Bai na kontenido

Bai na kontenido

Bo Por Gana e Bataya Kontra Satanas!

Bo Por Gana e Bataya Kontra Satanas!

“Tuma boso posishon kontra [Satanas], firme den fe.”—1 PED. 5:9.

1. (a) Dikon Satanas ta ataká nos ku asina tantu rabia? (b) Kon bini nos sa ku nos por gana e bataya kontra Satanas?

SATANAS ta hibando un guera kontra e ungínan ku ta riba tera i e ‘otro karnénan.’ (Huan 10:16) E ke kaba ku mas tantu sirbidó di Yehova posibel den e poko tempu ku a ked’é. (Lesa Revelashon 12:9, 12.) Nos lo por gana e bataya akí kontra Satanas? Klaru ku sí! Beibel ta asta bisa nos kon: “Oponé Diabel, i lo e hui for di boso.”—Sant. 4:7.

2, 3. (a) Dikon ta kumbiní Satanas ku hende ta kere ku e no ta eksistí? (b) Dikon abo sa sigur ku Satanas ta eksistí?

2 Hopi hende ta hasi bofon di e idea ku Satanas ta eksistí. Nan ta pensa ku Satanas i e demoñonan ta sernan imaginario ku bo ta haña den buki, pelíkula di horor i wega di vidio, i ku hende inteligente no ta kere den e kosnan ei. Pero bo ta kere ku Satanas ku su kompinchinan ta rabia ku hende ta pensa ku nan no ta personanan real? Nò. Al kontrario! E mes ta fomentá e idea ei, pasobra asina ta mas fásil p’e gaña e hendenan ku ta duda ku e ta eksistí.—2 Kor. 4:4.

3 Pero nos ku ta sirbidó di Yehova no ta entre e hendenan ku Satanas ta gaña. Nos sa sigur ku e ta eksistí. Kon nos por sa?  Wèl, Beibel ta bisa nos ku ta Satanas a papia ku Eva via di un kolebra. (Gén. 3:1-5) Ta Satanas a papia ku Yehova i a kuestioná Yòb su motibu pa sirbi Dios. (Yòb 1:9-12) Ta Satanas a purba di hinka Hesus den tentashon. (Mat. 4:1-10) I despues ku e Reino a nase na 1914, ta Satanas “a bai pa bringa” kontra e restu di e ungínan riba tera. (Rev. 12:17) E bataya ei ta sigui te awe: Diabel ta purba di kaba ku e fe di e restu di e 144.000 i ku e fe di e otro karnénan. Pa gana e bataya akí, nos mester oponé, òf resistí, Satanas i mantené nos fe firme. E artíkulo akí lo presentá tres manera ku nos por hasi esei.

RECHASÁ ORGUYO

4. Dikon nos ta bisa ku Satanas ta e kolmo di orguyo i arogansia?

4 Satanas no ta niun tiki humilde. E echo ku un angel tabatin e tribilidat di kuestioná Yehova su derecho di goberná i establesé su mes komo un dios rival ta e kolmo di orguyo i arogansia. P’esei mes nos mester rechasá orguyo i kultivá humildat. Asina nos ta resistí Satanas. (Lesa 1 Pedro 5:5.) Pero kiko ta orguyo? Semper e ta algu malu?

5, 6. (a) Splika si orguyo semper ta malu. (b) Ki tipo di orguyo ta peligroso? (c) Duna algun ehèmpel bíbliko di orguyo peligroso.

5 Segun un dikshonario, orguyo ta un sintimentu di konfiansa i rèspèt propio. Tambe orguyo por ta “un sintimentu di satisfakshon ku bo tin pasobra abo òf un hende yegá di bo a hasi algu bon òf tin algu bon.” No tin nada malu den esei. Apòstel Pablo a bisa e rumannan na Tesalónika: “Nos ta papia ku orguyo di boso den e kongregashonnan di Dios pa motibu ku boso ta demostrá perseveransia i fe den tur e persekushon- i tribulashonnan ku boso ta pasa aden.” (2 Tes. 1:4) Pues, ta normal—i asta probechoso—pa nos sinti nos orguyoso di e logronan di otro hende òf di nos mes. Nos no tin nodi di sinti bèrgwensa di nos famia, nos kultura òf nos pais.—Echo. 21:39.

