Bai na kontenido

Bai na kontenido

 HISTORIA DI BIDA

Yehova A Bendishoná Mi Desishon Rikamente

Yehova A Bendishoná Mi Desishon Rikamente

Tabata aña 1939. Nos a lanta mei anochi i a kore den outo mas ku un ora pa bai na e stat chikitu ku yama Joplin ku ta keda den zùitost di Missouri, Merka. Ora nos a yega einan, ketu ketu nos a kuminsá pasa tratado bou di porta di kada kas den e teritorio. Asina ku nos a kaba, ora mainta tabata serka di habri, nos a drenta den outo i a bai topa ku e otro gruponan. Pero dikon nos a bai prediká mei anochi i a sali for di teritorio asina lihé? Lo mi konta bo esei despues.

MI A nase na aña 1934. Mi mayornan, Fred ku Edna Molohan, ya tabatin 20 aña kaba komo Studiantenan di Beibel (Testigunan di Yehova) ora ku mi a nase. Mi ta gradisidu ku nan a siña mi stima Yehova. Nos a biba na Parsons, un pueblito chikitu ku ta keda den zùitost di Kansas. Nos tabata parti di un kongregashon kaminda kasi tur hende tabata ungí. Nos famia tabatin un bon rutina di bai reunion i prediká e bèrdat di e Palabra di Dios na otro hende. Djasabra atardi, mayoria di biaha nos tabata hasi e trabou di prediká den kaya, manera nan tabata yama predikashon den áreanan públiko e tempu ei. Tin biaha nos tabata kansa, pero Tata semper tabata kumpra eiskrim pa nos ora nos kaba.

Nos kongregashon chikitu tabatin un teritorio grandi ku tabata inkluí diferente pueblito i hopi boerderij. En bes di duna nos plaka pa nos literaturanan, algun kunukero tabata duna nos bèrdura fresku, webu fresku (ku nan a kaba di kue for di nèshi) òf te asta galiña bibu. Komo ku Tata ya a duna kontribushon pa e literaturanan, e kumindanan akí a yuda alimentá nos famia.

KAMPAÑA DI PREDIKASHON

Mi mayornan a haña un tokadisko ku nan tabata usa den e trabou di prediká. Mi tabata muchu chikitu pa us’é, pero mi tabata gusta yuda Tata ku Mama toka e diskursonan di Ruman Rutherford na rebishita òf estudio di Beibel.

Huntu ku mi tata i mama dilanti di nos outo ku ekipo di zonido

Tata a instalá un spiker grandi riba dak di nos outo, un Ford di aña 1936, i asina nos outo a bira un outo ku ekipo di zonido. E outo akí tabata hopi útil pa prediká e mensahe di e Reino. Normalmente nos tabata toka músika pa hala atenshon di e hendenan, i despues nos tabata toka un  diskurso bíbliko. Anto despues di e diskurso, nos tabata ofresé literatura na e hendenan interesá.

Den un pueblito di Kansas ku yama Cherryvale, polis a prohibí Tata di toka e grabashonnan den e parke kaminda hopi hende tabata relahá riba djadumingu. Pero parti pafó di e parke sí Tata tabata por a toka e grabashonnan. Pues, sin protestá, Tata a bai pone e outo den e kaya banda di e parke di manera ku ainda e hendenan fásilmente por a tende e mensahe, i despues el a sigui toka e grabashonnan. Semper ta emoshonante pa ta huntu ku Tata i mi ruman hòmber grandi, Jerry, na momentonan asina.

Promé ku aña 1940, nos a partisipá den un kampaña spesial ‘relámpago’ pa den poko tempu kubri e teritorionan ku tabatin hopi oposishon. Nos tabata lanta promé ku di dia habri (manera nos a hasi na Joplin, Missouri) i ketu ketu nos tabata pasa tratado òf foyeto chikitu bou di porta di e hendenan su kas. Despues, nos ta topa pafó di e stat pa wak si polis a arestá un hende.

Durante e añanan ei, un otro rasgo emoshonante di nos sirbishi tabata loke nos a yama marcha di informashon. Pa anunsiá e Reino, nos tabata bisti pankarta pa prediká i tabata kana un tras di otro den un stat. Mi ta kòrda un marcha asina den nos stat unda nos rumannan a bisti e pankarta ku tabata bisa “Religion Ta un Trampa i un Froude.” Nan a sali for di nos kas, kana pasa dor di e stat, mas o ménos 1,6 km, i despues bini bèk na nos kas. Afortunadamente, nan no a haña niun oposishon, pero sí hopi hende tabata kurioso di loke tabata pasando.

