Bai na kontenido

Bai na kontenido

 ARTÍKULO DI ESTUDIO 32

Laga Boso Amor Krese

Laga Boso Amor Krese

“Esaki ta loke mi ta sigui pidi den orashon: pa boso amor por krese mas i mas.”—FLP. 1:9.

KANTIKA 106 Kultivá Amor

UN BISTA ADELANTÁ *

1. Ken a forma e kongregashon na Filipo?

ORA apòstel Pablo, Sílas, Lukas i Timoteo a yega e kolonia romano Filipo, nan a haña hopi hende ku tabata interesá den e mensahe di Reino. E kuater rumannan zeloso ei a forma un kongregashon. I tur e disipelnan a kuminsá reuní huntu, probablemente na kas di un ruman masha hospitalario ku yama Lidia.—Echo. 16:40.

2. Ki difikultat e kongregashon ei a enfrentá despues di poko tempu?

2 Despues di poko tempu, e kongregashon resien formá ei a kuminsá hañ’é ku difikultat. Satanas a pone hende ku tabata odia e bèrdat oponé e predikashon di Pablo i su kompañeronan. Nan a arestá Pablo i Sílas, suta nan ku bara i sera nan den prizòn. Ora nan a sali for di prizòn, nan a bai bishitá e disipelnan nobo pa animá nan. Despues, Pablo, Sílas i Timoteo a bandoná e stat, pero Lukas aparentemente sí a keda. Kon e rumannan den e kongregashon resien formá a trata ku e difikultatnan ei? Ku yudansa di spiritu santu, nan a sigui sirbi Yehova. (Flp. 2:12) Pablo tabatin bon motibu pa ta orguyoso di nan!

3. Segun Filipensenan 1:9-11, kiko Pablo a pidi Yehova?

3 Mas o ménos dies aña despues, Pablo a skirbi un karta pa e kongregashon na Filipo. Segun ku bo ta lesa e karta ei, bo por mira kuantu Pablo a stima su rumannan. El a skirbi: “Mi tin masha gana di mira boso i . . . mi tin e mesun tierno kariño pa boso ku Kristu Hesus tin.” (Flp. 1:8) El a skirbi ku el a hasi orashon pa nan. El a pidi Yehova  pa yuda nan amor krese, pa nan por sigui hasi sigur kiko ta e kosnan mas importante, pa nan ta sin defekto, pa nan no pone otro trompeká i pa nan sigui karga fruta hustu. Awe, nos por siña hopi for di Pablo su palabranan sinsero. (Lesa Filipensenan 1:9-11.) Den e artíkulo akí, nos lo analisá algun punto ku el a menshoná, i nos lo wak kon nos por apliká kada un di nan.

KRESE DEN AMOR

4. (a) Segun 1 Huan 4:9 i 10, kon Yehova a proba ku e ta stima nos? (b) Kon nos mester stima Dios?

4 Yehova ta stima nos hopi. E prueba di mas grandi di esei ta ora el a manda su Yu na mundu pa muri pa nos pikánan. (Lesa 1 Huan 4:9, 10.) Dios su amor pa nos ta pone ku nos ta stim’é. (Rom. 5:8) Kon nos mester stima Dios? Hesus a kontestá e pregunta ei ora el a bisa un fariseo: “Stima Yehova bo Dios ku henter bo kurason, ku henter bo alma i ku henter bo mente.” (Mat. 22:36, 37) Nos kurason no por ta dividí. Nos ke pa tur dia nos amor pa Dios bira mas fuerte. Pablo a bisa e filipensenan ku nan amor mester “krese mas i mas.” Kiko nos por hasi pa nos amor pa Dios sigui krese?

