“Bisti e armadura kompleto ku Dios ta duna pa boso por para firme kontra e trampanan di Diabel.”—EFE. 6:11.

KANTIKA: 79, 140

1, 2. (a) Kon bini hóbennan ta ganando e guera kontra Satanas i su demoñonan? (Wak e promé plachi.) (b) Kiko nos lo analisá den e artíkulo akí?

APÒSTEL Pablo a kompará kristiannan ku sòldá ku ta lucha man na man. Ta klaru ku nos lucha no ta literal, sino spiritual. Nos enemigunan ta Satanas i su demoñonan; nan ta personanan real i guereronan ábil ku hopi eksperensia. Na promé bista, por parse imposibel pa nos spesialmente pa hóbennan kristian, gana e guera ei. Pero esei ta asina? Òf nos hóbennan por gana e guera kontra e spiritunan malbado i poderoso ei? Sí, nan por gana e guera, i nan ta ganando. Kon bini? Pasobra nan ta “sigui haña mas fortalesa den Señor” Yehova. Ademas di esei, meskos ku sòldá bon entrená, nan ta “bisti e armadura kompleto ku Dios ta duna.”—Lesa Efesionan 6:10-12.

2 Kisas ora Pablo tabata papia tokante armadura, e tabata pensa riba e armadura di un sòldá di e ehérsito romano. (Echo. 28:16) Laga nos analisá dikon e komparashon ei ta apropiá. Segun ku nos ta hasi esei, wak kiko algun hóben ta bisa tokante e retonan i benefisionan di usa kada parti di e armadura spiritual.

Bo Tin e Armadura Kompleto Bistí?

 “E BÈRDAT MARÁ MANERA UN FAHA”

3, 4. Dikon nos por kompará e bèrdat ku nos ta haña den Beibel ku faha di un sòldá romano?

3 Lesa Efesionan 6:14. E faha ku e romanonan tabata usa den ehérsito tabatin plachi di metal ku tabata protehá hep di e sòldá i yuda wanta e peso di e parti ariba di e armadura. Algun faha tabatin baliña fuerte pa e sòldá por a karga un spada i un kuchú. Ora un sòldá su faha tabata bon mará, e por a bai guera ku mas konfiansa.

4 Di mes manera, e bèrdatnan ku nos ta siña for di Beibel ta protehá nos di daño spiritual ku siñansanan falsu ta kousa. (Huan 8:31, 32; 1 Huan 4:1) Mas nos stima e bèrdatnan di Beibel, mas fásil ta pa nos karga nos “harnas di pechu,” esta, pa nos biba segun e normanan hustu di Dios. (Sal. 111:7, 8; 1 Huan 5:3) Ademas, ora nos tin un bon komprondementu di e bèrdatnan di Beibel, nos lo tin mas konfiansa pa defendé e bèrdatnan ei ora hende ta oponé nos.—1 Ped. 3:15.

5. Dikon nos mester papia bèrdat?

5 Si nos tin e bèrdatnan di Beibel mará manera un faha, esaki lo motivá nos pa apliká nan den nos bida i papia bèrdat na tur momento. Dikon nos no ke gaña? Pasobra mentira ta un di e armanan ku Satanas tin mas éksito kuné. Mentira ta perhudiká e persona ku ta gaña i esun ku ta ker’é. (Huan 8:44) Pues, nos mester hasi esfuerso pa no gaña. (Efe. 4:25) Pero esei por ta un desafio. Abigail, kende tin 18 aña, a bisa: “Kisas no ta tur ora ta parse ku ta bale la pena pa papia bèrdat, foral si un mentira por saka bo for di un situashon difísil.” Pero, dikon semper e ta hasi esfuerso pa papia bèrdat anto? El a bisa: “Ora mi papia bèrdat, mi ta keda ku un konsenshi limpi dilanti di Yehova. I mi mayornan i mi amigunan sa ku nan por konfia mi.” Victoria, kende tin 23 aña, a bisa: “Ora bo ta papia bèrdat i ta defendé bo kreensianan, hende por pèst bo. Pero semper lo bo saka hopi benefisio: Bo ta haña mas konfiansa den bo mes, bo ta sinti bo mas serka Yehova i bo ta gana rèspèt di esnan ku ta stima bo.” Sin duda, ta bale la pena pa tur ora bo tin “e bèrdat mará manera un faha rònt di [bo] sintura.”

