“[Amor] su vlamnan ta vlamnan di kandela, e vlam di SEÑOR.”—KANT. 8:6.

1, 2. Ken por benefisiá di Kantika di Sálomon, i dikon? (Wak e promé plachi.)

E BRÙIT ku e brùidehòm tabata blo wak otro den kara i smail. Tur hende por a mira ku nan tabata masha namorá di otro. E ruman hòmber ku a kaba di duna e diskurso di kasamentu a wak ku kuantu ternura nan tabata tene man i a puntra su mes: ‘Nan matrimonio lo resistí e prueba di tempu?’ Es desir, nan amor pa otro lo bira kada dia mas profundo? Òf pokopoko lo e kaba na nada? Ora un hòmber i un muhé ta stima otro di bèrdat, esei ta algu masha bunita i nan relashon por superá asta e problemanan di mas difísil. Pero lamentablemente, mas i mas matrimonio ta kaba na divorsio. Pues, ta lógiko ku hopi hende ta puntra nan mes: Amor por dura pa semper?

2 For di tempu di Rei Sálomon, amor berdadero tabata skars. Dikon? Sálomon a splika: “Mi a haña un hòmber [rekto] entre mil, ma entre tur esakinan mi no a haña un muhé. Mira, esaki so mi a haña: Dios a traha hende rekto, ma nan a buska hopi plan di maldat.” (Ekl. 7:26-29) E normanan moral di e israelitanan a bai asina atras ku tabata masha difísil pa Rei Sálomon haña un hòmber òf un muhé ku bon moral. Pa gran parti esaki tabata debí na e mal influensia di muhénan estranhero ku tabata adorá Baal. * Pero un  poema ku e rei a skirbi un 20 aña promé, Kantika di Sálomon, ta mustra ku amor duradero entre un hòmber i un muhé ta posibel. E poema ta deskribí kon e amor ei ta i kon nos por demostr’é. Tur sirbidó di Yehova, sea kasá òf soltero, por siña hopi for di e buki akí di Beibel.

AMOR BERDADERO TÁ EKSISTÍ!

3. Dikon un hòmber i un muhé por stima otro pa semper?

3 Lesa Kantika di Sálomon 8:6. Dikon Sálomon ta deskribí amor berdadero komo “e vlam di SEÑOR [òf, “vlam di Yah,” NW]”? Pasobra e kualidat di mas grandi di Yehova ta amor, i ora el a krea hende den su imágen, el a duna nos e kapasidat di imitá su amor. (Gén. 1:26, 27) Despues ku Yehova a krea e promé hòmber, Adam, el a dun’é un bunita kasá. Ora Adam a mira Eva pa promé biaha, el a sintié asina felis ku el a ekspresá su sintimentunan p’e ku palabranan poétiko. I sin duda, Eva tambe a sintié hopi uní ku su esposo, ya ku ta for di Adam Yehova a kre’é. (Gén. 2:21-23) Pues, komo ku ta Yehova a duna hende e kapasidat pa stima, ta posibel pa un hòmber i un muhé stima otro pa semper.

4, 5. Konta brevemente e historia di Kantika di Sálomon.

4 Kantika di Sálomon ta deskribí na un manera masha bunita e amor ku un hòmber i un muhé por tin pa otro. E ta un historia den forma di kantika, manera e kantikanan di ópera. E ta konta e historia di amor entre un mucha muhé di kunuku di e pueblito di Sunem (òf Sulem) i un wardadó di karné. E mucha muhé tabata kuida e kunukunan di wendrùif di su ruman hòmbernan, serka di e lugá kaminda Rei Sálomon ku su sòldánan tabata kamper. Un dia, Sálomon a mira e mucha muhé i a keda enkantá ku su beyesa. El a manda su sòldánan tres’é den e kampamentu. Pero for di kuminsamentu tabata bisto ku e mucha muhé tabata namorá di un wardadó di karné. Segun ku Sálomon tabata purba di gana su amor ku palabranan bunita i regalo, é, na su turno, tabata ekspresá libremente kiko e tabata sinti: e tabata ke ta serka su wardadó di karné. (Kant. 1:4-14) E wardadó tabata busk’é i a logra drenta e kampamentu. Ora el a haña e mucha muhé, nan dos a konfirmá nan amor pa otro ku palabranan masha bunita.—Kant. 1:15-17.

