Bai na kontenido

Bai na kontenido

 ARTÍKULO DI ESTUDIO 20

Kon pa Duna Konsuelo na Víktima di Abusu Seksual?

Kon pa Duna Konsuelo na Víktima di Abusu Seksual?

‘E Dios di tur konsuelo ta konsolá nos den tur nos tribulashonnan.’—2 KOR. 1:3, 4.

KANTIKA 134 Yu Ta un Herensia di Dios

UN BISTA ADELANTÁ *

1-2. (a) Duna un ehèmpel ku ta mustra ku tur hende ta nase ku e nesesidat pa haña konsuelo i e abilidat pa duna konsuelo. (b) Ki daño algun mucha ta sufri?

TUR hende ta nase ku e nesesidat pa haña konsuelo i e maravioso abilidat pa duna konsuelo. Por ehèmpel, ora un mucha chikitu ta kore hunga i e kai raspa su rudia, ku awa na wowo e ta kore bai serka mama. Aunke e mama no por kura e herida, e por konsolá e yu sí. E ta puntr’é kiko a pasa, seka su wowo, bras’é i kisas pone remedi òf un pleister riba e herida. No ta dura muchu, ku e mucha ta stòp di yora i ta sigui hunga. Ku tempu, e herida lo kura.

2 Pero tin biaha, algun mucha ta sufri daño hopi mas pió. Tin di nan ta ser abusá seksualmente. E abusu por a sosodé un biaha so òf vários biaha durante transkurso di hopi aña. Sea kual sea e kaso, abusu seksual ta kousa nan hopi daño i doló emoshonal. Tin biaha hende ku abusá di mucha ta haña kastigu i ta bai será. Otro biaha por parse ku nunka nan no ta haña kastigu. Pero, aunke nan haña kastigu mesora, e víktima ta sigui sufri asta ora e bira adulto.

3. (a) Manera 2 Korintionan 1:3 i 4 ta mustra, kiko Yehova ke? (b) Ki pregunta nos lo analisá?

3 Si un ruman den kongregashon tabata víktima di abusu seksual na mucha i ainda ta lucha ku doló emoshonal, kiko por yud’é? (Lesa 2 Korintionan 1:3, 4.) Ta klaru ku Yehova ke pa su karnénan haña e amor i konsuelo ku  nan mester. Pues, laga nos analisá tres pregunta: (1) Dikon víktima di abusu seksual na mucha mester di konsuelo? (2) Ken por duna nan e konsuelo ku nan mester? (3) Kon nos por konsolá nan?

DIKON NAN MESTER DI KONSUELO?

4-5. (a) Dikon ta importante pa realisá ku mucha ta kompletamente diferente for di adulto? (b) Kiko ta pasa ora un hende ku e mucha ta konfia abusá di dje seksualmente?

4 Algun persona ku na mucha tabata víktima di abusu seksual ainda mester di konsuelo aunke hopi aña a pasa. Dikon? Pa di promé, nos mester realisá ku mucha ta kompletamente diferente for di adulto. E manera ku abusu seksual ta afektá un mucha ta diferente for di un adulto. Kon asina?

5 Mucha mester sinti ku nan por konfia esnan ku ta kria i kuida nan. Esei ta laga nan sinti nan safe i nan lo siña konfia hende ku ta stima nan. Lamentablemente, hopi biaha abusu seksual ta pasa na kas di e mucha i esun ku ta abusá di dje ta un famia òf un konosí. Ora un hende ku e mucha ta konfia abusá di dje, ta bira hopi difísil pa e mucha konfia otro hende i e sintimentu ei por dura pa hopi aña.

6. Dikon abusu seksual di mucha ta kruel i ta hasi nan daño?

6 Mucha no por protehá nan mes. Abusu seksual di mucha ta kruel i ta hasi nan daño. Un mucha no ta kla den sentido físiko, emoshonal ni mental pa tene relashon seksual. Si un hende oblig’é pa hasi esei tòg, esei por kousa basta daño den e mucha su bida. E abusu por pone ku e mucha ta haña un punto di bista robes di sèks, di su mes i di kualke un hende ku ke sera un amistat kuné.

7. (a) Dikon ta hopi fásil pa hende usa astusia pa gaña i abusá seksualmente di un mucha, i kon e por logra esei? (b) Kiko por ta e resultado di e mentiranan ei?