E bèrdat mará manera un faha (Wak paragraf 3-5)

“E HARNAS DI HUSTISIA”

6, 7. Dikon nos por kompará Yehova su normanan hustu ku un harnas?

6 E harnas di e sòldá romano tabata trahá di plachi di heru horizontal ku tabata baha un tiki riba otro. Nan tabata dobla e plachinan akí pa nan pas rònt di su pechu i barika i tabata pega nan ku hak i hèspu di metal na e strèpnan di kueru. E sòldá su skoudernan tabata tapá ku otro plachi di heru ku tambe tabata pegá na strèpnan di kueru. E harnas akí tabata limitá su moveshon, i regularmente e sòldá mester a chèk si e plachinan di heru tabata bon na lugá. Pero e harnas tabata protehá su kurason i otro órgano importante kontra spada òf flecha.

7 Nos por kompará e harnas akí ku Yehova su normanan hustu ku ta protehá nos “kurason,” òf e persona ku nos ta di paden. (Pro. 4:23) Meskos ku un sòldá lo no kambia su harnas di heru pa un harnas di un metal inferior, nos tampoko lo no ke kambia Yehova su normanan pa nos mes ideanan. Nos sabiduria ta limitá i no por duna nos e protekshon ku nos mester. (Pro. 3:5, 6) Mas bien, regularmente nos mester chèk si nos ‘plachinan di heru’ ku Yehova a duna nos ta bon poné riba nos kurason.

8. Dikon ta bale la pena obedesé e normanan di Yehova?

8 Bo sa sinti ku tin biaha Yehova su normanan hustu ta un karga òf ku nan ta kita  bo libertat? Daniel, kende tin 21 aña, a bisa: “Mi maestronan i mi kompañeronan di skol ta hasi bofon di mi pasobra mi ta biba segun e normanan di Beibel. Pa un tempu, mi a pèrdè konfiansa den mi mes i tabata sinti mi deprimí.” Pero kiko a yuda Daniel sintié mihó? El a bisa: “Ku tempu, mi a mira e benefisionan di biba segun e normanan di Yehova. Algun di mi supuesto amigunan a kuminsá usa droga i otronan a stòp di bai skol. Tabata tristu pa mira kiko nan a hasi ku nan bida. Di bèrdat Yehova ta protehá nos.” Madison, un hobensita ku tin 15 aña, a bisa: “Ta difísil pa mi tene mi mes na e normanan di Yehova i pa mi no sigui loke mi pareunan ta haña prèt òf leuk.” Kiko Madison ta hasi? El a bisa: “Mi ta kòrda mi mes ku mi ta karga e nòmber di Yehova i ku tentashon ta un arma ku Satanas ta usa pa ataká mi. Ora mi resistí un tentashon, mi ta sinti mi mihó.”

E harnas di hustisia (Wak paragraf 6-8)

“PIA BISTÍ KU E SANDALIA PA PREDIKÁ E BON NOTISIA DI PAS”

9-11. (a) Ki sapatu simbóliko kristiannan ta bisti? (b) Kiko por yuda nos sinti nos mas kómodo ora di prediká?

9 Lesa Efesionan 6:15. Un sòldá romano ku no tabatin su sapatu bistí no tabata kla pa bai bataya. E sapatu tabata parse un sandalia trahá di tres kapa di kueru i tabata wanta su pia stabil. E  tabata duradero i kómodo.

10 Aunke ku e sapatu ku e sòldánan romano tabata bisti a yuda nan den guera, e sapatu simbóliko ku kristiannan ta bisti ta yuda nan hiba un mensahe di pas. (Isa. 52:7; Rom. 10:15) Asina mes, nos mester di kurashi pa duna testimonio ora un oportunidat presentá. Un yònkuman di 20 aña ku yama Bo a bisa: “Mi tabatin miedu di prediká na mi kompañeronan di klas. Mi ta kere ku mi tabatin bèrgwensa. Awor ku mi ta wak bèk, mi no sa dikon mi tabata sinti asina. Awor mi ta kontentu ku mi ta prediká na mi pareunan.”

