“Mi no por haña un kasá den kongregashon, i mi tin miedu di bira bieu mi so.”

“Algun hòmber den mundu ta amabel, kariñoso i atento. Nan no ta kontra di mi religion, i asta nan ta parse mas interesante ku algun ruman.”

Algun sirbidó di Dios ku ta soltero a bisa algu similar. Nan sa ku Yehova ke pa su sirbidónan kasa “basta ta den Señor,” es desir, kasa solamente ku kristiannan berdadero. (1 Kor. 7:39) Pues, dikon tin ruman ta hasi e komentarionan ei?

DIKON TIN TA DUDA KU E TA REALÍSTIKO?

Algun ruman ta bisa ku tin mas ruman muhé soltero ku ruman hòmber soltero. Bèrdat esei ta e kaso den hopi pais. Konsiderá dos ehèmpel: Na Korea, 57% di Testigu soltero ta ruman muhé i 43% ta ruman hòmber. I na Colombia, 66% di Testigu soltero ta ruman muhé i 34% ta ruman hòmber.

Den algun pais tin e kustumber ku mayornan ku no ta Testigu kisas ta eksigí un suma grandi di plaka òf regalo masha karu pa un hende kasa ku nan yu muhé. I ruman hòmbernan ku ta hiba un bida simpel no por afòrt e regalonan ei. Konsekuentemente, algun ruman muhé ta sinti ku lo ta masha difísil pa nan haña un kasá “den Señor.” *

TA IMPORTANTE PA KONFIA DEN YEHOVA

Si bo a yega di sinti asina, bo por tin sigur ku Yehova sa di bo situashon i ta komprondé presis kon bo ta sinti bo.—2 Kró. 6:29, 30.

Yehova ta bisa den su Palabra ku nos mester kasa solamente den Señor pasobra e sa kiko ta bon pa nos. Yehova no solamente ke spar nos di e doló di un mal desishon, sino tambe e ke pa nos ta felis. Den tempu di Nehemías, hopi hudiu tabata kasa ku estranhero ku no a adorá Yehova. Kiko Nehemías a hasi? El a referí na e kaso di Sálomon  pa yuda nan korigí nan aktitut. El a bisa nan ku aunke Yehova tabata stima Sálomon, “e muhénan estranhero a hasi asta Sálomon kometé piká.” (Neh. 13:23-26) Pues, si Yehova ta manda nos kasa solamente ku hende ku ta sirbié ta pasobra e ke pa bai nos bon. (Sal. 19:7-10; Isa. 48:17, 18) Nos ta masha gradisidu ku Yehova a duna nos konseho ku ta amoroso i konfiabel. Ora nos obedesé Yehova komo nos Gobernante Soberano, nos ta rekonosé ku e tin e derecho di bisa nos kiko pa hasi.—Pro. 1:5.

Ta klaru ku lo bo no ke “forma un yugo desigual,” es desir, kasa ku un hende ku no ta stima Yehova. E persona ei lo por pone bo stòp di sirbi Dios. (2 Kor. 6:14, nota) Dios su konseho semper ta funshoná, i awe hopi kristian a tuma e desishon sabí pa obedesé Yehova. Ma tin otronan ku no a hasi esei.

AINDA E MANDAMENTU TA REALÍSTIKO

Un ruman muhé na Australia ku yama Maggy a splika kiko a pasa ora el a kuminsá sali ku un mucha hòmber ku no tabata Testigu: “Mi tabata falta hopi reunion djis pa mi ta huntu kuné. Mi relashon ku Yehova a bai hopi atras.” * Un otro ruman muhé na India ku yama Ratana a kuminsá namorá un kompañero di klas ku a kuminsá studia Beibel. Pero ku tempu e mucha hòmber a demostrá ku e motibu pakiko e tabata studia ta p’e por a kuminsá un relashon amoroso ku Ratana. Lamentablemente, Ratana a stòp di sirbi Yehova i a djòin un otro religion p’e por a kasa ku e mucha hòmber.

Un otro ehèmpel ta di un ruman na Kamerun ku yama Ndenguè. E tabatin 19 aña ora el a kasa ku un hòmber ku no tabata Testigu. Promé ku nan a kasa, su futuro esposo a primintié ku lo e por a sigui sirbi Yehova sin problema. Ma dos siman despues di kasamentu, e kasá a prohibié di bai reunion. Ndenguè a bisa: “Mi tabata sinti mi mi so i m’a yora hopi. Anto m’a realisá ku mi no tabatin kontrol mas riba mi bida. Mi tabata sinti mi hopi kulpabel pa esei.”

Ta bèrdat ku tin rumannan ku a kasa ku hòmbernan ku ta amabel i rasonabel aunke nan no ta Testigu. Ma asta si bo kasá ta kariñoso, kon e echo ku bo a kasa ku un hende ku no ta kreyente lo afektá bo relashon ku Yehova? Kon lo bo sinti bo ora bo kòrda ku bo no a hasi kaso di e konseho ku Yehova a duna pa bo mes bon? Es mas, kon Yehova lo sintié ku e desishon ku bo a tuma?—Pro. 1:33.

