Bai na kontenido

Bai na kontenido

Laga Yehova Fortalesé i Protehá Bo Matrimonio

Laga Yehova Fortalesé i Protehá Bo Matrimonio

“Si SEÑOR no warda e stat, ta enbano e guardia ta keda lantá.”—SAL. 127:1b.

1, 2. (a) Dikon 24.000 israelita a pèrdè nan herensia maravioso? (b) Kiko nos ta siña for di e suseso ei?

DJIS promé ku e nashon di Israel a drenta e Tera Primintí, míles di hòmber israelita a kometé inmoralidat seksual ku “e yu muhénan di Moab.” Komo resultado, Yehova a ehekutá 24.000 israelita. E hòmbernan ei a spera asina tantu tempu pa risibí nan herensia, i awor ku nan tabata a punto di hañ’é, nan a pèrdè tur e bendishonnan maravioso ei pasobra nan a kai den tentashon pa kometé inmoralidat. Esta duele!—Num. 25:1-5, 9.

2 E ehèmpel desastroso ei “a ser skirbí komo spièrtamentu pa nos ku ta biba na final di e tempu akí.” (1 Kor. 10:6-11) Awe, den e fase final di “e último dianan,” e sirbidónan di Dios ta a punto di drenta e mundu nobo. (2 Tim. 3:1; 2 Ped. 3:13) Pero, lamentablemente algun sirbidó di Yehova no a keda alerta i a kai den e trampa di inmoralidat. I awor nan ta kosechá e konsekuensianan amargo di nan kondukta inmoral, i si nan no arepentí, nan por asta pèrdè e oportunidat di biba pa semper den Paradeis riba tera.

3. Dikon parehanan kasá tin mester di e guia i protekshon di Yehova? (Wak e promé plachi.)

3 E mundu djawe ta opseshoná ku sèks, i p’esei rumannan  kasá tin mester di Yehova su guia i protekshon pa konserbá nan matrimonio. (Lesa Salmo. 127:1.) Den e artíkulo akí nos lo analisá kon un pareha por fortalesé nan matrimonio. Nan tin ku (1) protehá nan kurason, (2) hala serka Dios, (3) kultivá e personalidat nobo, (4) mantené bon komunikashon i (5) satisfasé e nesesidatnan emoshonal i seksual di otro.

PROTEHÁ BO KURASON

4. Kiko a pone algun kristian kometé inmoralidat?

4 Kiko a pone algun kristian kometé inmoralidat? Hopi biaha e tentashon ta kuminsá ku loke wowo ta mira. Hesus a splika: “Ken ku sigui wak un muhé ku pashon, ya kaba a kometé adulterio kuné den su kurason.” (Mat. 5:27, 28; 2 Ped. 2:14) Hopi ruman ku a kai den e trampa di inmoralidat a kuminsá hasi kosnan ku a debilitá nan defensa moral. Tin di nan tabata wak pornografia, lesa bukinan erótiko òf wak kosnan moralmente repugnante riba Internet. Otronan tabata wak pelíkulanan, obranan teatral òf programanan di televishon ku ta presentá esenanan di sèks abiertamente. I algun asta a bishitá klupnan nokturno, shownan kaminda hende ta kita sunú òf lugánan pa haña masashi erótiko.

5. Dikon nos tin ku protehá nos kurason?

5 Tambe tin kristian ku a kai den tentashon pasobra nan a buska atenshon serka un persona ku no ta nan kasá. Nos ta biba den un mundu kaminda tur kos mag i e hendenan ta entregá nan mes na tur sorto di impulso seksual. Pues ta masha fásil pa nos kurason traishonero i desesperá pone nos haña sintimentunan romántiko pa un hende ku no ta nos kasá. (Lesa Yeremías 17:9, 10.) Hesus a spièrta: “For di kurason ta sali pensamentu malisioso, matamentu, adulterio, fornikashon.”—Mat. 15:19.

6, 7. (a) Kiko por sosodé si nos laga deseo inapropiá saka rais den nos kurason? (b) Kon nos por evitá di kai den inmoralidat seksual?

