Den e relato di kreashon den e buki bíbliko di Génesis, nos ta lesa ku Dios a bisa e promé hòmber, Adam: “Di tur palu di e hòfi bo mag kome libremente, ma di e palu di konosementu di bon i malu lo bo no kome, pasobra e dia ku bo kome di dje, lo bo muri sigur.” (Génesis 2:16, 17) E palabranan ei ta demostrá klaramente ku si Adam a obedesé Dios su mandamentu, lo e no a muri pero lo el a sigui biba den e hòfi di Edén.

Lamentablemente, en bes di obedesé Dios i sigui biba, Adam a skohe pa ignorá Dios su mandamentu i a kome for di e fruta prohibí ora su kasá Eva a dun’é pa kome. (Génesis 3:1-6) Anto te awe nos ta sufri e konsekuensianan di nan desobedensia. Apòstel Pablo a splik’é asin’akí: “Pa medio di ún hende piká a drenta mundu, i morto pa medio di piká, i asina morto a pasa pa tur hende pasobra nan tur a peka.” (Romanonan 5:12) E “hende” ei tabata Adam. Pero, ta ki piká el a kometé, i dikon esei a hiba na morto?

Loke Adam a hasi, esta, desobedesé Dios su Lei deliberadamente, ta piká. (1 Huan 3:4) I e kastigu pa piká ta morto, manera Dios a bisa Adam. Si Adam i su futuro desendientenan a obedesé Dios su mandamentu, nan lo no a peka ni no tabatin nodi di muri. Dios no a krea hende pa muri sino pa biba, anto pa semper.

 Pues, sin duda, manera Beibel ta bisa, morto “a pasa pa tur hende.” Pero, un parti di nos ta sigui biba despues ku nos muri? Hopi lo bisa ‘sí,’ ku nos tur tin un parti inmortal ku yama alma. Ma si ta asina, ta gaña Dios a gaña Adam anto. Pasobra si un parti di nos ta sigui biba den un otro region despues ku nos muri, e ora ei morto lo no ta kastigu pa piká manera Dios a bisa. Pero Beibel ta bisa: “Ta imposibel pa Dios gaña.” (Hebreonan 6:18) En realidat, ta Satanas a gaña Eva ora el a bis’é: ‘Siguramente lo bo no muri!’—Génesis 3:4.

Esei ta lanta e pregunta: Si e siñansa di inmortalidat di alma ta basá riba un mentira, kiko ta sosodé anto ora un hende muri?

BEIBEL TA KITA TUR DUDA

E relato di kreashon den Génesis ta bisa: “SEÑOR Dios a forma hende di e stòf di tera i a supla e rosea di bida den su nanishi; i hende a bira un ser bibu.” E ekspreshon “un ser bibu” ta un tradukshon di e palabra hebreo néfesh, * ku ta nifiká literalmente “un kriatura ku ta hala rosea.”—Génesis 2:7.

Pues, Beibel ta mustra bon kla ku hende no a ser kreá ku un alma inmortal, sino ku kada hende ta “un ser bibu.” P’esei mes, maske kuantu bo buska, lo bo no haña un teksto di Beibel ku ta usa e palabranan “alma inmortal.”

Ya ku Beibel no ta bisa ku hende tin un alma inmortal, dikon hopi religion ta siña lo kontrario? Pa haña kontesta di e pregunta akí, nos mester bai bèk te den tempu di Egipto di antigwedat.

 UN SIÑANSA PAGANO TA PLAMA

Herodoto, un historiadó griego di siglo 5 promé ku Kristu, a bisa ku e egipsionan tabata “e promé nashon ku a promové e idea di inmortalidat di alma.” E babilonionan, un otro nashon di antigwedat, tambe tabata kere den alma inmortal. Pa e tempu ku Aleksander e Grandi a konkistá Medio Oriente na aña 332 promé ku Kristu, filósofonan griego a promové e siñansa akí, i masha lihé el a plama den henter e Imperio Griego.

Lo bo no haña un teksto di Beibel ku ta usa e palabranan “alma inmortal”

Den e promé siglo, dos sekta hudiu prominente, e esenenan i e fariseonan, a siña hende ku e alma ta sigui bibu despues ku e kurpa muri. The Jewish Encyclopedia ta bisa: “E hudiunan a bin tende di inmortalidat di alma ora ku nan a haña sa di ideanan griego i prinsipalmente via filosofia di Plato.” Di mes manera, Hosefo, un historiadó hudiu di promé siglo, a bisa ku e siñansa akí a bini, no for di e Skritura Santu, sino for di “e opinion di e griegonan,” i el a mira eseinan komo un kolekshon di leyenda i mito.

Segun ku e influensia di e kultura griego a sigui plama, hende ku a bisa ku nan ta kristian tambe a aseptá e siñansa pagano ei. Segun e historiadó Jona Lendering: “Plato su teoria ku un tempu nos alma tabata biba den un lugá mihó i ku awor nos alma ta biba den un mundu dekaí a habri e kaminda pa e kristiannan adoptá e filosofia di Plato.” Di e manera ei, e iglesia “kristian” a aseptá e doktrina pagano di alma inmortal, i esei a bira un parti fundamental di su kreensianan.

 “E BÈRDAT LO HASI BOSO LIBER”

Den e promé siglo, apòstel Pablo a duna e spièrtamentu akí: “E palabra inspirá ta bisa bon kla ku mas despues algun hende lo kai for di fe, pasobra nan ta presta atenshon na deklarashonnan inspirá engañoso i na siñansa di demoño.” (1 Timoteo 4:1) Ki sierto e palabranan ei tabata! E doktrina di alma inmortal ta apénas un ehèmpel di “siñansa di demoño.” E no ta basá riba Beibel, sino riba religionnan pagano i filosofia di antigwedat.

Afortunadamente, Hesus a bisa: “Boso lo konosé e bèrdat, i e bèrdat lo hasi boso liber.” (Huan 8:32) Ora nos haña un konosementu eksakto di e bèrdat di Beibel, nos ta ser librá for di e siñansanan i práktikanan ku ta desonrá Dios ku hopi religion di mundu ta promové. Ademas, e bèrdat den e Palabra di Dios ta libra nos di tur tradishon i superstishon ku tin di haber ku morto.—Wak e kuadro “ Unda e Mortonan Ta?

No tabata e intenshon di nos Kreador pa hende biba solamente 70 òf 80 aña riba tera pa despues bai biba pa eternidat den un otro region. Su propósito original tabata pa su kreashon humano biba pa semper aki riba tera komo su yunan obediente. E propósito akí ta demostrá e amor ku Dios tin pa humanidat, i lo e no frakasá. (Malakías 3:6) E salmista inspirá pa Dios a sigurá nos di esei ora el a bisa: “E hustunan lo heredá e tera, i lo biba den dje pa semper.”—Salmo 37:29.

 

^ par. 9 Algun tradukshon di Beibel manera Beibel na papiamentu koriente ta tradusí néfesh komo “hende a haña bida.”