Kon nos por yuda rumannan ku ta alérgiko pa perfume i otro holónan fuerte?

Hende ku ta sensitivo pa holó fuerte ta den un situashon difísil. Hopi biaha, durante nan aktividatnan diario, nan no por evitá di ta den kontakto ku hende ku ta usa perfume. P’esei algun di nan a puntra si ta posibel pa pidi e rumannan pa no usa perfume òf aftershave na reunion, asamblea i kongreso.

Naturalmente, ningun kristian konsientemente lo ke hasi algu ku ta stroba un ruman di asistí na reunion. Nos tur tin mester di e animashon ku nos ta haña na e reunionnan. (Heb. 10:24, 25) P’esei, si tin un ruman ku no por ta na reunion pasobra holó di perfume ta hasié malu, e por papia di e asuntu ku e ansianonan. Aunke lo no ta apropiá ni bíbliko pa bini ku regla tokante uso di perfume, e ansianonan kisas por yuda e kongregashon komprondé ki problemanan algun ruman ta haña nan kuné. Dependiendo di e sirkunstansia, e ansianonan por disidí di duna un diskurso den un parti di nesesidat lokal durante e Reunion di Sirbishi, basá riba informashon ku a keda publiká anteriormente, òf nan por hasi un anunsio diskreto tokante e asuntu. * Ma e ansianonan no mester keda hasi e tipo di anunsionan akí konstantemente. Kòrda ku na nos reunionnan tur ora bai tin hende nobo i bishitante ku no ta na haltura di e situashon, i nos ke pa e personanan akí sinti nan bon biní. Nos no mester laga niun hende sinti nan inkómodo pasobra nan a usa un tiki perfume.

Si sirkunstansianan lokal ta permití, e kuerpo di ansiano por apartá un espasio den Salòn di Reino pa e rumannan ku no por ku perfume. Por ehèmpel, kisas tin un sala di konferensia ekipá ku sistema di zonido kaminda nan por sinta pa asina benefisiá di e reunion. Si e ansianonan a hasi nan bèst pa resolvé e asuntu pero tòg ainda tin ruman ta bira hopi malu di e holó di perfume, e kongregashon por graba e reunionnan pa e personanan akí òf laga nan sigui e reunion via telefòn, manera ta hasi den kaso di rumannan ku ta malu i ku no por sali for di kas.

Durante último añanan, Nos Ministerio di Reino a animá nos pa limitá uso di perfume i kolonia fuerte ora nos ta asistí na kongresonan regional. E rumannan ta urgi nos pa sigui e instrukshon akí ya ku mayoria di kongreso ta den lugánan será ku ta dependé di sistema di ventilashon. Ademas, generalmente no ta posibel pa perkurá un área apartá na e sitionan ei pa rumannan ku ta alérgiko pa holó fuerte. Ma no tabata e intenshon pa e instrukshonnan akí bira un regla general pa reunionnan di kongregashon, i niun hende no mester apliká nan asina tampoko.

Tanten ku nos ta biba den e mundu akí, nos tur ta sufri e konsekuensianan di imperfekshon. P’esei nos ta apresiá e esfuerso ku otronan ta hasi pa aliviá nos sufrimentu. Kisas pa nos ta un sakrifisio pa no usa perfume òf aftershave. Pero amor lo motivá nos pa hasi esei, ya asina ta mas fásil pa un ruman ku ta alérgiko pa holó fuerte por asistí na reunion.

 Tin fuentenan históriko, fuera di Beibel, ku ta konfirmá e eksistensia di Ponsio Pilato?

E nòmber di Pilato ta skirbí na latin riba e pida piedra akí

Lesadónan di Beibel konosé Ponsio Pilato pa su papel den e huisio i ehekushon di Hesus. (Mat. 27:1, 2, 24-26) Ma e nòmber di e gobernador romano akí ta aparesé tambe den otro registronan históriko di e époka ei. Segun The Anchor Bible Dictionary, e kolekshon di referensia históriko na Ponsio Pilato ta “mas grandi i mas detayá ku di kualke otro gobernador romano di Hudea.”

E nòmber di Pilato ta aparesé mas tantu den e obranan skirbí di e historiadó hudiu Hosefo, kende a menshoná tres insidente spesífiko relashoná ku Pilato, tempu ku e tabata goberná Hudea. Un otro historiadó hudiu ku yama Filo tambe a menshoná un di kuater insidente. E eskritor romano Tásito, ku a registrá e historia di e emperadornan romano, a konfirmá ku Ponsio Pilato a duna òrdu pa mata Hesus durante e reinado di Tiberio.

Na 1961, arkeólogonan ku tabata traha den un antiguo teater romano na Sesarea (Israel) a haña un pida piedra riba kua por a lesa klaramente e nòmber di Pilato na latin. E inskripshon (wak e potrèt) no ta kompleto, pero ta parse ku originalmente e tabata bisa: “Ponsio Pilato, Prefekto di Hudea, a dediká e Tiberieum [akí] na e onorabel diosnan.” “Tiberieum” probablemente tabata un tèmpel ku nan a traha na onor di e emperador romano Tiberio.

Un ruman muhé mester tapa kabes ora e ta dirigí un estudio di Beibel den presensia di un publikadó maskulino?

Un artíkulo di “Pregunta di Lektor,” publiká den E Toren di Vigilansia di 15 di yüli 2002, a splika ku un ruman muhé mester tapa su kabes ora e ta dirigí un estudio di Beibel den presensia di un publikadó maskulino, sea ku e publikadó ta batisá òf nò. Despues di un análisis mas profundo di e asuntu akí ta parse apropiá pa ahustá e instrukshon akí.

Un ruman muhé mester tapa kabes ora ku e ta dirigí un estudio di Beibel establesí kaba den presensia di un ruman hòmber batisá. Dikon? Wèl, asina e ta mustra rèspèt pa Yehova su prinsipio di outoridat den e kongregashon kristian; bon mirá, e ruman muhé ta efektuando un tarea ku normalmente un ruman hòmber batisá mester hasi. (1 Kor. 11:5, 6, 10) Klaru ku un otro opshon ta pa e ruman muhé pidi e ruman hòmber pa dirigí e estudio, si e ta kapasitá pa hasié.

Di otro banda, si un ruman muhé ta bai un estudio di Beibel establesí kaba ku un publikadó maskulino no-batisá ku no ta su kasá, no tin niun norma bíbliko ku ta indiká ku e ruman muhé mester tapa kabes. Pero kisas tin ruman muhé ku a base di nan konsenshi ta disidí di tapa nan kabes tòg na okashonnan asina.

^ par. 2 Pa mas informashon riba e tema akí, wak e artíkulo “Yudansa pa Hende Ku Ta Sufri di MCS,” den e revista ¡Despertad! di 8 di ougùstùs 2000, página 8-10.