6 Unabes deseo inapropiá saka rais den e kurason traishonero di dos persona ku ta gusta otro, nan lo por kuminsá papia tokante asuntunan ku eigenlijk ta ku nan kasá so nan mester papia. Lo no tarda mashá ku nan ta kuminsá bini ku mas i mas èksküs pa topa otro i pa pasa tempu huntu. Kisas nan ta pretendé ku e enkuentronan ei ta inosente òf puru kasualidat. Pero, pokopoko, nan sintimentunan pa otro ta bira mas intenso, i nan defensa moral ta bira suak i ta bira mas difísil pa nan hasi loke ta korekto. Mas íntimo nan relashon bira, mas difísil ta pa nan stòp, apesar ku nan sa ku loke nan ta hasi ta malu.—Pro. 7:21, 22.

7 Pokopoko nan barera spiritual ta basha abou, i nan ta lubidá kompletamente riba e normanan moral di Yehova. Loke a kuminsá ku simpel kòmbersashon ta para bira muchu mas: tenementu di man, sunchimentu, karisiamentu i mishimentu di otro na un manera ku ta stimulá deseo seksual. Pero tur e tipo di ekspreshonnan di kariño ei ta kosnan ku un persona tin mag di hasi solamente ku su kasá. Al final, nan kada un ta “ser atraí i sedusí [òf, “kapturá komo si fuera ku as,” nota, NW] pa su mes deseo.” Dado momento, nan deseo ta bira asina intenso ku e ta “duna lus na piká”: nan ta kometé inmoralidat seksual. (Sant. 1:14, 15) Esta un final tristu! E dos personanan ei por a evitá tur esaki si nan a laga Yehova protehá nan matrimonio. Yehova ta siña nos respetá matrimonio komo un union santu. Pero kon nos por desaroyá e rèspèt ei?

 HALA SERKA DIOS

8. Kon nos amistat ku Yehova ta protehá nos kontra inmoralidat?

8 Lesa Salmo 97:10. Amistat ku Yehova ta un protekshon kontra inmoralidat. Mas nos siña tokante Yehova su bunita kualidatnan i purba di imit’é “komo yunan stimá, i sigui kana den amor,” mas fásil lo ta pa nos rechasá ‘fornikashon i tur sorto di impuresa.’ (Efe. 5:1-4) Parehanan kasá sa ku “Dios lo husga esnan ku ta kometé fornikashon i adulterio.” P’esei nan tin ku hasi nan máksimo esfuerso pa keda fiel na otro.—Heb. 13:4.

9. (a) Dikon Yosef por a resistí e tentashon inmoral? (b) Kiko nos por siña for di e ehèmpel di Yosef?

9 Algun kristian a debilitá nan defensa moral debí ku nan a kuminsá asosiá despues di ora di trabou ku koleganan ku no ta Testigu. Otro rumannan a haña nan ku tentashon na trabou mes. Esei ta loke a pasa ku e hóben Yosef. Miéntras ku e tabata traha, el a ripará ku e kasá di su doño tabata gust’é. Dia aden dia afó, e muhé tabata purba di konvens’é pa drumi kuné. Finalmente, “e muhé a kohe Yosef tene na su paña, bisando: ‘Drumi ku mi!’” Pero Yosef a nenga i a kore bai lag’é. Kiko a yuda Yosef resistí e tentashon ei i keda fiel na su prinsipionan? Wèl, e tabata determiná pa no daña su amistat ku Dios, i esei a protehá su puresa i integridat. Su posishon firme a pon’é pèrdè su trabou i el a ser enkarselá inhustamente, ma Yehova a bendishon’é. (Gén. 39:1-12; 41:38-43) Sea ta na trabou òf kualke otro kaminda, nos tin ku evitá situashonnan ku por hinka nos den tentashon pa bira infiel na nos kasá.

