Bai na kontenido

Bai na kontenido

Nan A “Mira” e Kosnan Ku Dios A Primintí

Nan A “Mira” e Kosnan Ku Dios A Primintí

“E promesanan no a kumpli den nan tempu, ma nan a mira nan djaleu.”—HEB. 11:13.

1. Dikon ta bon ku nos por imaginá kosnan ku nos no a mira? (Wak e promé plachi.)

YEHOVA a duna nos un regalo maravioso. El a duna nos e kapasidat di imaginá kosnan ku nos no a mira. Esei ta yuda nos spera ansiosamente riba kosnan bon i tambe plania pa futuro i asina evitá problema. Yehova tin e kapasidat di mira kosnan ku no a sosodé ainda, i den Beibel el a bisa nos algun kos bon ku lo bai pasa. Aunke nos no por mira nan, nos por imaginá nos kiko lo bai pasa, es desir, nos por forma un kuadro mental di nan i tene fe ku nan lo sosodé.—2 Kor. 4:18.

2, 3. (a) Kon nos imaginashon por yuda nos? (b) Ki preguntanan nos lo analisá den e artíkulo akí?

2 Pero tin biaha nos ta imaginá nos kosnan ku no ta basá riba realidat. Por ehèmpel, si un mucha chikitu ta imaginá su mes ta bula rònt riba lomba di un barbulètè, esei ta puru fantasia. En kambio, Ana, mama di Samuel, a usa su imaginashon pa pensa riba algu ku sigur lo a sosodé: e dia ku lo el a hiba su yu pa sirbi na e tabernakel di Yehova huntu ku e saserdotenan. Esei no tabata un fantasia, sino algu ku el a disidí ku e ta bai hasi. Pues, e echo ku e por a imaginá su mes e dia ei a dun’é e forsa pa kumpli ku su promesa na Yehova. (1 Sam. 1:22) Asina tambe, ora nos  ta imaginá nos e kosnan ku Yehova a primintí, nos ta pensando riba kosnan ku lo sosodé sigur.—2 Ped. 1:19-21.

3 Sin duda, hopi sirbidó di Yehova den tempu bíbliko a imaginá nan e kosnan ku el a primintí nan. Kon nan a benefisiá di esaki? I dikon ta bon pa nos “mira” òf imaginá nos mes kon bida lo ta ora Yehova kumpli ku e kosnan maravioso ku el a primintí hende ku ta obedes’é?

NAN FE A BIRA MAS FUERTE ORA NAN A “MIRA” NAN FUTURO

4. Ki base Abel tabatin pa imaginá su mes un mihó futuro?

4 Abel tabata e promé sirbidó fiel di Dios. El a “mira” e kosnan ku Yehova a primintí? Wèl, e tabata sa kiko Yehova a bisa e kolebra despues ku Adam ku Eva a peka: “Lo mi pone enemistat entre abo i e muhé, i entre bo simia i su simia; e lo heridá bo kabes, i abo lo heridá su hilchi di pia.” (Gén. 3:14, 15) Aunke Abel no tabata sa presis kon e palabranan akí lo a kumpli, lo e mester a keda pensa riba loke Dios a bisa. Probablemente el a imaginá su mes ku e kolebra lo a ‘heridá un hende na su hilchi di pia’ pa asina humanidat por a bira perfekto atrobe. Pero, sin importá kiko Abel a imaginá su mes, e tabatin fe den e promesa di Dios, i p’esei Yehova a aseptá su sakrifisio.—Lesa Génesis 4:3-5; Hebreonan 11:4.

5. Kon Enok su imaginashon di futuro a anim’é?

5 Enok tabata un otro hòmber ku tabatin un fe firme den Dios. E tabata biba meimei di hende malbado ku tabata ofendé Dios. El a profetisá ku Yehova lo a bini “ku su multitut di angel santu, pa ehekutá huisio kontra tur, i pa deklará tur e malbadonan kulpabel pa motibu di tur nan echonan malbado ku nan a kometé i pa motibu di tur e kosnan ofensivo ku pekadónan malbado a papia kontra dje.” (Hudas 14, 15) Kiko a yuda Enok prediká ku asina tantu kurashi? Wèl, kasi sigur e palabranan inspirá ei a yuda Enok imaginá su mes un mundu sin hende malbado.—Lesa Hebreonan 11:5, 6.