5. Kon nos amor pa Dios por bira mas fuerte?

5 Pa nos stima Dios, nos mester konos’é. Beibel ta bisa: “Ken ku no ta stima no a siña konosé Dios, pasobra Dios ta amor.” (1 Huan 4:8) Apòstel Pablo a splika ku nos amor pa Dios lo bira mas fuerte segun ku nos ta gana “konosementu eksakto i pleno disernimentu” di Dios. (Flp. 1:9) Ora nos a kuminsá studia Beibel, nos a kuminsá stima Yehova aunke nos no tabata sa tur kos di dje. Segun ku nos tabata siña di Yehova, nos amor p’e a bira mas fuerte. Ta p’esei ta asina importante pa nos studia Beibel regularmente i meditá riba loke nos ta lesa.—Flp. 2:16.

6. Segun 1 Huan 4:11, 20 i 21, ken tambe nos tin ku stima?

6 Dios su gran amor pa nos lo motivá nos pa stima nos rumannan. (Lesa 1 Huan 4:11, 20, 21.) Kisas nos ta pensa ku esei ta bini di mes. Al fin i al kabo, nos ta adorá Yehova i ta hasi esfuerso pa imitá su bunita kualidatnan. I nos ta imitá Hesus, kende su amor tabata asina grandi ku el a duna su bida pa nos. Pero en realidat, no ta tur biaha ta fásil pa obedesé e mandamentu di stima otro. Laga nos wak un ehèmpel den e kongregashon na Filipo.

7. Kiko nos ta siña for di e konseho ku Pablo a duna Evodia i Síntike?

7 Evodia i Síntike tabata dos ruman zeloso ku a sirbi “lado a lado” ku apòstel Pablo. Pero nan amistat a kibra, kisas pa motibu di un desakuerdo. Den Pablo su karta, el a menshoná Evodia i Síntike pa nòmber i a konsehá nan pa “ta di e mesun mente.” (Flp. 4:2, 3) Pablo a mira tambe ku ta nesesario pa bisa henter e kongregashon: “Sigui hasi tur kos sin murmurá i sin pleita.” (Flp. 2:14) Sin duda, e konsehonan direkto ei di Pablo a yuda tantu e dos ruman muhénan fiel ei komo henter e kongregashon pa stima otro mas.

Dikon nos mester enfoká riba e bon kualidatnan di nos rumannan? (Wak paragraf 8) *

8. (a) Kiko por pone ku ta difísil pa stima nos rumannan? (b) Si bo haña bo ku un situashon asina, kiko por yuda bo?

8 Meskos ku a pasa ku Evodia i Síntike, e tendensia di enfoká riba fayo por pone ku ta difísil pa nos stima nos rumannan.  Nos tur ta faya tur dia. Si nos enfoká riba e fayonan di nos rumannan, nos amor pa nan lo fria. Ban bisa ku un ruman ta lubidá di yuda nos ku limpiesa di Salòn. Esei por pone nos kunsumí. Anto, si nos kuminsá kòrda riba tur su otro fayonan, mas nos lo kunsumí i mas nos amor p’e lo fria. Si bo haña bo ku un situashon asina, pensa riba esaki: Yehova ta mira nos fayonan i tambe esnan di nos rumannan, tòg e ta sigui stima nos tur. Pa e motibu ei, nos mester imitá Yehova su amor i enfoká riba e bon kualidatnan di nos rumannan. Ora nos ta hasi esfuerso pa stima nos rumannan, nos ta bira mas uní.—Flp. 2:1, 2.

“E KOSNAN MAS IMPORTANTE”

9. Kua ta algun di “e kosnan mas importante” ku Pablo a menshoná den su karta na e filipensenan?

9 Spiritu santu a inspirá Pablo pa bisa e kristiannan na Filipo—i tur kristian—pa “sigui hasi sigur kiko ta e kosnan mas importante.” (Flp. 1:10) Entre e kosnan importante ei tin santifikashon di Yehova su nòmber, kumplimentu di su propósito i pas i union den kongregashon. (Mat. 6:9, 10; Huan 13:35) Ora nos bida ta drei rònt di e kosnan ei, nos ta proba ku nos ta stima Yehova.

