PEDRO a yora amargamente despues ku el a nenga ku e konosé Hesus. I maske e tabatin ku lucha pa fortalesé su mes spiritualmente atrobe, Hesus tabata ke us’é pa yuda e otro disipelnan. P’esei Hesus a bis’é: “Unabes bo arepentí, fortalesé bo rumannan.” (Luk. 22:32, 54-62) Ku tempu, Pedro a bira un pilá di e kongregashon kristian di promé siglo. (Gal. 2:9) Awe tambe nos por haña nos ku kasonan similar: Un ruman hòmber ku un tempu tabata sirbi komo ansiano por bolbe asumí e responsabilidat ei i sinti e goso di por fortalesé su rumannan den kongregashon.

Algun kristian ku a pèrdè nan privilegio di sirbi komo superintendente tal bes ta sinti ku nan a frakasá. Julio, * por ehèmpel, kende pa mas ku 20 aña tabata ansiano na Suramérika a bisa: “Mi a dediká gran parti di mi bida na prepará diskurso, bishitá mi rumannan di kongregashon i pastoriá nan. Diripiente mi a pèrdè tur e privilegionan akí i mi a keda ku un bashí enorme. Tabata un periodo masha difísil.” Awe, Julio ta sirbi atrobe komo ansiano.

‘ALEGRÁ ORA BOSO TA KONFRONTÁ PRUEBA’

Disipel Santiago a skirbi: “Mi rumannan, alegrá ora boso ta konfrontá vários prueba.” (Sant. 1:2) E tabata referí na pruebanan ku nos por haña nos kuné debí na persekushon i nos imperfekshon. Santiago a papia di entre otro deseonan egoista i faboritismo. (Sant. 1:14; 2:1; 4:1, 2, 11) I ora Yehova disipliná nos, esaki tambe por ta doloroso, pero e pruebanan akí no mester laga nos pèrdè nos goso.—Heb. 12:11.

Maske nos a pèrdè un puesto di responsabilidat den kongregashon, semper nos tin oportunidat di demostrá kon fuerte nos fe ta i ku nos ta stima  Yehova. Ademas, nos por meditá riba e motibunan pakiko nos kier a sirbi den e puesto ei. Akaso tabata pa motibunan egoista? Òf tabata pasobra nos ta stima Yehova i ta konvensí ku e kongregashon kristian ta di dje i ku nos mester trata su karnénan ku ternura? (Echo. 20:28-30) Rumannan ku un tempu tabata ansiano i ku ta sigui sirbi Yehova fielmente ta duna prueba na tur persona, inkluso Satanas, ku nan amor pa Yehova ta sinsero.

Ora Rei David a haña disiplina debí na e pikánan grave ku el a kometé, el a aseptá reprendementu i a haña pordon. David a kanta: “Bendishoná ta esun, kende su transgreshon ta pordoná, kende su piká ta tapá! Bendishoná ta e hende, kende su inikidat SEÑOR no ta tuma na kuenta, i den kende su spiritu no tin engaño!” (Sal. 32:1, 2) E disiplina ku David a haña a hasié un mihó persona i sin duda un mihó wardadó di e pueblo di Dios.

Den mayoria di kaso, ruman hòmbernan ku bolbe kuminsá sirbi komo ansiano ta bira mihó wardadó. Un ansiano ku a pasa den e situashon ei a bisa: “Awor mi sa mihó kon pa yuda e rumannan ku kometé un eror.” Un otro ansiano a bisa: “Awor mi ta balorá mi privilegio di sirbi e rumannan mas.”

BO POR SIRBI ATROBE KOMO ANSIANO?

