“Esaki ta representá mi kurpa. . . . Esaki ta representá mi ‘sanger di e pakto.’”​—MAT. 26:26-28.

KANTIKA 16 Alabá Yehova pa Su Yu, Esun Ungí

UN BISTA ADELANTÁ *

1-2. (a) Dikon ta lógiko ku Hesus lo a siña nos kon pa konmemorá su morto na un manera simpel? (b) Menshoná algun kualidat di Hesus ku nos lo trata.

ABO lo por splika kiko ta tuma lugá na e konmemorashon anual di e morto di Kristu? Sin duda, mayoria di nos por kòrda e kosnan básiko ku ta tuma lugá na e Sena di Señor. Dikon? Pasobra e sena akí no ta kompliká. Sinembargo, e ta un evento masha importante. Pues, nos por puntra nos mes: ‘Dikon e sena akí ta asina simpel?’

2 Durante Hesus su sirbishi riba tera, semper el a siña hende e bèrdatnan importante na un manera simpel, kla i fásil pa komprondé. (Mat. 7:28, 29) Di mes manera, el a siña nos kon pa konmemorá * su morto na un manera simpel pero signifikativo. Laga nos analisá e Sena di Señor mas djaserka. I tambe nos lo analisá algun kos ku Hesus a hasi i bisa. Di e manera ei, nos lo komprondé mihó ainda kon humilde Hesus ta i kuantu kurashi i amor e tin. Ademas, nos lo siña kon nos por imit’é mas ainda.

HESUS TA HUMILDE

E pan i e biña ta kòrda nos ku Hesus a sakrifiká su bida pa nos i ku awor e ta nos Rei den shelu (Wak paragraf 3-5)

3. Segun Mateo 26:26-28, dikon nos por bisa ku e sena ku Hesus a instituí pa konmemorá su morto tabata simpel, i kiko e pan ku e biña a representá?

3 Hesus a instituí e konmemorashon di su morto den presensia di su 11 fiel apòstelnan. Pa hasi esei, el a usa e pan sin zürdeg i e biña ku a sobra di e sena di Pasku Hudiu. (Lesa  Mateo 26:26-28.) Hesus a bisa su apòstelnan ku e dos kosnan básiko akí ta representá su kurpa perfekto i su sanger ku pronto lo el a sakrifiká pa nan. E echo ku e sena nobo akí tabata asina simpel probablemente no tabata un sorpresa pa e apòstelnan. Dikon nò?

4. Ki konseho Hesus a duna Marta ku ta yuda nos komprondé dikon Hesus a hasi e Sena di Señor asina simpel?

4 Laga nos konsiderá loke a pasa algun luna promé. Durante Hesus su di tres aña di sirbishi riba tera, el a bishitá e kas di su bon amigunan, esta, Lázaro, Marta i Maria. Den e ambiente relahá ei, Hesus a kuminsá siña nan. Aunke ku Marta tabata presente, e tabata distraí pasobra e tabata prepará henter un bankete pa su invitado spesial. Ora Hesus a mira esaki, el a korigí Marta na un manera amabel i a yud’é mira ku no semper ta nesesario pa hasi henter un bankete. (Luk. 10:40-42) Un par di ora promé ku Hesus a muri, el a sigui e mesun konseho ku el a duna Marta algun luna promé. El a hasi sigur ku e Sena di Señor tabata simpel. Kiko esaki ta siña nos tokante Hesus?

5. Kiko e echo ku Hesus a instituí un sena simpel ta siña nos tokante dje, i kon Filipensenan 2:5-8 ta apoyá esaki?

5 Hesus a demostrá den tur loke el a bisa i hasi ku e tabata un persona humilde. Pues, no ta nada straño ku el a demostrá e kualidat akí riba e último anochi di su bida akí riba tera. (Mat. 11:29) Hesus tabata sa ku e tabata a punto di ofresé e sakrifisio di mas grandi den historia i ku Yehova lo a resusit’é pa hasié rei den shelu. Asina mes, e no a hala atenshon na su mes organisando un selebrashon elaborá i kompliká pa rekordá su morto. En bes di esei, el a bisa su disipelnan pa rekordá su morto un bes pa aña mediante e sena simpel akí. (Huan 13:15; 1 Kor. 11:23-25) Asina el a mustra bon kla ku e no ta un persona halsá. Ki kontentu nos ta ku un kualidat sobresaliente di nos Rei selestial ta humildat.​—Lesa Filipensenan 2:5-8.

