu bai tin mester di boluntario pa yuda den e otro departamentonan di kongreso.