Bai na kontenido

Bai na kontenido

Kon Ansianonan Por Yuda Ruman Hòmbernan Bira Kapas?

Kon Ansianonan Por Yuda Ruman Hòmbernan Bira Kapas?

“E kosnan ku bo a tende serka mi, . . . konfia nan na hòmbernan fiel.”—2 TIM. 2:2.

1. (a) Kiko sirbidónan di Dios tabata sa semper? (b) Dikon nos awe mester ta bon entrená? (c) Kiko nos lo trata den e artíkulo akí?

SEMPER sirbidónan di Dios tabata sa ku ta masha importante pa nan ta bon entrená òf kapasitá pa nan por tin éksito. Por ehèmpel, patriarka Abraham “a mobilisá su hòmbernan entrená” pa bai reskatá Lòt, i nan a logra esei tambe. (Gén. 14:14-16) Den tempu di Rei David tabatin kantante pa alabá Yehova den tèmpel, i nan tur tabata “instruí pa kanta.” (1 Kró. 25:7) Awe, nos ta bringando un guera spiritual kontra Satanas i su siguidónan. (Efe. 6:11-13) Tambe nos ta hasiendo nos máksimo esfuerso pa alabá Yehova i papia ku otro hende tokante su nòmber. (Heb. 13:15, 16) Pa nos por tin éksito den tur esei, nos mester ta bon entrená, meskos ku e sirbidónan di Dios di pasado. Yehova a enkargá e ansianonan di kongregashon ku e responsabilidat di entrená otronan pa bira kapas. (2 Tim. 2:2) Den e artíkulo akí nos lo bai trata algun método ku ansianonan ku eksperensia ta usa pa siña mas ruman hòmber bira kapas pa kuida e tou di Dios.

YUDA E RUMAN SU AMOR PA YEHOVA KRESE

2. Promé ku un ansiano kuminsá instruí un ruman hòmber, kiko kisas lo e tin ku hasi, i dikon?

2 Nos por kompará un ansiano ku un kunukero. Promé ku e  kunukero kuminsá sembra, kisas e tin ku duna e tera vitamina pa hasié mas produktivo. Meskos tambe, promé ku un ansiano kuminsá siña un ruman hòmber ku ménos eksperensia algun abilidat nobo, kisas e ansiano lo tin ku nutri e kurason di e ruman ku pasashinan di Beibel. Asina e kurason di e ruman lo ta mihó prepará pa aseptá e instrukshon ku e ta bai haña.—1 Tim. 4:6.

3. (a) Kon e ansiano por usa e palabranan di Hesus na Marko 12:29 i 30 ora e ta kòmbersá ku un ruman hòmber? (b) Kon e ruman lo sintié ora e tende e ansiano hasi orashon p’e?

3 Ta importante pa e ansiano sa kuantu efekto e bèrdat ta hasi riba kurason di e ruman hòmber. Lo e por puntr’é: ‘Kon bo dedikashon na Yehova a kambia e manera ku bo ta hiba bo bida?’ E pregunta ei lo duna e ansiano oportunidat pa kòmbersá kuné i splik’é kon nos por sirbi Yehova ku henter nos kurason. (Lesa Marko 12:29, 30.) Kisas na final di e kòmbersashon, lo bo por hasi un orashon i pidi Yehova duna e ruman su spiritu santu pa yud’é progresá. Ora e ruman tende bo hasi orashon p’e, esei sigur lo anim’é mashá.

4. (a) Menshoná algun relato bíbliko ku un ansiano por usa pa stimulá e kresementu spiritual di un ruman. (b) Ku ki meta un ansiano mester entrená un ruman hòmber?

4 Ora bo kuminsá entrená e ruman, analisá huntu kuné algun relato bíbliko ku lo yud’é mira e importansia di ta kla pa yuda, konfiabel i humilde. (1 Rei. 19:19-21; Neh. 7:2; 13:13; Echo. 18:24-26) E kualidatnan ei ta mes importante pa e ruman ku vitamina ta pa tera, pasobra nan ta stimulá kresementu spiritual. Jean-Claude, un ansiano di Fransia, a bisa: “Ami ta entrená un ruman ku e meta di yud’é bira un hòmber spiritual. Mi ta buska oportunidat pa nos por lesa tekstonan ku ta ‘habri su wowo’ pa e ‘kosnan maravioso’ ku tin den e Palabra di Dios.” (Sal. 119:18) Den ki otro manera un ansiano por fortalesé un ruman hòmber?

YUD’É PONE META I SPLIK’É E MOTIBU

5. (a) Dikon ta importante pa papia tokante metanan spiritual ku e ruman hòmbernan? (b) Dikon ansianonan mester kuminsá entrená e rumannan for di yòn? (Wak nota.)