6. Kon nos por imitá Hesus su humildat ora nos ta enfrentá prueba?

6 Un manera ku nos por imitá Hesus su humildat ta di pone interes di otro hende promé ku esun di nos mes. (Flp. 2:3, 4) Pensa atrobe riba Hesus su último anochi riba tera. Aunke Hesus tabata sa ku pronto lo e tabatin ku sufri un morto doloroso, el a preokupá mas pa e doló ku su fiel apòstelnan lo a sinti despues di su morto. Pues, el a pasa su  último anochi ta instruí, animá i konsolá nan. (Huan 14:25-31) Hesus tabata mas preokupá pa e bienestar di otro hende ku di su mes. Esta un bunita ehèmpel di humildat e ta pa nos!

HESUS TIN KURASHI

7. Kon Hesus a demostrá hopi kurashi poko despues ku el a instituí e Sena di Señor?

7 Un poko despues ku Hesus a instituí e Sena di Señor e mester a demostrá hopi kurashi. Kon asina? Hesus tabata dispuesto pa hasi e boluntat di su Tata aunke ku e tabata sa ku esei lo a enserá ser akusá di blasfemia, un akusashon ku siguramente lo a kous’é hopi tristesa, i despues ser ehekutá. (Mat. 26:65, 66; Luk. 22:41, 42) Hesus a mantené su integridat na un manera perfekto. Di e manera ei, el a onra Yehova su nòmber, apoyá Dios su soberania i habri e posibilidat pa hende ku arepentí por biba pa semper. Na mes momento, Hesus a prepará su siguidónan pa loke nan lo a enfrentá pronto.

8. (a) Kiko Hesus a bisa su fiel apòstelnan? (b) Kon Hesus su disipelnan a sigui Hesus su ehèmpel di kurashi añanan despues di su morto?

8 Hesus a demostrá kurashi tambe ora el a pone su mes preokupashonnan un banda i a enfoká riba e nesesidatnan di su fiel apòstelnan. E sena simpel ku Hesus a instituí, despues ku Hudas a bai, lo a rekordá tur esnan ku lo a bira su siguidónan ungí di e benefisionan di e sanger ku Hesus a drama i e benefisionan di ta parti di e pakto nobo. (1 Kor. 10:16, 17) Pa yuda nan keda fiel i pa nan por ta huntu kuné den shelu, Hesus a bisa su siguidónan loke tantu e komo su Tata tabata spera di nan. (Huan 15:12-15) Ademas, Hesus a bisa nan tokante e pruebanan ku nan lo tabatin ku enfrentá. Despues, el a bisa nan pa tene kurashi  meskos ku e mes a hasi. (Huan 16:33) Hopi aña despues, Hesus su disipelnan a sigui demostrá kurashi i imitá Hesus su sakrifisio propio. Nan tabata dispuesto pa sufri afin di yuda otro.​—Heb. 10:33, 34.

9. Kon nos por imitá Hesus su kurashi?

9 Awe tambe nos ta imitá Hesus su kurashi. Por ehèmpel, ta tuma kurashi pa nos yuda nos rumannan ku ta enfrentá persekushon pa motibu di nan fe. Tin biaha nan ta enkarselá nos rumannan inhustamente. Si esei sosodé, nos mester hasi tur loke nos por pa yuda nan i defendé nan. (Flp. 1:14; Heb. 13:19) Un otro manera ku nos por imitá Hesus su kurashi ta di sigui prediká. (Echo. 14:3) Meskos ku Hesus, nos ta determiná pa sigui prediká e mensahe di Reino aunke nos haña nos ku oposishon i persekushon. Pero kiko nos por hasi si nos ta sinti ku nos falta kurashi?

