Bai na kontenido

Bai na kontenido

 KASUALIDAT ÒF DISEÑO?

Dikon e Bèshi Pollia Tin un Koló Blou Briante?

Dikon e Bèshi Pollia Tin un Koló Blou Briante?

BO POR haña e bèshi chikitu di e mata Pollia condensata rònt Afrika. Aunke e no tin pigmento, tòg e bèshi tin un koló blou bibu ku ningun otro fruta no tin. Ta kiko ta su sekreto?

Pensa un ratu riba lo siguiente: E murayanan di sèl di e kaska di e bèshi akí ta konsistí di vários kapa di hilu fini riba otro. E hilunan di kada kapa ta kore paralelo ku otro. I komo ku kada kapa ta posishoná na un ángulo un poko diferente for di e kapa anterior, nan ta forma un spiral. E hilunan mes no ta blou pasobra nan no tin pigmento. Esei ke men ku e sekreto di su koló bibu, metáliko i briante ta den e struktura, es desir, den e manera ku e kapanan ta montoná òf poné riba otro. Aunke mayoria di sèl ta parse blou, ora bo wak nan di un otro ángulo, algun di nan ta bèrdè, ros òf gel debí na e posishon un tiki diferente di kada kapa. Ademas, ora bo wak e bèshi un tiki mas di serka, lo bo ripará ku e kolónan no ta dje zùiver ei. Nan ta manera e diferente kolónan di e pikselnan ku bo ta mira riba un pantaya di kòmpiuter.

Komo ku e bèshi Pollia no tin pigmento, e no ta pèrdè su koló ora e kai for di e mata. Figurá bo, algun bèshi ku nan a piki mas ku 100 aña pasá ta mustra mes briante ku esnan ku hende ta piki den nos tempu! I segun investigadónan, aunke e bèshinan akí no tin karni di fruta, paranan ta gusta nan simianan mashá.

Sientífikonan ta pensa ku lo por imitá e struktura di e koló di bèshi Pollia pa produsí un gran variedat di produkto manera tinzja ku no ta pèrdè koló i papel ku no por ser falsifiká.

Kiko bo ta pensa? E koló blou briante di e bèshi Pollia a bini di evolushon òf di kreashon?