Bai na kontenido

Bai na kontenido

 BEIBEL TA KAMBIA BIDA DI HENDE

Duna Mi Djis Ún Aña di Pas i Felisidat

Duna Mi Djis Ún Aña di Pas i Felisidat
  • NASÍ NA AÑA: 1971

  • PAIS NATAL: FRANSIA

  • SU PASADO: METÍ DEN KRÍMEN VIOLENTO, INMORALIDAT I DROGA

MI PASADO:

Mi famia tabata biba na Tellancourt, un pueblito den nortost di Fransia. Mi tata tabata franses, i mi mama ta italiano. Tempu mi tabatin ocho aña, nos a muda bai un bario di trahadó pober na Roma, Italia. E situashon na kas no tabata nada fásil. Mi mayornan tabata pleita fuertemente ku otro pasobra nan tabatin problema finansiero.

Ku 15 aña di edat mi mama a animá mi pa sali mas i buska amigu. Pues mi a kuminsá sali mas i kada biaha mi tabata keda mas tantu tempu for di kas. No a dura mashá ku mi a kuminsá haña mi ku mal amigu. Un dia, un hòmber, ku tabata parse amabel, a aserká mi i a ofres’é mi droga. Mi a tum’é pasobra mi kier a laga parse ku ta masha ‘hòmber’ mi tabata. Asina, masha lihé mes mi a kai den un mundu di droga i inmoralidat. Na diferente okashon mi a bira víktima di abusu seksual. Mi n’ tabatin kunes mas ku bida; mi n’ tabata wòri si mi a biba òf muri. Mi tabata sinti mi mi so i desesperá. Tempu ku mi tabatin 16 aña, mi a bebe henter un bòter di wiski i a bula den un lago pa purba di mata kurpa. Komo resultado, mi a kai den koma pa tres dia largu.

Despues di esei, mi a kuminsá duna mas balor na bida, tòg mi tabata violento i mañoso. Mi tabata ofresé hende pa hasi sèks ku nan. Pero ora mi tabata bai nan kas, mi tabata droga nan anto kaba hòrta nan kosnan di balor. Ademas, mi tabata trafiká droga rònt Italia pa grupo di kriminal organisá, i hopi biaha mi a haña mi den problema ku polis. Mi bida tabata bruhá i sin sentido. Tòg mi tabata konvensí ku mester tabatin un motibu pakiko mi ta eksistí. M’a resa na Dios i pidié p’e duna mi djis ún aña di pas i felisidat.

BEIBEL A KAMBIA MI BIDA:

Mi bida tabata na peliger debí ku algun trafikante di droga tabata buska mi pa mata. P’esei, tempu mi tabatin 24 aña, mi a disidí di muda bai Inglatera. Promé ku mi a bai, mi a bishitá mi mama, i pa mi sorpresa mi a haña un hòmber ku yama Annunziato Lugarà ta papia kuné tokante Beibel. * Mi tabata sa di su pasado komo kriminal; pues, mi a haña miedu i a  puntr’é kiko e tabata hasi einan. El a konta mi tokante e kambionan grandi ku el a hasi den su bida pa e por a bira un Testigu di Yehova, i el a pone mi primintié ku ora mi yega Inglatera, lo mi tuma kontakto ku e Testigunan. Mi a dun’é mi palabra, pero unabes mi a yega, mi a kai den e mesun estilo di bida atrobe.

Un dia, den un kaya drùk di Lònden, mi a topa un Testigu ku tabata ofresé e revistanan Toren di Vigilansia i Spièrta! N’e momento ei mi a kòrda loke mi a primintí Annunziato i mi a pidi e Testigu si mi por a haña un kurso di Beibel.

Loke mi a siña for di Beibel a impreshoná mi mashá. Por ehèmpel, un pasashi di Beibel ku a konmové mi mashá tabata 1 Huan 1:9, ku ta bisa ku ‘si nos konfesá nos pikánan, Dios lo pordoná nos nos pikánan i limpia nos, pasobra e ta fiel i hustu.’ E teksto ei tabatin un impakto profundo riba mi pasobra mi a sinti mi sushi debí n’e bida ku mi tabata hiba. Mesora mi a kuminsá bai e reunionnan na e Salòn di Reino di Testigunan di Yehova, i nan a duna mi un kaluroso bon biní. Ora mi a mira e amistat será ku nan tabatin ku otro, ku ta algu ku semper mi tabata anhelá, mi a disidí ku mi tambe kier tabata parti di e kongregashon ei, ku tabata manera un famia.

Apesar ku no tabata asina difísil pa mi stòp di usa droga i kambia mi estilo di bida, tabata hopi mas difísil pa mi mehorá mi personalidat. Mi a siña ku mi mester trata hende ku rèspèt i mustra konsiderashon na nan. De echo, ainda mi ta lucha ku algun mal kualidat, pero ku yudansa di Yehova mi a logra hasi progreso. Seis luna despues ku mi a kuminsá mi kurso di Beibel, mi a batisá komo un Testigu di Yehova. Esei tabata na aña 1997.

E BENEFISIONAN:

Despues ku mi a kaba di batisá, mi a kasa ku un mucha muhé ku yama Barbara, kende tambe a kaba di bira un Testigu di Yehova. Ora un di mi amigunan di ántes a mira kuantu kambio mi a hasi den mi bida, e tambe a kuminsá studia Beibel. Ku tempu, e i su ruman muhé a bira Testigu. Anto na edat di mas ku 80 aña, mi tanta grandi a kuminsá studia Beibel i a batisá promé ku el a fayesé.

Awor mi ta sirbi komo un ansiano den un kongregashon lokal, i ami ku mi kasá ta prediká 70 ora kada luna i ta yuda hende di abla italiano ku ta biba na Lònden siña tokante Beibel. Tempu tempu mi ta sinti mi deprimí pa motibu di mi estilo di biba di ántes, pero Barbara ta un gran apoyo pa mi. Porfin mi tin un bida di famia stabil i un Tata ku ta stima mi, manera semper mi a anhelá. Mi a pidi Dios duna mi djis ún aña di pas i felisidat, pero el a duna mi muchu mas ku esei!

Porfin mi tin un bida di famia stabil i un Tata ku ta stima mi, manera semper mi a anhelá

^ par. 10 Wak e artíkulo “Beibel Ta Kambia Bida di Hende—Semper Mi Tabata Kana Armá,” segun e relato di Annunziato Lugarà, den E Toren di Vigilansia di 1 di yüli 2014, página 8-9.