6. Riba kiko Noe lo a keda pensa despues di Diluvio?

6 Noe tabatin fe den Yehova, i esei a yud’é sobrebibí e Diluvio. (Heb. 11:7) Despues ku el a sali for di e arka, su fe a motiv’é pa ofresé sakrifisio di bestia. (Gén. 8:20) E tambe, meskos ku Abel, tabatin fe ku un dia humanidat lo ser librá di piká i morto. Pero despues di Diluvio, mundu a drenta un époka skur, durante kua Nimròd a kuminsá goberná, i el a fomentá rebelion kontra Yehova. Ma Noe a keda ku su fe i speransa. (Gén. 10:8-12, NW) Sin duda, Noe a imaginá su mes e tempu ora ku hende lo ser librá di gobièrnu opresivo, piká heredá i morto, i esaki sigur a anim’é mashá. Nos tambe por imaginá nos e tempu maravioso ei ku awor ta mas serka ku nunka!—Rom. 6:23.

NAN A “MIRA” E KOSNAN KU DIOS A PRIMINTÍ

7. Ki futuro Abraham, Isak ku Yakòb por a “mira” pa nan desendientenan?

7 Abraham, Isak ku Yakòb por a “mira,” òf imaginá nan, un futuro maravioso ya ku Yehova a primintí nan ku pa medio di nan desendiente tur e nashonnan di mundu lo a risibí bendishon. (Gén. 22:18; 26:4; 28:14) Dios a bisa tambe ku nan famia lo a bira un nashon grandi i ku lo el a duna nan un bunita lugá di biba: e Tera Primintí. (Gén. 15:5-7) Fe a pone ku e hòmbernan temeroso di Dios akí por a “mira” nan famianan ta biba kaba den e tera ei. De echo, for di momento ku Adam ku Eva a peka, Yehova a sigurá su  sirbidónan leal ku un dia hende lo tin bida perfekto atrobe.

8. Kiko a yuda Abraham demostrá un fe sobresaliente?

8 Beibel ta indiká ku “aunke e promesanan no a kumpli” den tempu di Abraham i otro sirbidónan leal di Dios, “nan a mira nan djaleu i a risibí nan gustosamente.” (Lesa Hebreonan 11:8-13.) Kon nan por a mira nan? Probablemente, nan a usa nan imaginashon. Abraham tabatin asina tantu motibu pa konfia den Yehova ku tabata komo si fuera el a mira e kosnan ku Dios a primintié, sin ku el a risibí nan ainda. Esei a fortalesé su fe i a yud’é obedesé Yehova asta bou di sirkunstansianan hopi difísil.

9. Kon Abraham su fe den e promesanan di Dios a yud’é?

9 Abraham su fe den e promesanan di Dios a dun’é e fortalesa pa kumpli ku Yehova su boluntat. Por ehèmpel, el a bai for di e stat Ur i a nenga di establesé su mes permanentemente den un di e statnan di Kanan. Dikon? Pasobra e tabata sa ku e dianan di e statnan rònt di dje tabata kontá, ya ku nan gobernantenan no tabata sirbi Yehova. (Hos. 24:2) Abraham a pasa e restu di su bida sperando “e stat ku tin berdadero fundeshi, e stat di kua Dios mes ta e diseñadó i konstruktor.” (Heb. 11:10) Ku otro palabra, Abraham a “mira” su mes kaba ta biba den un lugá permanente, goberná pa Yehova. Abel, Enok, Noe, Abraham i otro personanan di fe a kere den e resurekshon i a antisipá e bida riba tera bou di e Reino di Dios, “e stat ku tin berdadero fundeshi.” Kada biaha ku nan a meditá riba e bendishonnan ei, nan a haña mas fe den Yehova.—Lesa Hebreonan 11:15, 16.

10. Kiko Sara por a imaginá su mes a base di e promesa ku Yehova a hasi Abraham?

10 Laga nos pensa awor riba Sara, kasá di Abraham. Aunke e tabata un muhé di 90 aña i no tabatin yu, el a kere e promesa di Dios ku un dia lo e haña un yu. Dikon e tabata asina sigur di esei? Pasobra el a imaginá su mes kon futuro lo tabata. Ku wowo di fe, e por a mira su desendientenan ta disfrutá di e bendishonnan ku Yehova a primintí. (Heb. 11:11, 12) Yehova a bisa Abraham relashoná ku Sara: “Lo mi bendishon’é, i di bèrdat lo mi duna bo un yu hòmber pa medio di dje. E ora ei lo mi bendishon’é i e lo ta un mama di nashonnan; reinan di pueblonan lo sali for di dje.” (Gén. 17:16) Manera Yehova a primintí, Sara a haña un yu hòmber, Isak. E milager akí a konvensé Sara ku Yehova lo a kumpli ku e restu di e promesa ku el a hasi Abraham. Pues, nos tambe, segun ku nos ta meditá riba tur e kosnan maravioso ku Yehova a primintí, nos fe ta bira mas fuerte!

