Bai na kontenido

Bai na kontenido

Fe​—⁠Un Kualidat Ku Ta Fortalesé Nos

Fe​—⁠Un Kualidat Ku Ta Fortalesé Nos

FE TA duna nos poder ekstraordinario. Por ehèmpel, aunke Satanas ke destruí nos amistat ku Yehova, fe ta yuda nos “paga tur e flechanan sendí di e Malbado.” (Efe. 6:16) Si nos tin fe, nos por enfrentá problema ku por parse un seru grandi. Hesus a bisa su disipelnan: “Si boso fe ta djis e tamaño di un pipita di mòster, boso lo bisa e seru akí: ‘Kita for di aki, bai aya,’ i lo e kita.” (Mat. 17:20) Debí ku fe por hasi nos amistat ku Yehova mas fuerte, nos mester pensa riba e preguntanan akí: Kiko ta fe? Ki relashon tin entre nos kondishon di kurason i nos fe? Kon nos por fortalesé nos fe? I den ken nos mester pone fe?—Rom. 4:3.

KIKO TA FE?

Fe ta enserá mas ku djis kere ku loke Beibel ta bisa ta bèrdat. Al fin i al kabo, asta e demoñonan “ta kere [ku Dios ta eksistí], i nan ta tembla di miedu.” (Sant. 2:19) Pero e ora ei, kiko ta fe?

Meskos ku nos ta konfia ku semper lo tin dia i anochi, nos por konfia ku loke ku Dios ta bisa semper lo kumpli

Beibel ta mustra ku fe tin dos aspekto. Promé, “fe ta e konfiansa firme ku hende tin ku loke nan ta spera ariba lo keda realisá.” (Heb. 11:1a) Si bo tin fe, bo ta kere firmemente ku tur loke Yehova ta bisa ta bèrdat i lo kumpli. Por ehèmpel, Yehova a bisa e israelitanan: “Si boso por kibra mi aliansa ku dia, i mi aliansa ku anochi, asina ku lo no tin dia i anochi na nan tempu stipulá, anto por kibra tambe mi aliansa ku mi tin ku mi sirbidó David.” (Yer. 33:20, 21) Bo a yega di tin miedu ku solo ta keda sin sali òf baha, di manera ku no tin dia ni anochi mas? Di mes ku no. Si bo tin sigur ku solo lo sali i baha tur dia, lo bo duda ku e Kreador di tur e kosnan ei lo kumpli ku su palabra?—Isa. 55:10, 11; Mat. 5:18.

Di dos, fe ta “e demostrashon kla di realidatnan ku [hende] no ta mira.” Beibel ta bisa ku fe ta “e demostrashon kla,” òf “evidensia konvinsente,” di kos ku ta invisibel, ma ku ta real. (Heb. 11:1b; nota) Kon asina? Suponé ku un mucha puntra bo: ‘Kon bo por sa ku bientu ta eksistí?’ Aunke nunka bo a mira bientu, bo por rasoná ku e mucha riba e kosnan ku ta duna evidensia ku bientu ta eksistí, manera, e echo ku bo por tend’é i mira e blachinan di palu move. E evidensianan ei por yuda e mucha aseptá ku bientu di bèrdat ta eksistí aunke e ta invisibel. Meskos tambe, fe ta basá riba evidensia konvinsente.—Rom. 1:20.

UN BON KONDISHON DI KURASON TA NESESARIO

Fe ta basá riba evidensia. Pues, pa un hende tin fe, promé e mester haña “un konosementu eksakto di e bèrdat.” (1 Tim. 2:4) Pero, konosementu so no ta sufisiente. Apòstel Pablo a skirbi: “Den bo kurason bo mester tin fe.” (Rom. 10:10) Un hende no mester djis kere e bèrdat, ma e mester balor’é tambe. Ta e ora ei so lo e ta motivá pa demostrá su fe, esta, pa biba na armonia ku  e bèrdat. (Sant. 2:20) Un hende ku no tin un apresio sinsero pa e bèrdat por rechasá asta e evidensianan di mas konvinsente si e ta nenga di kambia su manera di pensa òf ta buska èksküs pa hasi loke e ke. (2 Ped. 3:3, 4; Hudas 18) Ta p’esei den tempu bíbliko, no ta tur hende ku a mira milager a kultivá fe. (Num. 14:11; Huan 12:37) Dios su spiritu santu ta produsí fe solamente den kurason di esnan ku ta stima bèrdat i odia mentira.—Gal. 5:22; 2 Tes. 2:10, 11.

KON DAVID A KULTIVÁ FE FUERTE?

David tabata un di esnan ku tabatin fe fuerte. (Heb. 11:32, 33) Pero, no ta tur hende den su famia tabatin fe asina ei. Por ehèmpel, pensa riba David su ruman mayó, Eliab. Ora Goliat a reta Israel, David a rabia mashá. Eliab a skual David pa esei, i loke Eliab a hasi a demostrá ku e no a pone fe den Yehova. (1 Sam. 17:26-28) Nos niun no ta nase ku fe òf ta heredá esei for di nos mayornan. Pues, e echo ku David tabatin fe ta pasobra e tabatin un amistat ku Dios.

