Bai na kontenido

Bai na kontenido

Ainda e Konsehonan di Beibel Ta Práktiko?

Ainda e Konsehonan di Beibel Ta Práktiko?

ALGUN HENDE TA BISA KU NÒ. Un dòkter a bisa ku ora bo usa Beibel komo un guia den bo bida, ta meskos ku si bo usa un buki di aña 1920 pa duna lès di kímika. Un hende ku no ta kere den Beibel por asta puntra si lo bo usa un manual di un kòmpiuter bieu i dañá pa sa kon pa traha ku un kòmpiuter nobo. Ku otro palabra, algun hende ta haña ku Beibel ta sumamente ouderwets.

Dikon un hende lo ke usa un buki bieu asina den un mundu tan moderno i di alta teknologia? Al fin i al kabo, awendia tin masha tantu website i blog ku ta duna tur tipo di konseho i guia. Na televishon mes tin yen di programa kaminda sikólogonan bon eduká, gurunan i eskritornan ta duna konseho tokante kon pa mehorá bo bida. I boekhandel ta bende un kantidat di buki pa bo mehorá bo bida, lokual a bira un industria multimionario.

Ku tantu informashon aktualisá disponibel ki ora ku bo ke, pakiko un hende lo akudí na Beibel—un buki ku hende a kompletá kasi 2.000 aña pasá? Hende ku no ta kere den Beibel tin rason di bisa ku si bo usa un buki bieu asina komo guia den bida ta meskos ku si bo usa un buki ouderwets di kímika òf di kòmpiuter? Eigenlijk, e komparashon ei ta robes. Siensia i teknologia ta kambia lihé, pero naturalesa humano a kambia? Ainda hende ke komprondé e nifikashon di bida, haña un grado di felisidat i siguridat, disfrutá di bon relashon ku famia i haña amigu duradero.

Pa bieu ku Beibel por ta, e ta ofresé guia riba e nesesidatnan ei i asta mas. Beibel ta bisa tambe ku ta nos Kreador a inspirá hende pa skirbi Beibel. E ta duna nos guia den tur aspekto di nos bida i e ta ekipá nos pa enfrentá kualke difikultat. (2 Timoteo 3:16, 17) Es mas, Beibel tin konseho ku semper ta al kaso—konseho ku nunka ta bira ouderwets! Beibel mes ta bisa: “E palabra di Dios ta bibu.”—Hebreonan 4:12.

Pero loke Beibel ta bisa ta bèrdat? E ta un buki ouderwets, òf e ta e buki di mas práktiko ku nos por usa awe? E Toren di Vigilansia akí ta e promé edishon di un seri di edishon spesial ku tin komo meta pa yuda bo haña kontesta pa e preguntanan akí.