E PROBLEMA

Algun pareha kasá ta enfrentá nan retonan di mas grandi despues ku nan yunan a krese i a bai biba riba nan mes. Ora e yunan bai, e mayornan ta sinti un bashí. Esaki por pone nan sinti ku nan ta dos hende straño den kas. M. Gary Neuman, un konsehero di famia, a skirbi: “Mi ta duna konseho na hopi hende ku no sa kon pa mehorá nan relashon ku otro. Na momento ku nan yunan no ta biba na kas mas, e mayornan tin ménos kos en komun i no sa kiko pa papia ku otro.” *

Abo ku bo kasá ta pasando den un situashon asina? Si esei ta e kaso, boso por mehorá boso relashon ku otro. Pero promé, ban wak kiko por ta algun faktor ku a distansiá boso for di otro.

DIKON ESAKI TA SOSODÉ

Pa hopi aña, e yunan tabata tur kos pa e mayornan. Hopi mayor ta pone nesesidat di nan yunan promé ku nan matrimonio. Klaru ku nan ta hasi esaki ku tur bon intenshon. Komo resultado, nan ta enfoká asina tantu riba nan ròl komo mama òf tata ku nan ta neglishá nan kasá. I ora e yunan no ta biba na kas mas, e pareha lo ripará esei. Un esposa di 59 aña di edat a bisa: “Ora e muchanan tabata na kas, sikiera nos tabata hasi kos huntu.” Pero el a atmití ku despues ku nan yunan a bai, “nos kada un tabata pa nos kuenta.” Dado momento, el a asta bisa su esposo: “Ta parse ku nos no por soportá otro.”

Algun pareha no ta prepará pa e etapa nobo akí di nan bida. E buki Empty Nesting ta bisa: “Hopi pareha ta sinti ku ta komo si fuera resien kasá nan ta.” Nan ta sinti ku nan no tin hopi kos en komun mas. Esei ta pone ku hopi esposo i esposa ta kuminsá enfoká riba nan propio interesnan, i maske nan ta kasá, nan ta bira manera dos hende ku ta djis biba den e mesun kas.

E bon notisia ta ku boso por evitá di kai den e trampa akí i asta disfrutá di e benefisionan di e kapítulo nobo akí di boso bida. Laga nos wak kon Beibel por yuda boso logra esei.

 LOKE BOSO POR HASI

Aseptá e kambio. Beibel ta bisa ku ora un yu bira adulto e “lo bandoná su tata i su mama.” (Génesis 2:24) Komo mayornan, boso meta tabata pa siña boso yunan desaroyá e abilidatnan nesesario pa ora e dia ei yega. Si boso mira e asuntu akí for di e punto di bista ei, boso lo mester ta orguyoso ku boso yunan a bai biba riba nan mes pasobra boso a logra boso meta.—Prinsipio di Beibel: Marko 10:7.

Klaru ku semper boso lo keda mayor. Sinembargo, boso relashon ku boso yunan a kambia. Awor, boso no ta bisa nan mas kiko pa hasi sino boso ta duna nan konseho. Di e manera akí, boso por mantené un bon relashon ku boso yunan miéntras tur boso atenshon ta bai prinsipalmente na boso kasá. *Prinsipio di Beibel: Mateo 19:6.

Ekspresá boso preokupashonnan. Konta bo kasá kon bo ta sinti bo awor ku e yunan no ta biba na kas mas, anto skucha ora bo kasá ta ekspresá su sintimentunan. Tene pasenshi i mustra komprenshon. Probablemente lo tuma tempu pa boso relashon bira fuerte bèk, pero esei ta bale la pena.—Prinsipio di Beibel: 1 Korintionan 13:4.

Pensa kiko boso por hasi huntu. Papia tokante metanan ku boso lo ke alkansá huntu òf riba aktividatnan ku boso lo ke hasi komo pareha. E echo ku boso a lanta yu a duna boso hopi eksperensia. Lo no ta algu bunita si boso usa e eksperensia ei pa yuda otro hende?—Prinsipio di Beibel: Yòb 12:12.

Rebibá boso amor pa otro. Pensa riba e kualidatnan ku a atraé boso na otro. Komo pareha, kòrda riba tur loke boso a pasa aden huntu i riba e momentonan difísil ku boso a pasa aden. Pues, e etapa nobo akí den boso bida tambe por resultá di ta un kapítulo bunita. De echo, si boso tur dos hasi esfuerso, boso lo tin un matrimonio mas felis i boso lo rebibá e amor ku a trese boso huntu promé ku boso a kasa.

^ par. 4 Di e buki Emotional Infidelity.

^ par. 12 Si ainda bo ta lantando yu, kòrda ku abo ku bo kasá ta “un karni.” (Marko 10:8) Yunan ta sinti nan mes hopi safe ora nan mira ku nan mayornan tin un relashon stabil ku otro.