11 Hopi hóben a realisá ku, si nan prepará bon promé, nan ta sinti nan mas kómodo pa prediká. Kiko abo por hasi pa bo ta bon prepará? Julia, kende tin 16 aña, a bisa: “Semper mi tin publikashon den mi tas, i mi ta skucha mi kompañeronan di klas ora nan ta duna nan opinion i ora nan ta papia tokante nan kreensianan. Esei ta yuda mi haña sa kon pa yuda nan. Ora mi ta bon prepará, mi por bisa nan algu spesífiko ku por benefisiá nan.” Makenzie, un mucha muhé di 23 aña, a bisa: “Si bo ta amigabel i bo ta skucha bon, bo por haña un idea kiko ta pasando ku bo kompañeronan. Mi ta hasi sigur di lesa tur publikashon pa hóben. Di e manera ei, mi por mustra mi kompañeronan algu den Beibel òf riba jw.org ku por yuda nan.” Manera e komentarionan akí ta mustra, ora bo ta bon prepará pa prediká, ta komo si fuera bo tin “sapatu” duradero i kómodo bistí.

Bistí ku sandalia i kla pa prediká (Wak paragraf 9-11)

“E ESKUDO GRANDI DI FE”

12, 13. Kiko ta algun di “e flechanan sendí” ku Satanas por lansa kontra bo?

12 Lesa Efesionan 6:16. “E eskudo grandi” di un sòldá romano tabata rektangular i tabata asina grandi ku e por a tapa e sòldá for di su skouder te na su rudia. E tabata protehá e sòldá kontra spada, flecha i otro arma.

13 Algun di “e flechanan sendí” ku Satanas por lansa kontra bo ta mentira tokante Yehova. Por ehèmpel, Satanas ke laga bo kere ku Yehova no ta interesá den bo ni stima bo. Ida, un ruman muhé di 19 aña ku ta lucha kontra e sintimentunan ei, a bisa: “Tin biaha, mi ta sinti ku Yehova ta leu for di mi i ku e no ke ta mi Amigu.” Kon e ta trata ku e sintimentunan ei? El a  agregá: “E reunionnan ta fortalesé mi fe mashá. Ántes mi tabata djis sinta i no tabata duna komentario, pensando ku niun hende lo no tabatin gana di tende mi komentario. Pero awor, mi ta prepará pa reunion i ta purba di duna komentario dos òf tres biaha. No ta fásil, pero mi ta sinti mi bon despues ku mi duna komentario. Ademas, e rumannan ta animá mi mashá. Semper mi ta sali for di reunion konvensí ku Yehova ta stima mi.”

14. Ki bèrdat e eksperensia di Ida ta resaltá?

14 E eksperensia di Ida ta resaltá un bèrdat importante: E eskudo literal di un sòldá tabatin un tamaño fiho, pero nos fe sí por oumentá òf mengua. Esei ta dependé di nos. (Mat. 14:31; 2 Tes. 1:3) P’esei, ta masha importante pa nos fortalesé nos fe.

E eskudo grandi di fe (Wak paragraf 12-14)

“E HÈLM DI SALBASHON”

15, 16. Den ki sentido speransa ta manera un hèlm?

15 Lesa Efesionan 6:17. E hèlm ku un sòldá romano tabata bisti tabata diseñá pa protehá su kabes, garganta i kara. Algun hèlm tabatin un strèp pa asina un sòldá por a ten’é den su man.

16 Meskos ku un hèlm ta protehá un sòldá su selebro, nos “speransa di salbashon” ta protehá nos mente, esta, nos kapasidat di pensa. (1 Tes. 5:8; Pro. 3:21NW) Nos speransa ta yuda nos keda enfoká riba e promesanan di Dios i ta yuda nos pa nos problemanan no desanimá nos. (Sal. 27:1, 14; Echo. 24:15) Sinembargo, pa nos speransa protehá nos, e mester ta real pa nos. Sí, nos “hèlm”  mester ta riba nos kabes i no den nos man.

