No ta fásil pa sa kiko bo mester regalá un otro hende. Pasobra ta e hende ku ta risibí e regalo ta disidí si e regalo ta bon p’e. I loke un hende ta haña bon, e otro hende kisas no ta haña bon.

Por ehèmpel, un tiner por haña ku ta e último modèl di un aparato elektróniko ta e mihó regalo p’e. Di otro banda, un adulto por apresiá un regalo ku tin balor sentimental, por ehèmpel un herensia di famia. Ademas, den algun kultura, tantu hóben komo adulto gusta haña sèn komo regalo, pasobra nan por usa esei manera nan ta deseá.

Apesar di e retonan ei, hopi hende ta sigui ku nan búskeda pa haña e mihó regalo pa un persona ku nan ta apresiá. Aunke no ta semper fásil pa haña e mihó regalo pa un otro hende, tin algun faktor ku por yuda nos haña éksito den nos búskeda. Laga nos analisá kuater di nan ku por yuda nos duna e mihó regalo.

E deseo di e persona ku ta haña e regalo. Un hòmber na Belfast, Nort Irlanda, a bisa ku e baiskel di kareda ku nan a regal’é tempu e tabatin 10 òf 11 aña tabata e mihó regalo ku el a yega di haña. Dikon? E ta splika: “Pasobra e baiskel ei tabata algu ku ègt mi tabata ke.” Su kontesta ta mustra ku ta e deseo di un hende ta loke ta hasi un regalo bon p’e. Pues pensa riba e hende ku bo ke duna un regalo. Purba di saka afó kiko lo e tin gana di tin, pasobra loke un hende ta gusta hopi biaha ta influensiá su deseonan. Por ehèmpel, welanan hopi biaha ta gusta pasa tempu huntu ku nan famia. Nan lo ke mira nan yu- i ñetunan mas tantu posibel. Kisas un fakansi ku famia ta loke nan lo gusta mas ku kualke otro regalo.

Un manera pa haña sa kiko ta un hende su deseo ta ora nos ta pone bon atenshon na loke e ta bisa. Beibel ta animá nos pa “ta kla pa skucha, slo pa papia.” (Santiago 1:19) Ora bo ta kòmbersá ku bo amigu- òf famianan, skucha bon pa bo haña sa kiko nan ta gusta i kiko nan no ta gusta. Lo bo ta den un mihó posishon e ora ei pa duna nan un regalo ku nan lo gusta.

 E nesesidat di e persona ku ta haña e regalo. Un hende por balorá un regalo asta si e ta chikitu òf barata si e ta útil p’e. Pero kon nos por sa kiko un otro persona tin mester?

E manera di mas fásil pa haña sa esei ta di puntra e persona kiko e tin mester di dje òf kiko e ke haña. Sinembargo, pa hopi hende ku ta duna regalo, esei lo kita e goso ku un hende ta haña ora di duna regalo. Nan lo preferá di duna e hende e mihó regalo komo sorpresa. Ademas, miéntras ku tin hende ta papia abiertamente di loke nan ta gusta i no ta gusta, tin otro hende ku ta mas reservá i no ta papia masha tokante loke nan mester.

P’esei, opservá bon i tuma bon nota di e hende su sirkunstansianan. E ta yòn, e ta di edat, soltero, kasá, divorsiá, biuda, sin trabou òf penshonado? Despues, pensa ki tipo di regalo por ta útil pa e hende.

Pa nos haña sa kiko e persona mester di dje, nos por papia ku otro hende ku tabata den un situashon similar. Kisas nan por bisa nos di algun nesesidat ku otro hende no sa di dje. Ku e informashon akí, nos lo por duna un regalo ku ta satisfasé un nesesidat ku otro hende no a pensa ariba.

E momento apropiá pa duna e regalo. Beibel ta bisa: “Ki bon ta un palabra duná na ora.” (Proverbionan 15:23) E teksto akí ta mustra ku ta importante pa skohe e momento apropiá pa papia. Esei ta konta tambe pa nos akshonnan. Meskos ku un palabra papiá na e momento apropiá por laga e persona sintié bon, asina tambe un regalo duná na e momento apropiá por hasi e persona kontentu.

Un amigu di nos ta bai kasa. Un hóben ta bai gradua. Un pareha kasá ta bai haña yu. Eseinan ta djis algun okashon pa kua hende sa duna regalo. Algun hende ta haña ku ta práktiko pa tene un lista di okashon spesial durante e aña. Asina nan por plania ki regalo nan ta bai duna na kada okashon. *

Ta klaru ku no ta na okashonnan spesial so nos por duna regalo. Nos por eksperensiá e goso di duna regalo na kualke momento. Sinembargo, nos mester tene kuidou. Por ehèmpel, si un hende hòmber duna un hende muhé un regalo sin niun motibu, e hende muhé por pensa ku e regalo ta nifiká ku e hende hòmber tin interes den dje i ku e ke konos’é mas mihó. Pero si esei no ta e intenshon, un regalo asina por hiba na mal komprondementu òf problema. Esei ta un bon motibu anto pakiko nos mester analisá un otro faktor importante, esta, e motivashon di e hende ku ta duna regalo.

E motivashon di e persona ku ta duna e regalo. Manera e ehèmpel anterior a mustra, ta bon pa esun ku ta duna e regalo puntra su mes si esun ku ta risibí e regalo tin chèns di malinterpretá su intenshonnan. Di otro banda, ta bon pa esun ku ta bai duna e regalo analisá su propio motivashonnan. Aunke hopi hende ta kere ku nan motibu pa duna regalo ta bon, nan ta duna regalo den sierto temporada di aña pasobra nan ta sinti nan preshoná pa hasi esei. Di otro banda, tin hende ku ta duna regalo pa haña un trato spesial òf pa haña algu bèk.

Kiko nos por hasi pa nos tin sigur ku nos tin e motivashon korekto ora di duna regalo? Beibel ta bisa: “Laga tur boso asuntunan tuma lugá ku amor.” (1 Korintionan 16:14) Si nos duna un regalo ku amor i ku interes sinsero, esun ku lo risibí nos regalo lo tin goso, i nos lo ta felis pasobra nos a demostrá berdadero generosidat. Ora nos ta duna di kurason, nos lo hasi nos Tata selestial kontentu. Apòstel Pablo a elogiá e kristiannan di e stat antiguo di Korinto ora ku na un manera generoso i gososo nan a apoyá i yuda nan rumannan na Hudea. Pablo a bisa nan: “Dios ta stima hende ku ta duna ku alegria.”—2 Korintionan 9:7.

Ora nos tene kuenta ku e faktornan ku nos a analisá, esei por yuda nos duna hende regalo ku lo duna nan berdadero goso. Dios a tene kuenta ku e faktornan akí i otro kosnan pa duna humanidat e mihó regalo ku ta eksistí. Lo bo haña sa kiko e regalo akí ta ora bo lesa e siguiente artíkulo.

^ par. 13 Hopi hende ta duna regalo pa hasimentu di aña i riba dianan di fiesta. Pero e okashonnan ei tin di haber ku práktikanan ku ta bai kontra siñansanan di Beibel. Wak e artíkulo “Nos Lektornan Ta Puntra: Pasku Ta un Selebrashon pa Kristian?” den e revista akí.