Bai na kontenido

Bai na kontenido

 FOR DI NOS ARCHIVO

Lus Ta Bria na Hapon

Lus Ta Bria na Hapon

Invitashon pa diskurso públiko ku nan a usa na Tokio; na Osaka, nan a benta e invitashonnan for di avioneta

DIA 6 di sèptèmber 1926, un peregrino (superintendente biahero) hapones ku tabata biba na Merka a regresá Hapon komo misionero. Ora el a yega, tabatin un hende so pa risibié: e úniko persona ku tabatin un abonamènt riba E Toren di Vigilansia, un hòmber ku a kuminsá ku un grupo di estudio di Beibel na e stat Kobe. Dia 2 di yanüari 1927, e Studiantenan di Beibel a tene nan promé asamblea den e stat ei. Un total di 36 persona a asistí, i 8 a batisá. Esei tabata un bon komienso. Pero kon e grupito akí lo por a hiba e lus di e bèrdat bíbliko na e 60 mion habitantenan di Hapon, ku ta konosí tambe komo e Pais Kaminda Solo Ta Sali?

Na mei 1927, e Studiantenan di Beibel a organisá un kampaña intenso pa anunsiá un seri di charla bíbliko. E promé diskurso lo a tuma lugá na Osaka, i e rumannan a pone bòrchinan di propaganda grandi i chikitu tur kaminda den e stat pa anunsiá esei. Tambe nan a manda 3.000 invitashon na hendenan prominente, nan a parti 150.000 pamfleta i a pone anunsio den e korantnan mas lesá di Osaka i riba 400.000 karchi di trein. E dia di e diskurso, dos avioneta a benta 100.000 pamfleta mas riba e stat. Kiko tabata e resultado? E Sala Asahi na Osaka tabata yenyen! Un 2.300 hende a skucha e diskurso “E Reino di Dios Ta Serka.” Rònt di 1.000 hende a keda pafó pasobra no tabatin mas lugá. Despues di e diskurso, mas ku 600 hende a keda pa un seshon di pregunta i kontesta. Durante e lunanan ku a sigui, e rumannan a tene diskurso tambe na Kioto i otro statnan den parti wèst di Hapon.

Na òktober 1927, e Studiantenan di Beibel a programá tres diskurso na Tokio, e kapital di Hapon. Ei tambe nan a manda invitashon pa personanan prominente, manera e promé minister, miembronan di parlamento i lidernan religioso i militar. Ademas, nan a usa poster, pone anunsio den korant i parti 710.000 pamfleta. Un total di 4.800 persona a asistí na e charlanan ei.

PIONERONAN YEN DI ENTUSIASMO

Katsuo ku Hagino Miura

Pioneronan (ku e tempu ei tabata yama kòlportùr) a hunga un papel importante den predikashon di e mensahe di Reino di kas pa kas. E ruman muhé Matsue Ishii, un di e promé pioneronan na Hapon, huntu ku su kasá Jizo, a kubri 75% di e pais: for di Sapporo, te ariba den nort, pa Sendai, Tokio, Yokohama, Nagoya, Osaka, Kioto, Okayama i Tokushima. Ruman Matsue i un otro ruman muhé di edat, Sakiko Tanaka, tabata bisti nan kimononan di gala pa bishitá funshonarionan haltu di gobièrnu. Un biaha, un funshonario a pidi 300 ehemplar di e bukinan E Harpa di Dios i Liberashon pa pone den bibliotekanan di prizòn.

Katsuo ku Hagino Miura a lesa e bukinan ku nan a tuma serka Ruman Matsue, i e pareha a mira mesora ku nan a haña e bèrdat. Nan a batisá na 1931 i  a bira pionero. Haruichi ku Tane Yamada—i hopi di nan famianan—a aseptá e mensahe di Reino djis promé ku 1930. E pareha Yamada a bira pionero, i nan yu muhé, Yukiko, a bai sirbi na Bètel na Tokio.

“JEHÚ” GRANDI I “JEHÚ” CHIKÍ

Un Jehú Grandi a karga seis pionero

E tempu ei outo tabata masha karu i e kamindanan tabata masha malu. Pues, e ruman hòmber Kazumi Minoura, i otro pioneronan, tabata biba den kas riba wil ku nan mes mester a hala, un tipo di karavana sin motor. Nan a duna e karavananan akí e beinam Jehú, a base di e personahe bíbliko Jehú, ku despues a bira rei di Israel i ku tabatin e reputashon di kore su garoshi masha duru mes. (2 Rei. 10:15, 16) Tabatin tres Jehú Grandi, kada un tabata midi 2,2 meter largu, 1,9 meter hanchu i 1,9 meter haltu, i tabatin lugá di drumi pa seis pionero. Ademas, na e sukursal di Hapon nan a traha 11 Jehú Chikí ku por a hala ku baiskel i a karga dos persona. Kiichi Iwasaki, kende a yuda traha e Jehúnan, a konta: “Kada Jehú tabatin un tènt i tambe un bateria di outo pa por a haña koriente pa lus.” E pioneronan a plama e lus di e bèrdat den tur skina di Hapon, for di Hokkaido den nort te na Kyushu den zùit, segun ku nan tabata pusha i hala e Jehúnan atraves di seru- i vayenan.

Un Jehú Chikí a karga dos

E ruman hòmber pionero Ikumatsu Ota a konta: “Ora nos yega un stat, nos tabata pone nos Jehú kantu di un riu òf den un kunuku habrí. Promé kos ku nos a hasi tabata di bishitá e hendenan prominente di e stat, manera e alkalde, kaba nos tabata ofresé e publikashonnan di kas pa kas. Despues di kubri e teritorio, nos a pasa pa e siguiente stat.”

Dia ku e grupo di 36 Studiante di Beibel na Kobe a tene nan promé asamblea, esei tabata un “dia di kosnan chikitu.” (Zak. 4:10) Sinku aña despues, na 1932, 103 pionero i publikadó na Hapon a entregá rapòrt; nan a laga mas ku 14.000 buki. Awe, den e statnan grandi di Hapon e rumannan a organisá predikashon den áreanan públiko, i un 220.000 publikadó ta laga nan lus bria den e Pais Kaminda Solo Ta Sali.—For di nos archivo na Hapon.

Pintura di Kiichi Iwasaki, kende a traha e Jehúnan na Bètel di Hapon