Bai na kontenido

Bai na kontenido

 FOR DI NOS ARCHIVO

“Un Temporada Masha Spesial”

“Un Temporada Masha Spesial”

NA AÑA 1870, un grupito na Allegheny, ku awe ta parti di Pittsburgh (Pennsylvania), a kuminsá studia Beibel. Enkabesá pa Charles Taze Russell, nan a analisá e doktrina di e reskate, i mesora nan a ripará ku esaki tabata un punto sentral den e propósito di Yehova. Nan a keda masha emoshoná ora nan a siña ku e sakrifisio di Kristu ta habri e kaminda pa salbashon, anto asta pa hende ku ainda no a tende di Hesus! Gratitut a motivá nan pa sigui konmemorá e morto di Hesus tur aña.—1 Kor. 11:23-26.

Despues Ruman Russell a kuminsá publiká e revista Zion’s Watch Tower (E Toren di Vigilansia di Sion), ku a defendé e siñansa di e reskate komo e ekspreshon prinsipal di e amor di Dios. E Toren di Vigilansia a referí na e époka di Konmemorashon di e morto di Kristu komo “un temporada masha spesial” i a animá su lektornan pa konmemor’é sea na Pittsburgh òf kualke otro kaminda den gruponan privá. E revista a bisa ku Kristu lo ta huntu ku nan, “asta si ta apénas dos òf tres persona di e mesun fe presioso akí t’ei presente,” òf unu so.

Kada aña, mas i mas hende tabata bini Pittsburgh pa e Konmemorashon, òf Memorial. Riba e invitashon tabatin pará: “Kurasonnan kaluroso lo laga bo sinti bo bon biní akinan.” Sí, Studiantenan di Beibel di e área ei gustosamente tabata duna kuminda i alohamentu na nan rumannan spiritual. Na 1886, despues di Memorial nan a tene un “Reunion General” (un tipo di kongreso) di vários dia. E Toren di Vigilansia a urgi: “Bini ku un kurason ku ta rebosá di amor pa e Doño, pa su rumannan i pa su bèrdat.”

Un skema ku nan tabata usa pa pasa e pan i e biña di Memorial na e Tabernakel di Lònden

Durante vários aña, e Studiantenan di Beibel na Pittsburgh tabata tene kongreso pa hende ku a pone fe den e reskate i asistí na Memorial. Segun ku e kantidat di Studiante di Beibel a krese, asina tambe e asistensia i kantidat di reunion pa Memorial ku nan tabata tene rònt mundu a oumentá. Ray Bopp, kende tabata di e eklesia (kongregashon) di Chicago, a konta ku den dékada di 1910 tabata dura vários ora pa pasa e pan i e biña entre e sientos di hendenan ku a asistí, ya ku kasi tur hende tabata kome di e pan i bebe di e biña.

Ki emblema, òf símbolo, nan tabata usa? Aunke E Toren di Vigilansia a indiká ku Hesus a usa biña durante e Sena di Señor, pa un tempu e revista a rekomendá pa usa djus di drùif fresku òf di rasenchi herebé, pa no hinka esnan ku tabata “débil den karni” den tentashon. Ma nan tabatin biña mes tambe pa esnan ku tabata sinti ku ta “biña fermentá mester a usa.” Ku tempu, e Studiantenan di Beibel a bin komprondé ku biña kòrá puru ta e símbolo apropiá pa representá e sanger di Hesus.

E pida papel i e pòtlot akí a pasa di sèl pa sèl den un prizòn na Nicaragua pa konta e asistensia na Memorial

E Konmemorashon tabata un oportunidat pa reflekshoná seriamente riba e nifikashon di e morto di Hesus. Pero, den algun kongregashon tabata reina un  ambiente di tristesa durante e diskurso, i ora e programa a kaba, tur hende tabata sali bai sin papia un pia di palabra. P’esei e buki Yehova, publiká na 1934, a splika ku e rumannan no mester a tene e Memorial “ku tristesa,” konsentrando riba Hesus su morto doloroso, sino mas bien “ku goso,” ya ku for di 1914 e ta goberná komo Rei.

Rumannan ku a reuní den e kampo di trabou fòrsá na Mordvinia (Rusia) pa tene Memorial na 1957

Na 1935 a bini un klarifikashon tokante ken e “multitut grandi” deskribí na Revelashon 7:9 tabata. Esei tabatin un gran efekto riba e selebrashon di Memorial. Te ku e tempu ei, e sirbidónan di Yehova tabata konsiderá e multitut grandi komo un grupo di kristian dediká pero ku ménos zelo. Ma e aña ei nan a komprondé ku e multitut grandi akí tabata sirbidónan fiel di Yehova ku tin e speransa di biba pa semper den un paradeis riba tera. Poko despues di e klarifikashon akí, Ruman Russell Poggensee a saminá su kurason kuidadosamente i a atmití: ‘Yehova no a usa su spiritu santu pa duna mi e yamada pa biba den shelu.’ Tantu é komo hopi otro ruman mas a stòp di kome di e pan i bebe di e biña, pero sí nan a sigui asistí na Memorial.

Durante e “temporada masha spesial” ei, nan tabata organisá kampañanan spesial di prediká i tur ruman por a demostrá nan apresio pa e reskate di Kristu partisipando den nan. Na 1932, e Boletin a spièrta kristiannan pa nan no ta “santu di Memorial,” esta, rumannan ku ta djis asistí na reunion i tuma di e símbolonan pero ku no ta prediká. Mas bien, nan mester tabata “trahadónan outéntiko,” es desir, nan mester a prediká e mensahe di e bèrdat. Na 1934, e Boletin a hasi un yamada pa e rumannan traha pionero ousiliar puntrando: “Nos lo alkansá 1.000 [pionero ousiliar] durante e temporada di Memorial?” Relashoná ku e ungínan, e Informadó a komentá: “Nan goso lo ta kompleto solamente si nan ta partisipá den e trabou di prediká e Reino.” Ku tempu, esaki lo a konta tambe pa esnan ku tabatin e speransa di biba riba tera. *

Harold King a skirbi poesia i kantika tokante Memorial ora e tabata den kashòt

Pa tur Testigu di Yehova, e Konmemorashon di e morto di Kristu ta e selebrashon di mas importante di aña. Nan ta ten’é asta bou di sirkunstansianan difísil. Por ehèmpel, na 1930, Pearl English ku su ruman muhé, Ora, a kana un 80 kilometer pa asistí na Memorial. E misionero Harold King, ku tabata den kashòt den prizòn na China, a skirbi poesia i kantika tokante Memorial i a usa aros ku rasenchi pa traha e pan i e biña. Anto ku kurashi rumannan di Ost Europa, Sentroamérika i Afrika a selebrá e Konmemorashon di e morto di Hesus durante di guera i persekushon. No ta importá na unda nos ta biba òf den ki situashon nos ta, nos tur ta reuní huntu pa onra Yehova Dios i Hesukristu durante e temporada spesial di Memorial.

^ par. 10 E Boletin su nòmber a bira despues Informadó i awe e yama Nos Ministerio di Reino.