Bai na kontenido

Bai na kontenido

 ARTÍKULO DI ESTUDIO 14

Bo Ta Kumpliendo ku Bo Sirbishi Kabalmente?

Bo Ta Kumpliendo ku Bo Sirbishi Kabalmente?

“Sigui prediká e bon notisia, kumpli ku bo sirbishi kabalmente.”—2 TIM. 4:5, nota.

KANTIKA 57 Nos Ta Prediká na Tur Sorto di Hende

UN BISTA ADELANTÁ *

Despues ku Hesus a resusitá, el a reuní ku su disipelnan i a duna nan e mandamentu pa “bai, i hasi hende . . . disipel” (Wak paragraf 1)

1. Kiko nos tur ke siña, i dikon? (Wak e plachi riba portada.)

KRISTU HESUS a duna su siguidónan e siguiente mandamentu: “Bai, i hasi hende di tur nashon mi disipel.” (Mat. 28:19) Nos tur ke siña kon pa ‘kumpli ku nos sirbishi kabalmente.’ (2 Tim. 4:5) Kon ku bai bin, e trabou ei ta mas importante, mas balioso i mas urgente ku kualke otro trabou. Apesar di esei, no ta semper nos por dediká e tempu ku nos lo ke den sirbishi.

2. Kiko ta algun difikultat ku algun di nos ta enfrentá?

2 Tin otro kos importante ku ta eksigí hopi di nos tempu i energia. Kisas algun di nos tin ku traha hopi ora pa perkurá pa nos mes i nos famia. Òf kisas nos òf nos famia ta lucha ku malesa, depreshon òf krekechénan di edat avansá. Kon nos por kumpli ku nos sirbishi kabalmente apesar di e difikultatnan ei?

3. Kiko nos ta komprondé for di e palabranan di Hesus na Mateo 13:23?

3 Si nos sirkunstansianan ta limitá e kantidat di ora ku nos por traha den sirbishi di Yehova, nos no mester desanimá. Hesus tabata sa ku no ta nos tur por hasi mes tantu. (Lesa Mateo 13:23.) Tanten ku nos ta duna Yehova lo mihó ku nos por den su sirbishi, e ta apresiá esei. (Heb. 6:10-12) Di otro banda, nos por sinti ku nos sirkunstansianan ta permití nos hasi mas. Den e artíkulo akí, nos lo analisá kon nos por pone nos sirbishi na promé lugá den nos bida. Ademas, nos lo wak kon nos por mantené nos bida simpel i kon nos por mehorá nos abilidat di prediká  i di siña hende. Pero, promé ku tur kos, laga nos wak kiko kumpli ku nos sirbishi kabalmente ta nifiká.

4. Kiko kumpli ku nos sirbishi kabalmente ta nifiká?

4 Ku poko palabra, kumpli ku nos sirbishi kabalmente ta nifiká partisipá mas tantu posibel den e trabou di prediká i di siña hende. Pero, esei ta enserá mas ku djis prediká un kantidat di ora. Mas bien, nos motivashon ta importante pa Yehova. Sí, nos amor pa Yehova i nos próhimo ta motivá nos pa traha ku henter nos kurason den nos sirbishi kristian. * (Mar. 12:30, 31; Kol. 3:23) Sirbi Dios ku henter nos kurason ta nifiká usa nos forsa i energia lo mihó ku nos por den su sirbishi. Ora nos mira e trabou di prediká komo un gran privilegio, nos lo haña mas gana di papia ku mas tantu hende posibel tokante e bon notisia.

5-6. Kon un persona ku no tin hopi tempu por pone sirbishi na promé lugá den su bida? Ilustrá esaki.

5 Imaginá un hóben ku ta gusta toka guitara. E ta toka ki ora ku e haña un chèns. Un dia, e ta haña trabou pa toka tur wikènt den un restorant. Pero, loke e ta gana no por kubri su gastunan. Pues, e ta kuminsá traha di djaluna pa djabièrnè den un supermarket. Aunke ku e ta pasa mayoria di su tempu trahando na supermarket, su berdadero pashon ta músika. E tin gana di mehorá su abilidat pa un dia e bira un guitarista fultaim. Mientrastantu, e ta probechá di tur oportunidat pa toka, asta si esei ta pa un ratu so.

