Bo a yega di puntra bo mes: ‘Kon shelu ta? Kon e kriaturanan spiritual ku ta biba einan ta?’ Si ta asina, bo no ta bo so. Hende tin míles di aña ta spekulá tokante esaki. Algun hende ta kere ku ta nos antepasadonan ku meresé onor ta biba den shelu. Otronan ta imaginá ku shelu ta un lugá kaminda ta reina pas i felisidat, i kaminda angel i bon hende ku a fayesé ta biba. I tin otro hende ta kere ku shelu ta un hogar pa míles di miónes di dios.

Hopi hende ta kere ku nos no por sa nada di shelu pasobra no tin niun persona ku a yega di bini di einan pa konta nos tokante dje. Pero e rasonamentu ei no ta korekto. Promé ku Hesukristu a bini na tera, e tabata eksistí kaba den shelu. Hesus mes a bisa e lidernan religioso di e promé siglo esei bon kla: “Mi no a baha for di shelu pa hasi mi boluntat, ma pa hasi boluntat di esun ku a manda mi.” Pues Hesus a papia di eksperensia personal ora el a bisa su apòstelnan: “Den kas di mi Tata tin masha hopi lugá.”—Huan 6:38; 14:2.

Hesus su Tata ta Dios, kende su nòmber ta Yehova, i Yehova su “kas” ta den shelu. (Revelashon 4:11) Pues no tin niun persona ku por deskribí shelu mihó ku Yehova Dios i Hesukristu. Nan a duna hopi informashon tokante shelu mediante vishonnan espektakular ku nan a duna sirbidónan fiel.

E siguiente artíkulo ta analisá porshonnan den Beibel ku ta deskribí loke hende a mira den diferente vishon. Segun ku bo ta analisá e vishonnan akí, tene na mente ku shelu no tin kosnan ku nos por mira òf mishi kuné. P’esei, Dios no a skohe pa splika asuntunan na un manera ku ta e kriaturanan spiritual so por komprondé; ma pa duna nos un idea kon shelu ta, el a duna su sirbidónan vishonnan ku a inkluí konseptonan ku nos por komprondé. E vishonnan akí lo yuda bo komprondé ken ta biba den shelu.