Bai na kontenido

Bai na kontenido

E sistema nèrvioso intrínsiko (blou) ta den e sistema digestivo

Nos Tin un “di Dos Selebro”?

Nos Tin un “di Dos Selebro”?

KUANTU selebro bo tin? Si bo kontestá ku ta “unu so” bo tin, bo tin rason. Pero bo tin mas ku un sistema nèrvioso sí. Den nos kurpa tin un ret di neuron, òf sèl di nèrvio, ku ta asina ekstenso ku algun sientífiko ta yam’é e “di dos selebro.” Ta trata di e asina yamá sistema nèrvioso intrínsiko ku no ta den nos kabes sino prinsipalmente den nos barika.

Pa nos kurpa por kombertí kuminda den energia, hopi koordinashon i esfuerso ta nesesario. P’esei, ta bon mes ku nos selebro ta trahá di tal manera ku e ta laga e sistema nèrvioso intrínsiko, na moda di papia, dirigí mayoria di e trabounan digestivo.

Aunke e sistema nèrvioso intrínsiko ta hopi mas simpel ku e selebro, tòg e ta sumamente kompliká. Un hende tin mas o ménos 200 pa 600 mion neuron den su sistema digestivo. Sientífikonan ta kere ku si e selebro mester a hasi tur loke e sistema nèrvioso intrínsiko ta hasi, e nèrvionan ku lo e mester tin lo ta demasiado diki. Segun e buki The Second Brain, “ta mas safe i kumbiniente pa laga e [sistema digestivo] sòru pa su mes.”

“UN LABORATORIO KÍMIKO”

Ta importante pa por tin diferente meskla di kímiko hopi presis na e momento apropiá i hibá na e lugá korekto pa e sistema digestivo digerí kuminda. Ta p’esei, profesor Gary Mawe ta yama e sistema digestivo “un laboratorio kímiko.” E prosesonan kímiko ku ta tuma lugá eiden ta inkreiblemente kompliká. Por ehèmpel, e muraya parti paden di e sistema digestivo ta konsistí di sèlnan spesialisá ku ta detektá ki tipo di kímiko tin den e kuminda ku bo a kome. E informashon akí ta yuda e sistema nèrvioso intrínsiko determiná presis ki tipo di enzima ta nesesario pa kibra e kuminda den partíkula ku e kurpa por apsorbá. Ademas, e sistema nèrvioso intrínsiko ta hunga un papel masha importante den analisá e zür i otro karakterístikanan kímiko di partíkulanan di kuminda pa asina ahustá e enzimanan digestivo na armonia ku esei.

Nos por kompará e sistema digestivo ku un lopende band na un fabriká ku tin ku funshoná prinsipalmente bou di direkshon di e sistema nèrvioso intrínsiko. Bo “di dos selebro” ta sòru pa e múskulonan di e murayanan di e sistema digestivo kontraé òf move pa kuminda por pasa dor di dje. Ademas, e sistema nèrvioso intrínsiko ta sòru pa adaptá e kantidat mesora i kon duru e múskulonan mester kontraé pa e sistema funshoná manera un lopende band.

Tambe e sistema nèrvioso intrínsiko ta supervisá resistensia di bo kurpa. E kuminda ku bo ta kome probablemente ta kontené bakteria ku por hasi bo malu. P’esei, no ta nada straño ku un 70 pa 80 porshento di e linfositonan—un komponente prinsipal di bo sistema inmunológiko—ta den bo barika. Si bo ingerí un gran kantidat di organismo ku por hasi bo daño, e sistema nèrvioso intrínsiko ta protehá bo dor di kousa kontrakshonnan fuerte ku ta pone bo saka òf haña diarea pa bo kurpa deshasí di un gran parti di e venenu.

BON KOMUNIKASHON

Aunke e sistema nèrvioso intrínsiko ta funshoná independientemente di e selebro, ámbos sistema nèrvioso ta komuniká konstantemente ku otro. Por ehèmpel, e sistema nèrvioso intrínsiko ta hunga un ròl masha importante den regulá e hormonanan ku ta bisa bo selebro ki ora bo mester kome i kuantu bo mester kome. E ta duna señal na bo selebro ora bo barika ta yen i por pone bo saka si bo kome di mas.

Kisas promé ku bo a lesa e artíkulo akí, bo tabata sa ku tin un konekshon entre bo sistema digestivo i bo selebro. Por ehèmpel, bo a ripará ku ora bo kome sierto kuminda vèt, esei ta drecha bo beis? Investigadónan ta kere ku esaki ta sosodé ora bo sistema nèrvioso intrínsiko manda “señal alegre” pa bo selebro. I esaki na su turno ta kuminsá e proseso ku ta pone bo sinti bo bon. Kisas esei ta splika dikon hende ku tin strès ta haña gana di kome algu zut, salu òf vèt. Sientífikonan ta studiando ki posibilidat tin pa stimulá e sistema nèrvioso intrínsiko na un manera artifisial komo tratamentu pa depreshon.

Un otro ehèmpel di komunikashon ku ta tuma lugá entre e selebro i e sistema digestivo ta ora ku bo ta sinti ku bo no por kome pa motibu di tenshon òf hopi strès. Ta parse ku ora bo tin hopi strès, e sistema nèrvioso intrínsiko ta manda e sanger ku tin ku bai na bo stoma un otro kaminda. Un otro posibel konsekuensia ora bo tin strès ta ku bo por haña gana di saka pasobra bo selebro por pone ku e kontrakshonnan normal ku bo ta haña den bo tripa ta kambia. Segun algun eksperto, e konekshon ku tin entre bo selebro i bo tripa kisas ta loke ta pone bo haña un “presentimentu.”

Aunke e sistema nèrvioso intrínsiko por influensiá bo sintimentunan, e no por pensa ni tuma desishon pa bo. Ku otro palabra, e sistema nèrvioso intrínsiko eigenlijk no ta un selebro. E no por yuda bo komponé un kantika, kalkulá kuantu plaka bo tin riba bo kuenta di banko ni traha bo hùiswèrk pa bo. Tòg, e sistema maravioso akí ta sigui impreshoná sientífikonan ya ku e ta sumamente kompliká i probablemente nan tin hopi kos mas pa siña di dje. Pues e siguiente biaha ku bo ta bai kome, para ketu un ratu i pensa riba tur e prosesonan ku ta bai tuma lugá den bo sistema digestivo: supervishon, análisis, koordinashon i komunikashon.