17, 18. (a) Kon Satanas por pone nos kita nos hèlm? (b) Kon nos por demostrá ku nos no ta kai den trampa di Satanas?

17 Satanas ke pone nos kita nos hèlm. Kon e por hasi esei? Pensa riba loke el a purba di hasi ku Hesus. Satanas tabata sa ku Hesus tabatin e speransa di bira rei di humanidat den futuro. Pero Hesus mester a warda te ora Yehova su tempu stipulá a yega. I promé ku esei, e mester a sufri i muri. P’esei, Satanas a ofresé Hesus e chèns pa bira rei mas promé. Satanas a bisa Hesus ku si Hesus a ador’é un biaha so, Satanas lo a dun’é tur kos na e momento ei. (Luk. 4:5-7) Asina tambe, Satanas sa ku Yehova a primintí di duna nos kos material den e mundu nobo. Pero nos mester warda, i kisas asta pasa den prueba miéntras nos ta warda. P’esei, Satanas ta ofresé nos e chèns di disfrutá di un bida kómodo aworakí mes. E ke pa nos pone kos material na promé lugá i pone e Reino na di dos lugá.—Mat. 6:31-33.

18 Hopi hóben kristian no ta kai den e trampa ei di Satanas. Por ehèmpel, Kiana, di 20 aña, a bisa: “Mi sa ku e úniko solushon pa nos problemanan ta e Reino di Dios.” Ki efekto e speransa sólido akí tin riba su manera di pensa i su kondukta? El a agregá: “E speransa di bida den Paradeis ta yuda mi pone kos ku ta ménos importante na nan debido lugá. Mi no ta usa mi talentonan pa gana bòshi plaka ni pa buska prestigio. Mas bien, mi ta usa mi tempu i energia pa logra metanan spiritual.”

E hèlm di salbashon (Wak paragraf 15-18)

“E SPADA DI SPIRITU”: E PALABRA DI DIOS

19, 20. Kon nos por mehorá e manera ku nos ta usa Beibel?

19 Tempu ku Pablo a skirbi su karta na e efesionan, e spada di un sòldá romano tabata mas o ménos 50 centimeter largu i tabata diseñá pa usa den lucha man na man. Un motibu pakiko e sòldánan romano por a usa nan armanan asina bon tabata pasobra nan tabata entrená ku nan tur dia.

20 Pablo a kompará e Palabra di Dios ku un spada ku Yehova a duna nos. Pero nos mester siña usa Beibel ábilmente pa nos por defendé nos kreensianan òf pa ahustá nos manera di pensa. (2 Kor. 10:4, 5; 2 Tim. 2:15) Kon bo por bira mas ábil? Un ruman hòmber di 21 aña ku yama Sebastian a bisa: “Mi ta skirbi un teksto for di kada kapítulo ku mi lesa durante mi lesamentu di Beibel. Mi ta trahando un lista di mi tekstonan faborito. Esei ta yuda mi komprondé Yehova su manera di pensa.” Daniel, menshoná anteriormente, a bisa: “Segun ku mi ta hasi mi lesamentu di Beibel, mi ta skohe tekstonan ku mi ta pensa ku por yuda hende ku mi ta topa den sirbishi. Mi a ripará ku hende ta reakshoná bon ora nan mira ku bo ta stima Beibel i ta hasi esfuerso pa yuda nan.”

E spada di spiritu (Wak paragraf 19, 20)

21. Dikon nos no mester tin miedu di Satanas i su demoñonan?

21 Manera nos a siña for di ehèmpel di e hóbennan menshoná den e artíkulo akí, nos no mester tin miedu di Satanas i di su demoñonan. Ta bèrdat ku nan ta poderoso, pero nan no ta invensibel, i nan lo no biba pa semper. Pronto, durante e Reinado di Mil Aña di Kristu, nan lo ta den un kondishon di inaktividat kompleto, i despues nan lo ser destruí. (Rev. 20:1-3, 7-10) Nos konosé nos enemigu i nos sa kiko ta su trikinan i su intenshonnan. I ku yudansa di Yehova, nos por para firme kontra dje!