6 Di mes manera, kisas bo no por dediká e kantidat di tempu ku bo ke na e trabou di prediká. Pero, esei ta nèt loke bo ta gusta hasi. P’esei, bo ta hasi esfuerso pa mehorá bo abilidat pa asina yega na kurason di hende ku e bon notisia. Pero, komo ku tin asina tantu kos ku ta eksigí di bo tempu, kisas bo ta puntra bo mes: ‘Ta  kon ami por pone e trabou di prediká na promé lugá den mi bida?’

KON BO POR PONE SIRBISHI NA PROMÉ LUGÁ DEN BO BIDA?

7-8. Kon nos por imitá e aktitut ku Hesus tabatin relashoná ku sirbishi?

7 E aktitut ku Hesus tabatin relashoná ku sirbishi ta un ekselente ehèmpel pa nos. E kos di mas importante den su bida tabata di papia tokante e Reino di Dios. (Huan 4:34, 35) El a kana masha hopi kilometer pa prediká na mas tantu hende posibel. El a probechá di tur oportunidat pa papia ku nan sea na nan kas òf na lugá públiko. Sirbishi tabata tur kos p’e.

8 Un manera ku nos por imitá Kristu ta di probechá di kualke momento òf oportunidat ku presentá pa papia ku hende tokante e bon notisia. Nos ta dispuesto pa pone loke ta kumbiní nos un banda pa prediká. (Mar. 6:31-34; 1 Ped. 2:21) Algun ruman den kongregashon ta pionero spesial, regular òf ousiliar. Otronan a siña un otro idioma òf a muda bai kaminda tin mester di mas predikadó. I nos no mester lubidá e publikadónan ku no por sirbi den e maneranan ei pero ku ta hasi un gran parti di e trabou di prediká i ta duna tur loke nan por. Sea kual sea e kaso, Yehova no ta pidi mas di loke nos por duna. E ke pa nos tur disfrutá di prediká “e glorioso bon notisia di e Dios felis.”—1 Tim. 1:11; Deu. 30:11.

9. (a) Aunke Pablo mester a traha pa sostené su mes, kon el a pone sirbishi na promé lugá den su bida? (b) Kiko Echonan 28:16, 30 i 31 ta siña nos di Pablo su aktitut relashoná ku sirbishi?

9 Apòstel Pablo tambe a pone un bon ehèmpel pa nos ya ku el a pone sirbishi na promé lugá den su bida. Ora e tabata na Korinto, durante su di dos biahe komo misionero, su plaka tabata kabando i e mester a traha tènt pa sostené su mes. Pero, e trabou ei no tabata esun di mas importante pa Pablo. El a hasi e trabou ei pa asina e por a prediká e bon notisia “sin kobra nada,” esta, sin ku e rumannan di Korinto mester a paga pa su gastunan. (2 Kor. 11:7) Aunke Pablo mester a traha pa un tempu, el a keda pone sirbishi na promé lugá den su bida, i el a prediká tur Sabat. Despues ku su situashon a mehorá, e por a prediká mas. El a “kuminsá dediká su mes kompletamente na prediká e palabra di Dios i tabata duna testimonio na e hudiunan pa proba ku Hesus di bèrdat ta e Kristu.” (Echo. 18:3-5; 2 Kor. 11:9) Mas despues, ora e tabata prezu den su kas na Roma pa dos aña, el a prediká na hende ku a bin bishit’é i skirbi karta. (Lesa Echonan 28:16, 30, 31.) Pablo tabata determiná pa no laga nada stroba su sirbishi. El a skirbi: “Komo ku nos tin e sirbishi akí . . . , nos no ta entregá.” (2 Kor. 4:1) Meskos ku Pablo, asta si nos tin ku traha pa sostené nos mes, nos por pone sirbishi na promé lugá den nos bida.

Tin vários manera pa kumpli ku nos sirbishi kabalmente (Wak paragraf 10-11)

10-11. Kon nos por kumpli ku nos sirbishi kabalmente si nos tin problema ku salú?