MI PROMÉ KONGRESONAN

Nos famia tabata biaha hopi di Kansas pa Texas pa asistí na e kongresonan. Tata tabata traha pa un kompania di trein, pues nos por a biaha ku trein grátis pa bai e kongresonan i pa bishitá nos famianan. Fred, Mama su ruman hòmber mas grandi, ku su kasá, Eulalie, tabata biba na Temple, Texas. Tio Fred a konosé e bèrdat na yòn na prinsipio di siglo 20, el a batisá i a kompartí loke el a siña ku su ruman muhénan, inkluso mi mama. E rumannan di sentro di Texas tabata konos’é hopi bon, pasobra el a yega di sirbi einan komo un sirbidó di zona (awor konosí komo superintendente di sirkuito). Tio Fred tabata un hòmber amabel, kontentu i semper tabata dushi pa ta rònt di dje. E tabatin zelo pa e bèrdat, i sigur e tabatin un bon influensia riba mi den mi hubentut.

Na 1941, nos famia a biaha den trein pa bai St. Louis, Missouri, pa asistí na un kongreso grandi. A pidi tur e hóbennan pa sinta huntu den un sekshon spesial pa skucha e diskurso di Ruman Rutherford titulá “Yunan di e Rei.” Na final di su diskurso, nos a haña un sorpresa grandi. Ruman Rutherford i su asistentenan a duna kada un di nos e buki nobo Yunan. Tabatin mas ku 15.000 hóben presente ku a haña e bendishon spiritual akí.

 Na aprel di aña 1943, nos a asistí na e asamblea “Llamada a la Acción” na Coffeyville, Kansas. Na e asamblea ei, nan a anunsiá ku tur kongregashon lo a kuminsá tene e Skol di Ministerio Teokrátiko. Tambe nan a presentá un foyeto chikitu ku tin 52 lès i mester a usa e foyeto akí den e skol. Mas despues den e aña ei, mi a duna mi promé parti. E asamblea ei tabata spesial tambe pa mi pasobra, huntu ku un par di otro hende, mi a batisá den awa friu di un lago chikitu na un boerderij den serkania.

MI DESEO DI TRAHA NA BÈTEL

Mi a kaba skol sekundario na aña 1951 i mi mester a disidí kiko mi tabata ke hasi ku mi bida. Mi deseo sinsero tabata pa traha na Bètel, kaminda mi ruman hòmber Jerry tambe a traha, pues, mi a manda mi aplikashon Brooklyn. Den korto tempu nan a aprobá mi aplikashon, i nan a invitá mi pa kuminsá traha na Bètel riba 10 di mart 1952. E desishon akí a benefisiá mi hopi den sentido spiritual.

Mi deseo tabata pa traha den drùkerei pa asina yuda ku e produkshon di revista i literatura. Pero, nan a asigná mi pa traha komo waiter i despues den kushina, kual tabata un eksperensia hopi agradabel pa mi. Pues, nunka mi no a haña e privilegio di traha den drùkerei. Sinembargo, e diferente orario di traha den kushina a benefisiá mi mashá pasobra esei a permití mi tin tempu durante dia pa hasi estudio personal usando e biblioteka amplio di Bètel. Esaki a yuda mi krese spiritualmente i a fortalesé mi fe. I mi a bira mas determiná pa sirbi Yehova na Bètel miéntras ku mi tabata por. Jerry a sali for di Bètel na aña 1949 i a kasa ku Patricia, pero nan a bai biba serka di Brooklyn. Semper nan a yuda mi i enkurashá mi durante mi promé añanan di sirbishi na Bètel.

Un poko tempu despues ku mi a yega Bètel, e rumannan a kuminsá wak e bètelitanan ku nan por a pone riba e lista di oradónan di Bètel. Nan tabata asigná e ruman hòmbernan ku tabata riba e lista akí durante un aña pa duna diskurso i pa traha den sirbishi ku kongregashonnan ku a keda na un distansia di 322 kilometer for di Brooklyn. Mi tabatin e privilegio di ta riba e lista. Ora mi a kuminsá hasi bishita i duna diskurso públiko, di ún ora largu e tempu ei, mi tabata hopi nèrvioso. Por lo general, mi tabata biaha ku trein. Mi ta kòrda bon riba algu ku a pasa un djadumingu atardi den wenter di aña 1954. Mi a subi un trein pa bai bèk New York, i mi tabata supose di a yega Bètel atardi lat. Pero, na kaminda pa bini bèk tabatin un tormenta ku bientu fuerte i sneu. E motornan eléktriko di e trein a pèrdè koriente i a stòp di traha, i nos a yega New York te 5 or di mainta di djaluna. Djei, mi a subi un metro pa yega Brooklyn, i ora mi a yega, mi a bai stret kushina pa kuminsá traha. Mi tabata un tiki lat i hopi kansá pasobra mi no a drumi henter anochi. Pero e goso ku mi tabatin di sirbi e kongregashonnan i konosé asina tantu ruman hòmber i ruman muhé tabata bal mas ku kualke sakrifisio ku mi a hasi.