6 Di otro banda, tin un tipo di orguyo ku por daña nos relashon ku otro hende i foral nos amistat ku Yehova. E tipo di orguyo ei por pone nos rechasá bon konseho en bes di asept’é humildemente. (Sal. 141:5) E orguyo akí por pone un hende kere ku e ta masha kos òf haña e aktitut arogante di kere—hopi biaha sin motibu—ku e ta mihó ku otro hende. Yehova ta odia e tipo di orguyo ei. (Eze. 33:28; Ámos 6:8) En kambio, Satanas lo mester ta superkontentu ora e mira hende ta imitá su arogansia i ta broma tokante nan mes. Nos por imaginá nos kon el a gosa ora ku hòmbernan manera Nimròd, Fárao i Absalon tabata broma pa motibu di orguyo inkorekto! (Gén. 10:8, 9NW; Éks. 5:1, 2; 2 Sam. 15:4-6) Orguyo a hunga un ròl tambe den e kaida di Kain. Yehova Dios mes a konseh’é, ma e tabata muchu orguyoso pa aseptá e korekshon akí. E tabata tèrko i a pasa por haltu di e spièrtamentu di Yehova, i esei a hib’é direktamente na desaster.—Gén. 4:6-8.

7, 8. (a) Kiko ta rasismo, i dikon nos por bisa ku e ta un forma di orguyo? (b) Splika kon orguyo por kibra e pas di e kongregashon.

7 Awe, hende ta demostrá orguyo na vários manera ku ta perhudiká otronan. Por ehèmpel, ora hende ta rasista. Segun un dikshonario, rasismo ta e despresio ku un persona ta sinti pa hende di otro rasa i ta “e kreensia ku hende di algun rasa ta superior pasobra nan tin kualidatnan i abilidatnan ku otro rasanan no tin.” Orguyo di rasa a hiba na disturbio, guera i asta na matamentu masal di sierto grupo di hende.

8 Klaru ku kosnan asina no ta tuma lugá  den e kongregashon kristian. Sinembargo, tin biaha orguyo por provoká desakuerdo entre rumannan, i fásilmente esaki por sali for di man. Ta asina a pasa ku algun kristian di promé siglo. Pa e motibu ei disipel Santiago a hasi nan e pregunta penetrante akí: “Di unda e bringamentu i pleitamentu ku tin den boso ta bini?” (Sant. 4:1) Pues, si nos ta menospresiá algun ruman òf ta sinti ku nos ta mihó ku nan, nos lo por bisa òf hasi algu ku ta hùrt nan. (Pro. 12:18) Ta bisto anto ku orguyo por kibra e pas di e kongregashon.

9. Kon Beibel ta yuda nos kombatí rasismo i otro formanan inkorekto di orguyo? (Wak e promé plachi.)

9 Si nos tin e tendensia di pensa ku nos ta mihó ku otro hende, nos tin ku kòrda ku Yehova ta odia “hende ku ta orguyoso di kurason.” (Pro. 16:5) Tambe lo ta bon pa nos analisá nos kurason i puntra nos mes: ‘Mi ta sinti ku mi rasa, mi pais òf mi kultura ta mihó ku di otro hende?’ Si nos ta laga orguyo nashonal òf di rasa influensiá nos, nos ta pasa por haltu di e echo ku ta ‘for di ún hende Dios a traha tur nashon.’ (Echo. 17:26) Den un sentido, nos tur ta di e mesun rasa, pasobra nos tur a bini di e mesun tata: Adam. P’esei ta masha apsurdo pa kere ku algun rasa ta mihó ku otro. Esei ta loke e Diabel ke pa nos pensa, pasobra asina e ta haña chèns di kaba ku nos amor i union kristian. (Huan 13:35) Pues, pa gana e bataya kontra Satanas, nos tin ku rechasá orguyo i arogansia.—Pro. 16:18.

RECHASÁ MATERIALISMO I NO STIMA E MUNDU

10, 11. (a) Dikon lo por ta fásil pa namorá di e mundu akí? (b) Kon Démas kisas a demostrá amor pa mundu?