E TABATIN SU BISTA FIHÁ RIBA E REKOMPENSA

11, 12. Kiko a yuda Moises kultivá amor pa Yehova?

11 Un otro persona ku tabatin fe den e promesanan di Yehova i un amor profundo p’e tabata Moises. Komo ku el a lanta den e famia di e rei di Egipto, lo tabata fásil p’e kria un amor pa poder i rikesa. Ma su mayornan biológiko a siñ’é tokante Yehova i tokante Su promesa di libra e hebreonan for di sklabitut i duna nan e Tera Primintí. (Gén. 13:14, 15; Éks. 2:5-10) Moises kasi sigur a pensa hopi biaha riba e bendishonnan ku tabata warda e pueblo di Dios. Kiko bo ta kere lo a krese den su kurason: e deseo pa un posishon prominente den Egipto òf amor pa Yehova?

12 Beibel ta bisa riba kiko Moises a meditá: “Pa medio di fe Moises, ora el a bira grandi, a nenga di ser yamá yu di e yu muhé di Fárao. El a skohe pa ser maltratá huntu ku e pueblo di Dios en bes di gosa di e  plasernan pasahero di piká, pasobra el a konsiderá e desonor ku el a sufri komo Ungí komo un rikesa mas grandi ku e tesoronan di Egipto, ya ku e tabatin su bista fihá riba e rekompensa.”—Heb. 11:24-26.

13. Dikon tabata bon ku Moises a meditá riba loke Dios a primintí?

13 Mas Moises a meditá riba loke Yehova a primintí di hasi pa e israelitanan, mas su fe i amor pa Dios a krese. Meskos ku otro sirbidó di Dios, Moises tambe probablemente a imaginá su mes e dia ku Yehova lo a libra hende for di morto. (Yòb 14:14, 15; Heb. 11:17-19) Ta lógiko ku Moises a haña un gran amor pa e Dios ku tabatin asina tantu kompashon pa e hebreonan i pa henter humanidat. Fe i amor a motivá Moises durante henter su bida. (Deu. 6:4, 5) Asta ora Fárao a menas’é ku morto, e no tabatin miedu. Su fe, su amor pa Dios i probablemente e kuadro mental ku e tabatin di un futuro briante a dun’é e fortalesa pa enfrentá e situashon ei ku kurashi.—Éks. 10:28, 29.

DEDIKÁ TEMPU NA IMAGINÁ E KOSNAN KU E REINO DI DIOS LO HASI

14. Ki tipo di pensamentu ta puru fantasia?

14 Hopi hende awe ta imaginá nan mes kosnan ku lo no sosodé nunka. Por ehèmpel, aunke Beibel ta bisa ku bida den e mundu di Satanas akí lo “no ta nada otro ku molèster i pena,” tòg tin hende pober ta soña ku un dia nan lo bira mionario i ku nan lo no tin niun preokupashon mas. (Sal. 90:10) Aunke Beibel ta indiká ku ta e Reino di Dios so por solushoná e problemanan di mundu, tin hende ta imaginá nan ku un dia lo presentá un gobièrnu humano ku lo solushoná tur nan problemanan. (Dan. 2:44) I aunke Beibel ta sigurá nos ku Dios lo destruí e mundu malbado akí, hopi hende ta pensa ku nada malu no ta bai pasa. (Sof. 1:18; 1 Huan 2:15-17) Hende ku ta pasa por haltu di e propósito di Yehova pa futuro ta bibando den un mundu di fantasia.

Bo ta mira bo mes den e mundu nobo? (Wak paragraf 15)

15. (a) Dikon ta bon pa nos imaginá nos mes e futuro ku Dios a primintí nos? (b) Kiko ta un di e kosnan ku bo ta spera ansiosamente riba dje?

