Bai na kontenido

Bai na kontenido

 TÓPIKO PRINSIPAL | UNDA BO POR HAÑA KONSUELO?

Kon Dios Ta Duna Nos Konsuelo?

Kon Dios Ta Duna Nos Konsuelo?

Apòstel Pablo a deskribí Yehova * komo e “Dios di tur konsuelo, kende ta konsolá nos den tur nos tribulashonnan.” (2 Korintionan 1:3, 4) Pues, Beibel ta sigurá nos ku Dios por yuda tur hende i ku no tin niun tragedia ku nos ta pasa aden ku nos Tata selestial no por konsolá nos.

Klaru ku nos mester hasi algu si nos ke konsuelo for di Dios. Kon un dòkter por yuda nos si nunka nos no a traha un sita pa bai serka dje? Profeta Ámos a puntra: “Dos hende ta kana huntu, sin ku nan a bai di akuerdo ku otro?” (Ámos 3:3) P’esei e Skritura ta urgi nos: “Hala serka Dios, i lo e hala serka boso.”—Santiago 4:8.

Kon nos por tin sigur ku Dios lo hala serka nos? Di promé, pasobra vários biaha e ta bisa nos ku e ke yuda nos. (Wak e  kuadro na página 5.) Di dos, pasobra tin hopi hende ku Dios a konsolá, tantu den nos tempu komo den pasado.

Meskos ku hopi hende awe ku ta buska yudansa di Dios, Rei David tambe a pasa den hopi tragedia. Un biaha el a roga Yehova: “Tende na e bos di mi súplikanan ora mi sklama na bo pa yudansa.” Dios a kontest’é? Sí. David a agregá: “Mi ta wòrdu yudá; p’esei mi kurason ta regosihá.”—Salmo 28:2, 7.

E PAPEL KU HESUS TIN DEN KONSOLÁ HENDE TRISTU

Dios su propósito tabata pa Hesus hunga un papel importante den duna hende konsuelo. Un di e tareanan ku Dios a duna Hesus tabata pa “kura hende di kurason kibrá” i pa “konsolá tur esnan ku ta yora.” (Isaías 61:1, 2) Manera Beibel a profetisá, Hesus a mustra un interes spesial den hende ku tabata ‘traha duru i ku tabata kargá.’—Mateo 11:28-30.

Hesus a konsolá hende pa medio di su konsehonan sabí, su manera bondadoso di trata ku nan i, den algun kaso, ora el a kura nan malesa. Un dia un leproso a roga Hesus: “Si bo ke, bo por kura mi.” Kompashon a konmové Hesus, i el a  kontest’é: “Mi ke. Sea kurá.” (Marko 1:40, 41) Anto el a kura e leproso.

Awe, e Yu di Dios no ta riba tera pa duna nos konsuelo. Pero su Tata, Yehova, e “Dios di tur konsuelo,” ta sigui yuda hende ku mester di yudansa. (2 Korintionan 1:3) Ban analisá kuater manera ku Dios ta konsolá hende.

  • Beibel. “Tur loke a ser skirbí anteriormente a ser skirbí pa nos instrukshon, pa asina mediante nos perseveransia i e konsuelo for di e Skritura nos por tin speransa.”—Romanonan 15:4.

  • Dios Su Spiritu Santu. Poko tempu despues di Hesus su morto, henter e kongregashon kristian tabatin un periodo di pas. Dikon? Pasobra “henter e kongregashon tabata kana den temor di Yehova i biba na armonia ku e konsuelo ku nan a risibí di spiritu santu.” (Echonan 9:31) Spiritu santu, esta, Dios su forsa aktivo, ta masha poderoso. Dios por us’é pa konsolá kualke hende den kualke sirkunstansia.

  • Orashon. Beibel ta konsehá nos: “No sea anshá tokante nada.” Mas bien, e ta bisa: “Laga Dios sa kiko ta boso petishonnan; i e pas di Dios ku ta surpasá tur komprondementu lo protehá boso kurason i boso mente.”—Filipensenan 4:6, 7.

  • Rumannan Kristian por ta berdadero amigunan ku nos por konfia ora nos ta pasa den situashon difísil. Apòstel Pablo a deskribí su rumannan komo “un fuente di gran konsuelo” den tempu di “angustia i tribulashon.”—Kolosensenan 4:11; 1 Tesalonisensenan 3:7.

Pero kisas bo ta puntra bo mes kon tur esaki por ta posibel. Ban analisá eksperensia di hende ku a enfrentá e problemanan ku a ser menshoná den e artíkulo anterior. Meskos ku nan, bo tambe por mira ku te ainda Dios ta kumpli ku e promesa akí: “Manera esun ku su mama ta konsolá, asina lo mi konsolá boso.”—Isaías 66:13.

^ par. 3 Beibel ta bisa ku Dios su nòmber ta Yehova.