Preparando pa transmití for di studio di WBBR

Durante mi promé añanan na Bètel, mi a kuminsá yuda na e stashon di radio, WBBR. E studionan tabata na e di dos piso di e edifisio na 124 Columbia Heights. Tur siman tabatin un programa di Estudio di Beibel, i mi tabata asigná pa partisipá den dje. Ruman A. H. Macmillan, kende a sirbi na Bètel pa hopi aña, tabata partisipá regularmente den e programanan di radio akí. Nos tabata yam’é Ruman Mac. E tabata un ekselente ehèmpel di perseveransia pa nos komo ruman hòmbernan hóben na Bètel pasobra el a keda fiel apesar di hopi difikultat.

Nos tabata distribuí pamfleta di WBBR den sirbishi pa lanta interes

Na 1958, mi asignashon a kambia i mi a kuminsá traha estrechamente ku e Skol di Galaad. Mi asignashon tabata pa yuda e graduadonan haña visa i pa regla asuntu di biahe pa e rumannan yen di zelo akí. Biaha ku avion tabata hopi karu e tempu ei, pues algun di e graduadonan so tabata biaha ku avion. Mayoria di e rumannan ku tabatin ku biaha pa Afrika i Lehano Oriente a bai  ku barku di karga. Ora e preisnan di e vuelonan komersial a baha, mayoria di e misioneronan tabata biaha ku avion pa bai nan asignashon.

Preparando e diplomanan di Galaad promé ku e programa di graduashon kuminsá

BIAHE PA E KONGRESONAN

Na aña 1960, mi trabou a bira mas amplio pasobra mi tabatin ku organisá biahenan privá for di Merka pa Europa pa e kongreso internashonal di aña 1961. Mi tambe a biaha di New York pa Hamburg, Alemania, pa e kongreso ei. Despues di kongreso, ami ku tres otro ruman hòmber di Bètel a hür un outo i a kore for di Alemania te Italia, pa bishitá e sukursal na Roma. Di einan, nos a bai Fransia, pasa over di e Serunan Pirineo i drenta Spaña, kaminda e trabou di prediká tabata prohibí. Nos a logra duna nos rumannan na Barcelona algun publikashon lorá den papel di regalo. Tabata hopi emoshonante pa konosé nan! Despues, nos a kore bai Amsterdam i a bula bai New York.

Mas o ménos un aña despues, mi a haña e asignashon pa organisá biahe pa sierto delegado ku tabatin ku biaha pa un seri spesial di kongreso internashonal rònt mundu. Esaki tabata e asamblea “Bon Notisia Eterno” na aña 1963. A hasi areglo pa 583 delegado biaha rònt mundu pa asistí na e kongresonan na Europa, Asia i Sur Pasífiko, i pa despues bai Honolulu, Hawai, i Pasadena, California. Tambe nan lo a bishitá Líbano i Hordan pa haña un tour spesial tokante e teranan di Beibel. Nos departamento di Bètel tabata enkargá ku reservashon di vuelo i hotèl i tambe regla tur visa nesesario pa e diferente paisnan.

UN KOMPAÑERO DI BIAHE NOBO

Aña 1963 tabata hopi spesial pa mi pa un otro motibu. Dia 29 di yüni, mi a kasa ku Lila Rogers di Missouri, kende tabata un bètelita pa tres aña kaba. Un siman despues di nos kasamentu, ami ku Lila a djòin un tour ku tabata bai biaha rònt mundu i nos a bishitá Gresia, Egipto i Líbano. For di Beirut nos a subi un vuelo kòrtiku pa e aeropuerto chikitu di Hordan. E trabou di prediká na Hordan tabata prohibí i nan a bisa nos ku Testigunan di Yehova no ta haña visa pa drenta e pais. Pues, nos no tabatin sigur kiko lo a pasa ora nos a yega einan. Imaginá bo kon kontentu i sorprendé nos tabata ora nos a yega i a mira un grupo di ruman hòmber i ruman muhé pará na aeropuerto ku spandoek grandi ku tabata bisa: “Bon biní, Testigunan di Yehova”! I ki maravioso tabata pa personalmente mira e teranan di Beibel! Nos a bishitá e lugánan kaminda e patriarkanan di pasado a biba, kaminda Hesus i su apòstelnan a prediká i kaminda kristianismo a kuminsá plama te na e parti mas leu di tera.—Echo. 13:47.

