E Toren di Vigilansia di 1 di yanüari 1918 a kuminsá ku e palabranan akí: “Kiko aña 1918 lo trese kuné?” Europa ainda tabata den e kayente di e Guera Grandi (Promé Guera Mundial). Sinembargo, e susesonan na komienso di e aña ei a indiká ku posiblemente lo tabatin kosnan bon na kaminda pa e Studiantenan di Beibel i e mundu en general.

MUNDU TA PAPIA DI PAS

Dia 8 di yanüari 1918, Presidente Woodrow Wilson a duna un diskurso na Kongreso Merikano, kaminda el a menshoná 14 punto ku ta esensial pa logra “un pas hustu i stabil.” El a proponé pa e paisnan desaroyá un bon relashon ku otro, pa redusí e kantidat di arma i pa establesé un “union general di nashonnan” ku lo a benefisiá tur “pais grandi i chikitu.” Su “Dieskuater Puntonan” a bira e base pa forma e Liga di Nashonnan i pa negoshá e Tratado di Versailles, ku a pone fin na e Guera Grandi.

DEROTA DI OPOSITORNAN

Apesar di e agitashon, òf konfushon, di e aña anterior, * a parse ku pas tabata serka pa e Studiantenan di Beibel, i por a mira esei na e susesonan durante e reunion anual di Watch Tower Bible and Tract Society.

Durante e reunion akí, dia 5 di yanüari 1918, vários hòmber prominente ku mester a bai for di Bètel a purba di haña kontrol di e organisashon. Richard H. Barber, un fiel superintendente biahero, a habri e reunion ku orashon. Despues di duna un informe di e trabou di e aña anterior, a sigui ku e elekshon anual di e direktornan. Ruman Barber a nominá Joseph Rutherford i seis ruman hòmber mas. Despues un abogado ku tabata na banda di e opositornan a nominá shete otro hòmber, inkluso esnan ku mester a bai for di Bètel. Pero nan a sufri derota. E gran mayoria di akshonista a elegí Ruman Rutherford i e seis otro ruman hòmbernan fiel komo e direktornan.

Hopi ruman ku tabata presente a bisa ku e reunion ei tabata “e kongreso di mas bendishoná ku hamas nan a yega di asistí na dje.” Pero nan goso no a dura mashá.

REAKSHON RIBA E BUKI E MISTERIO TERMINÁ

Ya pa vários luna, e Studiantenan di Beibel tabata distribuí e buki E Misterio Terminá. Lesadónan sinsero a reakshoná na un manera positivo riba e bèrdatnan bíbliko den e buki ei.

E. F. Crist, un superintendente biahero di Canada, a papia di un pareha ku a lesa e buki E Misterio Terminá i a aseptá e bèrdat den solamente sinku siman! El a bisa: “Tantu e esposo komo e esposa a dediká nan mes kompletamente i nan ta hasiendo bon progreso.”

Un hòmber ku a haña e buki a kompartí loke el a siña mesora ku su amigunan. E mensahe a hasi un gran “impakto” riba dje. E ta konta: “Mi tabata kana riba Avenida Tres [i] un kos pisá manera un klenku a kai riba mi skouder, pero no tabata klenku sino e buki ‘E Misterio Terminá.’ M’a koh’é bai kas kuné i a les’é kompleto. . . . Despues m’a haña sa ku ta un pastor . . . den su rabia . . . a tira e buki fo’i su bentana. Mi ta konvensí ku pa medio  di e akshon ei e pastor a kombertí mas hende na un speransa bibu ku kualke otro akto den su bida. . . . Pa motibu di e pastor ei su rabia, awor nos ta alabá Dios.”

E pastor ei no tabata e úniko persona ku a reakshoná malu. Dia 12 di febrüari 1918, e funshonarionan di gobièrnu kanades a prohibí e buki. Nan a insinuá ku e buki a kontené deklarashon ku ta hiba na rebeldia i ku ta kontra guera. No muchu tempu despues, e funshonarionan di Merka a hasi meskos. Algun agente di gobièrnu a tene kontrol na Bètel i tambe na e ofisinanan na New York, Pennsylvania, i California; nan tabata en buska di evidensia kontra di e rumannan ku ta dirigí e organisashon. Dia 14 di mart 1918, e Departamento di Hustisia di Merka a prohibí e buki E Misterio Terminá. Nan a pretendé ku publikashon i distribushon di e buki akí ta stroba guera, i esei ta un violashon di e Akuerdo di Spionahe.

ENKARSELASHON!

Dia 7 di mei 1918, e Departamento di Hustisia a haña òrdu pa arestá Giovanni DeCecca, George Fisher, Alexander Macmillan, Robert Martin, Frederick Robison, Joseph Rutherford, William Van Amburgh i Clayton Woodworth. Nan akusashon tabata ku e rumannan “na un manera ilegal, malisioso i pa malu tabata pone hende desobedesé outoridat, bira desleal i nenga di sirbi den ehérsito militar i naval di Merka.” Nan kaso a kuminsá den korte dia 5 di yüni 1918, pero no tabatin duda ku lo a kondená nan. Dikon?