10. Kiko nos por hasi den e simannan promé ku Memorial, i dikon?

10 Nos por haña mas kurashi si nos ta meditá riba e speransa ku e sakrifisio di reskate di Hesus ta hasi posibel pa nos. (Huan 3:16; Efe. 1:7) Den e simannan promé ku Memorial, nos tin bon oportunidat pa oumentá nos apresio pa e reskate. Durante e dianan ei, nos por sigui e lesamentu di Beibel pa Memorial i meditá riba e susesonan ku a hiba na Hesus su morto. Anto ora nos reuní pa selebrá e Sena di Señor, nos lo haña un mihó komprondementu di loke e pan i e biña ta simbolisá i di e sakrifisio úniko ku nan ta representá. Ora nos komprondé kiko Hesus i Yehova a hasi pa nos i kon esei ta benefisiá nos i nos sernan kerí, esei lo fortalesé nos speransa pa futuro i nos lo sinti nos motivá pa perseverá ku kurashi te na fin.​—Heb. 12:3.

11-12. Kiko nos a siña te asina leu?

 11 Te asina leu, nos a mira ku e Sena di Señor no solamente ta rekordá nos di e balor di e reskate, sino tambe di Hesus su humildat i kurashi. Nos ta masha gradisidu ku Hesus ta sigui desplegá e kualidatnan akí komo nos Sumo Saserdote den shelu, kende ta hasi súplika na nos fabor. (Heb. 7:24, 25) Pa mustra nos apresio sinsero, nos mester konmemorá Hesus su morto presis manera el a pidi nos hasi. (Luk. 22:19, 20) Nos ta hasi esaki riba e dia ku ta korespondé ku 14 di Nisan, e fecha di mas importante di henter e aña.

12 E manera simpel ku Hesus a selebrá e Sena di Señor ta resaltá un otro kualidat di Hesus. E kualidat akí a motiv’é pa muri pa nos. Tempu ku Hesus tabata riba tera, e tabata konosí pa e kualidat akí. Ki kualidat esaki tabata?

HESUS TA AMOROSO

13. Kon Huan 15:9 i 1 Huan 4:8-10 ta deskribí e amor ku Yehova i Hesus a demostrá, i ken ta benefisiá di nan amor?

13 Den tur loke Hesus a hasi, el a reflehá perfektamente Yehova su amor profundo pa nos. (Lesa Huan 15:9; 1 Huan 4:8-10.) Mas importante ainda, amor a motivá Hesus pa sakrifiká su bida pa nos. Sea ku nos ta ungí òf di e ‘otro karnénan,’ nos ta benefisiá di e amor ku Yehova i su Yu a demostrá na nos pa medio di e sakrifisio ei. (Huan 10:16; 1 Huan 2:2) Pensa tambe riba e dos kosnan ku Hesus a usa na e Sena di Señor. Eseinan ta mustra Hesus su amor i konsiderashon pa su disipelnan. Kon asina?

Amorosamente Hesus a instituí un seremonia simpel ku su sirbidónan por a selebrá pa vários siglo i te den nos tempu bou di diferente sirkunstansia (Wak paragraf 14-16) *

14. Kon Hesus a demostrá amor pa su disipelnan?

14 Hesus a demostrá amor pa su siguidónan ungí ora el a instituí un sena simpel pa nan selebrá i no algu kompliká. Tur aña e disipelnan ungí mester a konmemorá Hesus su morto. Nan mester a hasi esei bou di vários sirkunstansia, inkluso enkarselashon. (Rev. 2:10) Tabata posibel pa nan obedesé Hesus su instrukshon? Sigur ku sí!

15-16. Kiko algun ruman a hasi pa konmemorá e morto di Hesus, asta bou di sirkunstansia difísil?

15 E kristiannan berdadero semper a hasi tur loke nan tabata por pa konmemorá e morto di Hesus, i nan ta sigui hasi esei. Nan ta purba di sigui e instrukshonnan enkuanto e Sena di Señor lo mihó posibel, tin ora asta bou di sirkunstansia difísil. Tuma por ehèmpel Ruman Harold King. Komo ku e tabata será su so den kashòt na China, e mester tabata kreativo pa por a konmemorá e morto di Hesus. Usando loke tabata disponibel, Ruman King a prepará e emblemanan di Memorial sin ku ningun hende a ripará. Ademas, el a kalkulá e fecha di Memorial lo mihó ku e tabata por. Ora e momento a yega pa e konmemorashon, su so a kanta, hasi orashon i duna un diskurso bíbliko.