E salmista a skirbi ku Yehova ‘no ta sigui akusá nos ketu bai.’ (Sal. 103:9BPK) Pues, nos no mester pensa ku nunka mas Yehova lo konfia un persona ku kometé un eror grave. Ricardo, kende a pèrdè su privilegionan despues di a sirbi hopi aña komo ansiano, a bisa: ‘Mi a keda sumamente desapuntá ku mi a faya. Pa hopi tempu, sintimentunan di frakaso a stroba mi di bolbe sirbi komo ansiano. Mi tabatin miedu ku e rumannan lo no konfia mi mas. Pero komo ku mi ta gusta yuda hende, mi por a dirigí estudionan di Beibel, animá e rumannan na Salòn di Reino i traha huntu ku nan den sirbishi. Esei a kita mi temornan i awor mi ta sirbi atrobe komo ansiano.’

Yehova a yuda vários ruman hòmber haña nan goso bèk i sinti e deseo di sirbi atrobe

Renkor ta un otro sintimentu ku por stroba un ruman hòmber di sirbi komo ansiano atrobe.  P’esei, ta muchu mas mihó pa imitá David, kende a hui di Rei Saul, ku tabata un hòmber yalurs. David a haña vários oportunidat pa tuma vengansa kontra Saul, tòg e no a hasié. (1 Sam. 24:4-7; 26:8-12) Ora Saul a muri den bataya, David a yora i a bisa ku tantu Saul komo Saul su yu Jonatan tabata hòmbernan “stimá i amabel.” (2 Sam. 1:21-23) Pues, David no a karga renkor.

Si bo ta sinti ku bo a bira víktima di un malkomprondementu òf inhustisia, no laga renkor kontrolá bo pensamentunan. William, kende a sirbi 30 aña komo ansiano na Gran Bretaña, a keda karga renkor kontra algun ansiano despues di a pèrdè su privilegio. Kiko a yuda William rekobrá su stabilidat spiritual? El a bisa: ‘E buki di Yòb a animá mi mashá. Si Yehova por a yuda Yòb drecha asuntu ku su tres kompañeronan, e por yuda ami tambe hasi esei ku e ansianonan.’—Yòb 42:7-9.

YEHOVA TA BENDISHONÁ ESNAN KU KUMINSÁ SIRBI ATROBE KOMO WARDADÓ

Si bo a disidí di stòp di pastoriá e tou di Dios, ta bon pa bo puntra bo mes ta dikon bo a tuma e desishon ei. Tabata pa motibu di hopi problema personal? Òf otro kosnan kisas a bira mas importante den bo bida? Òf ta imperfekshon di bo rumannan a desepshoná bo? Sea kual sea e motibu, kòrda ku tempu bo tabata ansiano bo por a sirbi bo rumannan mas. Bo diskursonan tabata fortalesé nan, bo ehèmpel tabata animá nan i bo bishitanan di pastoreo tabata yuda nan soportá prueba. I e trabounan ku bo tabata hasi komo un ansiano fiel tabata alegrá tantu Yehova su kurason komo di bo.—Pro. 27:11.

Bo por demostrá bo amor na Yehova sirbiendo é ku goso

Yehova a yuda vários ruman hòmber haña nan goso bèk i sinti e deseo di bolbe sirbi komo ansiano den kongregashon. Si bo a disidí di stòp di sirbi komo ansiano den kongregashon òf a pèrdè e privilegio ei, bo por “hasi esfuerso pa bira un superintendente” atrobe. (1 Tim. 3:1) Pablo nunka “a stòp di hasi orashon” pa e rumannan na Kolósas haña konosementu eksakto di Dios su boluntat. Dikon? Pa nan ‘por a kana na un manera digno di Yehova a fin di agrad’é plenamente.’ (Kol. 1:9, 10) Si bo a haña e privilegio di sirbi atrobe komo ansiano, pidi Yehova duna bo forsa, pasenshi i goso. Den e último dianan akí, e pueblo di Dios mester di e sosten spiritual di wardadónan amoroso. Abo por fortalesé bo rumannan? Bo ta dispuesto pa hasi esei?

^ par. 3 A kambia algun nòmber.