Bai na kontenido

Bai na kontenido

Konfia Semper den Yehova!

Konfia Semper den Yehova!

“Konfia den dje na tur tempu, o pueblo.”—SAL. 62:8.

1-3. Dikon Pablo tabata konvensí ku e por a konfia den Yehova? (Wak e promé plachi.)

E KRISTIANNAN di promé siglo na Roma tabata biba den un époka masha peligroso. Nan tabata ser persiguí kruelmente. E romanonan a kulpa nan di a sende e stat na kandela na aña 64 i tambe a akusá nan di ta odia hende. Tur dia e kristiannan tabata enfrentá e posibilidat di ser arestá i torturá. De echo, algun di nan a ser habraká pa bestia. Otronan a ser klabá na staka i kimá bibu pa sirbi komo iluminashon pa e stat durante anochi.

2 Durante e periodo teribel ei, apòstel Pablo tabata den prizòn na Roma pa di dos biaha. Kisas el a puntra su mes si su rumannan kristian lo a bin ousili’é, ya ku e ta kòrda ku den un situashon anterior niun hende no a yud’é. E mes a skirbi Timoteo: “Den mi promé defensa ningun hende no a bini na mi banda, ma nan tur a bandoná mi; mi ta spera ku Dios lo no tene nan responsabel pa esei.” Pero el a rekonosé ku, apesar di tur kos, e no a keda sin yudansa. El a skirbi: “Señor a para band’i mi i a duna mi poder.” Sí, Yehova, mediante nos Señor Hesus, a duna Pablo e poder ku e tabatin mester. I kon esaki a yud’é?  Pablo di: “El a libra mi for di boka di leon.”—2 Tim. 4:16, 17. *

3 Pablo lo mester a sintié hopi animá ora el a kòrda kon Yehova a yud’é e biaha ei. Pues, e tabatin konfiansa ku Yehova lo a dun’é e forsa pa superá e prueba ku e tabata aden i kualke otro ku lo a presentá den futuro. P’esei e por a sigui bisa ku konvikshon: “Señor lo libra mi di tur loke ta malu.” (2 Tim. 4:18) Sí, Pablo tabata sa di eksperensia ku asta ora otro hende no por yuda nos, Yehova ku Hesus semper t’ei pa sostené nos!

OPORTUNIDATNAN PA NOS KONFIA DEN YEHOVA

4, 5. (a) Ken semper t’ei pa yuda bo? (b) Kon bo por fortalesé bo amistat ku Yehova?

4 Bo a yega di haña bo den un situashon difísil i a sinti bo bo so, sin niun hende pa yuda bo? Kisas bo a pèrdè trabou òf bo tabatin un problema di salú òf kualke otro prueba. Òf si bo ta un hóben, kisas bo a haña bo ku preshon na skol. Podisé bo a pidi un hende yuda bo, pero bo a keda desepshoná pasobra e persona no a duna bo e sosten ku bo tabatin mester. Naturalmente, tin problemanan ku niun ser humano no por yuda bo resolvé. Kiko nos por hasi e ora ei? Beibel ta konsehá nos pa ‘konfia den Yehova.’ (Pro. 3:5, 6) E konseho ei ta realístiko? Klaru ku sí! Den Beibel nos por lesa hopi relato ku ta konvensé nos ku Yehova realmente ta yuda su pueblo.

5 P’esei, si bo no haña e yudansa ku bo a spera di hende, no karga renkor. Mas bien, hasi manera Pablo. Mira situashonnan difísil komo oportunidatnan pa konfia den Yehova i pa eksperensiá den bo propio bida su kuido amoroso. Ku ki resultado? Esaki lo oumentá bo konfiansa den dje i fortalesé bo amistat kuné.

