Bai na kontenido

Bai na kontenido

 TÓPIKO PRINSIPAL | ANGEL​—KIKO BEIBEL TA BISA DI NAN?

Kon Angel Por Yuda Bo?

Kon Angel Por Yuda Bo?

E angelnan fiel na Dios ta masha interesá den aktividatnan humano, i nan ta masha aktivo den kumpli ku e boluntat di Yehova. Ora Dios a krea tera, e angelnan tabata “kanta huntu, i tur e yu hòmbernan di Dios tabata grita di alegria.” (Yòb 38:4, 7) Atraves di historia, angelnan “tin masha gana di komprondé” profesia relashoná ku susesonan ku lo tuma lugá riba tera den futuro.—1 Pedro 1:11, 12.

Beibel ta mustra ku pa e boluntat di Dios por a kumpli, na sierto okashon angelnan a protehá sirbidónan di Dios te na un sierto grado. (Salmo 34:7) Por ehèmpel:

  • Ora Yehova a destruí e statnan malbado di Sódoma i Gomora, angel a yuda e hòmber hustu Lòt i su famia hui.—Génesis 19:1, 15-26.

  • Den Babilonia di antigwedat, ora tres hóben hebreo a ser kondená pa muri den un fòrnu sumamente kayente, Dios “a manda su angel i a libra su sirbidónan.”—Daniel 3:19-28.

  • Despues ku e hòmber hustu Daniel a pasa anochi den un kueba ku leonnan hambrá, el a bisa ku el a sobrebibí pasobra “Dios a manda su angel i a sera boka di e leonnan.”—Daniel 6:16, 22.

Atraves di historia, angel a yuda hende ku tabata fiel na Dios

ANGEL A YUDA E KRISTIANNAN DI PROMÉ SIGLO

Ora tabata nesesario, angel di Dios a intervení den e aktividatnan di e promé kristiannan pa e boluntat di Yehova por a kumpli. Por ehèmpel:

  • Un angel a habri porta di un prizòn i a instruí e apòstelnan ku tabata enkarselá einan pa nan sigui prediká den e tèmpel.—Echonan 5:17-21.

  • Un angel a bisa Felipe, un predikadó, pa e bai na e kaminda di desierto ku tabata sali di Herúsalèm bai Gaza i prediká na un etiope ku a bai Herúsalèm pa adorá Dios.—Echonan 8:26-33.

  • Ora tabata Dios su tempu pa hende no hudiu bira kristian, den un vishon, un angel a aparesé na Kornelio, e ofisial di ehérsito romano, i a instruyé pa manda bisa apòstel Pedro pa bini su kas.—Echonan 10:3-5.

  • Ora apòstel Pedro tabata enkarselá, un angel a aparesé na dje i a sak’é for di prizòn.—Echonan 12:1-11.

 KON ANGEL POR YUDA BO?

No tin prueba ku awe Dios ta usa angel pa yuda hende na maneranan milagroso manera nos por lesa den Beibel. Pero, relashoná ku nos tempu, Hesus a bisa: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.” (Mateo 24:14) Bo tabata sa ku e disipelnan di Kristu ta hasiendo e trabou akí bou di supervishon di e angelnan?

Angel ta yuda deklará e bon notisia den henter e tera

E buki di Revelashon ta indiká ku e angelnan lo ta sumamente okupá ta yuda hende rònt mundu siña di Yehova Dios i di su propósito pa humanidat. Apòstel Huan a skirbi: “Mi a mira un otro angel ta bula meimei di shelu, i e tabata deklará bon notisia eterno na esnan ku ta biba riba tera, na tur nashon, tribu, idioma i pueblo, i e tabata bisa na bos haltu: ‘Teme Dios i dun’é gloria, pasobra e ora di su huisio a yega! P’esei, adorá Esun ku a traha shelu, tera, laman i fuentenan di awa!’” (Revelashon 14:6, 7) Hopi relato den nos tempu ta duna prueba ku angel ta apoyá e trabou di prediká e Reino rònt mundu. Anto ora un pekadó arepentí i bolbe na Yehova, “tin goso entre e angelnan di Dios.”—Lukas 15:10.

Kiko lo sosodé ora e trabou di prediká terminá? E ora ei, e “ehérsitonan [di angel] den shelu” huntu ku Hesukristu, e Rei di reinan, lo bringa den e guera di “e gran dia di Dios, e Todopoderoso,” ku yama Armagedon. (Revelashon 16:14-16; 19:14-16) Angelnan poderoso lo ehekutá huisio divino ora Señor Hesus “trese vengansa riba esnan ku . . . no ta obedesé e bon notisia tokante nos Señor Hesus.”—2 Tesalonisensenan 1:7, 8.

Bo por ta sigur anto ku e angelnan ta masha interesá den bo i den e bienestar di hende ku ke sirbi Yehova. Manera nos a mira, vários biaha Yehova a usa angel pa fortalesé i protehá su fiel sirbidónan riba tera.—Hebreonan 1:14.

Pues, kada un di nos tin un desishon importante di tuma. Nos lo skucha i obedesé e bon notisia ku ta ser prediká riba henter e tera awe? Testigunan di Yehova den bo área lo ta kontentu pa yuda bo benefisiá di e yudansa di Dios su angelnan poderoso ku ta interesá den bo.