10 Satanas ta “gobernante di e mundu akí.” Henter e mundu ta den su poder. (Huan 12:31; 1 Huan 5:19) Ta lógiko ku hopi di e kosnan ku ta popular den e mundu djawe ta bai kontra di e normanan di Dios. Naturalmente, esei no ke men ku tur loke tin den mundu ta malu. Sinembargo, nos por tin sigur ku Satanas lo usa e mundu akí pa probechá di nos deseonan i pone nos peka, òf lo e purba di laga nos namorá di mundu i neglishá nos adorashon di Yehova.—Lesa 1 Huan 2:15, 16.

11 Algun kristian di e promé siglo a stima mundu. Un di nan tabata Démas. Pablo a skirbi tokante dje: “Démas a bandoná mi—ya ku el a stima e mundu akí.” (2 Tim. 4:10) Beibel no ta bisa presis kiko di mundu a atraé Démas i pon’é bandoná Pablo. Kisas el a kuminsá stima kosnan material mas ku su sirbishi na Yehova. En todo kaso, Démas a pèrdè e oportunidat di haña privilegionan spiritual emoshonante. Anto a kambio di kiko? Kiko e mundu akí lo por a ofres’é ku ta mas balioso ku e bendishonnan ku Yehova lo por a dun’é komo kompañero di Pablo?—Pro. 10:22.

12. Kon nos por bira víktima di “e poder engañoso di rikesa”?

12 Algu similar por pasa ku nos. Komo kristian, nos tin e deseo natural di perkurá pa nos nesesidatnan material i di nos famia. (1 Tim. 5:8) Ademas, Yehova a traha nos ku e deseo di biba den un lugá agradabel. Nos por mira esaki na e echo ku el a duna Adam ku Eva un bunita paradeis pa nan biba aden. (Gén. 2:9) Ma Satanas ta purba di laga e deseonan ei sali for di kontrol dor di usa “e poder engañoso di rikesa.” (Mat. 13:22) E ta laga hende kere ku plaka òf kos material lo hasi nan felis òf duna nan éksito. Pero esei ta un gran mentira, i e por pone nos pèrdè e kos di mas  balioso ku nos tin: nos amistat ku Yehova. Hesus a spièrta su disipelnan: “Ningun hende no por ta esklabo di dos doño, pasobra sea lo e odia esun i stima e otro òf lo e pega na esun i despresiá e otro. Boso no por ta esklabo di Dios i di Rikesa.” (Mat. 6:24) Bon mirá, nos no por ta esklabo di plaka, pasobra si ta asina, nos a stòp di sirbi Yehova. Esei ta nèt loke Satanas ke pa nos hasi! Nunka permití pa plaka òf kos material bira mas importante ku nos amistat ku Yehova. Pa nos por gana e bataya kontra Satanas, nos mester tin un punto di bista balansá di kos material.—Lesa 1 Timoteo 6:6-10.

RECHASÁ INMORALIDAT SEKSUAL

13. Ki opinion robes hopi hende tin di matrimonio i sèks?

13 Un otro trampa di Satanas ta inmoralidat seksual. Awe, hopi hende ta pensa ku fieldat na nan kasá—i asta matrimonio—ta kos ku a bai fo’i moda i ku ta kita nan libertat. Por ehèmpel, un aktris famoso a bisa: “Ta imposibel pa un hòmber òf un muhé tin un solo pareha. Mi no konosé niun hende ku ta fiel na su pareha òf ku lo ke ta fiel.” Un otro aktor a bisa: “Mi no tin sigur ku nos ta trahá pa pasa henter nos bida ku e mesun persona.” Pero matrimonio ta un regalo di Dios. Diabel lo mester ta keda masha kontentu kada biaha ku e tende un hende famoso papia ku menospresio di matrimonio. Satanas no ta niun tiki interesá den apoyá e areglo di matrimonio. Al kontrario! E ke pa esaki frakasá. P’esei, pa nos gana e bataya kontra Satanas, nos mester respetá matrimonio.

14, 15. Kon nos por rechasá inmoralidat seksual?