5 Ora Sálomon tabata bai Herúsalèm bèk, el a bai ku e mucha muhé, pero e wardadó di karné tambe a bai tras di su stimá. (Kant. 4:1-5, 8, 9) Ni maske kiko Sálomon a bisa òf hasi, e no por a gana e amor ku e mucha muhé tabata sinti pa e wardadó di karné. (Kant. 6:4-7; 7:1-10) Finalmente, e rei a laga e mucha muhé bai su kas bèk. Na final di e kantika, e mucha muhé sulamita ta yama su stimá pa kore bini serka dje lihé, ‘manera un biná yòn.’—Kant. 8:14.

6. Dikon no ta fásil pa sa ta ken ta papia den Sálomon su kantika?

6 E kantika ku Sálomon a skirbi ta un kantika bunita i yen di nifikashon. De echo, e ta ser yamá “Kantika di Kantikanan.” (Kant. 1:1) Pero den e kantika, no ta fásil pa identifiká e personahenan ku tabata papia. Kisas Sálomon tabata ke pa e beyesa poétiko di e kantika resaltá, i p’esei e no a agregá tur e detayenan ei. Aunke e kantika no ta menshoná nòmber di esun ku ta na palabra, tòg ta posibel pa sa ta ken ta papia a base di loke ta ser bisá. *

“BO EKSPRESHONNAN DI KARIÑO TA MIHÓ KU BIÑA”

7, 8. Duna algun ehèmpel di e “ekspreshonnan di kariño” ku e wardadó i e mucha muhé a bisa otro.

7 Den Kantika di Sálomon, e mucha muhé ku e wardadó di karné ta bisa otro  palabranan bunita pa ekspresá nan amor. Algun di e “ekspreshonnan di kariño” akí por zona straño den nos orea, ya ku nan a ser skirbí mas ku 3.000 aña pasá den e kultura di Medio Oriente. (Kant. 1:2) Pero maske nan kultura tabata diferente for di esun di nos awe, no ta difísil pa komprondé kon e pareha tabata sinti pa otro. Por ehèmpel, e wardadó a kompará e mucha muhé su wowonan suave i amabel ku wowo di palomba, loke ta indiká ku el a gusta su wowonan. (Kant. 1:15) Pa e mucha muhé tambe, e koló di wowo skur di e mucha hòmber, rondoná pa e blanku di wowo, tabata mes bunita ku un palomba ku ta baña den lechi.—Lesa Kantika di Sálomon 5:12.

8 Pero no ta tur nan ekspreshonnan di kariño tabata konsentrá riba bunitesa físiko. Por ehèmpel, e wardadó tabata gusta e manera amabel ku e mucha muhé tabata papia ku otro hende. (Lesa Kantika di Sálomon 4:7, 11.) El a bisa e mucha muhé: “Bo lepnan, mi brùit, ta gotia miel; miel i lechi ta bou di bo lenga.” P’e, e palabranan di e mucha muhé tabata mes agradabel i dushi ku lechi i miel. Pues, ora e wardadó a bisa e mucha muhé “bo ta tur bunita ku tin” i “no tin defekto den bo,” e no tabata referí simplemente na su beyesa físiko sino tambe na su bon kualidatnan.

9. (a) Ki klase di amor mester tin den un matrimonio? (b) Dikon ta importante pa pareha kasá ekspresá nan amor pa otro ku palabra?

9 Matrimonio mester ta mas ku djis un akuerdo formal òf un kontrakt sin amor òf kariño. Amor mester ta yùist un karakterístika importante di matrimonionan kristian. Pero ki klase di amor esei ta? Ta e amor basá riba prinsipio bíbliko ku nos mester tin pa tur hende? (1 Huan 4:8) Òf ta e amor ku di manera natural nos ta sinti pa nos famia? Ta e kariño spesial ku tin entre bon amigu? (Huan 11:3) Òf ta amor romántiko? (Pro. 5:15-20) Bon mirá, berdadero amor den un matrimonio mester tin tur e sintimentunan ei. I ta importante pa e esposo i esposa demostrá e amor ei ku palabra i ku echo. Nan no mester permití pa e keasernan di tur dia stroba nan di ekspresá nan amor pa otro. Nan demostrashonnan di kariño ta yuda nan sinti nan mas felis i sigur. Esaki ta konta tambe pa e kulturanan kaminda nan ta regla kasamentu di antemano. Sa sosodé den kasonan asina ku e pareha kasi no a haña chèns di konosé otro promé ku e dia di kasamentu. Pues, segun ku nan ta siña konosé otro i nan amor ta krese, nan tin ku ekspresá ku palabra e amor ku nan ta sinti pa otro. Esaki lo hasi nan matrimonio mas fuerte i lo hala nan mas serka otro.

