Bai na kontenido

Bai na kontenido

 LÈS 5

Guia di un Persona Adulto Ta Importante

Guia di un Persona Adulto Ta Importante

KEN MESTER GUIA E MUCHANAN?

Un yu mester di un persona adulto pa gui’é i konseh’é. Komo mayor, abo ta esun ku mester duna bo yu guia i konseho. Sinembargo, otro adulto tambe por tin bon influensia riba bo yunan.

DIKON GUIA DI HENDE GRANDI TA IMPORTANTE?

Den hopi pais, mucha no ta pasa muchu tempu ku hende grandi. Dikon nò?

  • Mucha ta pasa gran parti di nan dia na skol; na skol tin hopi mas studiante ku dosente òf otro adulto.

  • Ora e muchanan yega for di skol, algun di nan ta keda nan so pasobra nan mayornan ta traha.

  • Un informe ta mustra ku na Merka mucha entre 8 pa 12 aña ta pasa un averahe di mas o ménos seis ora riba nan aparatonan elektróniko tur dia. *

E buki Hold On to Your Kids ta bisa: “Mucha no ta wak nan mama, tata, maestro òf otro adulto responsabel komo nan ehèmpel. Ni nan no ta akudí na nan pa haña guia i konseho . . . Mas bien, nan ta akudí na nan pareunan pa konseho.”

KON LO BO POR DUNA GUIA NA BO YUNAN?

Pasa tempu ku bo yunan.

PRINSIPIO DI BEIBEL: “Instruí un mucha den e kaminda ku e mester kana, i asta ora ku e bira bieu e lo no apartá su mes for di dje.”—Proverbionan 22:6.

Normalmente, un yu ke pa su mayornan gui’é i yud’é. En realidat, algun eksperto ta bisa ku asta tiner ta preferá pa nan mayornan duna nan konseho en bes di otro tiner. Den e buki You and Your Adolescent, profesor di sikologia Dr. Laurence Steinberg a skirbi: “Durante adolesensia i ora un yu bira hóben adulto, mayornan ta keda e personanan ku tin mas tantu influensia riba e aktitut i komportashon di nan yu.” El a sigui bisa: “Un yu tiner ke sa kiko bo ta pensa i ta skucha kiko bo ta bisa, asta ora e no ta atmití esei òf no ta di akuerdo ku bo.”

Ya ku bo yu ke bo guia, hasi loke bo por pa dun’é e guia ei. Pasa tempu ku bo yu i papia kuné tokante diferente tópiko, loke ta importante pa bo i loke bo a siña den bida.

 Skohe un persona ku lo por sirbi komo un ehèmpel pa bo yunan.

PRINSIPIO DI BEIBEL: “Esun ku anda ku hende sabí lo ta sabí.”—Proverbionan 13:20.

Bo konosé un persona adulto ku por ta un bon ehèmpel pa bo yu? Kisas bo por pidié pa pasa tempu kuné. Klaru, esei no ke men ku un otro persona ta bira responsabel pa bo yu. Pero un persona adulto konfiabel ku bo sa ku lo no hasi bo yu daño por yuda bo gui’é. Den Beibel, un hóben ku yama Timoteo a benefisiá hopi di e kompania di apòstel Pablo, asta ora el a bira adulto. I Pablo tambe e benefisiá di Timoteo su amistat.—Filipensenan 2:20, 22.

Den nos tempu, hopi famia, esta tawela ku wela, tio, tanta i otro miembronan di famia, no ta biba huntu den mesun kas, bisindario ni pais. Si esei ta bo kaso, perkurá pa bo yu haña oportunidat di siña di e personanan adulto ku tin kualidat ku bo ke pa bo yu tin.

^ par. 9 E informe ei ta mustra ku tiner ta pasa un averahe di kasi nuebe ora pa dia riba nan aparatonan elektróniko. E promedionan ei no ta inkluí e tempu ku mucha i tiner ta pasa riba Internet na skol òf ora nan ta hasi hùiswèrk.