15 En kambio, komo kristian, ta bon pa nos imaginá nos mes ta disfrutá di e kosnan ku Yehova a primintí, sea ku nos speransa ta bida den shelu òf bida riba tera. Abo tin kustumber di hasi esei? Bo ta mira bo mes den e mundu nobo? Lo bo sinti bo mas felis i lo bo tin mas ánimo pa sigui sirbi Yehova. Por ehèmpel, “mira” bo mes ta biba pa semper riba tera. Imaginá bo ta traha huntu ku bo amigu- i amiganan pa transformá e tera den un bunita paradeis. Tur bo bisiñanan ta stima Yehova, meskos ku bo. Bo tin bon salú, bo ta yen di energia i bo no tin niun preokupashon. Esnan ku ta supervisá e trabou di restorashon di bèrdat ta stima bo, i esei ta hasi bo bida mas dushi ainda. I bo ta kontentu, masha kontentu mes, ku bo por usa bo talento- i abilidatnan pa yuda otro hende i pa trese onor pa Yehova. Kisas bo ta yudando asta hende ku a ser resusitá siña konosé Yehova. (Huan 17:3; Echo. 24:15) Nò, esaki no ta un soño òf un mundu di fantasia. Tur loke bo a kaba di imaginá bo mes lo ser realisá pasobra nan ta basá riba loke Beibel ta bisa tokante futuro.—Isa. 11:9; 25:8; 33:24; 35:5-7; 65:22.

PAPIA KU OTRO HENDE TOKANTE NOS SPERANSA

16, 17. Dikon ta bon pa nos papia tokante e futuro ku Yehova a primintí nos?

16 Ora nos ta kòmbersá ku nos rumannan tokante e kosnan ku nos lo ke hasi den e mundu nobo, e bunita futuro akí ta bira mas real pa nos. Ta bèrdat ku nos no sa kiko presis kada un di nos lo bai hasi den e mundu nobo, pero ta bon pa papia tokante  kon nos ta imaginá nos ku nos bida lo ta. Asina nos ta animá otro i ta ekspresá nos fe den loke Yehova a primintí. Ora apòstel Pablo a bishitá e rumannan na Roma, tabatin “un interkambio di estímulo” entre nan, i sin duda nan a apresiá esei. Awe, nos tambe tin mester di esei den e tempu difísil akí.—Rom. 1:11, 12.

17 Ora nos ta imaginá nos e bida den futuro, nos lo pensa ménos riba e problemanan aktual. Na un okashon apòstel Pedro a bisa Hesus: “Wak! Nos a laga tur kos i a sigui bo; kiko realmente nos lo haña?” Su palabranan ta indiká e preokupashon ku probablemente e ku e otro disipelnan tabatin. Kiko Hesus a hasi pa trankilisá nan? El a yuda nan imaginá e futuro maravioso ku tabata spera nan. E di ku nan: “Di bèrdat mi ta bisa boso: Dia tur kos bira nobo, ora e Yu di hende sinta riba su trono glorioso, boso ku a sigui mi tambe lo sinta riba 12 trono i husga e 12 tribunan di Israel. I tur hende ku a bandoná kas, ruman hòmber, ruman muhé, tata, mama, yu òf kunuku pa motibu di mi nòmber lo haña hopi biaha mas tantu di esakinan, i tambe bida eterno.” (Mat. 19:27-29) Pues, Pedro i e otro disipelnan por a imaginá nan mes ta forma parti di e gobièrnu ku lo a goberná mundu i trese masha hopi bendishon pa humanidat obedesidu.

18. Dikon ta bon pa nos imaginá nos mes e tempu ku nos lo risibí tur loke Yehova a primintí nos?

18 Sirbidónan di Yehova semper a pensa riba e kumplimentu di e promesanan di Dios, i esei a yuda nan kultivá un fe firme. Abel tabata sa sufisiente tokante e propósito di Dios p’e por tabatin fe i speransa i pa imaginá su mes un mihó futuro. Abraham a obedesé Yehova asta ora tabata masha difísil. Kon bini? Pasobra el a imaginá su mes e tempu ora ku e promesanan di Yehova relashoná ku e simia, òf “desendiente,” lo a kumpli. (Gén. 3:15) Moises a keda ku “su bista fihá riba e rekompensa” ku Yehova a primintié, i esei a yuda su fe i amor pa Yehova krese. (Heb. 11:26) Nos fe i amor pa Yehova tambe lo krese si nos ta imaginá nos mes e tempu ku nos lo risibí tur loke el a primintí nos. Den e siguiente artíkulo, nos lo siña tokante un otro manera mas ku nos por usa nos imaginashon.