7 Mucha no tin e kapasidat ainda pa analisá situashon, tuma desishon òf rekonosé i evitá peliger. (1 Kor. 13:11) Pues, ta hopi fásil pa hende usa astusia pa gaña i abusá seksualmente di un mucha. Nan ta gaña e mucha diferente kos: ku ta su falta ku e abusu a tuma lugá, ku e no mester bisa niun hende di e abusu, ku niun hende lo no bai ker’é òf yud’é si e bisa algu òf ku akto seksual ta e manera ku adulto i mucha ta mustra ku nan stima otro. Lo tuma e víktima hopi aña pa komprondé ku tur loke ku e hende a bis’é tabata mentira. Un mucha asina ta krese ku e pensamentu ku e ta sushi, ku e no ta sirbi pa nada i ku e no meresé amor ni konsuelo.

8. Dikon nos por tin sigur ku Yehova por konsolá esnan ku a sufri daño?

8 Loke nos a kaba di trata ta yuda nos komprondé ku abusu seksual ta kousa daño pa hopi aña. Esei ta un krímen masha horibel. E problema serio akí di abusu seksual ta mustra klaramente ku nos ta biba den e último dianan, un tempu ku hopi hende ta “sin kariño” i ku “hende malbado . . . lo bai di malu pa pió.” (2 Tim. 3:1-5, 13) Satanas su táktikanan ta hopi kruel, i ta tristu ora hende ta hasi loke Satanas ke. Pero, Yehova ta hopi mas poderoso ku Satanas i ku esnan ku ta hasi loke Satanas ke. Yehova semper ta mira tur kos ku Satanas ta hasi. Nos por tin sigur ku Yehova sa kuantu nos ta sufri, i e por duna nos e konsuelo ku nos tin mester. Nos ta kontentu pa sirbi e “Dios di tur konsuelo, kende ta konsolá  nos den tur nos tribulashonnan, pa nos por konsolá otro hende ku ta den kualke tipo di tribulashon ku e konsuelo ku nos a risibí di Dios.” (2 Kor. 1:3, 4) Pero, ken Yehova ta usa pa duna konsuelo?

KEN POR DUNA NAN KONSUELO?

9. Segun Salmo 27:10, kiko Yehova lo hasi pa víktima ku nan mayornan a bandoná?

9 E víktimanan di abusu seksual ku mas mester di konsuelo ta esnan ku nan mayornan a bandoná nan òf esnan ku hende yegá di nan a abusá di nan. Rei David tabata sa ku nos por konfia ku Yehova semper lo konsolá nos. (Lesa Salmo 27:10.) David tabata konvensí ku Yehova lo ta un Tata pa hende ku a sufri daño na man di nan famia. Kon Yehova ta hasi esei? E ta usa su fiel sirbidónan humano. Nos rumannan den kongregashon ta manera famia pa nos. Por ehèmpel, Hesus a bisa ku esnan ku ta adorá Yehova kuné lo bira p’e manera su rumannan i su mama.—Mat. 12:48-50.

10. Kon apòstel Pablo a deskribí su trabou komo ansiano?

10 Laga nos mira un ehèmpel di esei den kongregashon. Apòstel Pablo tabata un ansiano diligente i fiel. Dios a inspir’é pa bisa e kristiannan pa imitá su ehèmpel meskos ku el a imitá Kristu. (1 Kor. 11:1) Wak kiko Pablo a bisa tokante su trabou komo ansiano: “Nos a trata boso ku suavedat, manera ora un mama ku masha ternura ta kuida su yunan na lechi.” (1 Tes. 2:7) Awe tur ansiano fiel tambe ta papia ku ternura i suavedat ora nan ta usa Beibel pa konsolá esnan ku mester di yudansa.

Ruman muhé spiritualmente maduro por ta un bon fuente di konsuelo (Wak paragraf 11) *

11. Kon nos sa ku no ta ansiano so por duna konsuelo?

11 Akaso ta ansiano so por duna konsuelo na víktima di abusu seksual? Nò. Nos tur tin e responsabilidat pa “sigui konsolá otro.” (1 Tes. 4:18) Ruman muhé spiritualmente maduro por ta un gran yudansa pa ruman muhé ku mester di konsuelo. No ta pòrnada Yehova a kompará  su mes ku un mama ku ta konsolá su yu. (Isa. 66:13) Den Beibel tin ehèmpel di hende muhé ku a duna konsuelo na hende angustiá. (Yòb 42:11) Yehova ta bira hopi kontentu ora e mira ruman muhénan awe ta duna konsuelo na nan ruman muhénan ku ta sufri. Den algun kaso, e ansianonan por puntra un ruman muhé spiritualmente maduro si e por yuda un otro ruman muhé ku ta sufri. *

KON NOS POR KONSOLÁ NAN?