5 Puntra e ruman hòmber kiko ta su metanan spiritual. Si e no tin niun meta spesífiko na mente, yud’é pone un meta ku ta rasonabel i alkansabel. Bo por kont’é di un meta ku abo a pone i kon bo a sinti bo ora ku bo a logr’é. Lag’é mira bo entusiasmo. Aunke esaki por parse un método simpel, e ta duna resultado. Victor, un ansiano i pionero di Afrika, a konta: “Tempu mi tabata yòn, un ansiano a hasi mi algun pregunta bon pensá tokante mi metanan. E preguntanan ei a yuda mi kuminsá pensa seriamente riba mi sirbishi na Yehova.” Ansianonan ku eksperensia ta bisa ku ta importante pa kuminsá entrená e ruman hòmbernan for di ora nan ta yòn ainda, asina ku nan yega edat di tiner. Kiko nos por hasi? Por duna nan tareanan den kongregashon ku ta pas ku nan edat. I kiko nos ta logra ku esaki? Wèl, esei por yuda e mucha hòmbernan sigui konsentrá riba nan metanan segun ku nan ta bira mas grandi i ta haña nan ku yen di distraishon.—Lesa Salmo 71:5, 17. *

Splika e ruman dikon sierto tarea ta nesesario, i elogi’é pa e esfuerso ku e ta hasi pa kumpli kuné (Wak paragraf 5-8)

6. Ki método importante Hesus tabata usa pa entrená su disipelnan?

 6 No djis bisa e ruman kiko e tin ku hasi. Splik’é tambe pakiko ta importante pa hasié; esei lo stimulá su deseo pa sirbi. Asina bo ta imitá e Gran Maestro, Hesus. E tabata bisa su apòstelnan e motibu pakiko nan mester hasi sierto kos. Por ehèmpel, el a manda nan: “Bai, i hasi hende di tur nashon mi disipel.” Pero promé ku esei, el a bisa nan pakiko nan mester a obedes’é: “Mi a risibí tur outoridat den shelu i riba tera.” (Mat. 28:18, 19) Kon bo por imitá e manera ku Hesus a entrená su disipelnan?

7, 8. (a) Kon ansianonan por imitá e ehèmpel di Hesus ora di entrená un ruman hòmber? (b) Dikon ta asina importante pa elogiá e ruman? (c) Ki sugerensianan lo por yuda ansianonan entrená otro ruman? (Wak e kuadro “ Kon pa Entrená Mas Ruman Hòmber pa Bira Kapas.”)

7 Splika e ruman e motibunan bíbliko pakiko bo ta pidié hasi sierto kos. Asina bo ta siñ’é hasi kosnan a base di prinsipio bíbliko i no djis pasobra esei ta un regla. Por ehèmpel, suponé ku bo ta pidi un ruman hòmber pa tene e entrada di Salòn di Reino limpi i sin opstákulo. Lo bo por mustr’é Tito 2:10 i splik’é ku su trabou ta hasi e mensahe di Reino mas atraktivo. Tambe bo por lag’é pensa riba kon su trabou ta benefisiá e rumannan di edat den kongregashon. Kòmbersashonnan asina lo yud’é komprondé ku, maske ta importante pa kumpli ku instrukshon, e punto prinsipal ta pa hasi kos ku ta benefisiá hende. Ora e mira kon e rumannan ta benefisiá di su trabou, lo e sintié felis ku e ta útil pa e kongregashon.

8 Ademas, no lubidá di elogiá e ruman pa e esfuerso ku e ta hasi pa sigui bo sugerensianan. Dikon ta importante pa bo hasi esei? Pa e mesun motibu ku bo mester muha un mata: pa e bona! Elogio sinsero ta yuda e ruman krese den su sirbishi na Yehova.—Kompará ku Mateo 3:17.

UN DESAFIO SPESIAL

9. (a) Ki desafio spesial ansianonan den paisnan mas riku tin? (b) Dikon sirbishi na Dios no ta na promé lugá den bida di algun ruman hòmber yòn?

9 Ansianonan den paisnan mas riku tin un desafio spesial: kon pa motivá hóbennan batisá ku tin 20’i piku òf 30’i piku aña pa hasi mas den kongregashon. Nos a entrevistá algun ansiano ku eksperensia di un 20 pais desaroyá pa nan bisa nos dikon nan ta kere ku algun ruman hòmber yòn ta hui pa responsabilidat den kongregashon. E motibu ku mas e ansianonan a menshoná ta ku nan mayornan no a motivá nan pa pone metanan spiritual na mucha. Es mas,  aunke algun di e hóbennan ei tabatin e deseo di hasi mas pa e Reino, nan mayornan a animá nan pa nan alkansá metanan profeshonal na lugá di esei, sea enseñansa superior òf un karera den mundu! Pues, sirbishi na Dios nunka tabata na promé lugá den nan bida.—Mat. 10:24.