14 Sea ku nos ta soltero òf kasá, nos mester rechasá tur tipo di piká seksual. Ta bèrdat ku e bataya no ta fásil. Por ehèmpel, si bo ta un hóben, kisas bo ta tende bo kompañeronan di skol broma kon nan ta manda mensahe-, potrèt- òf vidionan seksual via telefòn. E práktika ei nan ta yama “sexting,” i den algun pais nan ta konsider’é meskos ku pornografia di mucha. Otro hóbennan ta konta ku orguyo kon nan tin sèks ku ken ku nan ke. Beibel ta bisa ku “esun ku ta praktiká fornikashon ta peka kontra su mes kurpa.” (1 Kor. 6:18) Malesanan transmití seksualmente a kousa basta sufrimentu i morto. Ademas, segun un enkuesta bou di hóbennan soltero, mayoria di nan ku a pèrdè nan birginidat a bisa ku nan ta lamentá esei. Pues, e mundu di entretenimentu ke laga nos kere ku un hende por kibra lei di Dios i kometé inmoralidat seksual sin niun konsekuensia òf daño. Ma esaki no ta bèrdat! Hende ku ta kere esei ta bira víktima di “e poder engañoso di piká.”—Heb. 3:13.

15 Kiko bo por hasi si bo tin problema pa resistí e tentashon pa kometé inmoralidat seksual? Pa kuminsá, rekonosé ku bo tin un debilidat. (Rom. 7:22, 23) Kaba pidi Dios duna bo forsa pa resistí. (Flp. 4:6, 7, 13) Evitá situashonnan ku por hiba na inmoralidat. (Pro. 22:3) Anto ora e tentashon presentá, rechas’é sin pensa dos biaha!—Gén. 39:12.

16. (a) Kon Hesus a reakshoná riba e tentashonnan di Satanas? (b) Kiko nos por siña for di e ehèmpel di Hesus?

16 Hesus tabata un bon ehèmpel pa nos den resistí tentashon. E no a laga e promesanan di Satanas engañ’é, ni e no a para pensa riba nan pro i nan kontra. Mas bien, el a kontest’é mesora ku e palabranan: “Ta pará skirbí.” (Lesa Mateo 4:4-10.) Hesus tabata konosé e Palabra di Dios bon i ta  p’esei e por a aktua mesora i sita tekstonan di Beibel ora Satanas a purba di hink’é den tentashon. Pa nos gana e bataya kontra Satanas, nos mester sòru pa nos no kai den e tentashon pa kometé inmoralidat seksual.—1 Kor. 6:9, 10.

PERSEVERÁ I LO BO GANA

17, 18. (a) Ki otro armanan Satanas ta usa, i dikon esaki no ta un sorpresa pa nos? (b) Kiko lo pasa ku Satanas, i kon esaki ta animá bo pa perseverá?

17 Orguyo, materialismo i inmoralidat seksual ta tres di e armanan ku Satanas ta usa pa ataká nos. Pero e tin hopi mas. Por ehèmpel, algun kristian ta haña oposishon di nan famia, òf nan kompañeronan di skol ta hasi bofon di nan. Otronan ta biba den paisnan kaminda gobièrnu ta purba di prohibí e trabou di prediká. E difikultatnan ei no ta un sorpresa pa nos, pasobra Hesus a spièrta su disipelnan: “Tur hende lo odia boso pa motibu di mi nòmber, ma esun ku perseverá te na fin lo ser salbá.”—Mat. 10:22.

Satanas lo ser destruí pa semper (Wak paragraf 18)

18 Kon nos por gana e bataya kontra Satanas? Hesus a bisa: “Pa medio di boso perseveransia, boso lo gana boso alma.” (Luk. 21:19) Kòrda ku niun hende no por hasi nos nada ku lo kousa nos daño permanente. Niun hende no por kibra nos amistat ku Dios, a ménos ku nos mes permití esei. (Rom. 8:38, 39) Kiko si un sirbidó di Dios muri? Akaso esei ta un viktoria pa Satanas? Di ningun manera! Yehova a primintí ku lo e resusitá su sirbidónan. (Huan 5:28, 29) En kambio, Satanas sí no tin futuro. Despues ku destruí su mundu malbado, lo e ser bentá den abismo pa 1.000 aña. (Rev. 20:1-3) Na final di Hesus su Reinado di Mil Aña lo laga Satanas “sali for di su prizòn” pa un periodo kòrtiku, i lo e purba pa di último biaha di gaña humanidat perfekto. Pero e ora ei lo e ser destruí pa semper. (Rev. 20:7-10) Kontrali na Satanas, abo tin un futuro briante bo dilanti. Tuma bo posishon kontra Satanas, firme den fe. Bo por gana e bataya kontra dje!