Un matrimonio kibrá, malesa i un konsenshi sushi ta djis algun di e konsekuensianan ku un hende ku a kai den tentashon por hañ’é kuné. Kiko nos mester hasi pa evitá di kai den e trampa akí?

Kiko ta tentashon?

Tentashon ta un deseo pa hasi algu, prinsipalmente algu malu. Pa nos por komprondé esaki mihó, laga nos wak un ehèmpel. Laga nos bisa ku bo ta hasi kómpras i bo ta mira algu ku bo tin gana di haña. E pensamentu ta pasa den bo mente ku lo ta fásil pa bo hòrt’é sin nan gara bo. Pero, bo konsenshi ta bisa bo pa no hasi esei, i bo ta saka e kos for di bo mente i ta sigui. Na e momento ei, bo a resistí e tentashon i a gana e bataya.

LOKE BEIBEL TA BISA

 

E echo ku bo a haña e deseo pa hasi algu malu no ke men ku bo ta un mal hende. Beibel ta bisa ku nos tur ta enfrentá tentashon. (1 Korintionan 10:13) Pero loke ta konta ta kon nos ta reakshoná ora nos haña nos ku un tentashon. Algun hende ta keda pensa riba e mal deseo, anto tardi òf trempan nan ta kai den e tentashon. Otronan ta rechasá e tentashon mesora pasobra nan sa ku loke nan ke hasi ta malu.

“Kada hende ta ser poné na prueba ora e ser atraí i sedusí pa su mes deseo.” —Santiago 1:14.

Dikon ta sabí pa bo tuma medida mesora ora bo haña bo ku un tentashon?

Beibel ta splika nos kiko ta e pasonan ku ta hiba na piká. Santiago 1:15 ta bisa: “Ora nutri e deseo [ku no ta bon], e ta duna lus na piká.” Ku poko palabra, si nos keda pensa riba un mal deseo, nos lo yega na e punto ku nos lo peka. Nos por kompará esei ku un hende muhé na estado ku dado momento tin ku duna lus. E no por evitá esei. Sinembargo, nos por evitá di bira esklabo di deseonan ku no ta bon; nos por dominá nan.

KON BEIBEL POR YUDA NOS

 

Meskos ku nos por alimentá nos mente ku deseo ku no ta bon, nos por eliminá nan tambe. Kon? Dor di enfoká riba otro kos: hasi un aktividat, kòmbersá ku un amigu òf meditá riba pensamentunan ku ta bon. (Filipensenan 4:8) Tambe ta bon pa nos pensa kiko lo ta e konsekuensianan emoshonal, físiko i spiritual si nos kai den tentashon. (Deuteronomio 32:29) Orashon tambe ta un gran yudansa. Hesukristu a bisa: “Hasi orashon kontinuamente pa boso no kai den tentashon.”—Mateo 26:41.

“No gaña boso mes: Dios no ta laga hende hasi bofon di dje. Pues, kiko ku un hende sembra, esei lo e kosecha tambe.”—Galationan 6:7.

 Kiko por yuda bo pa bo no kai den tentashon?

E REALIDAT

 

Eigenlijk, tentashon ta manera un trampa òf as ku por hinka un persona inosente, sin eksperensia i ku no ta tene kuidou den peliger. (Santiago 1:14) Esaki ta asina foral den kaso di inmoralidat seksual, ku por tin konsekuensianan teribel.—Proverbionan 7:22, 23.

KON BEIBEL POR YUDA NOS

 

Hesukristu a bisa: “Awor bon, si bo wowo drechi ta pone bo trompeká, sak’é tira afó.” (Mateo 5:29) Klaru ku Hesus no tabata ke men ku nos mester hasi esei literalmente. Mas bien, e tabata ke men ku si nos ke agradá Dios i haña bida eterno, nos mester dominá nos kurpa pa nos no kometé piká. (Kolosensenan 3:5) Esei ta nifiká ku nos mester rechasá tentashon na un manera firme. Un hòmber ku tabata sirbi Dios fielmente a pidi den orashon: “Kita mi bista for di banidat.”—Salmo 119:37.

Klaru ku no ta fásil pa nos dominá nos mes pasobra “e karni ta débil.” (Mateo 26:41) Pues, nos lo hasi fout. Sinembargo, ora nos tin ègt duele di loke nos a hasi i ta hasi nos bèst pa no praktiká piká mas, nos Kreador, Yehova Dios, lo mustra “kompashon” i “miserikòrdia” na nos. (Salmo 103:8) Esta un konsuelo esei ta!

‘Si abo, SEÑOR, tuma inikidatnan na kuenta, o Señor, ken lo por keda para?’—Salmo 130:3.