10, 11. (a) Kon un ansiano pokopoko por yuda un ruman kambia su manera di pensa? (b) Kua pasashinan di Beibel un ansiano lo por analisá ku e ruman, i dikon? (Wak nota.)

10 Si un ruman hòmber no ta parse masha interesá pa hasi mas den kongregashon, ta posibel pa kambia su manera di pensa; pero esei lo tuma tempu i pasenshi. Meskos ku un kunukero por stret e stam di un mata pokopoko segun ku e ta krese i pon’é bai den e direkshon korekto, asina un ansiano pokopoko por yuda un ruman mira ku e tin ku kambia su aktitut i aseptá mas responsabilidat den kongregashon. Pero kon e por hasi esei?

11 E ansiano mester dediká tempu pa bira amigu di e ruman. Laga e ruman sa ku e kongregashon tin mester di dje i, segun tempu ta pasa, rasoná kuné riba sierto versíkulo di Beibel. Yud’é reflekshoná riba su bida for di dia ku el a dediká su mes na Yehova. (Ekl. 5:4; Isa. 6:8; Mat. 6:24, 33; Luk. 9:57-62; 1 Kor. 15:58; 2 Kor. 5:15; 13:5) Kisas bo por puntr’é: ‘Kiko bo a primintí Yehova ora bo a dediká bo mes na dje?’ Purba di yega na su kurason ku e siguiente preguntanan: ‘Kon bo ta kere Yehova a sintié dia ku bo a batisá?’ (Pro. 27:11) ‘Kon Satanas lo a sintié?’ (1 Ped. 5:8) No lubidá ku un òf mas pasashi di Beibel bon skohé por yega te den fondo di e ruman su kurason i motiv’é pa kambia.—Lesa Hebreonan 4:12. *

HÓBEN, KUMPLI FIELMENTE KU BO TAREANAN

12, 13. (a) Ki aktitut Eliseo a demostrá durante su entrenamentu? (b) Kon Yehova a rekompensá Eliseo pa su fieldat?

12 Pero kiko di boso, hóbennan, ku e kongregashon tin asina tantu mester di dje? Ki aktitut boso mester tin pa boso por tin éksito den boso sirbishi na Yehova? Pa kontestá e pregunta ei, laga nos analisá e bida di Eliseo, un sirbidó di Dios di pasado.

13 Rònt di 3.000 aña pasá, profeta Elías a invitá Eliseo pa bira su ayudante. Mesora e hóben a aseptá e invitashon, i fielmente el a hasi tareanan humilde pa e profeta. (2 Rei. 3:11) Despues di un seis aña asina, Eliseo tabata bon entrená. Anto el a haña sa ku e trabou ku su maestro tabata hasi den Israel tabata a punto di yega na su fin. Tres biaha e profeta a pidi su ayudante pa stòp di sirbié, pero kada biaha Eliseo a nenga, bisando: “Lo mi no laga bo.” E tabata determiná pa keda ku su mèntòr mas tantu tempu posibel. Yehova a mira e fieldat i lealtat di Eliseo i komo rekompensa a lag’é mira e manera espektakular ku Elías a ser hibá den un warwarú.—2 Rei. 2:1-12.

14. (a) Kon hóbennan por imitá Eliseo? (b) Dikon ta asina importante pa un hóben ta fiel i kumpli sin falta ku su tareanan?

14 Komo hóben, kon abo por imitá Eliseo? Aseptá di buena gana kualke tarea ku bo haña pa hasi, pa humilde ku e tarea ta. Konsiderá bo maestro komo un amigu, i lag’é sa ku bo ta apresiá mashá e esfuerso ku e ta hasi pa siña bo. E manera ku bo ta reakshoná ta bis’é, na moda di papia: “Lo mi no laga bo; mi ke sigui siña di bo.” Pero mas ku tur kos, kumpli sin falta ku bo tareanan. Dikon esaki ta importante? Pasobra asina bo ta demostrá ku bo ta fiel i konfiabel,  i e ansianonan por mira ku bo ta e tipo di persona ku Yehova lo ke duna mas responsabilidat den kongregashon.—Sal. 101:6; lesa 2 Timoteo 2:2.