KONFIANSA TA IMPORTANTE PA NOS AMISTAT KU YEHOVA

6. Dikon no ta fásil pa konfia den Yehova ora nos tin un problema difísil?

6 Kisas bo tin un problema difísil ku ta angustiá bo. Si bo a hasi tur loke ta na bo alkanse pa resolvé e problema i bo a pidi Yehova yuda bo, bo por ta trankil pasobra bo sa sigur ku lo e yuda bo. (Lesa Salmo 62:8; 1 Pedro 5:7.) De echo, nos no por ta amigu di Dios si nos no tin e konfiansa ei den dje. Ma nos tin ku atmití ku tin biaha esaki no ta fásil. Dikon? Un motibu ta ku no ta semper Yehova ta kontestá nos orashonnan mesora.—Sal. 13:1, 2; 74:10; 89:46; 90:13; Hab. 1:2.

7. Dikon Yehova no ta kontestá tur nos orashonnan mesora?

7 Pero, dikon Yehova no ta reakshoná mesora riba tur nos orashonnan? No lubidá ku Beibel ta kompará e relashon ku nos tin ku Yehova manera esun di un yu ku su tata. (Sal. 103:13) Un mucha no por ferwagt ku su tata ta dun’é mesora tur loke e pidi. E tata sa ku tin biaha loke e yu ta pidi ta djis un deseo pasahero. Otro biaha, e tata ta disidí di warda pa e momento mas adekuá pa kumpli ku su petishon. Por ta tambe ku e petishon no ta na e mucha su bienestar ni na bienestar di otro hende. Es mas, si e tata mester duna e mucha mesora tur loke e pidi, e tata ta bira su katibu. Asina tambe, Yehova por disidí di warda pa kontestá nos orashonnan pasobra e sa ku esei ta mihó pa nos. E tin derecho di hasié, pasobra e ta nos Kreador sabí, nos Doño amoroso i nos Tata selestial. Ademas, nos no mester lubidá ku ta nos ta sirbi Dios, i no ta é ta sirbi nos.—Kompará ku Isaías 29:16; 45:9.

8. Kiko Yehova ta primintí nos?

 8 Un otro faktor ku nos mester tuma na kuenta ta ku Yehova sa presis kiko kada persona por wanta i kiko nan no por wanta. (Sal. 103:14) Pues, e no ta ferwagt di nos ku nos lo perseverá riba nos mes forsa; e ta nos Tata i ta ofresé nos su yudansa. Klaru ku tin biaha nos lo por sinti ku nos no por mas. Pero Yehova ta primintí nos ku si e problema ta asina grandi ku nos no por soport’é, lo e duna nos un salida. (Lesa 1 Korintionan 10:13.) Pues, ta un konsuelo pa sa ku nos por tin e konfiansa ku Yehova sa presis kuantu kos nos por wanta.

9. Kiko nos mester hasi si e yudansa di Yehova no ta yega mesora despues ku nos hasi orashon?

9 No bira desesperá si, despues di hasi orashon, Yehova su yudansa no yega mesora. Tene pasenshi. Kòrda ku Yehova ta ansioso pa yuda nos, pero e tambe ta warda ku pasenshi pa e mihó momento pa duna nos loke nos tin mester. Ta manera Isaías 30:18 (BPK) ta bisa: “SEÑOR ta buska un chèns pa mustra boso su bondat. L’E lanta pa tene kompashon ku boso, pasobra SEÑOR ta un Dios di hustisia. Felis tur ku ta sper’É.”

“BOKA DI LEON”

10-12. (a) Ki sirkunstansianan difísil un kristian ku ta kuida un miembro di famia ku ta malu por hañ’é kuné? (b) Si nos ta konfia den Yehova durante momentonan difísil, kiko lo pasa ku nos amistat kuné? Duna un ehèmpel.