10 Kiko si edat òf salú ta stroba nos di prediká di kas pa kas manera nos ke? Si esei ta e kaso, tin otro manera ku nos por prediká. E kristiannan di promé siglo a prediká unda ku nan a haña hende. Nan a probechá di tur oportunidat pa papia di e bèrdat, sea di kas pa kas, na lugá públiko òf informalmente. Sí, nan a papia ku tur hende ku “pa kasualidat tabata” presente. (Echo. 17:17; 20:20) Si e pianan no ta duna, nos por sinta na un  lugá públiko kaminda nos por prediká na hende ku ta kana pasa. Òf nos por duna testimonio informal, prediká via karta òf telefòn. Ora e publikadónan ku tin problema serio ku salú ta usa e métodonan ei pa prediká, nan ta sinti nan felis i satisfecho.

11 Sí, asta si nos tin problema ku salú, nos por kumpli ku nos sirbishi kabalmente. Laga nos wak e ehèmpel di apòstel Pablo atrobe. El a bisa: “Pa tur kos mi tin forsa pa medio di esun ku ta duna mi poder.” (Flp. 4:13) Pablo tabatin mester di e poder ei ora el a bira malu durante un di su biahenan komo misionero. El a splika e kristiannan na Galasia: “E promé biaha ku mi a haña chèns di deklará e bon notisia na boso tabata pasobra mi tabata malu.” (Gal. 4:13) Di mes manera, ta posibel ku bo problema ku salú ta duna bo oportunidat di prediká e bon notisia na dòkter òf otro hende ku ta duna bo kuido médiko. Mayoria di nan ta na trabou ora ku nos rumannan ta yama na nan kas.

KON BO POR MANTENÉ BO BIDA SIMPEL?

12. Kiko ke men mantené un wowo simpel?

12 Hesus a bisa: “Wowo ta lampi di e kurpa. P’esei, si bo wowo ta simpel, henter bo kurpa lo bria.” (Mat. 6:22) Kiko Hesus tabata ke men ku esei? E tabata ke men ku nos mester enfoká riba un solo meta òf propósito sin laga nada distraí ni desviá nos. Asina ei nos por mantené nos bida simpel. Hesus mes a enfoká su bida riba e sirbishi, i el a siña su disipelnan pa keda enfoká riba e sirbishi di  Yehova i e Reino. Nos ta imitá Hesus ora nos sirbishi kristian ta e kos di mas importante den nos bida. Sí, nos ta buska “promé e Reino i e hustisia di Dios.”—Mat. 6:33.

13. Kiko por yuda nos enfoká riba nos sirbishi?

13 Un manera ku nos por enfoká riba nos sirbishi ta di simplifiká nos bida. Asina nos tin mas tempu pa yuda otro hende konosé i stima Yehova. * Puntra bo mes: ‘Mi por traha ménos ora di manera ku mi por prediká mas tantu den siman? Òf mi por baha man na entretenimentu ku ta kita hopi tempu for di mi?’

14. Ki kambio un pareha a hasi pa nan por tin mas tempu pa sirbishi?

14 Tuma nota kiko un ansiano ku yama Elías ku su kasá a hasi. El a splika: “Na e momento ei, nos no por a traha pionero pero nos mester a kuminsá un kaminda. Pues, pokopoko nos a kuminsá hasi kambio pa nos tin mas tempu pa sirbishi. Por ehèmpel, nos a baha nos gastunan. Djei, nos a mira ku nos tabata dediká muchu tempu na rekreo i nos a disidí di baha man na esei tambe. Ademas, nos a pidi nos doño di trabou pa laga nos traha orario mas fleksibel. Asina ei, nos por a sali den sirbishi anochi, dirigí mas estudio di Beibel i asta nos por a sali den sirbishi dos bes pa luna den siman. Esta un goso!”

KON BO POR MEHORÁ BO ABILIDAT DI PREDIKÁ I DI SIÑA HENDE?

Si nos apliká loke nos ta siña na e reunion di den siman, nos lo sigui mehorá nos sirbishi (Wak paragraf 15-16) *

15-16. Segun 1 Timoteo 4:13 i 15, kon nos por mehorá nos abilidat di prediká? (Wak tambe e kuadro “Meta Ku Por Yuda Mi Kumpli ku Mi Sirbishi Kabalmente.”)