10. Kiko nos tin ku hasi pa Yehova konsiderá nos sin defekto?

10 Pablo a bisa tambe ku nos mester “ta sin defekto.” Esei no ke men ku nos mester ta perfekto, pasobra nos no por ta perfekto den e mesun sentido ku Yehova Dios ta perfekto. Pero, Yehova lo konsiderá nos sin defekto si nos ta hasi nos esfuerso pa oumentá nos amor i sigui hasi sigur kiko ta e kosnan mas importante. Un manera ku nos por mustra nos amor ta di hasi tur nos esfuerso pa no pone nos rumannan trompeká.

11. Dikon nos mester evitá di pone nos rumannan trompeká?

11 E atvertensia pa evitá di pone otro trompeká ta masha serio. Nos eskoho di entretenimentu, bistimentu òf asta nos empleo por pone un ruman trompeká. Kisas nos no ta hasi nada malu. Pero, si nos eskoho ta molestiá konsenshi di un ruman i ta debilitá su fe, esei ta algu masha serio. Hesus a bisa ku lo ta mihó pa nos si nan mara un piedra pisá na nos garganta i benta nos den laman ku pone un di su karnénan trompeká.—Mat. 18:6.

12. Kiko nos ta siña for di e ehèmpel di un pareha pionero?

12 Kon un pareha pionero a apliká loke Hesus a bisa? Den nan kongregashon tabatin un pareha resien batisá kende a lanta den un famia masha strèn. E pareha ei tabata haña ku un kristian no mag di bai sine, ni si e pelíkula ta sano. Nan a keda di shòk ora nan a tende ku e pareha pionero a bai wak un pelíkula. Despues di esei, e pareha pionero a disidí di no bai sine te ora e pareha resien batisá a entrená nan konsenshi i bira mas balansá. (Heb. 5:14) Asina e pareha pionero a demostrá ku nan a stima nan rumannan nobo no ku palabra so, ma ku echo.—Rom. 14:19-21; 1 Huan 3:18.

13. Kon nos por pone un ruman peka?

13 Un otro manera ku nos por laga un ruman trompeká ta si nos pon’é peka. Kon esei por pasa? Imaginá ku un studiante di Beibel, despues di a lucha duru i largu, a logra vense su adikshon na alkohòl. El a bin realisá ku e tin ku keda leu for di alkohòl. El a hasi hopi kambio  den su bida i a batisá. Awor, un dia un ruman ta invitá e i algun otro ruman na su kas. Sin niun mal intenshon, e ruman ta ofres’é un bibida alkohóliko i ta bis’é: “Bo ta batisá awor, Yehova ta duna bo forsa pa medio di su spiritu santu. Anto bo sa, un aspekto di su spiritu santu ta dominio propio. Si bo tiné, bo mester por bebe maske ta un tiki.” Djis imaginá e konsekuensianan si e ruman nobo ei bai tras di e mal konseho ei!

14. Kon nos reunionnan ta yuda nos apliká e instrukshonnan na Filipensenan 1:10?

14 Nos reunionnan ta yuda nos apliká e instrukshonnan na Filipensenan 1:10 den vários manera. Promé, nos reunionnan ta rekordá nos kiko ta loke Yehova ta haña ta e kosnan di mas importante. Di dos, nan ta siña nos apliká loke nos ta siña pa asina nos ta sin defekto. I di tres, nan ta motivá nos “pa mustra amor i hasi bon obra.” (Heb. 10:24, 25) Mas animashon nos haña di nos rumannan, mas nos ta stima nan i nos Dios. Si nos ta stima Dios i nos rumannan ku henter nos kurason, nos lo hasi nos máksimo esfuerso pa evitá di pone un ruman trompeká.

SIGUI “KARGA FRUTA HUSTU NA ABUNDANSIA”

15. Kiko ke men “karga fruta hustu na abundansia”?

15 Den Pablo su orashon, el a pidi pa e filipensenan por “karga fruta hustu na  abundansia.” (Flp. 1:11) Sin duda, e “fruta hustu” ei a enserá nan amor pa Yehova i su pueblo. Esei tambe a enserá papia ku otro hende tokante nan fe den Hesus i nan speransa maravioso. Ademas, Pablo a bisa ku nan mester a “bria komo kargadó di lus den mundu.” (Flp. 2:15) E komparashon ei ta na su lugá, ya ku Hesus a yama su disipelnan “e lus di mundu.” (Mat. 5:14-16) El a manda su siguidónan tambe pa ‘hasi disipel,’ i el a bisa ku nan lo ta “testigunan . . . te na e parti mas leu di tera.” (Mat. 28:18-20; Echo. 1:8) Nos ta produsí “fruta hustu,” òf “karga fruta hustu,” ora nos ta hasi tur nos esfuerso den e trabou importante ei.

