Kiko ta duna bo goso i satisfakshon? Bo matrimonio, bo yunan òf amigunan? Probablemente ta un plaser tambe pa bo kome huntu ku bo sernan kerí. Pero, komo sirbidó di Yehova, loke ta duna nos mas goso ainda ta hasi Dios su boluntat, studia su Palabra i prediká e bon notisia, no ta bèrdat?

Den un kantika di alabansa na e Kreador, Rei David di Israel di antigwedat a kanta: “Pa hasi bo boluntat, o mi Dios, ta un delisia pa mi; bo Lei ta den mi kurason.” (Sal. 40:8) Apesar di tur e problemanan i preshon ku David a konfrontá, e tabatin berdadero goso hasiendo e boluntat di Dios. Ta klaru ku David no tabata e úniko persona ku tabatin plaser den sirbi e Dios berdadero.

Apòstel Pablo a apliká e palabranan di Salmo 40:8 na e Mesías, òf Kristu. El a skirbi: “Ora Kristu a bini na mundu, el a bisa Dios: ‘“Sakrifisio i ofrenda bo no tabata ke, ma bo a prepará un kurpa pa mi. Bo no tabatin plaser den ofrenda kimá ni ofrenda pa piká.” E ora ei mi a bisa: “Wak! Mi a bini (den e ròl di e buki ta pará skirbí tokante mi) pa hasi bo boluntat, o Dios.”’”—Heb. 10:5-7.

Tempu ku Hesus tabata riba tera, tabata un goso p’e opservá e kreashon, pasa tempu ku su amigunan i disfrutá di un kuminda ku otro hende. (Mat. 6:26-29; Huan 2:1, 2; 12:1, 2) Sinembargo, su interes prinsipal i mayor goso tabata pa hasi e boluntat di su Tata selestial. De echo, Hesus a bisa: “Mi kuminda ta pa hasi e boluntat di esun ku a manda mi i kaba e trabou ku el a duna mi pa hasi.” (Huan 4:34; 6:38) Hesus, e Gran Maestro, a siña su disipelnan e sekreto pa berdadero felisidat. P’esei, ku goso i entusiasmo nan a prediká e mensahe di Reino na otro hende.—Luk. 10:1, 8, 9, 17.

‘BAI I HASI DISIPEL’

Hesus a bisa su disipelnan: “Bai, i hasi hende di tur nashon mi disipel, i batisá nan den nòmber di e Tata i di e Yu i di spiritu santu, i siña nan kumpli ku tur loke mi a manda boso. I wak!, mi ta ku boso tur e dianan, te na konklushon di e era akí.” (Mat. 28:19, 20) Pa nos por kumpli ku  e mandamentu akí, nos mester prediká na tur hende, rebishitá esnan ku a mustra interes i studia Beibel ku nan. E trabou akí ta un fuente di berdadero goso i satisfakshon.

Amor ta motivá nos pa sigui prediká apesar di apatia

Sea ku hende mustra interes den nos mensahe òf nò, nos por tin goso den nos sirbishi basta nos tin un bon aktitut. Dikon nos ta sigui prediká e bon notisia apesar di apatia òf indiferensia? Pasobra nos ta konsiente ku mediante nos trabou di prediká i di hasi disipel nos ta demostrá nos amor pa Yehova i pa nos próhimo. Sí, bida di hende ta den wega, tantu di nos komo di nos próhimo. (Eze. 3:17-21; 1 Tim. 4:16) Laga nos trata algun punto ku a yuda hopi di nos rumannan ku ta traha den teritorionan difísil renobá òf keda ku nan zelo pa sirbishi.

PROBECHÁ DI TUR OPORTUNIDAT

Bon uso di pregunta den nos sirbishi hopi biaha ta duna bon resultado. Un mainta, un ruman muhé ku yama Amalia a mira un hòmber ta lesa korant den un parke. El a aserk’é i puntr’é si tin bon notisia den e korant. Ora ku e hòmber a bisa “nò,” Amalia a bis’é: “Ami sí tin bon notisia tokante e Reino di Dios pa mener.” Esaki a lanta e hòmber su interes i el a aseptá un estudio di Beibel. Amalia a kuminsá tres estudio di Beibel den e parke ei.

Janice ta prediká na su trabou. Ora un bewaker i su kolega a mustra interes den un artíkulo di E Toren di Vigilansia, Janice a ofresé pa trese revista pa nan regularmente. El a hasi meskos ku un otro kolega, kende a keda enkantá ku e variedat di tópiko ku E Toren di Vigilansia i ¡Despertad! ta trata. Esaki a pone ku un otro kolega tambe a pidié revista. Janice a bisa: “Esta un bendishon di Yehova!” Ku tempu, e tabatin 11 persona komo ruta di revista na su trabou.

SEA POSITIVO

Un superintendente biahero a konsehá publikadónan pa na final di un kòmbersashon den sirbishi nan no djis bisa e persona ku nan lo bini otro dia. Mas bien, el a animá nan pa puntra e persona: “Bo ta deseá pa mi mustra bo kon un estudio di Beibel ta bai?” òf “Ki dia i ki ora bo ke pa mi bolbe pa nos por sigui kòmbersá?” E superintendente biahero a bisa ku e publikadónan di un kongregashon ku el a bishitá a kuminsá 44 estudio di Beibel den ún siman usando e método akí.

Si nos ta hasi rebishita mesora, asta denter di algun dia, nos por haña masha bon resultado. Dikon? Pasobra ora nos ta hasi esei, nos ta mustra ku nos tin berdadero interes pa yuda hende sinsero komprondé Beibel. Ora nan a puntra un señora dikon el a aseptá pa studia Beibel ku Testigunan di Yehova, el a bisa: “Nan amor i interes sinsero a motivá mi pa kuminsá studia Beibel.”

Bo por puntra e doño di kas: “Bo ta deseá pa mi mustra bo kon un estudio di Beibel ta bai?”

 Un poko tempu despues ku Madaí a asistí na e Skol di Sirbishi di Pionero, e tabata dirigí 15 estudio di Beibel i a pasa 5 otro pa otro publikadó. Vários di su studiantenan di Beibel a kuminsá asistí regularmente na nos reunionnan. Kiko a yuda Madaí kuminsá asina tantu estudio di Beibel? Regularmente e tabata rebishitá e personanan ku a mustra interes, manera el a siña na e Skol di Pionero. Un otro ruman muhé ku a yuda hopi hende konosé e bèrdat di Beibel a bisa: “Mi a siña ku e klave pa yuda hende ku ke konosé Yehova ta sigui hasi rebishita.”

Ora nos ta rebishitá e personanan mesora, nos ta demostrá ku nos realmente ta interesá den hende ku ke komprondé loke Beibel ta siña

E trabou di hasi rebishita i dirigí estudio di Beibel ta rekerí esfuerso diligente. Sinembargo, e bendishonnan ta bal tur e esfuerso i mas ku esei. Ora nos ta hasi tur loke nos por den e trabou di prediká, nos por yuda hende “yega na un konosementu eksakto di e bèrdat,” i esei por hiba na nan salbashon. (1 Tim. 2:3, 4) I pa nos, esei ta resultá den goso i satisfakshon.