16 Laga nos wak un otro ehèmpel. Un grupo di ruman muhé ku tabata den un kampo di konsentrashon durante Segundo Guera Mundial a riska nan bida pa konmemorá e Sena di Señor. Sinembargo, komo ku e kosnan ku ta nesesario pa hasi e sena akí ta asina simpel, nan por a konmemorá Hesus su morto sin ku ningun hende a ripará. E rumannan a bisa: “Nos a para banda di otro rònt di un banki ku un paña blanku riba dje. Riba e paña blanku ei, nos a pone e pan ku e biña. Nos a usa un bela komo lus pasobra nos tabatin miedu ku un pera di lus lo a hala atenshon di hende. . . . Nos a renobá nos promesa ferviente na Yehova pa usa tur nos forsa pa vindiká su  santu nòmber.” E rumannan akí a demostrá fe ekstraordinario! Sin duda e echo ku Hesus a instituí un sena asina simpel ta un muestra di su amor. Dikon? Pasobra esei ta permití nos konmemorá su morto asta bou di sirkunstansia difísil!

17. Menshoná algun pregunta ku nos por hasi nos mes.

17 Segun ku e fecha di Memorial ta yega serka, lo ta bon pa nos hasi nos mes e siguiente preguntanan: ‘Kon mi por imitá Hesus su amor mas tantu ainda? Mi ta pone e nesesidatnan di mi rumannan promé ku mi mes nesesidatnan? Mi ta spera demasiado for di mi rumannan òf mi ta konsiente di nan limitashonnan?’ Laga nos semper imitá Hesus i mustra ku nos tin empatia pa otro.​—1 Ped. 3:8.

NO LUBIDÁ E LÈSNAN AKÍ

18-19. (a) Di kiko nos por tin sigur? (b) Kiko bo ta determiná pa hasi?

18 Denter di poko tempu, lo no ta nesesario mas pa nos konmemorá e morto di Kristu. Ora Hesus “yega” durante e tribulashon grandi, lo e reuní e restu di “su skohínan” pa bai shelu. For di e momento ei, lo stòp di tene Memorial.—1 Kor. 11:26; Mat. 24:31.

19 Nos por tin sigur ku asta despues ku nos stòp di konmemorá e morto di Hesus, Yehova su pueblo lo tin grato rekuerdo di e sena simpel akí i di e lèsnan ku nan a siña for di Hesus tokante humildat, kurashi i amor. Sin duda, tur hende ku a yega di asistí na e sena ekstraordinario akí lo sigui papia di dje pa benefisiá tur esnan ku ta na bida e tempu ei. Pero, pa nos por benefisiá awor di e sena akí, nos mester ta determiná pa imitá Hesus su humildat, kurashi i amor. Si nos hasi esei, nos por tin konfiansa ku nos lo risibí nos rekompensa for di Yehova.​—2 Ped. 1:10, 11.

KANTIKA 13 Kristu, Nos Ehèmpel

^ par. 5 Pronto nos lo asistí na e Sena di Señor pa konmemorá e morto di Hesukristu. E sena simpel akí ta siña nos hopi di Hesus su humildat, kurashi i amor. Den e artíkulo akí, nos lo mira kon nos por imitá e bunita kualidatnan ku Hesus a desplegá.

^ par. 2 SPLIKASHON: E palabra konmemorá ta nifiká hasi algu spesial pa rekordá i duna onor na un persona òf evento importante.

^ par. 56 DESKRIPSHON DI PLACHI: Algun ehèmpel di ruman fiel ku ta konmemorá e morto di Hesus den diferente tempu i bou di diferente sirkunstansia: den promé siglo; rònt di aña 1880; den un kampo di konsentrashon nazi; i den nos tempu na un Salòn di Reino modesto na aire liber den un klima kalor na Suramérika.