12. Kiko nos mester tene kuidou pa no hasi?

12 Sin duda, nos mester tene kuidou pa no insistí pa un ruman papia di algu ku e ta preferá di no papia di dje. (1 Tes. 4:11) Pero, kiko nos por hasi pa esnan ku mester i ke yudansa i konsuelo? Laga nos wak sinku manera basá riba Beibel ku nos por usa pa konsolá nan.

13. Segun 1 Reinan 19:5-8, kiko Yehova su angel a hasi pa Elías, i kon nos por imitá e angel?

13 Duna yudansa práktiko. Ora profeta Elías tabata hui pa esnan ku kier a mat’é, el a desanimá asina tantu ku e kier a muri. Yehova a manda un angel poderoso pa anim’é. E angel ei a duna Elías nèt loke e tabatin mester. El a dun’é un kuminda kayente i a bis’é pa kome. (Lesa 1 Reinan 19:5-8.) E relato ei ta siña nos un lès importante: Tin biaha djis un simpel gesto di bondat por ta di gran yudansa pa un ruman ku ta sufri. Nos por mustra ku nos ta stima nos rumannan ku ta sufri ora nos hasi algu pa nan, manera kushiná pa nan, duna nan un regalitu òf skirbi un karchi ku palabra animante. Nos por duna e yudansa práktiko ei, si nos ta haña difísil pa papia ku nan tokante loke nan a pasa aden.

14. Ki lès nos por siña for di e ehèmpel di Elías?

14 Yuda e víktimanan sinti nan safe i kómodo. Nos por siña un otro lès for di e relato di Elías. Milagrosamente Yehova a duna e profeta e yudansa ku e tabatin mester pa kana e distansia largu pa yega Seru Horèb. Kisas na e lugá leu ei, kaminda algun siglo promé Yehova a sera e pakto ku su pueblo, Elías a sintié safe. Por fin e tabata for di e gara di esnan ku kier a hasié daño. Ki lès nos por siña? Si nos ke duna konsuelo na un víktima di abusu seksual, nos tin ku yud’é sinti su mes safe promé. Por ehèmpel, e ansianonan mester tene kuenta ku si nan ke animá un ruman muhé angustiá, e lo sinti su mes mas safe i mas kómodo na su kas, ku un kòpi di te òf kòfi, en bes di na e Salòn di Reino. Un otro ruman kisas lo preferá lo kontrario.

Nos ta duna konsuelo ora nos ta skucha ku pasenshi, hasi orashon di kurason i skohe bon palabra (Wak paragraf 15-20) *

15-16. Kiko ke men sea un bon skuchadó?

15 Sea un bon skuchadó. Beibel ta duna nos e konseho akí: “Tur hende mester ta kla pa skucha, slo pa papia.” (Sant. 1:19) Nos ta bon skuchadó? Kisas algun di nos ta pensa ku un bon skuchadó ta djis keda ketu i skucha e otro persona sin bisa nada. Pero sea un bon skuchadó ta enserá mas ku esei. Por ehèmpel, eventualmente ora Elías a deshogá su mes na Yehova, Yehova realmente a skuch’é. Yehova a komprondé ku Elías tabatin miedu, e tabata sintié su so i a pensa ku tur su trabou tabata pòrnada. Ku amor Yehova a yud’é surpasá e sintimentunan ei. El a mustra ku realmente el a skucha Elías.—1 Rei. 19:9-11, 15-18.

16 Ora nos ta skucha nos ruman, kon  nos por demostr’é ku nos tin kompashon p’e? Tin biaha, algun palabra sinsero por yud’é komprondé kon nos ta sinti. Bo por bis’é: “Ta duel mi ku e kos ei a pasa ku bo. Niun mucha no mester pasa den algu asina.” Kisas bo por hasi pregunta pa hasi sigur ku bo a komprondé loke e ruman angustiá ta bisa. Bo por puntr’é: “Bo por splika mi kiko bo ke men?” òf “Mi a komprondé ku . . . Ta esei bo ke men?” Palabra sinsero asina ta yuda e ruman mira ku realmente bo ta skuch’é i ta purba di komprond’é.—1 Kor. 13:4, 7.