10 Si bo ta pasando den un problema serio, kisas bo ta sinti bo meskos ku Pablo: kasi den “boka di leon.” (2 Tim. 4:17) Momentonan asina por ta mas difísil pa konfia den Yehova, pero ta nèt e ora ei esaki ta mas nesesario ku nunka. Por ehèmpel, suponé ku bo ta kuidando un miembro di famia ku tin hopi tempu malu. Bo ta hasi bo bèst pa sigui padilanti, i bo a pidi Dios yuda bo wanta e situashon i tuma bon desishonnan. * Yehova ta sigurá bo den su Palabra ku e ta mira ku su mes wowo kiko ta pasando i ku lo e duna bo tur loke bo mester pa wanta i sigui fiel. Esei no ta duna bo un poko trankilidat?—Sal. 32:8.

11 Pero tin biaha por parse ku Yehova no ta yudando bo. Podisé e dòkternan mes no ta di akuerdo kiko ta e mihó tratamentu pa bo. Òf bo a stèns ku bo famia lo a sostené bo, pero en bes di esei nan ta hasi e situashon pió. Si ta asina, no entregá. Sigui konfia den Yehova; sigui pidié duna bo forsa; sigui hala serka dje. (Lesa 1 Samuel 30:3, 6.) Despues, ora bo mira bèk kon Yehova a yuda bo, bo amistat kuné lo ta mas fuerte.

12 Linda a eksperensiá esaki. * El a kuida su mayornan durante nan último añanan di bida. El a konta: “Durante e añanan ei tabatin okashon ku ni ami ni mi kasá ni mi ruman hòmber no tabata sa kiko pa hasi. Tin biaha nos tabata sinti nos desampará. Pero awor ku e situashon a pasa, nos ta mira mas kla kon Yehova a sostené nos tur e tempu ei. El a fortalesé nos i a duna nos presis loke nos tabatin mester, asta na momentonan ku tabata parse ku nos no tabatin mas opshon.”

13. Kon konfiansa den Yehova a yuda Rhonda wanta un tragedia tras di otro?

13 Nos pleno konfiansa den Yehova por yuda nos asta ora nos ta haña nos ku un tragedia tras di otro. E kaso di Rhonda ta demostrá esei. Nèt ora ku su kasá, ku no tabata Testigu di Yehova, a kuminsá ku trámitenan pa divorsio, dòkternan a saka afó  ku Rhonda su ruman hòmber tabatin un malesa grave ku yama lupus. Un par di luna despues, e kasá di e ruman hòmber a muri. Rhonda a kuminsá rekuperá di e gòlpinan duru ei i a bira pionero regular, pero poko tempu despues su mama a muri. Kiko a yud’é wanta tur e tragedianan ei? El a splika: “Mi tabata komuniká ku Yehova tur dia i tabata buska su guia asta den e desishonnan di mas chikitu. Esei a hasi Yehova mas real ainda pa mi. M’a siña dependé riba dje, en bes di riba mi mes òf asta riba otro hende. I Yehova di bèrdat a yuda mi. El a duna mi tur loke mi tabatin mester. M’a haña sa kiko ke men kana man tené ku Yehova.”

Asta algun situashon ku surgi den famia por pone nos amistat ku Yehova na prueba (Wak paragraf 14-16)

14. Ki konfiansa un kristian por tin ora nan ekspulsá un miembro di su famia?

14 Pensa awor riba un otro situashon difísil. Suponé ku un miembro di bo famia ser ekspulsá. Bo sa kiko Beibel ta bisa tokante e manera ku mester trata hende ekspulsá. (1 Kor. 5:11; 2 Huan 10) Pero komo ku bo stima e persona ei, por parse masha difísil òf asta imposibel pa obedesé Yehova. * Kiko lo bo hasi? Bo tin e konfiansa ku bo Tata selestial lo duna bo e forsa pa keda fiel na dje i obedesé e mandamentu di Beibel? Lo bo konsiderá e situashon akí komo un oportunidat pa fortalesé bo amistat ku Yehova?

