Bai na kontenido

Bai na kontenido

 TÓPIKO PRINSIPAL | BEIBEL​—HISTORIA DI SU SOBREBIBENSIA

Un Historia Importante

Un Historia Importante

Beibel ta diferente for di tur otro buki religioso. Niun otro buki a yega di forma e kreensianan di asina tantu hende durante asina tantu aña. Di otro banda, no tin niun otro buki ku a ser analisá i kritiká asina tantu.

Por ehèmpel, algun eksperto ta duda ku e Beibelnan djawendia ta kopianan konfiabel di e tekstonan original. Un profèser di estudionan religioso a bisa: “Nos no por tin sigur ku nos a logra reprodusí e teksto original na un manera eksakto. E úniko kos ku nos tin ta kopianan yen di fout, i e gran mayoria di nan a ser skirbí siglonan despues di e originalnan i aparentemente ta hopi diferente for di e originalnan.”

Otro hende, pa motibu di e religion ku nan a lanta aden, ta duda ku Beibel ta un buki outéntiko. Por ehèmpel, e famia di Faizal ku no tabata di un religion asina yamá kristian a siñ’é ku Beibel ta un buki santu wèl pero ku hende a kambi’é. Faizal a bisa: “Esei a pone ku mi tabata un poko deskonfiá ora hende kier a papia ku mi tokante Beibel. Al fin i al kabo, nan no tabatin e Beibel original; el a ser kambiá.”

Ta importá si Beibel a kambia? Wèl, pensa riba lo siguiente: Lo bo kere den su bunita promesanan pa futuro si bo no sa ku nan ta aparesé den e tekstonan original? (Romanonan 15:4) Si e kopianan di Beibel djawendia ta yen di fout, lo bo apliká prinsipio di Beibel ora di tuma desishon importante tokante trabou, famia òf adorashon na Dios?

Aunke e bukinan original di Beibel no ta eksistí mas, nos por konsultá e kopianan antiguo ku ta inkluí míles di manuskrito di Beibel. Kon e manuskritonan ei a ser konserbá, kon nan a sobrebibí oposishon i kon nan a logra keda intakto maske hende a purba di kambia e teksto? Kon e echo ku nan a sobrebibí por duna bo mas konfiansa den e Beibelnan ku awe ta disponibel? Ban wak kontesta riba e preguntanan ei den Beibel su historia di sobrebibensia.