10. Ki otro bon efekto ekspreshonnan di kariño por tin riba un matrimonio?

10 Tin un bon motibu mas pa parehanan kasá ekspresá nan kariño na otro. Den e kantika, Rei Sálomon a ofresé e mucha muhé sulamita ‘adornonan di oro, ku kuenta di plata.’ Tambe Sálomon a bis’é tur tipo di piropo: ku e ta “mes bunita ku luna yen, mes puru ku solo.” (Kant. 1:9-11; 6:10) Ma e mucha muhé no a hasi kaso di dje i a keda fiel na su wardadó stimá, aunke nan dos no por tabata huntu. Kiko a yud’é ku e no a kai pa Sálomon? (Lesa Kantika di Sálomon 1:2, 3. *) Wèl, esei tabata e grato rekuerdo di e “ekspreshonnan di kariño” di su wardadó. Pa e mucha muhé, su palabranan di amor tabata “mihó ku biña” ku ta hasi kurason di hende kontentu. I ora e mucha muhé tabata den palasio, e nòmber di e mucha hòmber a konsol’é manera “zeta di holó dushi” riba su kabes. (Sal. 23:5; 104:15) Pues, ta masha  importante pa esposo i esposa ekspresá nan kariño pa otro ku frekuensia, ya ku esei ta yuda nan amor krese. Anto e dushi rekuerdonan agradabel ei por fortalesé nan amor i lag’é dura.

NO LANTA AMOR SIN “KU E TA DESEÁ ESAKI”

11. Kiko kristiannan soltero por siña for di loke e sulamita a bisa e muhénan den e palasio di Sálomon?

11 Kristiannan soltero ku ta buska un kasá por siña algun lès for di Kantika di Sálomon. E sulamita no tabata sinti nada pa Rei Sálomon. P’esei el a bisa e muhénan di palasio firmemente: “No lanta ni spièrta mi amor te ora ku e ta deseá esaki.” (Kant. 2:7; 3:5) Dikon e no tabata ke esei? Pasobra no ta korekto pa kuminsá un relashon romántiko ku ken ku ta. Pues, ta sabí pa un kristian ku ta deseá di kasa warda ku pasenshi te ora ku e topa un persona ku di bèrdat e por stima.

12. Dikon e sulamita tabata stima e wardadó di karné?

12 Dikon e sulamita tabata stima e wardadó di karné? Wèl, ta bèrdat ku e mucha hòmber tabatin bon tipo, manera e sulamita a deskribié. E mucha muhé a bisa ku su mannan tabata fuerte manera ‘bara di oro’ i su pianan tabata bunita i fuerte manera ‘pilá di alabaster.’ Pero e tabata mas ku simplemente un hòmber fuerte i ku bon tipo. E mucha muhé tabata sa ku e wardadó tabata un persona spiritual ku masha bon kualidat. Ta p’esei e mucha hòmber tabata spesial den su bista, “manera un palu di apel meimei di e palunan di mondi será,” sí, stimá “meimei di e yònkumannan.”—Kant. 2:3, 9; 5:14, 15.

13. Dikon e wardadó di karné tabata stima e sulamita?

13 Anto dikon e wardadó di karné tabata stima e sulamita? No tin duda ku e sulamita tabata masha bunita mes. El a kapta asta e atenshon di Rei Sálomon, ku e tempu ei tabatin “sesenta reina i ochenta konkubina, i mucha muhénan, muchu hopi pa konta.” Pero ta djis pa su bunitesa e wardadó di karné tabata stim’é? Nò. Por ehèmpel, e tabata un mucha muhé remarkablemente humilde i modesto i a kompará su mes ku un simpel “leli di e vayenan,” un flor komun i koriente. E tambe tabata stima Yehova i tabatin bon kualidat. P’esei no ta un sorpresa ku den bista di e mucha hòmber e tabata úniko, “manera un leli meimei di sumpiña.”—Kant. 2:1, 2; 6:8.