KULTIVÁ E PERSONALIDAT NOBO

10. Kon e personalidat nobo ta protehá un matrimonio?

10 E personalidat nobo, “ku a ser kreá segun e boluntat di Dios den berdadero hustisia i lealtat,” ta un parti esensial di e defensa spiritual di parehanan kasá. (Efe. 4:24) Esnan ku bisti e personalidat nobo akí ta “mata,” na moda di papia, e inklinashonnan di nan kurpa. Kon asina? Den e sentido ku nan ta lucha kontra di práktikanan manera “fornikashon, impuresa, pashon [deskontrolá], mal deseo i golosidat.” (Lesa Kolosensenan 3:5, 6.) Aki e palabra “mata” ta indiká ku nos mester tuma medidanan drástiko pa dominá deseonan seksual inapropiá. Nos lo evitá tur loke por lanta deseo seksual pa un persona ku no ta nos kasá. (Yòb 31:1) Ora nos ta biba segun e normanan di Dios, nos ta siña “odia loke ta malu” i “pega na loke ta bon.”—Rom. 12:2, 9.

11. Kon e personalidat nobo por fortalesé un matrimonio?

11 E personalidat nobo ta reflehá e kualidatnan di “Esun ku a kre’é,” Yehova Dios. (Kol. 3:10) Ora e esposo i esposa ta kultivá “tierno kompashon, bondat, humildat, suavedat i pasenshi,” nan matrimonio lo bira fuerte i Yehova lo bendishoná nan. (Kol. 3:12) Tambe nan lo tin mas armonia den nan matrimonio si nan “laga e pas di Kristu reina den [nan] kurason.” (Kol. 3:15) I un pareha ku tin “tierno kariño pa otro” lo “tuma e inisiativa” pa duna otro atenshon i rèspèt.—Rom. 12:10.

12. Ki kualidatnan abo ta haña ta importante pa un matrimonio felis?

12 Ora a puntra un pareha kua ta e kualidatnan ku ta yuda hasi nan matrimonio felis, Sid, e esposo, a kontestá: “E kualidat prinsipal ku semper nos ta trata di kultivá ta amor. I nos a ripará ku suavedat tambe ta masha importante.” Su kasá, Sonja, tabata di akuerdo kuné i a agregá: “Sin duda, amabilidat tambe ta un kualidat esensial.  I nos tur dos ta purba di ta humilde, maske esei no ta fásil tur biaha.”

MANTENÉ BON KOMUNIKASHON

13. Kiko ta un faktor klave pa un matrimonio stabil, i dikon?

13 Parehanan ku ta papia ku otro na un manera kariñoso ta hasi nan matrimonio mas stabil. Esei sigur ta un faktor klave. Lamentablemente, tin esposo òf esposa ta papia ku mas rèspèt ku hende straño ku nan ta papia ku nan kasá! I algun asta ta trata nan bestianan di kas mihó ku nan kasá! Ora den un matrimonio tin “amargura malisioso, rabia, furia, gritamentu i papiamentu di kos ofensivo,” esei ta debilitá e defensa spiritual di e pareha. (Efe. 4:31) Pues, en bes di suak nan relashon ku krítika konstante i papiamentu di palabra skèrpi, nan tin ku fortalesé nan matrimonio ku palabranan kariñoso, tierno i kompasivo.—Efe. 4:32

14. Kiko nos mester evitá di hasi?

14 Komunikashon ta importante pa un bon matrimonio. Ta bèrdat ku Beibel ta bisa ku tin “un tempu pa keda ketu.” (Ekl. 3:7) Pero esei no ke men ku bo tin ku lanta un muraya di silensio, i stòp di papia ku bo kasá. Un esposa na Alemania a bisa: “Bou di tal sirkunstansianan, silensio por hùrt bo partner.” I el a agregá: “Aunke no ta semper fásil pa keda kalmu bou di strès, no ta bon tampoko pa djis laga tur emoshon sali. Lo bo por bisa òf hasi algu sin pensa ku por hùrt bo kasá, i esei simplemente ta hasi e situashon pió.” Parehanan no ta resolvé nan problemanan si nan ta grita otro òf nenga di papia ku otro. Na lugá di esei, nan por fortalesé nan relashon si nan ta resolvé desakuerdonan umbes i no ta laga eseinan para bira pleitunan ku no tin fin di kaba.

