Bai na kontenido

Bai na kontenido

 TÓPIKO PRINSIPAL | KIKO TA E MIHÓ REGALO KU BO POR HAÑA?

“E Mihó Regalo Ku Mi A Yega di Haña”

“E Mihó Regalo Ku Mi A Yega di Haña”

Esei ta loke un hobensita di 13 aña a bisa ora el a haña un kachó komo regalo. Un señora komersiante ku a haña un kòmpiuter komo regalo serka su tata tempu e tabata bai skol sekundario a bisa ku e regalo ei a kambia su bida. I un esposo resien kasá a bisa ku e karchi ku su esposa a traha p’e pa nan promé aniversario tabata e mihó regalo ku el a yega di haña.

Tur aña, hopi hende ta tuma tempu pa buska e “mihó” regalo pa un amigu òf pa un miembro di famia pa un okashon spesial. I hopi ke mira e persona ku nan a duna un regalo reakshoná manera e hendenan menshoná na komienso di e artíkulo akí. Kiko di abo? Lo bo tin gana di haña un regalo ku bo ta gusta òf regalá un hende algu ku lo e apresiá di bèrdat?

Sí, esei por zona hopi bon, pasobra e hende ku haña e regalo lo keda masha kontentu i e hende ku a duna e regalo lo sintié bon. Al fin i al kabo, Beibel ta bisa: “Tin mas felisidat den duna ku den risibí.” (Echonan 20:35) Di mes, nos ta haña mas felisidat ora nos duna regalo si esun ku a haña e regalo ta balor’é.

Pues anto, kiko nos por hasi pa tantu nos komo e hende ku lo haña e regalo por ta felis? I si bo no por duna e hende e “mihó” regalo, kiko bo por hasi pa e apresiá bo regalo?