Pa 55 aña kaba, Lila ta mi kompañera leal tur nos asignashonnan di sirbishi. Nos a bishitá Spaña i Portugal vários biaha tempu ku e trabou di prediká tabata prohibí den e paisnan ei. Nos tabata animá e rumannan i hiba publikashon pa nan i otro kosnan ku nan tabatin mester. Nos por  a asta bishitá algun ruman ku tabata den prizòn na un fòrti militar bieu na Cádiz, Spaña. Mi tabata hopi kontentu ku mi por a duna nan un diskurso di animashon.

Huntu ku Patricia ku Jerry Molohan na kaminda pa bai e Kongreso “Pas Riba Tera” na aña 1969

Desde aña 1963, mi tabatin e privilegio di yuda organisá biahenan pa kongresonan internashonal na Afrika, Australia, Europa, Hawai, Lehano Oriente, Nueva Zelandia, Puerto Rico, Sentroamérika i Suramérika. Ami ku Lila a disfrutá di hopi kongreso huntu ku nunka lo mi lubidá, inkluso esun na Varsovia, Polonia, na aña 1989. Hopi ruman di Rusia por a asistí na e kongreso ei. Tabata nan promé kongreso! Hopi di e rumannan ku nos a konosé a pasa vários aña den prizòn pa motibu di nan fe.

Un otro privilegio ku mi a disfrutá di dje ta di bishitá i animá e famianan di Bètel i e misioneronan rònt mundu. Nos lastu bishita tabata na Sur Korea, unda nos a topa ku 50 di nos rumannan den un prizòn na e stat Suwon. Tur e rumannan ei a demostrá un aktitut positivo i ku e deseo di por sirbi Yehova atrobe sin restrikshon. E echo ku nos a konosé nan a animá nos masha!—Rom. 1:11, 12.

OUMENTO TA DUNA GOSO

Mi a mira kon Yehova a bendishoná su pueblo atraves di añanan. Ora mi a batisá na aña 1943, tabatin 100.000 publikadó. Awor tin mas ku 8.000.000 hende ku ta sirbi Yehova den 240 pais. I gran parti di e kresementu akí ta danki na e gran trabou di prediká ku e graduadonan di Galaad a hasi. Pa mi tabata un plaser di por a traha huntu ku hopi di e misioneronan akí i yuda nan yega na nan asignashon.

Mi ta kontentu ku ora mi tabata yòn ainda, mi a tuma e desishon pa usa mi bida den e sirbishi di Yehova i pa apliká pa sirbi na Bètel. Yehova a bendishoná mi tur e añanan akí. Ademas di e goso di sirbi na Bètel, pa dékadanan ami ku Lila a disfrutá di e privilegio di por a prediká ku diferente kongregashon na Brooklyn, i nos a haña berdadero amigunan.

Ainda mi ta sirbi na Bètel ku apoyo di Lila tur dia. Aunke mi tin mas ku 84 aña di edat, mi ta kontentu ku ainda mi por hasi un trabou útil, esta, yuda ku korespondensia di sukursal.

Huntu ku Lila awe

Ta ki un goso pa forma parti di Yehova su organisashon maravioso i pa mira e diferensia entre esnan ku ta sirbi Yehova i esnan ku no ta sirbié. Esei ta laga nos komprondé mas mihó e palabranan na Malakías 3:18: “Boso lo distinguí atrobe entre e hustu i e malbado, entre un ku ta sirbi Dios i un ku no ta sirbié.” Kada dia ku pasa, nos ta mira kon e mundu di Satanas ta bira mas i mas pió, ku hende ku no tin speransa ni goso den bida. Pero esnan ku ta stima i sirbi Yehova tin un bida felis, asta den e tempunan krítiko akí, i un speransa sólido pa futuro. Ki un privilegio nos tin pa kompartí e bon notisia di e Reino! (Mat. 24:14) E Reino di Dios pronto lo remplasá e mundu bieu akí i lo e trese un paradeis. Nos ta anhelá pa e dia ei yega! E ora ei, tur sirbidó di Yehova riba tera lo disfrutá di un salú perfekto i un bida felis pa semper.