Salmo 27 ta revelá kon David a haña fe fuerte. (Vs. 1) David a meditá riba su eksperensianan di pasado i kon Yehova a proteh’é kontra su atversarionan. (Vs. 2, 3) Di kurason el a apresiá Yehova su tèmpel. (Vs. 4) David a adorá Dios huntu ku otro adoradó na e tabernakel. (Vs. 6) El a hasi orashon sinsero na Yehova. (Vs. 7, 8) Tambe David tabata ke pa Yehova siñ’é su kamindanan. (Vs. 11) Fe tabata asina importante pa David ku el a bisa ku sin fe lo e no por a perseverá.—Vs. 13.

KON PA FORTALESÉ BO FE

Bo por tin e mesun fe ku David tabatin. Djis imitá loke el a menshoná na Salmo 27. Komo ku fe ta basá riba konosementu eksakto, ta importante pa bo studia Beibel i nos publikashonnan. Mas bo studia, mas fásil lo ta pa produsí e aspekto ei di e fruta di spiritu. (Sal. 1:2, 3) Ora bo ta studia, tuma tempu pa meditá. Nos por kompará meditashon ku e tera den kua apresio ta krese. Sí, mas bo meditá, mas bo apresio pa Yehova ta krese. Segun ku bo apresio pa Yehova ta krese, bo ta haña mas gana di ador’é na e reunionnan i pa kompartí bo speransa ku otro hende. (Heb. 10:23-25) Un otro manera ku bo ta demostrá bo fe ta di “hasi orashon sin entregá.” (Luk. 18:1-8) P’esei, “hasi orashon konstantemente” na Yehova i konfia ku “e ta interesá den [bo].” (1 Tes. 5:17; 1 Ped. 5:7) Fe ta motivá bo na obra, i na su turno, bo obranan ta fortalesé bo fe.—Sant. 2:22.

PONE FE DEN HESUS

E anochi promé ku Hesus a muri, el a bisa su disipelnan: “Pone fe den Dios; pone fe  den mi tambe.” (Huan 14:1) Pues, nos mester pone fe no solamente den Yehova pero den Hesus tambe. Kon bo por pone fe den Hesus? Laga nos wak tres manera.

Kiko ke men pone fe den Hesus?

Promé, mira e reskate komo un regalo di Dios pa abo. Apòstel Pablo a bisa: “Mi ta [biba] pa medio di fe den e Yu di Dios, kende a stima mi i a entregá su mes pa mi.” (Gal. 2:20) Ora bo pone fe den Hesus, di bèrdat bo ta kere ku e reskate ta pa abo, ku pa medio di dje abo ta haña pordon di bo pikánan, ku e ta duna abo e speransa pa biba pa semper i ku e ta e prueba di mas grandi di Yehova su amor pa abo. (Rom. 8:32, 38, 39; Efe. 1:7) Esei lo duna bo forsa pa kore ku sintimentu di kulpa i otro sintimentu negativo.—2 Tes. 2:16, 17.

Di dos, hala serka Yehova pa medio di orashon. Esei ta posibel pasobra Hesus a muri pa nos. Mediante e reskate, nos por hasi orashon na Yehova “ku frankesa, pa nos por haña miserikòrdia i risibí bondat inmeresí pa yuda nos na e momento apropiá.” (Heb. 4:15, 16; 10:19-22) Orashon ta fortalesé nos determinashon pa resistí e tentashon di peka.—Luk. 22:40.

Di tres, obedesé Hesus. Apòstel Huan a skirbi: “Esun ku pone fe den e Yu lo haña bida eterno; esun ku desobedesé e Yu lo no haña bida, ma e rabia di Dios ta keda riba dje.” (Huan 3:36) Ripará kon Huan a hasi kontraste entre pone fe ku sea desobediente. Pues, ora bo obedesé Hesus bo ta poniendo fe den dje. Bo ta obedesé Hesus ora bo ta sigui “lei di Kristu,” esta, tur loke el a siña i manda hende hasi. (Gal. 6:2) Bo ta obedesé Hesus tambe ora bo ta sigui e guia ku e ta duna pa medio di “e esklabo fiel i prudente.” (Mat. 24:45) Si bo obedesé Hesus, lo bo tin e forsa pa soportá difikultat i problema ku por parse tormenta fuerte.—Luk. 6:47, 48.

“FORTALESÉ BOSO SANTÍSIMO FE”

Un biaha, un hòmber a bisa Hesus: “Mi tin fe! Yuda mi kaminda mi falta fe!” (Mar. 9:24) E hòmber ei tabatin un grado di fe, pero e tabata modesto i a rekonosé ku e tabatin mester di mas fe. Meskos kuné, nos tur na un momento den nos bida lo tin mester di mas fe. I nos tur por fortalesé nos fe for di awor. Manera nos a mira, nos por fortalesé nos fe ora nos ta studia Beibel i meditá riba loke nos a lesa. Esei lo oumentá nos apresio pa Yehova. Tambe, nos fe lo bira mas fuerte ora nos, huntu ku nos rumannan kristian, adorá Yehova, kompartí nos speransa ku otro hende i perseverá den orashon. Ademas, ora nos fortalesé nos fe, nos lo haña e rekompensa di mas grandi ku por tin. Beibel ta animá nos: “Rumannan stimá, fortalesé boso santísimo fe . . . pa asina boso por keda den e amor di Dios.”—Hudas 20, 21.