15 Un otro manera ku nos por kumpli ku nos sirbishi kabalmente ta di mehorá  nos abilidat di prediká. Por ehèmpel, dependé di un persona su profeshon, e mester keda risibí entrenamentu pa oumentá su konosementu i mehorá su abilidat. Esei tambe ta konta pa nos komo publikadó. Semper nos tin ku sigui siña kon pa mehorá nos abilidat den sirbishi.—Pro. 1:5; lesa 1 Timoteo 4:13, 15.

16 Pero, kon nos por hasi esei? Un manera ta di presta atenshon na loke nos ta siña na e reunion Nos Bida i Sirbishi Kristian. Ei nos ta haña entrenamentu balioso pa yuda nos prediká kada bes mas mihó. Por ehèmpel, ora e presidente ta duna konseho na un di e studiantenan ku a duna parti, purba di identifiká sugerensia ku lo yuda nos mehorá nos sirbishi. E siguiente biaha ku nos ta den sirbishi, nos por apliká e sugerensianan ei. Un otro kos ku nos por hasi ta di pidi nos superintendente di grupo di sirbishi di vèlt pa yuda nos òf pa traha den sirbishi ku nos. Tambe nos por sali ku otro publikadó ku eksperensia, un pionero òf e superintendente di sirkuito. Segun ku nos ta siña usa tur publikashon ku nos tin den nos Kaha di Hèrmènt pa Siña Hende e Bèrdat (Teaching Toolbox) bon, nos lo disfrutá mas di nos sirbishi i di siña hende.

17. Kon lo bo sinti bo ora bo kumpli ku bo sirbishi kabalmente?

17 Nos ta privilegiá di ta “kompañero di trabou di” Yehova. (1 Kor. 3:9) Ora nos “sigui hasi sigur kiko ta e kosnan mas importante” i sigui enfoká riba nos sirbishi, nos lo ‘sirbi Yehova ku goso.’ (Flp. 1:10; Sal. 100:2) Asta si bo ta pasando den difikultat òf si bo tin sierto limitashon, bo por ta sigur ku Yehova lo duna bo e poder ku bo tin mester pa kumpli ku bo sirbishi kabalmente. (2 Kor. 4:1, 7; 6:4) Sea ku bo situashon ta permití bo prediká hopi òf tiki, bo por “tin motibu pa ta masha kontentu” si bo ta traha den sirbishi di henter kurason. (Gal. 6:4) Ora bo ta kumpli ku bo sirbishi kabalmente, bo ta mustra ku bo ta stima Yehova i bo próhimo. Ta manera 1 Timoteo 4:16 ta bisa: “Hasiendo esei lo bo salba bo mes i tambe esnan ku ta skucha bo.”

KANTIKA 58 Nos Ta Buska Amigu di Pas

^ par. 5 Hesus a manda nos prediká e bon notisia di e Reino i pa hasi disipel. Den e artíkulo akí, nos lo mira kon nos por kumpli ku nos sirbishi kabalmente asta si nos sirkunstansianan ta difísil. Ademas, nos lo siña kon nos por ta mihó publikadó i kon nos por disfrutá mas ora nos ta prediká.

^ par. 4 SPLIKASHON: Nos sirbishi kristian ta enserá e trabou di prediká i di siña hende, konstrukshon i mantenshon di edifisio ku nos ta usa pa adorá Yehova i dunamentu di yudansa ora di desaster natural.—2 Kor. 5:18, 19; Echo. 11:29.

^ par. 13 Wak e shete pasonan den e kuadro “Kon pa Simplifiká Bo Bida” den E Toren di Vigilansia di yüli 2016, pág. 10.

^ par. 62 DESKRIPSHON DI PLACHI: Durante e reunion di den siman, un ruman muhé ta demostrá kon pa hasi un rebishita. Despues, segun ku e ta skucha e konseho di e presidente, e ta hasi anotashon den e foyeto Dunamentu di Siñansa. Ora ku e ta prediká den wikènt, e ta pone na práktika loke el a siña na reunion.