LUZIA TA KOKOCHÁ RIBA SU PIA ROBES. Na mucha, el a haña polio, un malesa sumamente kontagioso ku ta ataká e sistema nèrvioso. Ora e tabatin 16 aña, un señora ku Luzia tabata traha p’e a bisa Luzia: “Ta Dios a kastigá bo ku parálisis pasobra bo a desobedesé bo mama i a pèrdè rèspèt p’e.” Hopi tempu despues, ainda Luzia tabata kòrda kuantu daño e palabranan ei a kous’é.

ORA DAMARIS A HAÑA SA KU E TIN UN TUMOR SELEBRAL, su tata a puntr’é: “Ta kiko bo a hasi? Bo mester a hasi algu hopi malu ku Dios a kastigá bo.” Su komentario a pone Damaris sintié hopi kibrá.

Pa míles di aña kaba, hende ta kere ku malesa ta un kastigu di Dios. E buki Manners and Customs of Bible Lands ta bisa ku den tempu di Kristu hopi hende a kere ku “sea ta piká di e hende ku ta enfermo, òf piká di su famianan, ta kousa malesa, i ku malesa ta un kastigu pa su piká.” E buki Medieval Medicine and the Plague ta bisa ku den Edat Medio “algun hende tabata kere ku Dios tabata kastigá nan pa nan pikánan mediante plaga.” Akaso esei ke men ku ora miónes di hende na Europa a muri di e plaga di siglo 14 ta Dios a kastigá nan? Òf ta un infekshon di bakteria a kousa esei, manera siensia a komprobá despues? Tin hende kisas ta puntra nan mes: Ta bèrdat ku Dios ta usa malesa pa kastigá hende pa nan pikánan? *

ALGU PA PENSA ARIBA: Dikon Hesus lo a kura hende si malesa tabata un kastigu meresí di Dios? Esei lo no a nifiká ku lo el a kuestioná e hustisia di Dios? (Mateo 4:23, 24) Nunka Hesus lo no a hasi algu pa bai kontra Dios. Hesus a bisa: “Semper mi ta hasi loke ta agrad’é” i “mi ta hasi presis manera e Tata a manda mi hasi.”—Huan 8:29; 14:31.

Beibel ta bisa na un manera masha kla ku Yehova Dios ta “sin inhustisia.” (Deuteronomio 32:4) Por ehèmpel, Dios nunka lo mata sientos di hende inosente den un aksidente di avion djis pa e kastigá ún hende abordo. Abraham, un fiel sirbidó di Dios, tabata sa ku nunka Dios lo “destruí e hustu huntu ku e malbado.” El a bisa tambe: “E Hues di henter mundu lo no hasi hustisia?” (Génesis 18:23, 25) Beibel ta bisa tambe ku “leu sea di Dios di hasi maldat”; e no ta “kometé inikidat.”—Yòb 34:10-12.

KIKO BEIBEL TA SIÑA NOS TOKANTE SUFRIMENTU?

Ora nos ta sufri, no ta Dios ta kastigá nos pa un piká ku nos a kometé. Hesus a bisa esei bon kla ora e ku su disipelnan a topa un hòmber ku a nase siegu. “Su disipelnan a puntr’é: ‘Rabi, ta ken a peka ku e hòmber akí a nase siegu, e òf su mayornan?’ Hesus a kontestá nan: ‘No ta piká di e hòmber akí ni di su mayornan a pon’é nase siegu; pero ta pa hende por mira e obra di Dios pa medio di su kaso.’”—Huan 9:1-3.

Debí na e idea robes ku tabata reina e tempu ei, Hesus su disipelnan lo mester a keda sorprendí ora el a bisa nan ku ni e hòmber mes ni su mayornan a kometé un piká ku meresé kastigu. Na e momento ei, Hesus no solamente a kura e hòmber siegu sino tambe el a korigí e pensamentu robes ku sufrimentu ta un kastigu di Dios. (Huan 9:6, 7) Esta un gran konsuelo esei ta pa esnan den nos tempu ku tin problema ku salú!

Pakiko Hesus lo a kura malesa si esei ta un kastigu di Dios?

Beibel ta sigurá nos:

  • “Pasobra ningun hende no por pone Dios na prueba ku kos malu, i e mes tampoko no ta pone ningun hende na prueba ku kos malu.” (SANTIAGO 1:13) I no esei so, pronto Dios lo eliminá tur “kos malu” ku a pone hende sufri pa siglonan, entre otro, malesa, doló i morto.

  • Hesukristu “a kura tur ku tabata malu.” (MATEO 8:16) Asina e Yu di Dios a demostrá loke e Reino di Dios ta bai hasi na un eskala mundial.

  • “[Dios lo] seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.”—REVELASHON 21:3-5.

 KEN TA KULPABEL?

Pero ta dikon tin asina tantu sufrimentu riba e mundu akí? Pa hopi siglo hende ta hasi nan mes e pregunta ei. Si Dios no ta kulpabel, ta ken ta kulpabel anto? Nos lo kontestá e preguntanan akí den e siguiente artíkulo.

^ par. 4 Aunke den pasado Dios a yega di kastigá hende ku, entre otro, malesa òf desaster natural pa nan pikánan, Beibel no ta bisa ku Yehova ta hasi esei den nos tempu.