Ora Pablo a skirbi e karta pa e kongregashon na Filipo, e tabata prezu den su kas na Roma. El a hasi uso di kada oportunidat pa prediká na e guardianan i na e bishitantenan (Wak paragraf 16)

16. Kon Filipensenan 1:12-14 ta mustra ku nos por bria komo kargadó di lus asta den situashon difísil? (Wak e plachi riba portada.)

16 Den tur tipo di situashon, nos por bria komo kargadó di lus. Tin biaha, loke por parse di ta un opstákulo pa prediká por bira un oportunidat pa papia di e bon notisia. Esei tabata e kaso ku apòstel Pablo. Ora el a skirbi e karta pa e kongregashon na Filipo, e tabata prezu den su kas na Roma. Asina mes, e no a laga su kadenanan strob’é di prediká na e guardianan i na e bishitantenan. Su ehèmpel a duna e rumannan konfiansa i kurashi pa “papia e palabra di Dios sin miedu.”—Lesa Filipensenan 1:12-14; 4:22.

Hasi tur bo esfuerso pa prediká na otro hende (Wak paragraf 17) *

17. Kon algun ruman a sigui prediká asta ora esei tabata difísil?

17 Hopi ruman tin e oportunidat pa demostrá e mesun kurashi ku Pablo. Nan ta biba den un pais unda nos obra ta restringí, pues nan ta inventá otro manera pa prediká e bon notisia. (Mat. 10:16-20) Den un di e paisnan ei, un superintendente  di sirkuito a sugerí pa kada publikadó prediká den su mes “teritorio”: na su famia, bisiña, kompañero di skol, kolega di trabou i konosí. Den dos aña, e kantidat di kongregashon den e sirkuito ei a oumentá drástikamente. Aunke kisas nos por prediká libremente, nos por siña un lès balioso for di e rumannan kreativo ei. Semper nos mester buska manera pa partisipá plenamente den e trabou di prediká, ku e konfiansa ku Yehova lo duna nos e forsa ku nos mester pa vense kualke opstákulo.—Flp. 2:13.

18. Kiko mester ta nos determinashon?

18 Awor mas ku nunka, nos mester ta determiná pa apliká e konsehonan den Pablo su karta na e filipensenan. Nos mester sigui hasi sigur kiko ta e kosnan mas importante, hasi esfuerso pa ta sin defekto, evitá di pone otro trompeká i karga fruta hustu. E ora ei, nos amor lo krese i nos lo onra nos Tata amoroso, Yehova.

KANTIKA 17 ‘Mi Ke, Sí’

^ par. 5 Awor mas ku nunka, nos mester fortalesé nos amor pa nos rumannan. E karta ku Pablo a skirbi na e filipensenan ta mustra kon nos por krese den amor, asta ora esei no ta fásil.

^ par. 54 DESKRIPSHON DI PLACHI: Durante limpiesa di Salòn, Joe ta para papia ku un ruman hòmber i su yu. Esei ta kunsumí Mike, e ruman ku ta stòfzùig. E ta haña ku ‘Joe mester stòp di papia anto traha.’ Despues, Mike ta mira kon Joe amablemente ta yuda un ruman muhé di edat. Loke ku Mike a mira ei ta lag’é enfoká riba e bon kualidatnan di Joe.

^ par. 58 DESKRIPSHON DI PLACHI: Den un pais unda e obra di Testigunan ta restringí, un ruman na un manera diskreto ta papia ku un konosí tokante e mensahe di Reino. Mas despues, durante pousa na trabou, e ruman ta prediká na un kolega.