14. Kiko kristiannan soltero ku ke kasa por siña for di e wardadó di karné i e sulamita?

14 Beibel ta bisa bon kla ku kristiannan  mester kasa “den Señor.” (1 Kor. 7:39) Esaki ta nifiká ku un persona soltero ku ke kasa lo no forma relashon romántiko ku un hende ku no ta kompartí su fe; mas bien lo e kasa solamente ku un persona ku ta batisá i ku ta stima Yehova. Dikon esaki ta importante pa un bon matrimonio? Wèl, tur pareha kasá ta haña nan konfrontá ku e tenshonnan di bida diario. Pero si nan tur dos tin un bon relashon ku Yehova, nan por tin pas i felisidat den nan matrimonio. Pues, si bo ta deseá di kasa, hasi meskos ku e wardadó di karné i e sulamita: Buska un persona ku tin bon kualidat i ku realmente ta stima Yehova.

Un kristian lo no ke kuminsá un relashon romántiko ku un persona ku no ta kompartí nos fe (Wak paragraf 14)

MI BRÙIT TA MANERA “UN HÒFI SERÁ”

15. Kon parehanan ku ta namorá otro por imitá e ehèmpel di e sulamita?

15 Lesa Kantika di Sálomon 4:12. Dikon e wardadó di karné a bisa ku su mucha muhé sulamita tabata manera “un hòfi será”? Un hòfi será ku muraya òf waya no ta habrí pa públiko. Normalmente, ta via un porta ku sa ta di lòk so bo por drenta. E sulamita tabata manera e hòfi ei pasobra su amor i kariño tabata disponibel solamente pa su futuro esposo: e wardadó di karné. E tabatin pensá di kasa ku e mucha hòmber ei, i p’esei e no a hasi kaso di Rei Sálomon. Anto e no kier a kambia di idea tampoko. El a demostrá ku e tabata manera “un muraya” i no manera “un porta” ku ta habri fásilmente. (Kant. 8:8-10) Di e mesun manera, un pareha kristian ku tin pensá di kasa mester ta leal na otro i no duna atenshon romántiko na niun otro persona; nan amor i kariño ta reservá eksklusivamente pa nan futuro kasá.

16. Kiko Kantika di Sálomon ta siña nos tokante namoramentu?

16 Un dia, e wardadó di karné a pidi e sulamita pa bai dal un keiru kuné, pero e ruman hòmbernan di e mucha muhé no a lag’é bai. Na lugá di esei, nan a mand’é bai kuida e kunukunan di wendrùif. Dikon? Ta konfia nan no tabata konfi’é? Akaso nan a pensa ku nan ruman muhé lo kier a hasi algu inmoral ku e wardadó? Nò, simplemente nan kier a protehá nan ruman muhé i a tuma prekoushon pa e no haña su mes den un situashon ku lo por a hink’é den tentashon pa hasi algu malu. (Kant. 1:6; 2:10-15) Ki lès kristiannan soltero por saka for di esaki? Nan mester tuma e prekoushonnan nesesario pa tene nan namoramentu limpi. Esaki ta enserá ku nan lo evitá situashonnan ku por hiba na inmoralidat seksual, manera bai lugánan isolá nan dos so. I aunke no tin nada malu den ekspresá kariño pa otro, nan mester sòru pa esei ta na un manera limpi.

17, 18. Kiko bo a siña for di Kantika di Sálomon?

17 Yehova a instituí matrimonio pa e dura pa bida largu, i e tabata ke pa e hòmber i e muhé stima otro. Normalmente, ora un pareha kaba di kasa, nan tin masha amor i kariño pa otro. Pero pa nan matrimonio dura, nan mester hasi esfuerso pa nan amor pa otro keda bibu, manera un vlam di kandela ku no ta paga nunka.—Mar. 10:6-9.

18 Si bo ke kasa, buska un persona ku di bèrdat bo por stima. Ora bo hañ’é, traha huntu pa tene boso amor pa otro bibu, manera un vlam ku no ta paga. Manera nos a siña for di Kantika di Sálomon, amor berdadero, esta, amor ku ta dura pa semper, tá eksistí. E ta ‘e vlam di Yah.’—Kant. 8:6.

^ par. 2 Wak E Toren di Vigilansia di 15 di yanüari 2007, página 31.

^ par. 6 Wak e “Puntonan Sobresaliente di Kantika di Sálomon” den e buki Perspikasia pa Komprondé e Skritura (na spañó), Tomo 1, página 421.

^ par. 10 Kantika di Sálomon 1:2, 3 (NW): “Mare e por sunchi mi ku e sunchinan di su boka! Pasobra bo ekspreshonnan di kariño ta mihó ku biña. Bo zetanan tin un holó dushi. Bo nòmber ta manera un zeta di holó dushi ku ta ser bashá. P’esei e mucha muhénan ta stima bo.”