17. Dikon nos mester tene pasenshi i nos mester ta “slo pa papia”?

17 Kòrda sí ku nos mester ta “slo pa papia.” No interumpí e ruman pa dun’é konseho òf purba di korigí su manera di pensa. Tene pasenshi! Ora eventualmente Elías a deshogá su mes na Yehova, el a usa palabra fuerte pa ekspresá su angustia. Despues ku Yehova a fortalesé Elías su fe, Elías atrobe a deshogá su sintimentunan ku e mesun palabranan. (1 Rei. 19:9, 10, 13, 14) Ki ta e lès? Tin biaha hende ku ta angustiá tin ku deshogá nan mes mas ku un biaha. Meskos ku Yehova, nos ke skucha nan ku pasenshi. En bes di duna solushon, ta mihó pa nos mustra empatia i kompashon.—1 Ped. 3:8.

18. Ki tipo di orashon por ta di konsuelo pa esnan ku ta sufri, i dikon?

18 Hasi orashon di kurason ku esun ku ta sufri. Tin biaha un hende ta asina deprimí ku e ta sinti ku e no por hasi orashon. E por sinti ku e no ta digno pa aserka Yehova. Un manera ku nos por konsol’é ta di hasi orashon kuné i menshoná su nòmber den orashon. Bisa Yehova kon stimá e ruman ta pa nos i pa e kongregashon. Pidi Yehova pa trankilisá i konsolá su presioso karné. Tipo di orashon asina realmente por konsolá e ruman.—Sant. 5:16.

19. Kiko por yuda nos haña palabra korekto pa konsolá un ruman?

 19 Skohe palabra ku ta kura i konsolá. Pensa promé bo papia. Papia sin pensa por kousa hopi doló, ma palabra bon skohí por kura. (Pro. 12:18) P’esei, pidi Yehova pa yuda bo usa palabra ku ta konsolá i trankilisá e ruman. Pero kòrda sí ku e palabranan di mas poderoso ta esnan di Yehova ku nos ta haña den Beibel.—Heb. 4:12.

20. (a) Kon algun di nos rumannan ku a bira víktima di abusu seksual na mucha ta sinti? (b) Kiko nos ke kòrda nan?

20 Algun di nos rumannan ku a bira víktima di abusu seksual na mucha ta sinti nan sushi, sin balor i ku niun hende lo no por stima nan. Pero, esei no ta bèrdat! Ta p’esei nos mester usa teksto di Beibel pa kòrda nan ku Yehova ta stima i balorá nan. (Wak e kuadro “ Beibel Ta Duna Nos Konsuelo.”) Ora e profeta Daniel tabata sintié débil i deprimí, un angel a bin fortalesé. Yehova tabata ke pa e sirbidó stimá ei di dje sa kon presioso e ta den su bista. (Dan. 10:2, 11, 19) Asina tambe, kada un di nos rumannan angustiá ta presioso pa Yehova.

21. (a) Kiko lo pasa ku hende ku a hasi kos malu i ku no a arepentí? (b) Kiko nos tur mester hasi mientrastantu?

21 Ora nos duna otro hende konsuelo, nos ta kòrda nan ku Yehova ta un Dios di amor. Ademas, nos no ke lubidá ku e ta un Dios di hustisia. Niun abusu seksual no ta skondí pa Yehova. E ta mira tur kos, i lo e hasi sigur ku tur hende ku a abusá seksualmente di mucha i ku no a arepentí lo haña kastigu. (Num. 14:18) Mientrastantu, laga nos tur hasi tur loke nos por pa mustra amor na e víktimanan di abusu seksual. Ademas, ta un konsuelo pa sa ku un bes aki Yehova lo kura tur esnan ku a sufri pa kousa di Satanas i su mundu malbado. Nos por tin sigur ku, den e mundu nobo, tur e eksperensianan doloroso ei lo kita kompletamente for di nan mente i kurason.—Isa. 65:17.

KANTIKA 109 Stima Otro Intensamente di Kurason

^ par. 5 E personanan ku a ser abusá seksualmente na mucha por sigui sufri pa hopi aña largu. E artíkulo akí lo yuda nos komprondé dikon esei ta e kaso. Ademas, nos lo analisá ken por duna nan konsuelo i kon por konsolá nan.

^ par. 11 Víktima di abusu seksual mester disidí si e ke buska yudansa profeshonal.

^ par. 76 DESKRIPSHON DI PLACHI: Un ruman muhé spiritualmente maduro ta konsolá un ruman ku tin doló emoshonal.

^ par. 78 DESKRIPSHON DI PLACHI: Dos ansiano ta bishitá e ruman ku ta sinti su mes angustiá. El a pidi pa e ruman muhé spiritualmente maduro t’ei presente.