15. Dikon Adam a desobedesé Yehova?

15 Relashoná ku esaki, pensa un ratu riba e promé hòmber, Adam. Di bèrdat el a kere ku e por a desobedesé Yehova i sigui biba? Nò, pasobra Beibel ta bisa ku Adam  “no a ser gañá.” (1 Tim. 2:14) Wèl, dikon el a kome di e fruta ku Eva a dun’é? Pasobra e tabata stima su kasá mas ku Yehova. P’esei el a skucha su kasá en bes di skucha Yehova.—Gén. 3:6, 17.

16. Ken nos mester stima mas, i dikon?

16 Akaso esaki ta nifiká ku nos no mag di stima nos famia? Klaru ku nò! Loke e ta nifiká ta ku nos mester stima Yehova mas ku kualke otro persona. (Lesa Mateo 22:37, 38.) Bon mirá, sea ku nos famia ta sirbi Yehova òf nò, e mihó manera pa yuda nan ta di stima Yehova mas ku tur kos. Pues, sigui fortalesé bo amor pa Yehova i bo konfiansa den dje. I si bo ta preokupá pa e komportashon di bo famia ekspulsá, konta Yehova esei, i deshogá bo mes serka dje. * (Rom. 12:12; Flp. 4:6, 7) Aunke e situashon akí ta pone bo sufri hopi, mir’é komo un oportunidat pa hala mas serka Dios i asina fortalesé bo amistat kuné. I esaki lo yuda bo realisá ku obedesé Yehova semper ta e mihó opshon.

TANTEN KU NOS TA WARDA RIBA YEHOVA

Keda okupá den e trabou di prediká i asina demostrá bo konfiansa den Yehova (Wak paragraf 17)

17. Kiko nos por tin sigur ku Yehova lo hasi pa nos ora nos ta mantené nos mes okupá den e trabou di prediká?

17 Dikon Yehova a libra Pablo “for di e boka di leon”? E mes a bisa: “Pa mediante di mi e obra di predikashon por keda efektuá kabalmente i tur nashon por tende e mensahe.” (2 Tim. 4:17) Yehova a duna nos tambe e enkargo pa prediká “e bon notisia,” i e ta yama nos su ‘kompañeronan di trabou.’ (1 Tes. 2:4; 1 Kor. 3:9) Si nos, meskos ku Pablo, mantené nos mes okupá den e trabou di prediká, nos por tin sigur ku Yehova lo duna nos tur loke nos tin mester. (Mat. 6:33) Laga nos konfia den su promesa i ser mas aktivo posibel den e predikashon. Esei lo yuda nos keda trankil tanten ku nos ta warda riba su yudansa.

18. Kon nos por oumentá nos konfiansa den Yehova i fortalesé nos amistat kuné?

18 Pues, probechá di e tempu ku nos tin awor pa fortalesé nos amistat ku Yehova i oumentá nos konfiansa den dje. Si un situashon ta yena nos ku angustia, konsider’é komo un oportunidat pa hala mas serka Yehova. Lesa, studia i meditá riba e Palabra di Dios. Hasi orashon kontinuamente, i mantené bo mes okupá ku aktividatnan spiritual. No stòp di konfia den Yehova; lo e yuda bo wanta e difikultatnan aktual i esnan ku lo bini den futuro.

^ par. 2 Nos no sa si Pablo tabata ke men boka di un leon literal òf si e tabata referí na un situashon peligroso.

^ par. 10 Tin vários artíkulo ku a sali pa yuda kristiannan ora nan ta malu òf nan tin ku kuida un miembro di famia ku ta malu. Wak e revista ¡Despertad! di 8 di febrüari 1994, 8 di febrüari 1997 (tambe na papiamentu), 22 di mei 2000 i 22 di yanüari 2001.

^ par. 12 A kambia e nòmbernan.

^ par. 14 Wak e artíkulo “Ekspulshon Ta un Muestra di Amor” den e revista akí.

^ par. 16 Tin vários artíkulo ku a sali pa yuda nos ora un miembro di famia bandoná Yehova. Wak E Toren di Vigilansia di 1 di sèptèmber 2006, página 17-21 i 15 di yanüari 2007, página 17-20.