Den e leyenda ku nos a menshoná den un artíkulo anterior, Kreso a ser engañá pa e orákulo di Delfos, i komo resultado, e rei di Persia a derot’é. Di otro banda, Beibel ta kontené profesia tokante e rei di Persia ku a kumpli en detaye.

Mas o ménos 200 aña di antemano, hopi tempu promé ku Rei Siro a nase, e profeta hebreo Isaías a menshoná Siro pa nòmber i a bisa kon lo e konkistá Babilonia, un stat poderoso.

Isaías 44:24, 27, 28: “Asina SEÑOR . . . ta bisa e profundidat di laman: ‘Bira seku!’ I lo mi hasi bo riunan seka. Ta ami ta bisa di Siro: ‘E ta mi wardadó! E lo kumpli ku tur loke mi ta deseá.’ Di Herúsalèm e ta deklará: ‘Lo bo wòrdu konstruí,’ i di e tèmpel: ‘Bo fundeshi lo wòrdu poné.’”

Segun e historiadó Herodoto, e ehérsito di Siro a desviá e awa di Riu Eufrátes ku tabata pasa den e stat di Babilonia. Danki na e strategia di Siro, e awa a baha i su ehérsito por a pasa na pia den e riu pa drenta e stat. Despues ku Siro a konkistá Babilonia, el a libra e hudiunan prezu i a laga nan bolbe Herúsalèm pa rekonstruí e stat, ku a ser destruí 70 aña promé.

Isaías 45:1: “Asina SEÑOR ta bisa Siro, su ungí, esun ku mi a kohe na su man drechi, pa hasi nashonnan someté nan mes su dilanti, i pa kita arma for di reinan, pa habri portanan su dilanti, asina ku e portanan di stat lo no wòrdu será.”

E personan a drenta e stat via e portanan inmenso di dos blat ku a keda habrí pa deskuido. Si e babilonionan tabata sa kiko Siro tabatin pensá di hasi, nan lo por a sera tur e portanan ku ta keda kara pa e riu. Pero komo ku nan no a sera e portanan, e stat a keda sin defensa.

E profesia remarkabel akí ta djis ún di e tantísimo profesianan bíbliko ku a kumpli presis. * Kontrali na pronóstiko di hende, ku segun nan hopi biaha ta bini di nan diosnan falsu, profesia di Beibel ta bini di e Persona “kende ta deklará e fin for di prinsipio, i for di tempunan antiguo, kosnan ku no a wòrdu hasí ainda.”—Isaías 46:10.

Ta e Dios berdadero, kende su nòmber ta Yehova, so por bisa esei. Su nòmber evidentemente ta nifiká: “E Ta Kousa pa Bira.” Esaki ke men ku e tin e kapasidat di wak futuro i kumpli ku su boluntat.  Esei ta un garantia ku lo e kumpli ku tur loke el a primintí.

PROFESIANAN KU TA KUMPLIENDO

Bo tin gana di sa kiko Beibel ta profetisá tokante nos tempu? Mas o ménos 2.000 aña pasá, Beibel a bisa ku den “e último dianan lo bini tempunan krítiko, difísil pa trata kuné.” Ta e último dianan di kiko e ta papiando di dje? Wèl, no ta di planeta Tera ni di humanidat, pero di problema, opreshon i angustia ku ta pone hende sufri pa míles di aña kaba. Laga nos konsiderá djis algun profesia ku ta mustra ku nos ta bibando den “e último dianan.”

2 Timoteo 3:1-5: “Den e último dianan . . . hende lo stima nan mes, stima plaka; nan lo ta bromadó, arogante, blasfemadó, desobediente na mayornan, malagradesí, desleal, sin kariño; nan lo no ta dispuesto pa sera ningun akuerdo; nan lo ta kalumniadó, sin dominio propio, feros, sin amor pa loke ta bon, traidor, kabesura, hinchá di orguyo, ku ta stima plaser en bes di stima Dios, ku tin aparensia di ta deboto na Dios, ma ku no ta demostrá e deboshon ei den nan bida.”

No ta asina ku dia pa dia bo por mira e komportashon ei mas i mas? Unda ku bo bira hende ta stima nan mes, nan ta stima plaka i ta pensa riba nan so. Nan ta mas eksigente i ménos dispuesto pa bai di akuerdo ku otro hende. I yunan no ta tende di nan mayornan i, por lo general, hende ta stima plaser mas ku Dios. Anto dia pa dia, e situashon ta bira mas pió.

Mateo 24:6, 7: “Boso lo tende di guera den vários lugá . . . Nashon lo lanta kontra nashon i reino kontra reino.”

Segun algun kálkulo, e kantidat di morto ku guera i konfliktonan armá a kousa desde 1914 ta mas ku 100 mion; e sifra ei ta surpasá poblashon di hopi pais. Pensa un ratu kuantu lágrima, tristesa i doló esei lo mester a kousa. Pero e nashonnan a siña di nan foutnan i pone un fin na guera?

Mateo 24:7: “Lo tin skarsedat di kuminda.”

E Programa Mundial di Alimentashon ta bisa: “Den e mundu akí ku ta produsí sufisiente kuminda pa tur hende por kome, 815 mion hende, esei ta ún di kada nuebe hende, te ainda ta bai drumi stoma bashí. Pió ainda, ún di kada tres hende ta sufri di un forma di desnutrishon.” Nan ta kalkulá ku tur aña, mas o ménos tres mion mucha ta muri di hamber.

Lukas 21:11: “Lo tin temblor grandi.”

Tur aña, hende ta sinti mas o ménos 50.000 temblor. Di e temblornan ei, 100 ta kousa daño konsiderabel na edifisionan, i un temblor grandi ta sosodé kada pasa aña. Segun un kálkulo, entre aña 1975 i aña 2000, temblor a kobra bida di 471.000 hende.

Mateo 24:14: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.”

Aktualmente tin mas ku ocho mion Testigu di Yehova ta prediká e bon notisia di e Reino di Dios den mas ku 240 pais rònt mundu. Nan ta prediká den statnan inmenso, den pueblonan aislá, den selvanan i riba serunan haltu. E profesia ta bisa ku ora Dios keda satisfecho ku e trabou, “e fin lo yega.” Kiko esei ke men? Wèl, ku gobernashon di hende lo yega na su fin i ku e Reino di Dios lo kuminsá goberná. Ki promesanan lo kumpli e tempu ei? Sigui lesa pa bo haña kontesta riba e pregunta ei.