MUSTRA RÈSPÈT PA ANSIANONAN KU EKSPERENSIA

15, 16. (a) Kon Eliseo a mustra rèspèt pa su maestro? (Wak e promé plachi.) (b) Dikon Eliseo a gana e konfiansa di e otro profetanan?

15 E relato di Eliseo ta siña nos un kos mas: kon rumannan ku ta ser entrená por mustra rèspèt pa ansianonan ku eksperensia. Despues ku Elías i Eliseo a bishitá un grupo di profeta na Yériko, nan dos a kana bai Riu Hordan. Einan, “Elías a kohe su mantel i a dobl’é i a dal riba e awanan; i esakinan a parti.” Nan dos a krusa e riu riba tera seku i a sigui “kana ta papia.” Ta bisto ku Eliseo no a pensa ku ya e tabata sa tur kos. El a sigui skucha i siña for di su maestro te ora ku esaki a ser hibá den e warwarú. Ora Eliseo a bai bèk na Riu Hordan, el a dal riba e awanan ku e mantel di Elías i a bisa: “Unda SEÑOR, e Dios di Elías, ta?” Anto e awa di e riu a bolbe parti.—2 Rei. 2:8-14.

16 Bo a ripará ku e promé milager di Eliseo tabata presis meskos ku e último milager di Elías? Kiko nos por siña for di esaki? Aparentemente, Eliseo no a pensa ku, komo ku awor ta e ta na lugá di Elías, e tin ku kuminsá kambia e manera di hasi kos mesora. En bes di esei, el a disidí di sigui ku su trabou di profeta na e manera ku Elías tabata hasié. Asina el a mustra rèspèt pa su maestro, i esei a yud’é gana e konfiansa di e otro profetanan. (2 Rei. 2:15) Al final, Eliseo a sirbi 60 aña komo profeta i Yehova a dun’é e poder pa hasi hopi mas tantu milager ku Elías. Kiko ta e lès pa rumannan ku ta ser entrená awe?

17. (a) Kon e rumannan ku ta haña entrenamentu awe por imitá e aktitut di Eliseo? (b) Ku tempu, kon Yehova lo por usa algun di e rumannan akí?

17 Ora bo haña mas responsabilidat den kongregashon, no sinti ku bo tin ku kuminsá kambia kos mesora. No tin nodi di hasi kosnan na un manera kompletamente diferente for di loke e otro rumannan tabata hasi promé. No mester kambia kos djis pasobra bo tin gana di hasié. E motibu pa hasi kambio mester ta pasobra e kongregashon tin mester di esei òf pasobra e organisashon di Yehova a duna instrukshon pa hasié. Eliseo a gana e konfiansa di e otro profetanan i a mustra rèspèt pa su maestro dor di sigui usa e métodonan di Elías. Bo tambe por gana e konfiansa di e rumannan i mustra rèspèt pa bo maestronan dor di sigui usa e métodonan bíbliko di e ansianonan ku mas eksperensia. (Lesa 1 Korintionan 4:17.) Klaru ku segun ku bo ta gana eksperensia, lo bo por hasi e kambionan ku falta pa bo kongregashon por sigui progresá pareu ku e organisashon di Yehova. Ku tempu, lo por pasa ku bo meskos ku a pasa ku Eliseo: Yehova por usa bo pa hasi “obranan mas grandi” ku bo maestronan.—Huan 14:12.

18. Dikon ta asina importante pa yuda mas ruman hòmber bira kapas?

18 Nos ta spera ku e sugerensianan akí i esnan di e artíkulo anterior lo motivá ansianonan pa traha tempu pa yuda mas ruman hòmber bira kapas. Tambe nos ta pidi Yehova pa laga mas ruman hòmber mustra ku nan ta dispuesto pa risibí entrenamentu i usa loke nan siña pa yuda kuida e karnénan di Yehova. Nos tin sigur ku esaki lo fortalesé e kongregashonnan rònt mundu i lo duna kada un di nos e forsa nesesario pa keda fiel durante e susesonan impaktante ku ta na kaminda.

^ par. 5 Si un mucha hòmber ta maduro i humilde, i si e ta kumpli ku e otro rekisitonan ku Beibel ta trese padilanti, e ansianonan por rekomend’é komo sirbidó ministerial aunke e no tin 20 aña ainda.—1 Tim. 3:8-10, 12; wak La Atalaya di 1 di yüli 1989, página 29, i Nos Ministerio di Reino di mei 2000, página 8.

^ par. 11 Tambe por usa algun punto for di E Toren di Vigilansia di 1 di aprel 2012, página 20-22, paragraf 8-13, i tambe di e buki “Keda den e Amor di Dios,” kapítulo 16, paragraf 1-3.