Rònt mundu, rumannan hòmber i muhé a obedesé e konseho di Yehova pa kasa “basta ta den Señor,” i nan ta konvensí ku esei tabata e mihó desishon ku nan a tuma. Rumannan ku ta soltero ta determiná pa kasa ku un persona den e pueblo di Dios pasobra nan ke hasi Yehova su kurason kontentu. Tuma, por ehèmpel, Michiko, un ruman muhé soltero na Hapon. Su famia a purba di konvens’é pa kasa ku un persona ku no tabata Testigu, pero e tabata determiná pa obedesé Dios. Ademas, tabata duru p’e mira algun di su amiganan kasa ku rumannan di kongregashon, miéntras ku e tabata soltera ketu bai. Kon el a superá e situashon ei? El a konta: “Kada bes mi tabata kòrda mi mes ku nos felisidat no ta dependé di si nos ta kasá òf nò, sino di sirbi Yehova, e ‘Dios felis.’ Mi tin sigur tambe ku Yehova ta duna nos e deseonan di nos kurason. Pues, si nos ke kasa ma nos no por haña un persona ku ta sirbi Yehova, ta mihó pa nos keda soltero pa aworakí.” (1 Tim. 1:11) Ku tempu, Michiko a kasa ku un bon ruman, i e ta kontentu ku el a skucha Yehova i warda.

Algun ruman hòmber tambe a warda te ora nan a haña e persona adekuá pa kasa kuné. Por ehèmpel, esei tabata e kaso ku Bill di Australia. El a atmití ku tabatin biaha ku el a sintié atraí na hende muhé ku no tabata Testigu. Pero semper el a sòru pa no bira familiar ku nan. Dikon? Pasobra e no kier a “forma un yugo desigual” ku un hende ku no ta kreyente. Atraves di añanan, e tabata interesá den algun ruman muhé, ma nan no tabata interesá den dje. Bill a warda 30 aña promé ku el a haña un ruman muhé ku tabatin e mesun metanan kuné. Kon e ta sintié aworakí? El a bisa: “No ta duel mi ku m’a warda asina tantu pa kasa.” El a  sigui splika: “Mi ta sinti mi bendishoná, pasobra ami ku mi kasá ta bai sirbishi huntu, studia huntu i adorá Dios huntu. Ademas, e amigunan di mi kasá awor ta mi amigunan tambe, pasobra nos tur ta forma parti di e pueblo di Yehova. Nos ta usa prinsipionan di Beibel pa mehorá nos matrimonio.”

KIKO BO POR HASI TURESTEN?

Kiko bo por hasi turesten ku bo ta konfia den e konseho di Yehova i ta warda riba un kasá ku ta sirbié? Bo por pensa riba e motibu pakiko bo no ta kasá ainda. Si e motibu prinsipal ta pasobra bo ke obedesé e mandamentu di Yehova di kasa “basta ta den Señor,” nos ke felisitá bo pa esei. Bo por tin sigur ku Yehova ta kontentu ku bo determinashon pa obedesé su Palabra. (1 Sam. 15:22; Pro. 27:11) Kiko mas bo por hasi? Sigui papia ku Yehova regularmente den orashon i kont’é presis kon bo ta sinti bo. (Sal. 62:8) Bo relashon ku Yehova lo bira mas fuerte si bo ta hasi esfuerso pa resistí e tentashonnan di mundu i mal deseo. Bo por tin sigur ku e Dios Haltísimo ta preokupá pa tur su sirbidónan fiel. No lubidá nunka ku bo ta un persona balioso den su bista. E ta interesá den bo nesesidatnan i bo deseonan. Pero kiko si bo deseo di kasa ainda ta hopi fuerte? Aunke Yehova no ta primintí niun hende un kasá, e sa kiko ta mihó pa bo i kon pa satisfasé bo nesesidat.—Sal. 145:16; Mat. 6:32.

Tin biaha bo por sinti bo manera David, kende a bisa: “Kontestá mi lihé, o SEÑOR, mi spiritu ta desmayá; no skonde bo kara pa mi.” (Sal. 143:5-7, 10) No entregá na momentonan asina. Tene pasenshi i warda te ora ku Yehova mustra bo kiko e ke pa bo hasi. Pues, tuma tempu pa lesa su Palabra i meditá riba loke bo ta lesa. Asina lo bo komprondé mihó kiko Yehova ta ferwagt di bo i lo bo mira kon el a yuda su sirbidónan di pasado. Si bo skucha Yehova, lo bo tin e konfiansa pa sigui obedes’é.

Rumannan soltero ta di gran balor den kongregashon, pasobra hopi biaha nan ta yuda famianan i chikitinnan

Kiko mas bo por hasi pa bo ta felis i okupá miéntras ku bo ta soltero? Bo por usa e tempu ei pa hasi bo relashon ku Yehova mas fuerte i pa haña un bon reputashon. Tambe bo por trata di ta mas generoso i prudente. Hasi esfuerso pa bo ta un hende agradabel pa trata kuné, un persona trahadó i leal na Yehova. Asina lo bo ta mihó prepará pa bo por tin un matrimonio felis. (Gén. 24:16-21; Rut 1:16, 17; 2:6, 7, 11; Pro. 31:10-27) Buska promé e Reino. Partisipá plenamente den e trabou di prediká i den otro aktividatnan kristian. Esei lo protehá bo i asina bo ta evitá di tuma desishonnan ku no ta sabí. Bill, ku nos a menshoná anteriormente, ta bisa tokante e tempu ku e kier a kasa: “Mi a usa e tempu den Yehova su sirbishi trahando pionero. E añanan a pasa masha lihé!”

Sí, ainda ta realístiko pa kasa solamente “den Señor.” Ora bo ta obedesé e mandamentu ei, lo bo onra Yehova i lo bo ta felis. Beibel ta bisa: “Felis ta un hòmber ku rèspèt pa Señor, ku ta stima su mandatonan di henter su kurason. Rikesa i bonansa ta biba den su kas, e bon ku e ta hasi lo keda pa semper.” (Sal. 112:1, 3, BPK) Pues, sea determiná pa pega na e mandamentu divino di kasa “basta ta den Señor.”

^ par. 7 Den e artíkulo akí, nos ta analisá e asuntu desde e punto di bista di ruman muhé, aunke e mesun prinsipionan ta konta pa ruman hòmber.

^ par. 13 A kambia algun nòmber.