Bai na kontenido

Bai na kontenido

Hesus a bishitá e suegra di Pedro i a kur’é.—Mateo 8:14,15; Marko 1:29-31

Sirbidónan di Dios Mester Hiba un Bida di Selibato?

Sirbidónan di Dios Mester Hiba un Bida di Selibato?

RÒNT mundu, religionnan manera Iglesia Katóliko Romano, iglesianan òrtodòks i budismo ta rekerí di nan lidernan religioso i di miembro di klero pa nan hiba un bida di selibato. Di otro banda, hopi hende ta mira e práktika akí komo e kousa di e ola di eskándalonan seksual ku lidernan religioso di vários religion ta metí aden.

P’esei, kisas bo ta puntra bo mes: ‘Beibel ta bisa ku sirbidónan di Dios mester hiba un bida di selibato?’ Pa nos por kontestá e pregunta ei, laga nos analisá e orígen i desaroyo di e práktika akí i kiko Dios ta pensa di dje.

SELIBATO DEN HISTORIA RELIGIOSO

Segun e Encyclopædia Britannica, selibato ke men “e estado di no ta kasá, pues, di apstené di sèks, i por lo general e ta konta pa un lider religioso òf un persona deboto.” Na 2006, den un diskurso pa e Curia Romano, Papa Benedikto XVI a konektá selibato obligatorio ku “un tradishon ku a kuminsá den un époka djis despues di e Apòstelnan.”

Sinembargo, e kristiannan di promé siglo no a hiba un bida di selibato. De echo, apòstel Pablo, kende a biba den e promé siglo, a spièrta e kristiannan berdadero tokante hòmbernan ku lo bini ku “deklarashonnan inspirá engañoso” i ku lo “prohibí kasamentu.”—1 Timoteo 4:1-3.

Ta durante siglo dos e idea di un bida di selibato pa miembronan di klero a hasi su entrada den iglesianan ‘kristian.’ E buki Celibacy and Religious Traditions ta splika ku esei “a koinsidí ku un periodo di restrikshon seksual ku a kuminsá den e Imperio Romano.”

Durante e siguiente siglonan, konsilionan di iglesia i e asina yamá Tatanan di Iglesia a promové  un bida di selibato pa miembronan di klero. Nan tabata pensa ku relashon seksual ta hasi hende impuru i ku pastornan lo no ta apto e ora ei pa kumpli ku nan debernan. Apesar di esei, e Encyclopædia Britannica ta mustra ku “te ku siglo 10, ainda tabatin hopi pastor i asta algun obispu ku tabatin esposa.”

Durante e Konsilionan Laterano di 1123 i 1139 ku a tuma lugá na Roma, selibato a bira obligatorio pa klero, i esei ta e posishon ofisial di Iglesia Katóliko Romano te dia djawe. Ku e medida akí, e Iglesia lo no a pèrdè poder ni plaka mas ya ku pastornan kasá tabata laga propiedat di Iglesia komo herensia pa nan yunan.

LOKE DIOS TA PENSA DI SELIBATO

Dios su Palabra, Beibel, ta mustra bon kla kiko Dios ta pensa di selibato. Den Beibel nos ta lesa loke Hesus a bisa tokante hende ku, meskos kuné, a keda soltero “pa motibu di e Reino di shelu.” (Mateo 19:12) Apòstel Pablo a menshoná algu similar ora el a papia di kristiannan ku a skohe pa sigui su ehèmpel i keda soltero “pa kousa di e bon notisia.”—1 Korintionan 7:37, 38; 9:23.

Pero ni Hesus ni Pablo no a manda sirbidónan di Dios hiba un bida di selibato. Hesus a bisa ku hende ku por keda soltero tin un “don,” i no ta tur su siguidónan tin esei. Ora Pablo a skirbi tokante “hende ku no a kasa nunka,” el a atmití frankamente: “Mi no tin ningun òrdu di Señor, pero mi ta duna mi opinion.”—Mateo 19:11; 1 Korintionan 7:25.

Ademas, Beibel ta mustra ku hopi sirbidó di Dios di promé siglo, entre nan apòstel Pedro, tabata hòmbernan kasá. (Mateo 8:14; Marko 1:29-31; 1 Korintionan 9:5) De echo, komo ku den e mundu romano di e tempu ei, tabata komun pa hende praktiká inmoralidat seksual, Pablo a skirbi ku si un superintendente kristian tabata kasá, e mester tabata “esposo di ún esposa” i ku su ‘yunan mester tabata sumiso’ na dje.—1 Timoteo 3:2, 4.

Eseinan no tabata matrimonionan selibato, pasobra Beibel ta bisa bon kla ku “esposo [mester] kumpli ku su deber pa ku su esposa” i ku un pareha kasá no mester “nenga di kumpli ku e deber” di tene relashon seksual ku otro. (1 Korintionan 7:3-5) Pues, ta bisto ku un bida di selibato no ta un rekisito di Dios, ni e no ta obligatorio pa sirbidónan di Dios.

PA KOUSA DI E BON NOTISIA

Si selibato no ta obligatorio, dikon Hesus i Pablo a bisa ku ta bon pa keda soltero? Pasobra ora un hende ta soltero, e tin mas oportunidat pa kompartí e bon notisia ku otro hende. Un hende soltero por duna mas di su mes komo ku e no tin e preokupashonnan ku un hende kasá tin.—1 Korintionan 7:32-35.

Wak e ehèmpel di David. El a disidí di laga su trabou bon pagá na Siudat di México pa bai biba den un área di kunuku na Costa Rica pa e por siña hende tokante Beibel. E ta haña ku e echo ku e tabata soltero tabata un bentaha? David a bisa: “Sigur ku sí. Tabata un reto pa mi adaptá mi na un kultura nobo i siña biba den kondishonnan diferente. Pero komo ku ta pa mi so mi mester a sòru, tabata mas fásil pa mi adaptá mi mes.”

Claudia, un kristian soltero ku a muda bai sirbi kaminda tin mester di mas predikadó, a bisa: “Mi ta disfrutá di mi sirbishi na Dios. Mi fe i mi relashon ku Dios ta bira mas fuerte ora mi mira kon e ta kuida mi.”

“No ta importá si bo ta kasá òf soltero, lo bo ta felis si bo duna Yehova Dios lo mihó di bo mes.”—Claudia

No mester ta un karga pa keda soltero. Claudia a sigui bisa: “No ta importá si bo ta kasá òf soltero, lo bo ta felis si bo duna Yehova Dios lo mihó di bo mes.”—Salmo 119:1, 2.