E prokuradó general di Merka a bisa ku e rumannan a violá e Akuerdo di Spionahe, i a yam’é un “arma efektivo kontra di propaganda.” Dia 16 di mei 1918, e Kongreso a nenga di hasi un kambio den e Akuerdo ku lo a protehá esnan ku a publiká “loke ta bèrdat ku bon motibu i ku ta hustifiká.” E Misterio Terminá a forma un parti krusial di nan debate. E informashon ofisial di e Kongreso Merikano a bisa: E buki “E Misterio Terminá ta un di e ehèmpelnan di mas peligroso di e tipo di propaganda akí. Su úniko influensia ta di pone e sòldánan desakreditá nos kousa i pa inspirá . . . Resistensia di sirbishi militar.”

Dia 20 di yüni 1918, un hurado a haña tur e ocho ruman hòmbernan kulpabel di tur akusashon. E siguiente dia, hues a dikta su sentensia. El a bisa: “E propaganda religioso ku e akusadonan a respaldá i tabata plama . . . ta mas peligroso ku un divishon di e ehérsito aleman. . . . E kastigu mester ta pisá.” Dos siman despues, nan a enkarselá e ocho ruman hòmbernan ei den un prizòn federal na Atlanta, Georgia, ku sentensia ku a varia di 10 pa 20 aña.

E TRABOU DI PREDIKÁ TA SIGUI

Durante e periodo ei, e Studiantenan di Beibel a enfrentá oposishon severo. E ofisina di FBI (Departamento Federal di Investigashon) a hasi investigashon profundo di nan aktividatnan i a produsí  míles di dokumento. E rapòrtnan ta mustra ku nos rumannan tabata determiná pa sigui prediká.

Den un karta pa FBI e hefe di pòstkantor di Orlando, Flórida, a skirbi lo siguiente: “[E Studiantenan di Beibel] ta bai di kas pa kas den e pueblo, i ta hasi esaki prinsipalmente [parti] anochi. . . . Ta parse ku nan ta determiná pa sigui prediká apesar di tur oposishon.”

Un koronel ku ta traha pa e Departamento di Guera a skirbi FBI pa duna informe tokante e aktividatnan di Frederick W. Franz, kende despues a bira miembro di e Kuerpo Gobernante. E koronel a skirbi: “F. W. Franz . . . ta responsabel pa bendementu di míles di e buki ‘E Misterio Terminá’.”

Charles Fekel, kende tambe a sirbi despues komo miembro di e Kuerpo Gobernante, a enfrentá persekushon severo. E outoridatnan a arest’é pasobra e tabata distribuí e buki E Misterio Terminá i a kontrolá su kartanan personal. El a pasa ún luna den prizòn na Baltimore, Maryland, i nan a yam’é “enemigu estranhero di Austria.” Segun ku e tabata duna testimonio ku kurashi na esnan ku tabata interog’é, a bini na su mente e palabranan di Pablo na 1 Korintionan 9:16, ku ta bisa: “Ai di mi si mi no deklará e bon notisia!” *

Ademas di prediká zelosamente, e Studiantenan di Beibel a sirkulá un petishon pa libra e rumannan será den prizòn na Atlanta. Anna K. Gardner ta konta: “Semper nos tabata okupá ku algu. Ora nan a sera e ruman hòmbernan den prizòn, nos siguiente trabou tabata pa buska firma. Nos tabata bai di kas pa kas. Nos a haña míles di firma! Nos tabata bisa e hendenan ku nos a topa ku aki ta trata di kristiannan berdadero ku a ser enkarselá inhustamente.”

KONGRESONAN

Durante e tempunan difísil ei, a organisá hopi kongreso pa fortalesé fe di e rumannan. E edishon ingles di E Toren di Vigilansia a bisa: “Tabatin mas ku 40 kongreso . . . durante e aña ei . . . Nos a risibí bunita rapòrt for di e kongresonan ei. Ántes, tur kongreso tabata tuma lugá na fin di zomer òf na kuminsamentu di hèrfst; pero awor henter aña nos tin kongreso.”

E hendenan di kurason sinsero ainda tabata reakshoná na un manera positivo riba e bon notisia. Na un kongreso na Cleveland, Ohio, mas o ménos 1.200 persona a asistí i 42 a batisá. Entre nan tabatin un mucha hòmber yòn, kende tabatin “apresio pa Dios i pa su dedikashon, i esei a pone kara di hopi hende grandi na bèrgwensa.”

KIKO A SOSODÉ DESPUES?

Segun ku 1918 tabata yegando su fin, e Studiantenan di Beibel tabata enfrentá un futuro insigur. Nan a bende algun di nan propiedatnan na Brooklyn i e ofisina prinsipal a bai na Pittsburgh, Pennsylvania. Miéntras ku e rumannan ku tabata dirigí e trabou tabata den prizòn ainda, a disidí pa tene e siguiente reunion anual di akshonista dia 4 di yanüari 1919. Kiko lo a pasa?

Nos rumannan a sigui persistí den nan trabou. Nan tabata asina sigur di e bon resultado ku nan a skohe e palabranan di Isaías 54:17 pa e teksto di aña pa 1919. E ta bisa: “Ningun arma ku wòrdu formá kontra bo lo no prosperá.” E rumannan tabata prepará pa un kambio kompleto di sirkunstansia, loke lo a oumentá nan fe i fortalesé nan pa mas trabou ku tabata spera nan.

^ par. 6 Wak “Shen Aña Pasá—1917” den e Anuario 2017 di Testigunan di Yehova, página 172-176.

^ par. 22 Wak e historia di bida di Charles Fekel “Goso dor di Perseverá den Bon Obra” den E Toren di Vigilansia (na ingles) di 1 di mart 1969.