15. Kon bon komunikashon por fortalesé un matrimonio?

15 Un matrimonio ta bira mas fuerte tambe ora un pareha ta tuma tempu pa kompartí nan sintimentu i opinion ku otro.  Pero kòrda ku e manera ku nos ta bisa algu ta mes importante ku e kos ku nos ta bisa. P’esei, asta den situashonnan difísil, hasi esfuerso pa usa palabranan bondadoso i pa papia ku un tono amabel. Ta mas fásil e ora ei pa bo kasá skucha bo. (Lesa Kolosensenan 4:6.) Un pareha por fortalesé nan matrimonio ku bon komunikashon si nan ta papia “solamente loke ta bon pa edifiká segun e nesesidat di e momento, pa esaki por kompartí loke ta probechoso” ku nan kasá.—Efe. 4:29.

Un pareha por fortalesé nan matrimonio ku bon komunikashon (Wak paragraf 15)

SATISFASÉ E NESESIDATNAN EMOSHONAL I SEKSUAL DI OTRO

16, 17. Dikon ta importante pa parehanan kasá ta atento pa e nesesidatnan emoshonal i seksual di otro?

16 Parehanan por edifiká un matrimonio fuerte tambe ora nan ta preokupá mas pa satisfasé e nesesidatnan di nan kasá ku di nan mes. (Flp. 2:3, 4) Tantu esposo komo esposa mester ta atento pa e nesesidatnan emoshonal i seksual di nan kasá.—Lesa 1 Korintionan 7:3, 4.

17 Lamentablemente, tin kasá no ta kariñoso ku nan pareha òf no ta ekspresá ternura den nan relashonnan íntimo. Algun hende hòmber ta pensa ku ta hòmbernan débil ta tierno i suave ku nan kasá. Pero Beibel ta bisa: “Esposonan, biba ku boso esposanan ku komprenshon.” (1 Ped. 3:7BS) Un esposo tin ku komprondé ku pa e satisfasé e nesesidatnan emoshonal i seksual di su kasá no ta basta p’e djis tene relashon seksual kuné. E esposa lo disfrutá mas di e relashon seksual si tur otro ora e esposo ta kariñoso kuné i ta mustra ku e stim’é. Ora tur dos ta tene kuenta ku otro i ta demostrá amor i kariño, lo ta mas fásil pa nan satisfasé otro su nesesidatnan emoshonal i físiko.

18. Kon esposo i esposa por fortalesé nan laso matrimonial?

18 No tin ningun èksküs pa un hende ta infiel na su kasá, pero un falta di ternura por pone un esposo òf esposa bai buska kariño i intimidat serka un otro persona. (Pro. 5:18; Ekl. 9:9) P’esei Beibel ta konsehá parehanan kasá pa “no nenga di kumpli ku e deber ei [di satisfasé nan nesesidat] pa ku otro” a ménos ku ta ku konsentimentu di otro pa un tempu so. Dikon? “Pa Satanas no sigui hinka boso den tentashon pa motibu di boso falta di dominio propio.” (1 Kor. 7:5) Lo ta masha lamentabel si un pareha mester laga Satanas probechá di nan “falta di dominio propio” i pone un di nan kai den tentashon i kometé adulterio! Di otro banda, si en bes di buska nan “mes benefisio,” nan ta buska “esun di e otro persona” i satisfasé su nesesidatnan emoshonal i seksual komo muestra di nan amor i no komo un deber, nan lo fortalesé nan laso matrimonial.—1 Kor. 10:24.

SIGUI FORTALESÉ BO MATRIMONIO

19. Nos mester ta determiná pa hasi kiko, i dikon?

19 E mundu nobo ta den porta! Pues, ta masha peligroso pa entregá na deseonan karnal, ya ku esei por resultá mesun fatal pa nos ku e tabata pa e 24.000 israelitanan riba e Sabananan di Moab! Despues di deskribí e suseso bergonsoso i lamentabel ei, Beibel ta spièrta nos: “Laga esun ku ta kere ku e ta pará, tene kuidou pa e no kai.” (1 Kor. 10:12) Pues, ta masha importante pa nos protehá nos matrimonio i keda fiel na Yehova i na nos kasá. (Mat. 19:5, 6) Awor, mas ku nunka, nos tin ku ‘hasi tur nos esfuerso pa Dios haña nos finalmente sin mancha, sin defekto i na pas.’—2 Ped. 3:13, 14.