Bai na kontenido

Bai na kontenido

Bida TA Bale la Pena

Bida TA Bale la Pena

Faizal mester a hasi un operashon grandi di kurason mas o ménos un aña despues ku su esposa a fayesé. El a bisa: “Ora mi a lesa e buki di Yòb, mi a realisá ku Yehova a pone e relato ei den Beibel pa un motibu. Ora nos ta sinti nos hopi desanimá i ta lesa den Beibel di un hende ku a sinti su mes meskos ku nos, esei ta konsolá nos.” El a sigui bisa: “Bida ta bale la pena.”

Tarsha tabata yòn ora su mama a muri. El a bisa: “Ora bo konosé bo Kreador, bo tin propósito den bida, speransa i goso maske ku bo tin hopi problema. Nos por tin e konfiansa ku Yehova por kuida nos i yuda nos pasa kada dia.”

E ARTÍKULONAN anterior ta mustra kon vários suseso trágiko por laga bo sinti ku bida ta insoportabel. Ora bo ta lucha ku bo mes problemanan, bo por kuminsá duda ku bida ta bale la pena òf ku hende ta interesá den bo. Pero bo por ta sigur ku Dios ta interesá den bo i ku bo ta presioso p’e.

E eskritor di Salmo 86 a ekspresá su konfiansa den Dios: “Den e dia di mi angustia lo mi sklama na bo, pasobra abo lo kontestá mi.” (Salmo 86:7) Pero kisas bo ta puntra bo mes: ‘Kon Dios lo kontestá ami “den e dia di mi angustia”?’

Aunke Dios kisas lo no kita bo problemanan mesora, su Palabra, Beibel, ta sigurá bo ku Dios lo duna bo pas pa yuda bo trata ku bo problemanan: “No sea anshá tokante nada; mas bien, den tur kos, pa medio di orashon i súplika huntu ku gradisimentu, laga Dios sa kiko ta boso petishonnan; i e pas di Dios ku ta surpasá tur komprondementu lo protehá boso kurason i boso pensamentunan.” (Filipensenan 4:6, 7, nota) Por fabor, konsiderá kon e siguiente tekstonan di Beibel ta sigurá bo ku Dios di bèrdat ta interesá den bo.

Dios Ta Interesá den Bo

“Dios no ta lubidá ni un di [e mòfinan] . . . Boso ta bal mas ku hopi mòfi.” Lukas 12:6, 7.

PENSA RIBA ESAKI: Aunke paranan chikitu manera mòfi por parse insignifikante, tòg Dios ta interesá den kada un di nan. Tur ta presioso den Dios su bista. Pero hende ta hopi mas balioso pa Dios. Hende ta e parti mas importante di Dios su kreashon riba tera. Nan ta trahá den Dios su “imágen” i tin e kapasidat pa kultivá i desplegá su kualidatnan maravioso.—Génesis 1:26, 27.

“O SEÑOR, bo a saminá mi i bo konosé mi . . . Bo ta komprondé mi pensamentunan . . . Purba mi [òf, “Saminá mi,” NW] i konosé mi pensamentunan.”Salmo 139:1, 2, 23.

PENSA RIBA ESAKI: Dios konosé bo personalmente. E konosé bo sintimentu di mas profundo i bo preokupashonnan. Aunke otro hende kisas no ta komprondé bo problemanan i ansiedat, Dios ta interesá den bo i ke yuda bo. Esei ta hasi ku bida ta bale la pena.

 Bo Bida Tin Sentido

“Tende mi orashon, o SEÑOR! I laga mi sklamashon pa yudansa yega serka bo. . . . Inkliná bo orea na mi; den e dia ku mi yama, kontestá mi lihé. . . . El a konsiderá e orashon di esnan desampará.”Salmo 102:1, 2, 17.

PENSA RIBA ESAKI: For di kuminsamentu, Yehova ta konsiente di kada lágrima ku a basha for di hende su wowo. (Salmo 56:8) I esaki ta inkluí bo lágrimanan tambe. Dios ta kòrda tur loke abo a pasa aden i tur e lágrimanan ku a basha for di bo wowo pasobra bo ta presioso p’e.

“No desmayá, pasobra mi ta bo Dios. Lo mi fortalesé bo, sí, lo mi yuda bo . . . Ami ta SEÑOR bo Dios, . . . kende ta bisa bo: ‘No tene miedu, lo mi yuda bo.’”Isaías 41:10, 13.

PENSA RIBA ESAKI: Dios ta kla pa yuda bo. Si bo kai, lo e lanta bo.

Tin Speransa pa un Mihó Futuro

“Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.”Huan 3:16.

PENSA RIBA ESAKI: Bo ta asina presioso pa Dios ku el a sakrifiká su Yu, Hesus, boluntariamente pa bo. E sakrifisio akí ta duna bo e oportunidat pa hiba un bida felis i ku propósito pa semper. *

Aunke bo bida por ta hopi duru, saka tempu pa studia Beibel i fortalesé bo fe den Dios su promesanan. Esei lo hasi bo felis i konvensé bo ku bida ta bale la pena.

^ par. 19 Si bo ke haña sa mas tokante e benefisio di Hesus su sakrifisio, wak e vidio Laga Nos Rekordá Hesus Su Morto riba www.jw.org/pap. Bai na PUBLIKASHON > VIDIO > NOS REUNIONNAN I SIRBISHI.