Bai na kontenido

Bai na kontenido

Huntu ku mi kasá, Tabitha, den e trabou di prediká

 BEIBEL TA KAMBIA BIDA DI HENDE

Pa Ami, Dios No Tabata Eksistí

Pa Ami, Dios No Tabata Eksistí
  • NASÍ NA AÑA: 1974

  • PAIS NATAL: REPÚBLIKA DEMOKRÁTIKO DI ALEMANIA

  • SU PASADO: ATEISTA

MI PASADO

Mi a nase den un pueblito na Saksen, un estado ku e tempu ei tabata parti di Repúblika Demokrátiko di Alemania (RDA). E ambiente na kas tabata kaluroso i amoroso, i mi mayornan a siña mi norma- i balornan moral. RDA tabata un pais komunista, pues mayoria di habitante na Saksen no tabata haña religion importante. I pa ami, Dios no tabata eksistí. Dos kreensia ku tabatin influensia riba e promé 18 añanan di mi bida tabata komunismo i ateismo.

Dikon mi tabata interesá den komunismo? Pasobra mi tabata gusta e idea ku tur hende ta igual. Ademas, mi a kere ku tur propiedat mester a ser repartí na un manera hustu, komo ku esaki lo a trese un igualdat entre riku i pober. Pues mi a bira parti di un organisashon komunista pa hóbennan. Tempu mi tabatin 14 aña, mi a pasa hopi tempu ta traha riba un proyekto di medio ambiente pa resiklá papel. E pueblito lokal di Aue tabata asina gradisidu pa mi esfuersonan ku e outoridatnan einan a duna mi un premio. Aunke ku mi tabata yòn, mi a konosé algun polítiko renombrá di RDA. Mi a sinti ku mi tabatin bon metanan i un futuro briante.

Diripiente mi mundu a kai den otro. Na 1989, e Muraya di Berlin a kai i tambe e blòk komunista di Ost Europa. Un kos a hiba na otro. No a dura muchu ku mi a ripará ku hopi inhustisia tabata sosodé na RDA. Por ehèmpel, hende ku no ta apoyá komunismo tabata haña trato inferior. Kon esei tabata posibel? Nos komo komunista no tabata kere ku tur hende ta igual? Komunismo tabata djis un ilushon? Tur esakinan a duna mi ansiedat.

Pues mi a kambia mi metanan i a kuminsá enfoká riba músika i arte. Komo ku mi por a studia na un skol di músika ku e oportunidat pa sigui studia na un universidat, mi tabatin e deseo di bira un músiko. Ademas, mi a stòp di biba segun tur e norma- i balornan moral ku mi mayornan a siña mi tempu mi tabata chikí. Awor loke tabata mas importante pa mi tabata pa mi disfrutá di bida; esei a enserá entre otro sali ku vários mucha muhé pareu. Pero músika, arte i mi manera liberal di bida no a kita mi ansiedat. Asta e plachinan ku  mi tabata pinta a reflehá esei. Kiko futuro tabatin pa mi? I kiko tabata e propósito di bida?

Ora ku finalmente mi a haña kontesta pa mi preguntanan, mi a keda asombrá. Un dia na e skol di músika, mi tabata sintá ku un grupo di studiante i tabata kòmbersá tokante futuro. Un di e studiantenan tabata Mandy * i e tabata un Testigu di Yehova. E anochi ei el a duna mi bon konseho. El a bisa: “Andreas, si bo ke haña kontesta pa bo preguntanan tokante bida i futuro, analisá loke Beibel ta bisa.”

Mi no tabata kompletamente konvensí pero mi a disidí di buska den Beibel pa mi haña kontesta. Mandy a manda mi lesa Daniel kapítulo 2, i loke ku mi a lesa einan a laga mi keda babuká. E profesia akí ta deskribí un seri di poder mundial, gobièrnunan ku lo tin un gran impakto te den nos tempu. Mandy a mustra mi otro profesianan den Beibel ku ta papia tokante futuro. Por fin mi tabata haña kontesta pa mi preguntanan! Pero ken a skirbi e profesianan ei, i ken por a pronostiká e futuro asina eksakto? Ta posibel ku Dios ta eksistí tòg?

BEIBEL A KAMBIA MI BIDA

Mandy a pone mi den kontakto ku Horst ku Angelika, un pareha Testigu ku a yuda mi komprondé e Palabra di Dios mas mihó. Mesora mi a ripará ku Testigunan di Yehova ta e úniko organisashon religioso ku semper ta usa i ta hala atenshon na Dios su nòmber, Yehova. (Revelashon 4:11; Mateo 6:9) Mi a siña ku Yehova Dios ta duna humanidat e speransa di biba pa semper den un paradeis riba tera. Salmo 37:9 ta bisa en parte: “Esnan ku spera riba SEÑOR lo heredá e tera.” Mi a gusta ku e speransa akí ta pa tur hende ku ta hasi esfuerso pa biba segun e norma- i balornan moral di Dios ku nos ta haña den Beibel.

Sinembargo, no tabata fásil pa mi kambia i biba na armonia ku loke Beibel ta bisa. Mi mester a siña humildat pasobra mi éksito komo músiko i artista a pone ku mi a bira orguyoso. Ademas, no tabata fásil pa mi a bandoná mi bida inmoral. Mi ta hopi gradisidu ku Yehova ta tene pasenshi, ta demostrá miserikòrdia i ta komprondé pa hende ku ta hasi esfuerso pa pone na praktiká loke Beibel ta siña!

Komunismo i ateismo a forma mi den e promé 18 añanan di mi bida, pero desde e tempu ei padilanti, Beibel a transformá mi bida. Loke mi a siña di Beibel a baha mi ansiedat tokante futuro i a duna mi un propósito den bida. Na 1993, mi a batisá komo un Testigu di Yehova, i na 2000, mi a kasa ku Tabitha, un ruman muhé zeloso. Nos ta usa mas tantu di nos tempu posibel pa yuda otro hende konosé Beibel. Hopi hende ku nos topa tin un pasado komunista i ateista meskos ku ami tabatin. Mi ta sinti un satisfakshon profundo ora mi mustra nan kon nan por konosé Yehova.

E BENEFISIONAN

Ora mi a kuminsá asosiá ku Testigunan di Yehova pa promé biaha, mi mayornan tabata di shòk. Desde e tempu ei, nan a mira e efekto positivo ku e Testigunan tabatin riba mi. Ki kontentu mi ta ku awor nan ta lesa Beibel i ta asistí na e reunionnan di Testigunan di Yehova.

Ami ku Tabitha tin un dushi matrimonio pasobra nos ta purba di sigui e konseho ku nos ta haña den Beibel pa parehanan kasá. Por ehèmpel, nos ta sigui e konseho pa keda fiel na otro i esei ta sigui fortalesé nos matrimonio.—Hebreonan 13:4.

Mi no tin ansiedat di bida ni miedu tokante futuro mas. Mi ta sinti mi parti di un hermandat mundial, un famia ku ta disfrutá di berdadero pas i union. Den e famia akí, nos ta trata otro igual. Esei ta algu ku mi tabata ke henter mi bida.

^ par. 12 A kambia su nòmber.